لو عرفتموه (الجزء الثاني 💜) مكتملة

201💜

#لو عرفتموه لاحببتموه
يلا صلوا على النبى :(
#وفاة_النبى (5)
موت النبى في حضن زوجته عائشة رضي الله عنها و أرضاها ❤

شفنا امبارح أن النبى عليه الصلاة والسلام عيان اوى بس قال للسيدة عائشة اريد أن اكتب كتابا زى ما عرفنا وعائشه مش قادرة تمشى من جنب النبى خايفيه النبى يموت وهيه مش جانبه .. وكان موجود جنبه مجموعه من  الصحابة وكانوا كلهم خايفين ومش عايزينه يتكلم ويتعب نفسه .. لحظات مهيبه مخليا الكل متكتف ..

وكانت النتيجه أن الورقة متكتبتش .. ليه ؟ حكمة الله عز وجل وإرادته.. عشان المنافقين يبانوا من وسط المسلمين .. واللي رفض خلافه ابو بكر يبان  وميبقاش مدسوس وسط المسلمين

المهم بعد شوية تدخل فاطمة تسلم علي ابوها حبيبها ..  فاطمة بتقول:  فلما دخلت فلم يقم اليّ ليقبلني كما كان يفعل في كل مرة .. فعلمت انه قد أصابه البأس (عيان اوى) .. فالنبى عليه الصلاة والسلام شافها فحاول يقوم بس مقدرش و قال لها قربى منى ياض فاطمة عايز اقولك حاجه.. فجت فاطمة و حطت ودنها عند شفتي النبي فقال لها سر بصوت واطى اوى.. فعائشه بتحكى لنا المشهد و بتقول فرفعت فاطمه رأسها وبكت ..

فقال النبى لها إدن مني يا فاطمة ( قربي مني تاني ) ففعلت و برده النبى وطى صوته و قال لها سر فرفعت فاطمة رأسها فضحكت .. فبعد كده راحت عائشة و قالت يا فاطمة ما رأيت اعجب اليوم من بكائك وضحكك في نفس الوقت .. وسألتها قالك ايه النبي ؟ فقالت فاطمة ما كنت لأُفشي سر رسول الله ..
فبعد وفاة النبي عائشة منستش و راحت لفاطمة و قالت لها قوليلى النبى قالك ايه يوميها.. فقالت فاطمة أما الآن فنعم سأخبرك.. يا عائشة قال لى أبى : يا فاطمة إني ميت الليلة.. فبكيت .. ثم قال لى يا فاطمة إنك اول أهلي لحاقاً بي فضحكت .. يعنى انتى اول حد حيموت بعدى .. شايفين البكاء و الضحك عند فاطمة مرتبط بوجودها مع النبى ❤ سواء ف الدنيا او الأخرة.
و ده مش بس حال فاطمة ..ده حال كل الصحابة ..

في مرة كان فى صحابي بيبكى فبيقول للنبى: يا رسول الله اني اخاف حتي ولو دخلت الجنة ان تكون انت في اعلي منزلة في الجنة مع النبيين والصديقين .. وانا أكون في ادني منزلة من الجنة.. فأخشى ان لا اراك يا رسول الله..فعلا يا جماعه لا تطيب الجنة إلا بك يا رسول الله ...فقال النبي له : أما علمت ان المرء يحشر يوم القيامه مع من أٓحٓب.. فرح الصحابى و جرى يبلغ الصحابه ففرحوا أوى و قالوا: فوالله ما فرحنا بعد الاسلام بشيء كفرحتنا بهذا الحديث .. انا و أنتو كمان لازم نفرح اوى بالحديث ده ❤ و نفتكره عشان نقدر نصبر على فراق النبى فى الدنيا عليه الصلاة و السلام..

طيب احنا انهاردة يوم الاتنين ١٢ ربيع اول سنة ١١ هجرياً بعد الفجر بشوية تقريباً وقت شروق الشمس ..النبي دلوقتي في بيت عائشة .. طيب هتختار له موته عاملة ازاي يارب ؟ هل و هو بيحارب في سبيل الله ؟ طب وهو بيقرأ قرآن ؟ طب وهو ساجد ؟ لا و لا اى حاجة من دي ..امال ايه؟ ربنا حيختار ان النبي يموت في حضن مراته عائشة رضي الله عنها وأرضاها ♡..

النبى على فراشة فى حجرة عائشة.. بتحكي عائشه وبتقول فجأه  رأيت النبى ينظر فى سقف الحجرة ثم أشار النبى بأصبعه إلى السماء و قال : بل الرفيق الأعلى بل الرفيق الأعلى .. فعلمت ان ملك الموت قد حضر وأنه يخير النبى بين البقاء في الدنيا و بين لقاء الله  أصل  النبى عليه الصلاة والسلام قال قبل كده  : إنه لم يُقْبَضْ نَبِيٌّ قط حَتَّى يَرَى مقعده مِنَ الجنه ، ثم يُخَيَّرَ .. 

فأختار النبى لقاء الله .. فبتقول السيده عائشه فرايته صلى الله عليه وسلم أشار بإصبعه قائلا : بل الرفيق الأعلي .. ويموت النبى :'( ..

خلاص خلصت رسالة سيدنا جبريل على الأرض خلص نزول الوحى .. خلاص جبريل مش حينزل الارض تاني إلا مرة كل سنه فى ليله القدر .. ليله نزول القرآن على النبى محمد صلى الله عليه وسلم.

نكمل بكرة إن شاء الله ❤
#السيرة_النبوية_بالعامية_لنورهان_الشيخ