لو عرفتموه (الجزء الثاني 💜) مكتملة

79💜

الحلقة 79
لو عرفتموه لاحببتموه
يلا صلوا على النبى :)
رد شبهة زواج السيدة عائشة من رسول الله في سن تسع سنوات (ج2 و الأخير❤)

اتكلمنا إمبارح عن بودلي المستشرق الغير مسلم و جملته الشهيرة "لقد أخطأ الغرب إذ يقيسون زواج محمد على مقاييس زماننا هذا.. فهم يهدرون فروق البيئة و الزمان و الثقافة".. و فهمنا إن النبي عليه الصلاة والسلام لم يخالف عرف مجتمعه و لا العالم في زواجه من السيدة عائشة في سن 9 سنوات و ضربنا أمثلة عن ده زي زواج الأميرة أجينس في نفس السن من الأمير الكسيوس و زواج الأميرة. مارجريت من الأمير أيزك و قلنا إن حرام و لا يجوز زواج البنت الناضجة جسدياً فقط.. و فهمنا إن السيدة عائشة و أي بنت في سن زواجها كانوا في بيئة و ظروف أدت لنضجهم الفكري و الجسدي و عادات المجتمع و العرف السائد وقتها كان بيقول إن ده كان سن الزواج الطبيعى جداً..

والمفاجأة و الدليل على ده.. إن لما الله تعالى "أمر" النبي بطلب عائشة للزواج.. كانت هي أصلاً مخطوبة لواحد كافر.. فلو ماكانش سنها هو سن الزواج العادي في مجتمعها مكنش أصلاً خطيبها الأول "الغير مسلم" فكر إنه يتقدم لخطبتها.. خطيبها كان اسمه الجُبير بن مُطعم بن عدىّ (قبل إسلامه) فلما النبى اتقدم لخطبة عائشة.. أبوها سيدنا أبو بكر فرح جدااا، أبو بكر كان بيدعي ليل نهار إن النبى يخطب عائشة، كان نفسه يبقى بينه و بين النبى نسب، طب ليه يا أبو بكر قبلت إن عائشه تتخطب من الجبير.. ليه اتسرعت.. كنت استنى و بلاش تخلي عائشة ترتبط؟ أبو بكر اتسرع في خطوبة عائشة للجبير لأنه خاف تتأخر في الزواج.. فده دليل إن العرف السائد وقتها إنه عادي جداً زواج البنت في السن ده..

طيب على فكرة النبي ماكانش يعرف إن عائشة مخطوبة.. و أبو بكر لما عرف إن النبي عايز يتزوج من عائشة فرح جداً و ربنا شاء إن أم الجبير تقول لأبو بكر "إن زوجناك ابننا. و تدعوه لدين محمد!! أتريدون أن تُفسدوا ابننا علينا" يعنى أم الجبير خافت إن الجبير يسلم و بقت عايزة تفسخ الخطوبة فأبو بكر انتهز الفرصة و وافق على فسخ الخطوبة ..

طيب و حاجة كمان هل عائشة لما اتجوزت كانت بتنجب الأولاد؟ لأ.. عائشة ماكانتش بتخلف.. ربنا أراد ده لأن أنتِ يا عائشة رسالتك كبيرة قوي، أنتِ جوازك من النبي لهدف و رسالة.. أنتِ رسالتك أنك تبلغي الإسلام للبشرية كلها.. فأنتِ ما ينفعش تتشغلي بالأطفال وتقعدي تربيهم و تأكليهم.. عائشة هتروي عن رسول الله 2210 حديث أغلبهم في الفقه فهي ماينفعش تنشغل بحاجة تانية غير تبليغ الدعوة.. و كانت بتحب النبي أوي و نفسها تخلف منه و تقول له: يا رسول الله كل نسائك لهن كُنية إلا أنا فيقول لها صلى الله عليه و سلم: لا تحزني يا عائش.. أنتى أم عبد الله (يكنيها بعبد الله بن الزُبير ابن أسماء أختها)..

طيب هل السيدة عائشة كانت إنسانة عادية؟ لأ.. ماكانتش إنسانة عادية.. موسى بن طلحه بيقول: ما رأيتُ أفصح من عائشة .. و فى واحد من الصحابة قال:  ما رأيت أفرض من عائشة (أفرض يعنى عالمة بعلم الفرائض اللي هو علم المواريث.. ده علم صعب جداً و محتاج حد ذكى جداً وعنده قدرة على الحفظ وعلى التفريق بين الروايات فصعب جداً) و مش بس كده ده الصحابة كمان كانوا بيقولوا إن عائشة كانت أعلم الناس بالطب.. طب إزاي.. ده الطب سكة تانية خالص على اهتماماتها؟ لما سألوا عائشة عن ده قامت قالت: كان يَمرض رسول الله فيُنعت له فأحفظ (النبي كان يتعب فتتكتب له روشتة فكانت تحفظ) و كنت أمرض فيُنعت لي فأحفظ و يمرض فلان فيُنعت له فأحفظ.. ( فلما بقى حد يمرض تبدأ تسترجع بقى فُلان لما تعب أخد دواء كذا.. فبقت تقول الدواء وبقت طبيبة).. ده دليل أنها كانت مميزة جداً..

