لو عرفتموه (الجزء الثاني 💜) مكتملة

191💜

#ل عرفتموه لاحببتموه
يلا صلو على النبى 
ماريا القبطية "أم ابراهيم ابن النبى محمد صلى الله عليه وسلم"(ج1)

حنرجع بس سنتين عشان نحكى حدث مهمة ..الحدث ده بالظبط كان سنة 7 هجرياً.. الأول مين هى مارية القبطية ؟ كلمة قبطى مش معناها نصرانى لكن معناها مصرى فالأقباط يعنى المصريين ، فمارية كانت مصرية مسيحية و عندها اخت أسمها سيرين و كانوا عايشين فى مصر فى قصر المقوقس ملك مصر و كانت مارية جارية فى القصر ، هي و أختها جوارى بس مش أى جوارى كانت ليهم منزلة عظيمة فى قصر المقوقس والمقوقس بيعزهم جداً و بيقدرهم جداً ..
( فى سنة 7 هجرياً هفكرهم بالحدث اللى حصل فى السنة دى اللى بسببه جت مارية من مصر للمدينة .. سنة 7 هجرياً كانت بعد صلح الحُديبية بدأ النبى يبعت رسائل لملوك العالم .. من محمد رسول الله الى هرقل عظيم الروم أسلم تسلم ، من محمد رسول الله الى كسرى عظيم الفرس أسلم تسلم ، من محمد رسول الله الى المقوقس عظيم مصر أسلم تسلم فالجوابات كلها راحت للملوك فى نفس اليوم 15 جواب مع 15 رسول ( عشان نعرف أن الصحابة ماكنوش طول النهار بيصلوا ويصوموا وبس .. لأ كانوا دبلوماسيين و سياسيين و خبراء عسكريين ) 
فمن ضمن الرسل كان حاطب بن أبى بلتعة و يطلع حاطب بالجواب بتاعه إلى مصر ، و يدخل على المقوقس بالرسالة: من محمد رسول الله الى المقوقس عظيم مصر أسلِم تسلم يؤتيك الله أجرك مرتين و إن لم تُسلِم فعليك أثم القبط و السلام على من اتبع الهدى .. (يعنى لو ماأسلمتش يبقى أنا بلغت و انت اللى مبلغتش قومك فحتشيل ذنبهم) و بعد ما المقوقس قرأ الرسالة قال كلام غريب أوى .. قال : والله كنت أعلم أنه نبى أخر الزمان و ما كنت أظن أنه من العرب و ظننت أنه سيخرج من الشام (زى اليهود برده كانوا متوقعين ان نبى اخر الزمان يكون من الشام زى باقى الأنبياء) إنى أراه قد خرج من العرب و إنى أُصدّقه و لكن أخشى من القبط (خايف من الشعب بتاعى) وأخشى على مُلكى .
بس كمان المقوقس كان راجل مؤدب ما غلطش فى النبى لما قرا رسالته ..يعنى مثلاً كِسرى ملك الفرس لما قرا رسالة النبى قطعها أما المقوقس قال لسيدنا حاطب إنى أبعث معك بهدية لرسول الله إكراماً له و بعت للنبى عليه الصلاة و السلام كمان رسالة و قال له: قد جاءنى كتابك وإنى أُصدقك وما كنت أظن أنك تخرج من العرب ولكنى أراك خرجت منهم وقد بعثت إليك بهدية .. والمقوقس أترجى النبى ﷺ عشان يقبل الهدية .. إيه الهدية بقى ؟ ايه الهدية بقى ؟ جاريتين مارية و أختها سيرين و بعض المنسوجات والعطور اللى مصر مشهورة بيهم و بغلة عشان النبى ﷺ يركب عليها و النبى حيسميها دُلدُل ^_^ النبى ﷺ كان بيحب يسمى مقتنياته..المهم مارية لقت نفسها فجأة بتتاخد من بلدها بالأمر كدة و رايحة لبلد تانى خالص ، و خرجت مارية و سيرين و رايحين مع حاطب من مصر للمدينة .. فى طريق طويل جداً بس و هما راجعين سيدنا حاطب بيقول بصيت على مارية و سيرين لقيتهم بيعيطوا ! (تخيلوا هى متربية طول حياتها فى مصر بتحب بلدها بتحب النيل و كانت عايشة فى قصر و حتسيب كل ده و هيه مش عارفة هى رايحة فين و لا رايحة لمين و لا عارفة عيشتها هتبقى عاملة أزاى بس فى الأخر هى جارية لا زم تنفذ الأوامر ) فحيعمل ايه سيدنا حاطب بعد ما شافهم بيعيطوا ؟

حنعرف بكرة إن شاء الله ❤
#السيرة_النبوية_بالعامية_لنورهان الشيخ