لو عرفتموه (الجزء الثاني 💜) مكتملة

116💜

الحلقة 116
لو عرفتموه لاحببتموه
يلا صلوا على النبى  :) 🌷
"حادثه الإفك " الإفتراء على ام المؤمنين عائشة زوجة رسول الله(ج5)

شفنا إمبارح النبى عليه الصلاة و السلام و هوه بيحاول يعمل رأى عام عشان يقدر يعاقب سلول المنافق ، و بدأ يسأل اكتر من حد عشان يضمن ان فى ناس مأيداه فى تبرئة عائشة..النبى محمد و حبيبته عائشة فى معاناة و ازمة و جرح كبير النبى ﷺ حزين ان حد مس حبيبته بكلمة و عائشة ميتة من العياط عشان مش قادرة تتخيل ان ممكن حد يفكر انها تعمل شئ يمس حبها لرسول الله.. و مش مصدقة انها حطته فى موقف صعب بالشكل ده..

و انقطع الوحى و مفيش وحى بينزل على رسول الله بالآيات.. و الأزمة دى حتستمر لمدة شهر ..طيب النبى عمل رأى عام و حيقف دلوقتى على المنبر و يبدأ يواجه الناس بالآراء الى معاه ويحاول أنه يكسب الناس فى صفه و يقف النبى على المنبر و يقول : أيها الناس إن هناك رجلاً بلغ أذاه الى أهل بيتى ووالله ما علمت عن عائشة إلا خيرا (هو بنفسه بيبرأها فده أكبر دليل أنه مكنش مصدق الكلام ده) ولقد ذكروا لى رجلاً من أصحابى (يقصد صفوان بن المعطل) وما علمت على صفوان الا خيراً (وكمان برأ صفوان ، يعنى النبى مش مصدق أن هما الاتنين يعملوا كده وبرأهم الاتنين)

و يكمل النبى كلامه و يقول : أيها الناس والله إن صفوان كان لا يدخل البيت الا معى (بيقولهم كده علشان الكلام اللى اتقال أن صفوان كان بييجى لعائشة البيت والنبى مش موجود .. شوفتوا الموقف الصعب الى اتحط فيه النبى.. اضطره انه يتكلم لحد تفاصيل صعبه ازاى( !!
فسيدنا سعد بن معاذ مش قادر يستحمل الكلام ده فقام وقال يا رسول الله فداك أبى وأمى وعِرضى إن كان هذا الرجل من الأوس (لأن سعد أوسى) مُرنى آتيك برأسه وإن كان من إخواننا من الخزرج فمرنى أفعل ما تشاء

(اصل المنافق بن سلول يبقى خزرجى ..فسعد نسب الأمر للنبى .. عشان يبان ان سعد قتل بن سلول الخزرجى تنفيذ لأمر النبى فبتالى مش حتحصل مشاكل بين الاوس و الخزرج ) فقام واحد تانى اسمه سيدنا سعد بن عُبادة ( وكان خزرجى بس هو حيحصل منه تصرف مش صح عشان خدته النعرة القبيلية فحيقوم يرد على سعد بن معاذ و يقول : كذبت يا سعد بن معاذ ، فأنت لا تستطيع أن تقتل رجلاً منا فأنا سيد الخزرج .. فيقوم واحد تالت اسمه أُسيد بن حضير (صاحب سعد بن معاذ .. وكان أوسى برده) فقال يا سعد بن عُبادة : كذبت أنت منافق تدافع عن منافق (أسيد يقصد ان مدام بتدافع عن سلول يبقى أنت اكيد زيه !) و كلمة من هنا و كلمة تانية من هنا فقامت خناقة ... والنبى مش ناقص ﷺ.. فنظر اليهم النبى ودمعت عيناه

و راح قايل: أبدعوى الجاهلية وأنا بين أظهركم ؟ (هترجعوا للجاهلية وانا فى وسطكم) اسكتوا اسكتوا ما لهذا جئت.. ما لهذا جئت.. فسكتوا ونزل من على المنبر يبكى :'(، و دخل الى بيته ... و فى حاجة مهمة حصلت هيه ان صفوان بن المُعطل " اللى اتهموه مع عائشة رضى الله عنها" لما عرف أن حسان بن ثابت نقل كلام عليه ،مقدرش يمسك اعصابه فأخد القوس بتاعه وراح ضرب حسان ،فراح حسان أشتكى للنبى، فجاب النبى صفوان و قال له : يا صفوان.. هل ضربته؟

فقال : نعم يا رسول الله ، فقال له و لماذا يا صفوان؟ (شوفوا رد صفوان وأخلاقه وأخلاق الصحابة مع النبى ) وطى صفوان وشه فى الأرض وقال يا رسول الله لقد أتهمنى فى عِرضى (مش قادر يقوله فى عِرضك !!) فقاله شتمنى فى عِرضى انا ، فقام النبى قال له : عليك دية يا صفوان، بس النبى هو اللى حيتحمل الدية و حيدفعها لحسان بن ثابت..شايفين اد ايه النبى بيشق على نفسه و بيتحكم فى اعصابه..

طيب دلوقتى النبى ﷺ تعبان .. و فى بيته لا بياكل و لا بينام .. طيب فين عائشة بقى ؟ عائشة فى بيت باباها أبو بكر الصديق و بتقول : والله ظللتُ ثلاثون يوماً لا يرقأ دمعى ولا أكتحل بنوم ولا آكل طعاماً ولا أشرب شراباً.. كنت أبكى ليلآ و نهارآ حتى ظن أهلى أن البكاء فالق كبدى .. فبتقول حتى إن كان فى اليوم الثلاثين دخلت عليا صاحبتى من الأنصار (واحدة صاحبتى) فرأت حالى فأشفقت علي.. فلم تتكلم و جلست تبكى معى فجلسنا نبكى سوياً وأبى يبكى وأمى تبكى..

حتى دخل علينا رسول الله ( و دلوقتى أول مواجهة فى الموضوع ده حتحصل بين عائشة و رسول الله)

و حنعرف تفاصيلها بكرة إن شاء الله❤
#السيرة_النبوية_بالعامية_لنورهان_الشيخ