لو عرفتموه (الجزء الثاني 💜) مكتملة

102💜

الحلقة 102
#لو عرفتموه لاحببتموه
يلا صلوا على النبى :) 🌷
نقض القبائل للعهود مع رسول الله و غزو المدينة.

خلصت أحداث غزوة أحد..دلوقتى إحنا سنة أربعة هجريا،،السنة دي كلها أحداث نتيجة اللى حصل فى غزوة أحد من عدم تحقيق المسلمين لانتصارات كبيرة فيها،إيه اللى حصل بعد غزوة أحد؟ كل القبائل المحيطة بالمدينة نقضت عهودها مع الرسول عليه الصلاة والسلام ،،العهود دي كان الرسول واخدها معاهم بعد غزوة بدر بتنص على أن رسول الله لا يحاربهم ولا يحاربوه،،

بس بعد أحد و بعد ماحققت قريش خساير فى جيش المسلمين ،قالوا أن جيش محمد مش قوى ولا حاجة و قرروا ينقضوا العهود ..حتبدأ القبائل تعمل محاولتين لغزو المدينة ... أول محاولة لغزو المدينة كانت من قبيلة بنى أسد بقيادة طلحة بن خويلد الأسدي (حيسلم بعد كدة) ..المهم الرسول حيعرف من المخابرات أن جيش بقيادة طلحة حيهجم على المدينة ،طيب حتعمل إيه يا رسول الله؟ دلوقتى جيش المسلمين منهك و تعبان، كمان لو النبى خرج بالجيش بره حيبقى وضع المدينة فى خطر فالوضع صعب جدا،فحيأمر رسول الله بخروج جيش بقيادة أبو سلمة ( فاكرينه ؟ ده أول مهاجر لله و رسوله من مكة للمدينة .. و زوجته أم سلمة. )

المهم خرج جيش المسلمين،و طلحة اتخض لما وصلت له الأخبار دى لأنه لاقي ان الموضوع بقى جد، دا محمد باعت جيش ، فخاف طلحة و خد جيشه و انسحب ، أصل طلحة كان متجرأ لأنه معتمد على فكرة أن المسلمين تعبانين فأكيد مش هيطلعوا يحاربوه، و حيهجم على المدينة على غفلة و يهزم المسلمين و ينتصر و خلاص، لكن اتفاجئ طلحة بخروج المسلمين بجيش.. و انسحب طلحة و بكدة فشلت أول محاولة لغزو المدينة، و حيرجع جيش المسلمين بقيادة أبو سلمة للمدينة، بس أبو سلمة كان عنده إصابة فى غزوة أحد و مستريحش، فالجرح يأثر فى أبو سلمة جامد و يموت رضى الله عنه و أرضاه..

طيب تانى محاولة لغزو المدينة بقيادة خالد بن سفيان الهذيلي ده من قبيلة اسمها هذيل .. خرج خالد ومعاه جيش كبير أكبر من جيش بنى أسد، و اتجه للمدينة، و عسكر فى منطقة قريبة من المدينة و طبعا دي كارثة!!.. وصلت للنبى الأخبار و جيش المسلمين تعبان فمكنش فى حل غير أن المعركة تخلص من قبل ما تبدأ ..يعنى لا المسلمين يخرجوا يحاربوا .. ولا الجيش اللى مع خالد يهجم على المدينة،،طيب إزاي ده حيحصل؟حيستدعى النبى صحابي اسمه عبدالله بن أنيس .. ده كان عنده عشرين سنة،فيقول له: لبيك يا رسول الله،فيبدأ النبى يحكى لعبدالله على الوضع ان خالد بن سفيان يريد قتلي و غزو المدينة وقتل المسلمين، و المسلمين تعبانين.

و بعدين بدأ النبى يقول لعبد الله بن أنيس : اخرج واذهب إلى المعسكر واقتل خالد بن سفيان و ارجع إلينا ،، فقال : يا رسول الله !!!، فقال النبى: اذهب يا عبد الله..فعبد الله مخضوض فقال: يارسول الله كيف أعرفه!! ( يعنى دى مشكلة عبد الله !! إنه بس مش عارف شكله !! طب مفكرتش إزاى حتعمل ده أصلا!! طبعا ده عشان حبه للدين و ثقته فى النبى) فيرد النبي عليه و يقول له : إذا رأيته وجدت لبدنك قشعريرة وتذكرت الشيطان..و بعدين خرج عبد الله و قال : أنا مكنش قدامى غير انى أنفذ و أطيع أمر رسول الله..