لو عرفتموه (الجزء الثاني 💜) مكتملة

130💜

# لو عرفتموه لاحببتموه
يلا صلوا على النبى :)
صلح الحديبية (ج1)

خلصنا كل الغزوات أو المناورات اللي ردعنا بيها  آلاف المشركين بتوع غزوة الأحزاب. دلوقتي وضع المدينة بقى ممتاز، المدينة آمنة داخلياً و خارجياً. داخلياً بقت آمنة بأن ما بقاش فيها  يهود بيغدروا بس لسة موجود فى المدينة اليهود لكن اليهود المسالمين طبعاً.. آه اتحكم بالإعدام على اليهود الخونة لكن المسالمين ماحدش قرب منهم .. و لما حصل جلاء أو طرد ليهود بني النضير، بسبب غدرهم.. برده ده كان حكم على اللى غدروا بس.. و بني قينقاع أتحكم برده على اللي غدروا بس.. أما باقى اليهود فضلوا موجودين .. و الدليل إن النبي عليه الصلاة والسلام مات و درعه مرهون عند رجل يهودي..

بس في الآخر أمر النبيﷺ بإجلاء اليهود تماماً من المدينة و ده أمر من الله عزوجل بإن لا يبقى في المدينة دينان.. و النبي ﷺحتى ما لحقش ينفذه ..لأن النبيﷺ قال على ده و هو بيموت فنفذه أبو بكر الصديق و عمر بن الخطاب.. و حكمة ربنا فى ده هى حفظ مكة والمدينة من أي دين تاني و إلا كان أختلط على المسلمين دينهم.. فمكة و المدينة هم الحرمين، مافيهمش كفار و مافيهمش أي دين غير الإسلام..

طيب المدينة آمنة داخلياً و خارجياً. داخلياً إن مافيش يهود و خارجياً آمنة بعد انتصار المسلمين على  آلاف المشركين بتوع غزوة الأحزاب ..طب حتعمل إيه دلوقتى يا رسول الله. خلاص إرتاح بقى يا رسول الله! حتعيش و تاكل و تشرب و تنام و تقول للناس.. اعبدوا ربنا و احفظوا القرآن و موتوا و خشوا الجنة.. طب ده صح؟ لا طبعاً  النبى مش حيرتاح ..لأن لازم نشر الإسلام و نشر الدعوة.. طب ليه؟ عشانى و عشانك ..عشان الدين يوصل ليا و لكم عشان أقدر أفهم الحياة و أعيش و أعرف إن ربنا موجود فأدعيه.. و أعرف المنهج اللى فى صالحى اللى ربنا خالقنى عشان أختار ان أمشى عليه ..
أصل هل ربنا بعث النبى لأهل المدينة و مكة بس ؟ لأ طبعاً ربنا بعث النبى محمد ﷺرحمة للعالمين لكل الدنيا كافة.. النبي عليه الصلاة والسلام بيقول: بعث كل نبي لقومه خاصة و بعثت للعالمين كافة.. فالنبىﷺ  مش حيرتاح لأنه لازم  يبلغ الدعوة.. أصل مفيش راحة في الدنيا...الإمام أحمد رحمه الله سئل: قيل يا إمام متى الراحة؟ قال: "مع أول قدم تضعها في الجنة " مفيش راحة في الدنيا..الدنيا كلها تحديات لازم تواجهها.. طيب دلوقتى قلنا إن النبىﷺ  حيبلغ الدعوة عشان احنا نيجي بعده مسلمين. طب يطلع النبى ﷺ يروح فين؟ للقبائل المحيطة و يدعو إلى الله؟ لأ .. ما ينفعش طبعا لأن كل قبيلة من دول عملت تحالف مع قريش لأن قريش سيدة العرب .. فمفيش و لا قبيلة سامحة للنبيﷺ أنه يكلمها نص كلمة ..لأن لو قريش عرفت إن بقى فيه بين القبائل دى و بين النبى ﷺ اتصال فساعتها حتنقض قريش التحالف معاهم و تعزل القبائل دى و تقطع كل العلاقات الإقتصادية و القبائل تجوع.. و بكدة يا جماعة قريش مقيدة النبي ﷺ.. و النبى  مش قادر يدعو إلى الله .. ف كل ما يروح لقبيلة تقوم القبيلة مانعة الدعوة فى بلدها.. فبقت قريش هى العائق قدام رسول الله.. فكان الحل هو إن النبى ﷺ يفتح مكة .. هتعمل إيه يا رسول الله؟ لازم أفتح مكة.

