لو عرفتموه (الجزء الثاني 💜) مكتملة

196💜

# لو عرفتموه لاحببتموه
يلا صلوا على النبى :)
#حجه_الوداع (ج3)

خلاص النبى عليه الصلاة والسلام خارج من مكة وهو طالع يقف ويبص على الحرم و يبص و يملى عينيه من الحرم.. مش بيفكركم الموقف ده بموقف تانى زمان؟ فاكرين لنا طلع النبى من مكة للمدينة مهاجر بعد إيذاء قريش للمسلمين و بعد ما اتفقوا على قتل النبى عليه الصلاة والسلام .. فاكرين لما خرج النبى مهاجر و وقف فى نفس المكان و قال الله يعلم انك احب بقاع الأرض الى قلبى ولولا أن قومك أخرجونى منك ما خرجت ..

يخرج النبى ﷺ و يوصل المدينة ، يدخل المدينة .. النبىﷺ خلاص قرب ميعاد وفاته و رغم ان ربنا عزوجل كان منزل الآيات اللى بتتكلم عن النبىﷺ بشر و حيموت إلا ان بعد وفاته الصحابه حيتعبوا جدا حزنا عليه ﷺ  .. قال تعالى : " وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ ۚ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ ۚ وَمَن يَنقَلِبْ  عَلَىٰ عَقِبَيْهِ فَلَن يَضُرَّ اللَّهَ شَيْئًا ۗ وَسَيَجْزِي اللَّهُ الشَّاكِرِينَ " (سورة آل عمران ).. و الآيات " إِنَّكَ مَيِّتٌ وَإِنَّهُم مَّيِّتُونَ"(سورة الزمر).. " وَمَا جَعَلْنَا لِبَشَرٍ مِنْ قَبْلِكَ الْخُلْدَ ۖ أَفَإِنْ مِتَّ فَهُمُ الْخَالِدُونَ " [سورة الأنبياء]

و يدخل النبى ﷺ المسجد النبوى بعد ما رجع من مكة يصلى ركعتين و يجمع الصحابة هيقولهم حديث مهم أوى : أبو بكر فى الجنة و عُمر فى الجنة و عثمان فى الجنة و علىّ بن ابى طالب و طلحة و الزبير  و عبد الرحمن بن عوف و سعد  بن أبى وقاص و سعيد بن زيد و أبو عُبيدة بن الجراح  ( دول العشرة المبشرين بالجنة ) ..
و يقول النبىﷺ: أيها الناس لا تسبّوا أصحابى لعن الله من سب أصحابى ..( انا اعتقد وده اجتهاد منى والله اعلم ، أنا بعتقد أن الحديث ده من دلائل النبوة ..ليه ؟ لأنه النبى بيكلم أبو بكر و عُمر و الصحابة و بيقول لهم لا تسبّوا أصحابى .. طب هما هيسّبوا نفسهم يعنى ؟؟ يبقى ده من دلائل النبوه لأن النبىﷺ عارف اللى هيحصل بعد كده )

و يرجع النبى ﷺ البيت و يبدأ جسمه يوجعه عاش 23 سنة تعب و كان للنبى ﷺ يصلى السُنن قاعد

تعرفوا أن مرة سيدنا عُمر  هزر مع النبى و قال له: شِبت يا رسول الله .. ( طبعا النبىﷺ مش  بيعجز ، النبى عليه الصلاة و السلام وشه ألين وأطيب من وجه الصبى .. مافيهوش أى تجاعيد وشعره أسود من الليل و مات  النبىﷺ عمرة 63 سنة و ماعندوش غير 17 شعرة بيضا ..
الصحابة عدوهم شعرة شعرة و الموضوع ده لطيف جداً .. يعنى أنا قعدت أفكر كده مرة أن النبى عليه الصلاة و السلام قاعد معاهم مثلاً بيخطب الجمعة أو بيدى درس أو قاعد معاهم قعدة لطيفة والصحابة قاعدين ، فأنا متخيلة بقى الصحابى اللى عد ال 17 شعرة.. متخيلاه وهو قاعد بيعد 1 2 3 بعد كده النبىﷺ لف وشه .. فيضطر الصحابى يعيد من الأول بقى ،ماهو أكيد ماقالش للنبىﷺ اثبت  علشان اعد..و ممكن كمان النبىﷺ يقوم قبل ما الصحابى يكمل عد فيضطر يعيد العد تانىة يوم  الموضوع صعب قوى و لكن الحب بيسهل أى شئ و يخلى صبرك طويل )

المهم يضحك سيدنا عُمر مع النبىﷺ و قال: شِبت يا رسول الله  فابتسم النبىﷺ وقال: يا عُمر شيبتنى سورة هود ..فيها آية شيبتنى .. إيه هى يا رسول الله ؟؟ " فَاسْتَقِمْ كَمَا أُمِرْتَ وَمَن تَابَ مَعَكَ "

نكمل بكرة إن شاء الله
#السيرة_النبوية_بالعامية_لنوهان  الشيخ