لو عرفتموه (الجزء الثاني 💜) مكتملة

87💜

الحلقة 87
لو عرفتموه لاحببتموه

يلا صلوا على النبى :)
غزوة أحد (ج5)
ادعُ عليهم يا رسول الله فقال ﷺ: لم أبعث لعاناً و لكنى بعثت رحمة، اللهم اغفر لقومى فإنهم لا يعلمون.

شفنا الحلقة اللى فاتت ان بدأ الصحابة يتلموا حوالين النبى من تانى بعد ما عرفوا إن خبر موته كان إشاعة و كانوا حوالى 20 صحابى. طيب فين بقية جيش المسلمين ؟ بقية جيش المسلمين بعد ما فكروا أن النبى مات ..حصل ربكة فى الجيش فراح عدد كبير منهم فى إتجاه المدينة و ساب المعركة.. راجعين بمصيبة.. راجعين يقولوا مات رسول الله .. ويشاء الله عز وجل أن وقت وصول الجيش للمدينة يصادف وصول صحابى اسمه أنس بن النضر ، أنس ده يبقى عم أنس بن مالك خادم رسول الله ..فكان أنس وقت غزوة "بدر" فى تجارة فى الشام فماحضرش الغزوة مع المسلمين ولما رجع وعرف اللى حصل بكى وقال: والله لئن أشهدنى الله مشهداً آخر مع رسول الله، فوالله ليرى الله أجمل ما أصنع..

وتلف الأيام وتيجى غزوة أحد و أنس برده يكون وقتها فى تجارة فى الشام بس المرة دى يسمع عن الغزوة فبسرعة يجرى.. و يوصل فى وقت انكسار المسلمين.. فيلاقيهم راجعين على المدينة فيقول لهم : ما لكم؟ فيحكوا له اللى حصل كله و يقولوا له قتل رسول الله ،فيقولهم : قتل رسول الله ؟ فيقولوا له : نعم .. فيرد عليهم ويقول و ما تصنعون بالحياة بعده !! اذهبوا وعودوا وموتوا على ما مات عليه رسول الله، كانت النتيجة إن بالفعل يرجع الجيش تانى لأرض المعركة و معاهم أنس بن النضر (صحابى واحد قدر إنه يرجع جيش كامل تانى للمعركة.. و احنا كمان لازم نساعد بعض و نشجع بعض لعل بكلمة منك يجعل عمل كبير أوى يبقى فى ميزانك من غير ما تكون عملته).

طيب دلوقتى رجع الجيش و انتشر فى أرض المعركة بس الصحابة لقوا حاجة غريبة إن أنس بيجرى فى جهة تانية غير اللى بيجروا فيها رايح فى اتجاه جبل أحد ، ناحية معسكر الكفار ، فيقولوا له : إلى أين يا أنس ؟! ليس من هذا الإتجاه يا أنس! فيرد عليهم أنس و يقول: إلى الجنة ، إلى الجنة و الله إنى لأجد ريح الجنة دون أحد ( عند جبل أحد) وبعد انتهاء المعركة حيشوفوه الصحابة مقتول فى نفس المكان اللى كان بيشاور عليه بس للأسف الكفار كانوا ممثلين بجثة أنس لدرجة ان محدش كان عارف مين ده بسبب تشوه وجهه

لحد ما جت أخته و عرفته من كف إيده و عرفته من صباعه لإن صباعه كان مقطوع فقالت: هذا كف أخى.. هذا بدن أنس بن النضر. وينزل قول الله تعالى " مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلًا "و كل ما الكفار يزيدوا فى التمثيل و التشويه لجثث المسلمين، كل ما يزداد تشديد النبى صلى الله عليه وسلم فى نهى المسلمين عن التمثيل بجثث الكافرين...طيب دلوقتى الجيش رجع و ابتدى يقاتل فى كل مكان .. بس حتحصل حادثة من أسوأ الحاجات اللى حصلت فى غزوة أحد و هى إصابة النبى صلى الله عليه وسلم.