لو عرفتموه (الجزء الثاني 💜) مكتملة

172💜

# لو عرفتموه لاحببتموه
يلا صلوا على النبى
#فتح_مكة(ج12والأخير)
فى قصة جميلة حصلت وقت فتح مكة ناس كتير أسلمت و ناس النبى عليه الصلاة و السلام عفا عنها..و وسط ما النبىﷺ مشغول كده.. فيشوف من بعيد سيدة عجوزة قوى بتتعكز كده على عصاية فابتسم لها النبى عليه الصلاة والسلام وبدأ يشاور لها يعنى بيقول لها تعالي تعالي، و جت المرأة و كان النبى ﷺ لابس وشاح على كتفه ،قام فارشه على الأرض.. و قعد يتكلم معاها و يسألها عن أحوالها.. طيب هى مين الست دي؟ دي صاحبة السيدة خديجة رضي الله عنها. تخيلوا يا جماعة دي خديجة ماتت من 10 سنين و لسه النبىﷺ فاكرها..النبى عليه الصلاة والسلام هو اللي علم البشرية الوفاء ♡

فالنبى كان قاعد مع المرأة العجوز و بيتكلم معاها بس مين كانت واقفة و متضايقة  ؟ السيدة عائشة طبعاً.. فبعد ما النبى ﷺ رجع قالت له: من هذه السيدة يا رسول الله؟ فقال النبىﷺ : يا عائشة هذه السيدة صاحبة خديجة..فقالت له: و فيم كنتم تتكلمون؟ فقال: يا عائشة كنا نتذكر أيام خديجة ..شوفتوا وفاء النبى صلى الله عليه وسلم !!.. سنين و لسه النبى ﷺ فاكرها..النبى عليه الصلاة والسلام هو اللي علم البشرية الوفاء ♡

فى واحد كمان من كفار مكة اسمه هبار بن الأسود فاكرينه ؟ ده اللى خرج وراء السيدة زينب (بنت النبىﷺ ) لما خرجت فى عز النهار علشان تهاجر للنبىﷺ من مكة للمدينة .. فمشى وراها هبار بن الأسود و لحقها و فضل يضرب ناقة زينب كذا مرة علشان يوقع زينب .. أصل عيب عند العرب أن الرجل يقتل امرأة فعلشان كده هبار لجأ لفكرة ضرب الناقة دى.. و فضل يضرب لحد ما الناقة خافت و جريت بسرعة شديدة فوقعت السيدة زينب من فوق الناقة و كانت زينب حامل و جالها نزيف جامد جدا و حصل إجهاض.. و مين لحقتها؟ هند بنت عتبة و كانت ساعتها كافرة.. بس كان عندها إنسانية..
فالنبى ﷺ بعت لحد يجيب زينب من مكة.. و لما النبىﷺ شافها بكى بكاء شديد على حالة زينب .. و بعدين فضل الجرح مأثر على زينب وحتموت بسببه بعد كدا ..و حزن الرسول عليه الصلاة والسلام عليها وقال: من رأى هبار بن الأسود فليحرقنه بالنار بس النبى ﷺ قال كده من حرقة قلبه على بنته.. بس لما هدى عليه الصلاة والسلام قام قايل " أيها الناس إنى أمرتكم أنه من رأى هبار بن الأسود فليحرقه بالنار، وإنه لا يحرق بالنار إلا رب النار، ولكن من رأى منكم هبار بن الأسود فليقتله ( و ده طبعا قصاص ) "

فلما فتح النبى عليه الصلاة و السلام مكة .. فهبار بن الأسود كان عارف أن المسلمين حيقتصوا منه ..فحاول يتخفى .. بس فضل هبار يدور على النبى عليه الصلاة والسلام لحد ما عرف مكانه و وراح له، و أول ما وقف قدامه كشف اللثام عن وجهه ..فقال هبار :يا محمد! أنا هبار بن الأسود..فالنبىﷺ اتخض و افتكره و افتكر اللى قتل زينب بنته حبيبته رضى الله عنها..فبسرعة قال هبار: اعف عني يا رسول الله فيرد النبي صلى الله عليه وسلم: عفوت عنك ♡..و من عفو و سماحة النبىﷺ أسلم هبار بن الأسود ..ويتحول هبار من كافر لصحابى و بقى يروى أحاديث كمان ♡

نكمل بكرة إن شاء الله
#السيرة_النبوية_بالعامية_لنورهان_الشيخ