طيب النبىﷺ كدة قدامه حلين.. يا إما أطلع دلوقتي و أفتح مكة و أحارب، و قريش تعبانة عالآخر فأكيد حنتصر.. يا إما أحاول أوصل لمعاهدة سلام بيني و بين قريش..تعالوا كدة ناخد الإختيار الأول إن هو يحارب.. ده اختيار منطقي جداً على فكرة ده حق المسلمين لأن اللى أتعمل فى الصحابة و فى رسول الله ﷺ قبل و بعد الهجرة ماكانش قليل .فاكرين ياجماعة السيدة سمية لما أنضربت بالحربة في مكان عفتها. و قتلوا زوجها ياسر أبو عمار بن ياسر.

فاكرين لما حرقوا ظهر سيدنا خباب لحد ما جلد ظهره ساح و بقى الشحم اللي بيدوب من ظهره هو اللي بيطفي الفحم. فاكرين لما كانوا بيعذبوا بلال في الصحراء.. فاكرين لما كانوا بيغطسوا وش عمار بن ياسر في الماء الساخن..
فاكرين حصار بنى هاشم فى الشِعب، سعد بن أبي وقاص من كتر الجوع بيقول كنت أتبول فسمعت طأطأة لبولي ..أصله تبول على شحم بعير..حتة دهن ..فياخدها ويطهرها فى النار لحد ما بقت رماد فبقى يسف الرماد بتاعها و يشرب عليها حبة ماية ويقول بقيت عليها 3 أيام ..

فاكرين عقبة بن أبي معيط لما كان يخلي النبيﷺ واقف يصلي و يجيب الرداء بتاعه و يبرمه و ييجي على رقبة النبي ﷺويخنقه و يسقط النبي صلى الله عليه و سلم على ركبتيه عشان مش قادر يتنفس..و مرة النبىﷺ فضل يلف على القبائل يقول من يأويني حتى أبلغ كلام ربي فإن قريشاً منعتني أن أبلغ كلام ربي.

و فضل النبى ﷺيطوف على القبائل و آخر اليوم يروح بيته يرتاح شوية و يحط قصاد إيده طبق و كان لسة هياكل لقمة منه .. ومفيش فى البيت أكل تانى، فيخشوا عليه كفار قريش و يكسروا عليه باب البيت و يجيبوا نجاسة ناقة و يرموهاله في الطبق بتاعه اللي مفيش اكل غيره ..فماياكلش صلى الله عليه و سلم.. بس رغم كل ده النبىﷺ مش حيحاربهم ولا حينتقم منهم مع إنهم فى ضعف دلوقتى ولو حاربهم حينتصر بس النبي ﷺمش عايز يحارب قريش، أصل أنا مش نبي الحرب، أنا نبي السلام هيختار النبى الحل التانى.. حيختار السلام ..

إزاي يا جماعة بعد كل ده حد دلوقتى يقول إن النبىﷺ كان نبى حرب.. أبداً والله ده نبي السلام ♡.. بعد كل اللى شافه ده أختار السلام مع أهل مكة ..طيب اخترت السلام .. حتعمل إيه دلوقتى يا رسول الله؟ حتروح تخبط على أهل مكة و تقول احنا جايين نمضي معاهدة سلام؟ أكيد لأ طبعاً.. لأنهم أكيد مش هيقبلوا.. طيب النبى ﷺحيعمل ايه ؟

حنعرف بكرة ان شاء الله ❤
#السيرة_النبوية_بالعامية_لنورهان_الشيخ