لو عرفتموه (الجزء الثاني 💜) مكتملة

176💜

#لو عرفتموه لاحببتموه
يلا صلوا على النبى
#غزوة_حُنين (ج3)
يقول ﷺ حين يصبح و يمسى: ربنا لا تكلني إلى نفسي طَرفة عين.

شفنا المرة اللى فاتت خطأ فادح حصل من المسلمين و هو اعجابهم بنفسهم.. و وثقوا بزياده فى تجهيزات المعركه و عددهم الكبير.. و لكن نسوا أن من لم يتوكل على الله، أوكله الله إلى نفسه..يعنى مدام انت شايف نفسك انك قوى ..اذن خلاص واجه الحياه بقوتك..لكن طبعا مين يقدر على كده!!! الانسان ضعيف اوى.. فاللهم ربنا لا تكلنا إلى أنفسنا طرفه عين.. ده دعاء النبى عليه الصلاة والسلام علمهولنا .. المهم ان بسبب اعجاب المسلمين بنفسهم حصل تراخى فى مواجهه العدو.. ودخلوا على منطقه حنين.. وبدأ المسلمين يعدو على دفعات زى ما النبى عليه الصلاة والسلام أمر عشان لو فى كمين الكفار عاملينه .. يبان مع اول دفعة..

فعدت كتيبه المسلمين الاولى وإيه اللى هيحصل؟ بدأت تخرج كمائن العدو من كل مكان و أتفزع الصحابه وجيش الكفار بدأ يقتل بعنف و بقسوة غير طبيعية.. والصحابة ارتبكوا فبقوا عايزين يرجعوا و يطلعوا على منحدر صغير.. لكن ناس من المسلمين كانوا نازلين لسه و مش عارفين اللى بيحصل .. فدول طالعين و دول نازلين و وسط الارتباك و فزع الخيول.. الكل داس على بعضه ..

و سيدنا خالد بن الوليد أصيب بجروح شديدة من كتر القتال و كان ده لازم يحصل عشان يبقى درس يزلزل المسلمين.. عشان يعلمهم نتيجة الإعجاب بالنفس و نسيان ان التوفيق من عند الله و بس.. درس مكنش ينفع ياخدوه فى خطبه أو بكلمة من النبى عليه الصلاة و السلام.. كان لازم تحصل كارثه تفوقكم يا مسلمين و ينزل قول الله تعالى: " لَقَدْ نَصَرَكُمُ اللَّهُ فِي مَوَاطِنَ كَثِيرَةٍ ۙ وَيَوْمَ حُنَيْنٍ ۙ إِذْ أَعْجَبَتْكُمْ كَثْرَتُكُمْ فَلَمْ تُغْنِ عَنكُمْ شَيْئًا وَضَاقَتْ عَلَيْكُمُ الْأَرْضُ بِمَا رَحُبَتْ ثُمَّ وَلَّيْتُم مُّدْبِرِينَ .. " [ سورة التوبه ]

المسلمين بدأو يجروا و يسيبوا أرض المعركه.. و مسلمين تانيين مش عارفين يلاحقوا على القتال من هنا و من هنا.. و فجأه النبى عليه الصلاة و السلام يلاقى نفسه لوحده فى ارض المعركه ..فبقى النبى عليه الصلاة و السلام عايز يجمع المسلمين من تانى.. فيقوم النبى بمنتهى الشجاعه يقول : "أيها الناس.. أنا النبى لا كذب.. أنا بن عبد المطلب " .. طبعا ده شئ خطير جدا و مجازفه كبيرة لأن النبى كده حدد مكانه فى أرض المعركة.. فالكفار كده حيعرفوا مكانه و حيهجموا عليه و يقتلوه.. بس الموقف كان شديد و النبى شجاع ..قرر يعلن عن نفسه عشان يثبت المسلمين..

و يسمعه سيدنا العباس و يجرى عليه و يقول له: لبيك لبيك ..بأبى أنت وأمى يا رسول الله.. و يبدأ النبى يطلب من العباس انه يجمع الناس .. طب حتخلى العباس ينادى على 12 ألف جندى؟ لا النبى هيخص النداء لناس معينه .. فيبدأ العباس ينادى و يقول :يا أصحاب الشجره.. يا أصحاب بيعة الرضوان.. يا اصحاب صلح الحديبيه .. ( بيفكرهم بوعودهم و المواقف اللى ثبتوا فيها زمان و نصروا النبى).. طب الناس اللى حضرت المواقف دى كتير؟ لأ.. اللى حضروا الاحداث دى زمان كانوا 1400 مسلم تقريبا .. لكن الواحد منهم ب100 مقاتل ولو ثبتوا الباقى هيثبت.. عارفين ليه.. عشان ربنا قال عنهم .. قال تعالى: " لَّقَدْ رَضِيَ اللَّهُ عَنِ الْمُؤْمِنِينَ إِذْ يُبَايِعُونَكَ تَحْتَ الشَّجَرَةِ فَعَلِمَ مَا فِي قُلُوبِهِمْ فَأَنزَلَ السَّكِينَةَ عَلَيْهِمْ وَأَثَابَهُمْ فَتْحًا قَرِيبًا.." [ سورة الفتح ] ..
طيب حيستجيب المسلمين للنداءات ؟ طبعا ♡

حنعرف التفاصيل بكرة ان شاء الله
#السيرة_النبوية_بالعامية_لنورهان_الشيخ