لو عرفتموه (الجزء الثاني 💜) مكتملة

153💜

# لو عرفتموه لاحببتموه
يلا صلوا على النبى :)
غزوة خيبر (ج8 و الأخير )

تزوج النبىﷺ من السيدة صفية و شاف أن نص وشها وارم و لونه أخضر من أثر ضرب عنيف !! فقال النبىﷺ : ما بكِ يا صفية ؟ فقالت له: يا رسول الله رأيت يوماً فى المنام رؤية .. رأيت كأن القمر سقط من السماء و نزل فى حجرى (الرؤية دى معناها أنها بتتمنى الزواج من النبى ﷺ و أنها حتتزوجه ) فصفية بمنتهى التلقائية حكت لزوجها الحلم و زوجها كان من أحبار اليهود (يعنى رجل دين يهودى) فقال لها: أتتمنين ملك يثرب و ضربها لحد ما وشها بقى أخضر و وارم ..

و كمان النبىﷺ أشفق علي صفية علشان كانت زعلانة أن أهلها ماتوا فى المعركة لكن النبى ﷺ حكى لصفية عن اليهود  و اللى عملوه فى المسلمين من غدر و خيانة فبتقول صفية  فضل النبىﷺ  يطيب خاطرها مع أنه ماعملهاش حاجة .. و اليهود هم اللى معتدين .. بس النبىﷺ فضل يطيب خاطر صفية .. شايفين حنين قد إيه؟ اللهم صل على سيدنا محمد )

وتعرفوا أن بعد زواج السيدة صفية من النبىﷺ .. فلما خرج النبى ﷺ تانى يوم الصبح ،لاقى سيدنا أبو أيوب الأنصارى رايح جاى قدام البيت و  ماسك سيفه !! فالنبى ﷺ قال له: ما بك يا أبا أيوب ؟ فقال: بتتُ الليلة كلها على الباب يا رسول الله لأحرسك.. فقال :مِمن ؟ فقال: خِفتُ عليك من تلك اليهودية ، قُتل أبوها و زوجها ، فخِفت أن تحاول أن تُؤذيكَ .. فوقفت عند الباب فلو سمعت إيذاءً منها لك ..دخلت فضربت عُنقها يا رسول الله !!.. 
فضحك النبىﷺ و قال: اللهم احفظ أبا أيوب كما بات يحفظنى..

السيدة عائشة لما عرفت خبر الزواج .. غارت جداً (و لها حق هي دى مشاعر حب و غيرة برده بشر..و كانت تقول فى الآخر استغفر لى يا رسول الله) فمرة راحت للنبى ﷺ و قالت: يا رسول الله أتزوجت صفية!! حسبك صفية !! ( و شاورت بأيديها كده، عايزة تقول له أنها قصيرة و فعلاً السيدة صفية كانت قصيرة جداََ ) فقال النبىﷺ: يا عائشة لقد قلتى كلمة لو مُزجت بماء البحر لمزجتهُ..(لو الكلمة دى قلبناها فى البحر.. لون البحر هيتغير و يتعكر.. لأن دى غَيبة) .. 

فى حاجة كمان جميلة قوى.. الغرب بيتكلموا دايماً عن الإتيكيت و معاملة الزوج لزوجته  و أن الزوج بيفتح لزوجته باب العربية.. تعالوا بقى أتفرجوا عندنا فى السُنة النبوية كان النبىﷺ بيعامل زوجاته إزاى .. كل الإتيكت و كل ده كان عندنا من 1400 سنة.. السيدة صفية كانت قصيرة قوى ما تعرفش تطلع على الناقة.. فكان النبىﷺ يعمل إيه؟ يحط ركبته على الأرض وينصب الآخرى و يشاور لصفية علشان تطلع على رجله كأن رجله سلمة من السلالم..فصفية تستحى أن تضع قدمها على فخذ رسول الله بس تسمع كلامه و تحط رجليها على ركبة النبىﷺ و تطلع .. شايفين الرقى فى التعامل.. صلى الله على محمد، صلى الله عليه و على آله وسلم ❤ .. 

كانت السيدة صفية بتحب النبى جداً لدرجة أن يوم وفاته كانت كل الزوجات مجتمعين عنده و هى كانت متأخرة فكانت عمالة تجرى و تبكى.. خايفة يموت و ما تلحقش تكلمه.. فدخلت عليه و هى بتبكى فقعدت  على ركبتها و قالت: يا رسول الله والله وددت لو أن ما بك بى و تكون أنت سليماً معافى (عارفين لما حد يقول لحد: ياريت اللى فيك يكون فيَّ) .. فالسيدة عائشة كانت  واقفة و طبعاً غارت.. فزوجات النبىﷺ اتغامزوا ( كأن كل واحدة  بتقول للتانية شايفة صفية بتقول إيه !!) فشافهم النبى ﷺ فقال:تتغامزان عليها ووالله إنها صادقة  ..