لو عرفتموه (الجزء الثاني 💜) مكتملة

128💜

لو عرفتموه  لاحببتموه
يلا صلوا على النبى :)
ردع النبي ﷺ لقبائل الكفار الغادرة (ج2)

شفنا المرة اللى فاتت حكمة النبى عليه الصلاة والسلام بإنه يعفوعن ثمامة بن أثال فيسلم لله تعالى .. بصوا بقى ثمامة حيعمل إيه بعد إسلامه .. أسلم ثمامة وقال: يا رسول الله نفسي أروح أعمل عمرة، أتأذن لي؟ فأذن له النبى.. أتاري ثمامة كان في نيته حاجة تانية... وصل ثمامة مكة ودخل الحرم، و طاف وعمل عمرة، وبعدين وقف يكلم قريش .. أصل قوم ثمامة "بنى حنيفة" بينهم وبين قريش اقتصاد، فلوس، وتجارة ..فقبيلة ثمامة هي اللي بتورد (الحبوب / القمح) لقريش ..وقريش بتشتريه من هناك.. فكدة قريش روحها في إيد بنى حنيفة..

المهم حيقف ثمامة و يقول لهم: يا معشر قريش، أتأذون رسول الله؟ فقالوا: ما بك يا ثمامة (هما مستغربين كلامه أوى .. مش فاهمين حيقول إيه) فقال ثمامة: والله لا تأتيكم من بلادى حبة من حبها حتي يأذن فيها رسول الله ..فقريش اتجننت ..مش مصدقة اللى بتسمعه، فيرجع بلده ويمنع التجارة لقريش.. وتبدأ قريش تعانى..مفيش أكل لمدة شهر، والتانى والتالت.. بقت مجاعة.. طيب حيعملوا ايه؟ حيستنجدوا.. طب بمين ؟ بمحمد صل الله عليه وسلم.. إنجدنا..إنقذنا يا محمد!! ويقولوا له يا محمد أنقذ قومك.. (دلوقتى بقيتوا قومه.. طب والحصار اللى استمر شهرين للنبى و المسلمين فى غزوه الأحزاب!! )

المهم بعتوا وقالوا :أنقذ قومك يامحمد قد أحلت بهم المجاعة وأمر صاحبك فليخلي بيننا وبين الحنطة (يعنى الحبوب)..فالنبي حيعمل إيه؟ ياترى حيذلهم؟ ماهم خلاص روحهم فى إيده ؟ لا والله مش حيعمل كدة صلى الله عليه وسلم ..ده بسرعة حيبعت لثمامة جواب ويقول له: يا ثمامة خلي بين قومي وبين تجارتهم (ويسميهم قومه.. يااا بتعمل كدة رغم كل اللى عملوه فيك يا رسول الله ) فثمامة يقول إيه؟ )

سمعاً وطاعة يا رسول الله، فيفتح التجارة تاني وتنتهى المجاعة فى قريش صلى الله على محمد، شوفتوا ياجماعة أخلاقه..كان ممكن يختارحاجة تانية، كان ممكن يفاوضهم.. لكن أبداً .. مرضيش يسيبهم جعانين ..صلى الله على محمد.

و يبعت النبى سرية تانية ، عشان يأدب قبيلة تانية بعد ما غدرت بيه، سرية إلى سيف البحر و دى منطقة ساحلية، ويطلع فيها سيدنا أبو عبيدة بن الجراح ومحصلش فيها أحداث كتير.. بس المسافة ليها كانت طويلة ، فالأكل اللي مع السرية خلص ومبقاش معاهم غير تمر ومن كتر الجوع بيحكى الصحابة وبيقولوا : كان أحدنا يأخذ التمرة فيمصها كما يمصها الصبي ثم يخرجها من فمه ويشرب عليها الماء (ياخد من التمرة السكر كأنه جلوكوز يعني عشان محدش يغمى عليه ، وفى نفس الوقت يفضل فيه تمر يتاكل)

بس إشتد بالسرية الجوع .. لكن المنطقة ساحلية زى ما قلنا، وهما ماشيين لاقوا سمكة عنبر إترمت على الشط فبيقول الصحابة : فقلنا نأكل (طبعا مكنتش لسة نزلت آية بتقول إن ميتة البحر حلال ، لحد الوقت ده كانوا فاكرين إن ميتة البحر حرام لأن ربنا قال : حُرِّمَتْ عَلَيْكُمُ الْمَيْتَةُ وَالدَّمُ وَلَحْمُ الْخِنزِيرِ [ المائده-3] فالسمكة دي طالعة من البحر ميتة، فقالوا: ميتة ..لا تأكلوها.. فقال أبو عبيدة: ميتة !! فقالوا :ولكننا سنموت من الجوع.. فبدأوا يشوفوا إنهم كدة في حكم المضطرين.. فأخدوا السمكة و شووها وكلوا منها حتتين عشان يسدوا جوعهم وبعد كدة خافوا يكملوا..

