لو عرفتموه (الجزء الثاني 💜) مكتملة

76💜

 يلا صلوا على النبى
غزوة بدر (ج3)

شفنا امبارح ابو جهل و هوه مصر يجهز جيش كبير عشان يحارب النبى عليه الصلاة و السلام و شفنا كمان ان فى ناس خايفه تطلع لأنهم عارفين ان النبى محمد انه فعلا رسول الله و أكيد ربنا حيبقى جنبه..
فى واحد من كفار قريش كان قوى جدا وشجاع و رغم كده مكنش راضى يطلع مع الجيش.. مين هوه؟

فاكريين الراجل اللى كان بيعذب بلال؟ كان امية بن خلف ..

اميه كان راجل ضخم جدا و قوى جدا فى منتهى الشجاعة .. لكن مكنش راضى يطلع مع الجيش و رجع بيته و قفل على نفسه باب بيته و أستخبى جوة .. طب ليه كل ده.. هوه ايه اللى مخوفه كده؟
أصل امية بن خلف من فتره بعد ما النبى هاجر للمدينه ..
قام "سعد بن معاذ" سيد و رئيس المدينه رايح يعمل عمرة و بطوف حوالين الكعبه ..فسعد دخل الحرم فأول ما دخل سعد و لسه بيطوف حوالين الكعبه لقى فى وشه ابو جهل.. فقام ابو جهل وقف و مسك سعد من هدومه وقال : آويتم محمدآ !! والله لننتقمن منكم.

( طب ينفع يمسك ابو جهل سعد بالشكل ده.. و سعد يسكت؟!! لأ)
يقوم سعد يدفع أبو جهل فيقع ابو جهل على الأرض ويقوم سعد قايل يا ابا الحكم لا ترفع صوتك هكذا ..فيفضلوا يتخانقوا مع بعض.. فجه مين؟ أميه بن خلف و أمية كان صديق قديم لسعد بن معاذ فمسك أميه سعد و قال له : يا سعد لا ترفع صوتك هكذا على ابا الحكم ( مينفعش عيب متعليش صوتك على ابو جهل)
فقام سعد رادد عليه و قال: إليك عنى يا امية.. و الله يا امية لقد حدثنا رسول الله أننا قاتلوك (يعنى الرسول قال ان اميه حيموت )

فأميه راح قايل: أحقآ يا سعد؟ فقال نعم والله ..
فيقوم قايل له : يا سعد..سأقتل خارج مكه أم فى مكه ؟
فقال سعد: لا ادرى ..
(هو اميه ماله؟
أميه مصدق كلام النبى جدا و عارف ان مدام النبى قال ان أميه حيموت يبقى اكيد كلام رسول الله حق .. شايفين إزاى الكفار كانوا عارفبن ان محمد نبى لكن الكبر و العند هو اللى أخرهم عن طاعه رسول الله لحد ما ماتوا على الكفر)

المهم من الوقت ده و أميه بقى مرعوب و مستنى لحظه موته.. فلما جت غزوة بدر
فقال أميه: لن اخرج فى هذه المعركه و راح قفل على نفسه بابه ..فمراته خافت فقال لها كلام سعد بن معاذ و قال لها: و أرى اننى إن خرجت فإننى مقتول..

فقامت مراته قالت : إذن لا تخرج.. بس يجيله واحد صاحبه اسمه عقبة بن ابى معيط ( ده المجرم اللى مرة بصق فى وجه النبى الشريف صلى الله عليه و سلم) فيفضل عقبه يخبط ..بس أميه ميفتحش لأنه خايف.. فيفضل عقبه يخبط يخبط.. فأمية يفتح الباب و يقول له ما تريد ؟ فيقول عقبة : يا أمية هلم معنا ..
( يلا تعالى معانا فى الغزوه احنا طالعيين) فيقول أميه : لا لن اخرج و يصر.. فعقبة يمشى و يرجع لأميه تانى و هوه جايب معاه " المجمرة" دى حاجة بيبخروا بيها. فيخبط عقبه فيفتح أميه فيدخل عقبه و يشعل المجمرة ويلف حوالين أميه: و يقوله استجمر يا أميه فإنما انت من النساء.. استجمر..فإنما أنت من النساء
(مدام مش عايز تطلع معانا يبقى انت من النساء) شايفين صديق السوء!!..

المهم رد عليه أميه و قال: ويحك ما اراك تأخذنى إلا لمقتلى.. فيرد عقبه و يقول: انت من النساء..فيفكر أميه و يقول له: ويحك بئس ما جئت به !! بس امية هيسمع كلام صاحبه وهيخاف على سمعته
فيقول أميه: إنى خارج.. فتجرى عليه مراته و تقوله: يا امية انسيت ما قاله لك سعد !! فقال : لا تخافى سأشترى اسرع فرس فى مكة ( عشان اى حاجة تحصل يطلع يجرى ) و فعلا راح أميه و أشترى اسرع فرس فى مكة .. بس ده حينفعه؟ لأ.. لان أميه فعلا حيموت زى ما النبى قال .. فيركب أميه الفرس و يطلع مع الجيش..
فى واحد تانى مش راضى يطلع مين هوه؟

ابو لهب..اصله مصدق النبى جدا فهو واثق ان النبى هينتصر .. عشان كده الله عز وجل سماهم الكفار( لأن كفر فى اللغه يعنى ستر و غطى و ليها نفس نطق بالانجليزى cover يعنى غطى.. و كفر فى كتاب الله معناها : ستر الحق و هم فعلا عرفوا الحق و ستروه و خبوه و كذبوه) المهم ابولهب مكنش راضى يطلع بس عيب اوى قدام العرب انه ميطلعش.. فيمثل انه عيان و يأجر شاب يطلع مكانه و يقوله خد سيفى وخد الفرس بتاعى اصل انا مريض و تعبان .. ويطلع الولد فعلا والجيش كله يخرج .. طب أبو لهب كده أرتاح؟ لأ .. حيفضل أبو لهب فى مكة لا عارف ينام ولا ياكل ولا يشرب. حيتجنن عايز يعرف ايه الاخبار.. و مش قادر يصبر..

فبعد كام يوم حيروح أبو لهب على بيت العباس عم رسول الله
طب هو أصلا العباس موجود فى مكه؟
لأ طبعا العباس خرج مع الجيش ..طب إزاى ده العباس رغم كفره كان واقف يوم بيعه العقبه و بيوصى اهل المدينه على النبى انهم يحموه ..و كان حابب ياخد دور اخوه أبو طالب فى حمايته للنبى بعد وفاته ؟ اصل عشان كده العباس حيخرج مضطر.. غصب عنه و مش حيرفع سيفه فى المعركة.. بس ابو لهب من شده قلقه راح على بيت العباس.. يعنى عنده امل أن يمكن العباس يكون بعت اى اخبار لزوجته " أم الفضل"

فتفتح ام الفضل فتقول له : ما بك؟
فيقول : هل عندك اخبار ؟ فقالت: لا .. ليس عندى اخبار ،فيفضل قاعد قدام بيت العباس.. مستنى اى اخبار..
فيعدى واحد أسمه أبو سفيان بن الحارث ده كان جى من عند بئر بدر فابولهب شافه و سأله : ما يحدث ببدر؟

حنعرف الحلقه القادمة إن شاء الله