# لو عرفتموه لاحببتموه
يلا صلوا على النبى
#غزوة_حُنين (ج5)
الحمد لله انتصر المسلمين .. صحيح النصر ماكنش سهل .. بس الحمد لله ربنا نصرهم و فى نفس الوقت إدى المسلمين درس عمرهم ما حينسوه .. بس قائد المسلمين تعبان .. مين ؟ سيدنا خالد بن الوليد .. فيسأل النبى عليه ويعرف أنه تعبان وفى خيمته فالنبى عليه الصلاة و السلام يروح له ويمسح على جرحه و يدعى له .. فيقول سيدنا خالد : ففتحت عينى وبمجرد ما النبى وقف دعاء .. قمت ركبت فرسى وكأن مفيش حاجه حصلت ..
سبحان الله
وقلنا المره اللى فاتت أن هوازن وثقيف هربوا من أرض المعركة
.. وراحوا على منطقة الطائف يتحصنوا فى حصن هناك .. فحيبدأ النبى يتوجه بجيشه للطائف.. عشان يحاصر هوازن و ثقيف.. عشان يتفادى انهم يحاربوا المسلمين تانى.. و يستمر الحصار لمده 40 يوم.. و يفك النبى الحصار..و يرجع النبى عليه الصلاة و السلام لمكان اسمه الجعرانه ..ده جنب حنين ..و فيه أتحطت كل غنائم غزوة حنين.. و يبدأ النبى عليه الصلاة و السلام بتوزيع الغنائم.. هتتوزع الغنائم ازاى ؟
النبى عليه الصلاة و السلام حيعطى مسلمين قريش الجدد اللى اسلموا بعد الفتح و دول اتسموا بالمؤلفة قلوبهم لأنهم كانوا من سادات قريش ..فالنبى كان عايز يفهمهم ان مش معنى انكم اسلمتم يبقى حتروح مكانتكم.. لا بالعكس حعطيكم أموال و حتفضلوا معززين مكرمين.. فالنبى عليه الصلاة و السلام أعطى لهم غنائم بسخاء عشان يألف قلبهم..
خلص رسول الله توزيع الغنائم.. بس فى مجموعه ما أخدتش.. مين دول؟؟ الأنصار.. الأنصار مش هياخدوا غنائم.. و حيزعلوا أوى بس ده مش طمع فى الغنائم أبدا.. الأنصار تاريخهم معروف.. لكن حيحسوا ان النبى بيوزع على ناس كتير من مكه و بيعطيهم بسخاء و هيقوم واحد منهم يقول : وجد رسول الله أهله... (عشان النبى من مكة ) و يحزن الأنصار حزن شديد و ياخدوا بعضهم و يروحوا يقعدوا فى حته بعيده .. زعلانين.. مش عايزين يكلموا حد.. طب و بعدين ؟ حيحصل ايه ؟
حنعرف المرة الجاية بإذن الله
كن محمديا لنورهان الشبخ
أنت تقرأ
لو عرفتموه (الجزء الثاني 💜) مكتملة
Spiritualالجزء التاني لو عرفتموه لمتم شوقا لرؤياه😍 كل القلوب الى الحبيب تميل.....ومعي بهذا شاهد ودليل أما الدليل اذا ذكرت محمدا........صارت دموع العاشقين تسيل 💜💜