و زعلوا أوى انهم أكلوا .. فخدوا بقيت السمكة معاهم إلى النبي علية الصلاة والسلام وأبو عبيدة خايف.. أصله حاسس إنهم عملوا حاجة حرام) فيبدأ أبو عبيدة يحكى للنبى اللى حصل فتنزل إكراماً ليهم الآية دى ، قال تعالى : أُحِلَّ لَكُمْ صَيْدُ الْبَحْرِ وَطَعَامُهُ مَتَاعاً لَكُمْ وَلِلسَّيَّارَةِ وَحُرِّمَ عَلَيْكُمْ صَيْدُ الْبَرِّ مَا دُمْتُمْ حُرُماً وَاتَّقُوا اللَّهَ الَّذِي إِلَيْهِ تُحْشَرُونَ [المائدة:96] .. ففرحوا جداً جداً ..

بس أبو عبيدة و الصحابة كانوا برده مضايقين لأنهم عملوا حاجة مش مألوفة.. فالنبى عشان يطمنهم قالهم : أمعكم منه شئ؟ معاكوا من السمك لسه؟ فقالوا نعم. فقال هاتوا. فأكل النبى حتة منها عشان يأكد لهم إن يحسوا إنها مش حرام و يستريحوا.. ودي من أعظم طرق التعليم عند النبي صل الله عليه وسلم.. على فكرة يا جماعة ممكن النبي يعمل حاجة هو مش عايز يعملها لكن بيعملها بس عشان يبين حكمها الشرعي و يعلمنا..فممكن ييجى على نفسه في حاجة هو مش نفسه يعملها خالص، بس بيعملها عشان يقوينا عليها بالذات لو حاجة تقيلة على قلبك أو حاجة إنت مش قادر تتقبلها بسهولة..عارفين زي إيه برده؟

زى العرب زمان كانوا مش قادرين يتقبلوا فكره تحريم الله عزوجل للتبنى.. أصل كان التبنى منتشر .. و كان النبى عليه الصلاة و السلام متبنى زيد بن محمد اللى أصلا اسمه كان زيد بن حارثة بس النبى كان مسميه على إسمه فلما نزل تحريم التبني ، قال تعالى : ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ [سوره الأحزاب -5] فرجع زيد لأسمه الحقيقى " زيد بن حارثة".. فبكده خلاص مبقاش ابن النبى ..بس برده العرب والصحابة كانوا لسه شايفين إن زيد ابن النبى ومراته تبقى هي مرات ابن النبى ، فربنا عاوزهم يبطلوا العادة دي و ميخلطوش الأمور.. فربنا قال للنبي صلى الله عليه وسلم فى القرآن الكريم، قال تعالى : فَلَمَّا قَضَىٰ زَيْدٌ مِّنْهَا وَطَرًا زَوَّجْنَاكَهَا لِكَيْ لَا يَكُونَ عَلَى الْمُؤْمِنِينَ حَرَجٌ فِي أَزْوَاجِ أَدْعِيَائِهِمْ إِذَا قَضَوْا مِنْهُنَّ وَطَرًا ۚ وَكَانَ أَمْرُ اللَّهِ مَفْعُولًا (سورة الأحزاب -37)

الآيه دى بتحكى ان سيدنا زيد حصل بينه و بين زوجته زينب خلافات فقرروا الطلاق و أنفصلوا.. فربنا أمر النبى عليه الصلاه و السلام بالزواج من زينب عشان النبى يأكد للناس أن زينب مش محرمه عليا لأن زيد أصبح مش أبنى و التبنى خلاص تم تحريمه..و الدليل إنى اقدر أتجوز طليقه زيد .. و بكده كمان النبى بيأكد لأى حد له أبن بالتبنى أن خلاص الإبن ده مش إبنك و خلاص التبنى أتحرم و التشريع النبى أكده بطريقه عمليه بأمر من الله عشان الناس تتقبل الفكره.. و من هنا نفهم أن زواج النبى من زينب كان امر من الله و مش برغبه النبى و إرادته ..

عشان كده لازم نعرف أن النبى فى حاجات بيعملها عشان بس يعلمنا ..مش عشان له رغبه فيها.. دي تحل بعض الشبهات في الأحاديث وبالذات في البخاري، إن ممكن يعدي عليك حديث ، فتقول ليه النبي عمل الحاجة الفلانية دى؟! فخلي دايماً عندك الإحتمال بإنه صلى الله عليه وسلم بيكون مضطر يعمل حاجات عشان يثبّت حكم معين وشايف إنه تقيل على الصحابة، فبيعمله عملياً عشان يأكد لهم إن ده مش حرام..

نكمل بكرة إن شاء الله❤
#السيرة_النبوية_بالعامية_لنورهان_الشيخ