طيب سيبوا كل اللي قلناه ده و نفترض إنكم لسه مش مقتنعين إنها تتجوز في سن صغير.. بس ركزوا في إللي حقوله ده... كان زواج رسول الله من السيدة عائشة أمر من رب العالمين، فمش من حقك أنك ترفض يا رسول الله.. ده أمر.. النبي بيقول للسيدة عائشة: أُريتُكِ فى المنام مرتين، رأيتك بصورتك في قطعة من حرير .. فأقوم من نومي وأقول إن يكن خيراً، يُمضيه الله..

طيب ممكن حد يقول ده مجرد حلم.. لأ.. مش مجرد  حلم لأن رؤيا الأنبياء حق و وحي من الله.. و سيدنا إبراهيم عليه السلام، أخبرنا الله تعالى فى القرآن الكريم إن سيدنا إبراهيم قال: يا بُنى إني أرى في المنام أني أذبحك قال يا أبت افعل ما تؤمر.. يبقى الرؤيا للأنبياء أمر من الله سبحانه و تعالى.. يبقى النبي في النهاية هو مأمور من الله
كده اتبقى نقطة وهي أن النبي كان كبير وقت زواجه من عائشة.. كان في الخمسينات.. طب ده ينفع؟؟ اه ينفع مع محمد بس.. ليه؟؟ لأن النبي أصلاً مش كل تكوينه زينا عنده حاجات خارقة للبشرية.. يعنى إيه برده؟ النبي مرة صام 3 أيام ورا بعض من غير ما يفطر المغرب.. ده اسمه صيام الوصال.. فجه صحابي حب يقلده فالصحابي كان هيموت.. فالنبي جرى عليه سأله بتعمل كده ليه؟ فقال له: أُقلدك يا رسول الله.. فقال النبي: لا تفعلوا هذا !! أنتم لستم مثلى.. فإني أبيتُ عند ربي يُطعمنى ويُسقينى (أنا أشبهكم في حاجات، وحاجات تانية.. لأ.. فأنا أصوم 3 أيام و ما أفطرش أما أنتم لأ)

حاجة تانية النبي كان عرقه مسك ﷺ فهل ده تكوين بشري زينا؟ طبعاً لأ، كمان النبي كان يمشى فيَرى من خلف ظهره.. هل ده زينا؟ لأ طبعاً.. و كمان النبي ماكنش ليه ضل على الأرض.. (في كتاب اسمه الخصائص الكبرى للسيوطى فيه كل الخصائص إللي انفرد بيها النبي عن باقي البشر).. طيب إللي عايزة أوصله لكم إن النبي ماكنش زينا في حاجات كتير و أنه مكنش بيشيب و يعجز، النبي مات وهو عنده 63 سنة وكان  جلده أنعم من الطفل إللي عنده 10 سنين.. ففكرة إنه كان كبير لما اتجوز عائشة وكان في سن الخمسينات.. ده مش بيمثل مشكلة خالص.. فماتقارنش النبى وقتها برجل كبير معدي الخمسين سنة.. النبي كان كأنه شاب.. فنفسياً عائشة مرتاحة جداً..

و إللي عايزة أوصله لكم برده.. إنكم تفهموا كويس قوي إن زواج محمد وعائشة ماينفعش حد يقلده دلوقتي بأي حال من الأحوال إلا لو جبنا حد زي النبي و ده مستحيل طبعاً و كمان لو جبنا واحدة زي عائشة وده برده مستحيل.. و نفس ظروف البيئة و المجتمع.. فزواج محمد من عائشة كان حاجة خاصة بيهم وبزمانهم و ماينفعش تتقلد في ظروف النهاردة..

نحكي شوية عن حبهم لبعض شوية بقى ❤ عاش النبي مع عائشة وكان بيحبها جداً فكان يقول لها: يا عائش إني أعلم متى تكونين عني راضية ومتى تكونين عني غضبى ^_^.. فقالت وكيف تعلم ذلك يا رسول الله؟ فقال إن كنتي عني راضية قلتي لا ورب محمد♡ وإن كنتي علي غضبى قلتي لا ورب إبراهيم.. فضحكت عائشة وقالت والله لا أهجر إلا اسمك يا رسول الله (أنا بخاصم اسمك بس يا رسول الله.. مش بخاصمك أنت.. أنا مقدرش أخاصمك أنت أبداً.. صلى الله عليه وسلم ) ..

نكمل مواقف جميلة في حب النبي و عائشة المرة الجاية إن شاء الله  ❤