لو عرفتموه (الجزء الثاني 💜) مكتملة

154💜

# لو عرفتموه لاحببتموه
يلا صلوا على النبى :)
رجوع أصحاب رسول الله من الحبشة (ج1)

حكينا فى حلقات فاتت أن النبى عليه الصلاة والسلام بعت جواب لنجاشى الحبشة  و بيطلب منه أن الصحابة يرجعوا للمدينة "..(فاكرين الصحابة اللى هاجروا من تعذيب قريش و راحوا الحبشة؟! دول بقى لهم سنين فى الحبشة .. و أخيراً حيرجعوا دلوقتى لحضن النبى عليه الصلاة و السلام بعد ما أتحرموا منه ١٤ سنة)

فيدخل الصحابة المدينة و يقابلهم النبىﷺ بكل لهفة و حب .. و كان من الصحابة دول،  سيدنا جعفر بن أبى طالب" و ده يبقى ابن عم النبىﷺ " فيحضنه النبىﷺ و يقول مقولته الشهيرة: بأيهما أفرح بفتح خيبر أم بقدوم جعفر ..

و حنحكى قصص عنهم و حنبدأ بقصة : أسماء بنت عميس، أسماء كانت صاحبة السيدة " حفصة بنت عمر بن الخطاب" و لما دخلت المدينة راحت زارت حفصة و قعدت كل واحدة تحكى للتانية عن أحوالها .. فعدى سيدنا عمر فقال لحفصة: مين معاكى، فقالت: أسماء، فقال عمر : الحبشية (يعنى  اللى رجعت من الحبشة) فقالت حفصة: نعم، و هنا بقى سيدنا عمر قال كلام هزار، بس أسماء حتاخد الكلام جد ..

قال لها عمر: أنتم لم تهاجروا مع رسول الله من مكة للمدينة و نحن أحق برسول الله منكم .. فأسماء ماضحكتش و اخدتها جد و قالت : لا لستم أحق برسول الله منا فأنتم كنتم في صحبته يطعم جائعكم و ينصح جاهلكم و يحنو عليكم ، أما نحن فكنا هناك في البعداء البغضاء و حُرمنا مصاحبته و كان كل ذلك فى سبيل الله و رسوله، فلستم أحق برسول الله منا.. و بكت أسماء و قالت لعمر: لأشكونك إلى رسول الله دون أن أزيد أو أنقص شيئا و فعلا راحت أسماء للنبى ﷺ و حكت له كلام عمر ..
فرد النبى ﷺ عليها و قال: نعم ليسوا أحق بى منكم فإن عمر و أصحابه هم أصحاب هجرة واحدة، أما أنتم أصحاب هجرتان "  ( علشان هم هاجروا فى سبيل الله مرتين .. مرة من مكة للحبشة فأطلق عليهم أسم "أهل السفينة" لأنهم هاجروا بالسفينة .. و الهجرة التانية هجرتهم من الحبشة للمدينة و كل ده فى سبيل الثبات على دين الله فبالتالى هم أولى برسول الله )

بس أنا و أنتم برده محرومين من رسول الله و ماشفناهوش بس حقول لكم  حديث حيفرحكم قوى قوى، النبى عليه الصلاة و السلام قال: " عبادة في الهرج كهجرة إليّ " يعنى وقت ثباتك على طاعة الله و حواليك ناس مش بتعملها و بتعصى ربنا.. فأنت بثباتك بتبقى هجرت معصية..و بقيت فى هجرة فى سبيل الله و رسوله ..فياترى كام هجرة هاجرتها للنبىﷺ ؟!.. كل ما تثبت على طاعة وسط معاصى كتير بيعملها اللى حواليك، بتزيد  هجرة لرسول الله و بتكون أولى برسول الله ﷺ 

المهم  فرحت أسماء بنت عميس برد النبى جداً ..و قالت : والله ما فرحت بشئ بعد دخولى الإسلام أكثر من فرحتى بهذا الحديث .. و كل الصحابة اللى كانوا راجعين معاها من الحبشة فرحوا جداً .. و أحنا و أنتم أكيد كمان فرحانين جداً

نكمل بكرة إن شاء الله ❤
#السيرة_النبوية_بالعامية_لنورهان_الشييخ