لو عرفتموه (الجزء الثاني 💜) مكتملة

48💜

يلا صلوا على النبى
محنه "مدينه الطائف"و إيذاء الحبيبﷺ(ج3)

كنا مع النبى عليه الصلاه والسلام وشاهدناه رافع إيده و بيدعى بعد الإيذاء النفسى والبدنى الشديد اللى اتعرضله وبدأ يدعى وهو متصور ان فى خطأ ارتكبه بسبب اللى حصل واستمر فى الدعاء و يشكو لربه : اللهم أشكو إليك ضعف قوتى و قله حيلتى ... إلى اخر الدعاء و يقول إن لم يكن بك غضب عليا فلا أبالى :') ..وينزل إيديه ﷺ من الدعاء, وربنا اكيد غير غضبان عليك يا رسول الله, ولكن ده لازم يحصل عشان المسلمين ييجو من بعدك يعرفو اد ايه أنت تعبت يا رسول الله..

وكان الرسول ﷺ يجلس يتحت ظل الشجرة يدعوا ربه . طيب و مين كان شايف النبى؟ عتبة و شيبة .. كان صعبان عليهم جدا اللى مر بيه رسول الله.. فنادوا على الخادم بتاعهم ، كان اسمه عدَّاس وقالو: "يا عدَّاس خذ هذا العنب و اطعمه لمحمد ", واخد عدَّاس العنب وذهب لمحمد, وقال : "كل", فمد إيده عليه الصلاه والسلام و أخذ العنب و قال بصوت مرتفع: بسم الله" ,

قال عدَّاس : "؟ ان القوم فى هذه البلاد لا يقولون هذا القول !! , فرد عليهﷺ وقال:"ما اسمك يا غلام؟ قال: عدَّاس , فقال النبى بلطف: "أهلا عدَّاس، من اى البلاد انت يا عدَّاس؟" فقال: "من نينوى" ..فقال النبى ﷺ: "بلد الرجل الصالح يونس بن متى؟" استغرب عدَّاس ( لان العرب مبيعرفوش اسماء الانبياء لانهم بيعبدوا الاصنام, فلو أى حد من الجزيرة اتكلم عن الانبياء السابقين يبقى حد غير عادى,) فقال عدَّاس : "أتعرف يونس بن متى!!.. فتبسم النبى وقال : "اجل يا عدَّاس كان يونس نبى وانا مثله نبى"

فبكى عدَّاس ونزل باس إيد النبى وقدميه الشريفه وقال: "اشهد ان لا إله إلا الله, واشهد انك رسول الله"...عتبة و شيبه كانوا ينظروا اليهم ..فواحد منهم قال للتانى : "انظر, بعثنا له عنقود من العنب فأفسد علينا عدَّاس خادمنا..وبسرعه نادوا على عداس وأخدوه بالعافية, والنبى عليه الصلاه و السلام خرج هوه و زيد من البستان رغم انهم ملحقوش يرتاحوا كفايه بعد الإيذاء الشديد ده..

تعرفوا مرة سألت عائشة رسول الله وقالت : يا رسول الله, هل مر عليك يوم أشد من يوم غزوة أُحد؟(وكان يوم غزوة أحد شديد على رسول الله و على المسلمين كلهم بس رغم كده الرسول رد عليها ) و قال: "يوم الطائف" ياعائشه. وحكى لها كل اللى عرفناه انا و انتم سوا عن الإيذاء الشديد و حكى عن اللى حصل بعد خروجه من البستان و قال: "خرجت من البستان أهيم على وجهى ((بمعنى مش شايف امامى و مش عارف اذهب على فين)) فإذا بغمامة (سحابة) تظلنى فنظرت إليها فإذا بها جبريل عليه السلام فقال لى : السلام عليك يا رسول الله, فرد الرسول السلام,

جبريل قال: يا رسول الله ان معى ملاك الجبال يستأذن أن يسلم عليك, فوافق رسول الله ..فيدخل ملاك الجبال ويقول : السلام عليك يا رسول الله, و رد النبى السلام, فقال الملاك: " يا رسول الله, إن ربك يقرئك السلام, فقال الرسول: هو السلام وعليه السلام ومنه السلام, وقال ملك الجبال : "يا رسول الله, إن ربك قد سمع قول قومك لك, وقد أرسلنى إليك لتأمرنى بما شئت, والله يا رسول الله لئن أمرتنى لأطبقن عليهم الأخشبين" (توضيح اكثر ربنا بيقولك أأمرنى اعمل في أهل الطائف اللى آذوك اللى انت عايزه ،و انا بسلطتى على الجبال أقدر أأمر الجبال اللى حاوالين مدينه الطائف إنها تدهسهم و تنطبق عليهم ),

(طبعا دىً كانت فرصة حتى ينتقم منهم النبى بعد كل الأذى الى أتعرضله..لإن عادى سيدنا موسي ومعاه اخوه هارون دعوا على فرعون و قومه و ربنا قالهم: "َ قَدْ أُجِيبَت دَّعْوَتُكُمَا" وكمان سيدنا نوح دعا على قومه وقال: " رَّبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا", وإستجاب ربنا سبحانه وتعالى و أغرق الكافرين, كمان سيدنا عيسى لما قال: " إِن تُعَذِّبْهُمْ فَإِنَّهُمْ عِبَادُكَ, فبالتالى كان من حق سيدنا محمد ﷺانه يعمل زى باقى الانبياء و يدعى على قومه وبالذات انه اتأذى كتير جدا .

لكن رد رسول الله صلى الله عليه و سلم على ملك الجبال و قال: "لا تفعل لا تفعل فإنى أرجو الله أن يخرج من أصلابهم من يوحد الله و لا يشرك به شيئاً, ورفع ايده و قال ﷺ:اللهم اهدى قومى فإنهم لا يعلمون و كررها 3 مرات

حنعرف المره الجايه إن شاء الله