لو عرفتموه (الجزء الثاني 💜) مكتملة

109💜

الحلقة 109
# لو عرفتموه لاحببتموه

يلا صلوا على النبي :)
رد شبهه تعدد زوجات النبى و الجمع بين 9 نساء (ج2)

اتكلمنا امبارح عن أن النبى عليه الصلاة و السلام مش زى باقى الرجال و أن الله عزوجل زى ما خصه بنزول الوحى، خصه كمان بالزواج و الجمع بين 9 نساء و كان له أسباب كثيرة... و قلنا أن تعدد الزواج ليس سنة بل رخصة..  طيب حنقول النهاردة حكمة كمان للتعدد و هى إثبات تمام الكمال للنبى صلى الله عليه وسلم..طب يعنى ايه ؟ أصل العلماء بيقولوا أن الزوجة لديها عين ناقدة, يعنى لو عايز تعرف حقيقة راجل اسأل زوجته هى أكتر واحدة عرفاه.. أنت مثلا دلوقتى بتسأل عن راجل, فممكن الناس تقولك ده رجل صالح و يشكروا فيه, و تيجى تسأل بقى زوجته حتلاقيها بتظهر حقيقته اللى بتبان جوة البيت.   فالرجل مهما تجمل أمام الناس, ميقدرش أبدا انه يتجمل أمام زوجته. فصدق النبى حين قال: "خيركم خيركم لأهله" الشخص الطيب بجد هو اللى طيب مع أهله فى البيت وده أحسن واحد فيكم..

طيب النبى صلى الله عليه و سلم بقى تزوج من تسع نساء، والتسعة أجمعوا على كمال أخلاق النبى و رقة معاملته و حسن خلقه المبهر و تعاونه..و كان يوصفوه بأنه "كان قرآنا يمشى على الأرض", فنفهم من ده أن لو النبى كان قاصد يتجمل أمام السيدة عائشة, فميقدرش يتجمل أمام السيدة حفصة بنفس الطريقة و هكذا مع الباقى.. فصدق و كمال النبى كان فى ثبات معاملته بنفس الاخلاق مع كل زوجاته. 

حاجة كمان مهمة جدا .. يعنى إيه الحديث المتواتر.. الأحاديث النبوية وصلت لنا إزاى؟ عن طريق التواتر .. و دقة الأحاديث دى مدروسة فى علم اسمه علم الحديث .. و الحديث المتواتر ده أعلى  درجات الصحة فى الحديث..طب ليه؟ عشان شروطه بتحدد ان 9 أو 10 أشخاص ينقلوا كلام النبى مباشرة و يكون كلامهم متطابق .. يعنى مثلا النبى يقول حديث, فيسمعه 10 من الصحابة, و كل واحد منهم يبلغ 10 تانيين و هكذا بيستمر التواتر لحد ما يوصل لنا حديث النبى عليه الصلاة و السلام ..  فبسبب الشرط الدقيق ده لا يمكن أن الأعداد دى كلها تكذب أو تألف الحديث. طيب وده علاقته إيه بالتعدد؟..النبى متزوج 9 فالنبى لما يقول حديث, التسع زوجات يتفقوا عليه, وكل زوجة تبلغه ل 9 أشخاص, وكل شخص من ال9 يبلغ 9 تانيين, فلو كان عدد نساء النبى اقل من 9 مكنوش حيبلغوا حد التواتر..

و النبى محمد هو نبى آخر الزمان يعنى مفيش نبى تانى حيجى للبشرية من بعده .. فعشان كدة لازم كل اللى يخصه يوصل لنا بدرجة عالية و موثوق منها..و دى حكمة ربنا من اختيار 9 زوجات بالذات عشان الأحاديث اللى حينقلوها تبلغ حد التواتر..  طيب كمان فى حاجه مهمه جدا بتثبت أن تعدد زوجات النبى كان بأمر إلهى أو غرض سياسى أو إجتماعى هو أن الوحيدة اللى النبى اختارها بنفسه زوجه هى "السيدة خديجة بنت خويلد". فاكرين زواج النبى من السيدة عائشة؟ لما النبى قال لها: "يا عائشة انى أريتك فى المنام ثلاث, يأتى بك الملك فى سرقة من حرير, و يقول يا محمد هذه زوجتك فى الدنيا و الآخرة, فأقول إن يكن هذا خير من عند الله يمضه" ,

ويقول ابن عباس: "رؤيا الأنبياء وحى", يعنى زواج النبى من السيدة عائشة كان أمر من الله..والدليل أن تعدد زوجات النبى أمر إلهى يخص النبى فقط هو أن غير مسموح للنبى أنه يطلق واحدة من زوجاته و لو واحدة ماتت مينفعش يتزوج مكانها واحدة تانية زى أى مسلم .. ربنا قال للنبى: "لَّا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ اللَّهُ عَلَىٰ كُلِّ شَيْءٍ رَّقِيبًا" سورة الأحزاب ..يعنى ربنا أمر النبى انه ميطلقهمش ...

طيب هل فى زوج من المسلمين ربنا أمره بعدم الطلاق؟ لا .. طيب يبقى النبى زى ما ربنا خصه بحكم الزواج من تسع نساء .برده خصه بحكم أنه ميطلقش ولا واحدة فيهم..فده دليل أن كل ده كان خصائص نبوية..زى نزول الوحى، هو ينفع أى حد ينزل عليه الوحى ؟ لا طبعا دى أمور تخص النبى فقط .. كذلك برده زواج النبى من 9 نساء كان من خصائصه وليست سنة تتبع.. مينفعش حد يتزوج تسعة غير رسول الله فقط..  كمان النبى بس من حقه أن سيدة تهب نفسها له و تعرض نفسها عليه للزواج, يقول الله فى القرآن: "وَامْرَأَةً مُّؤْمِنَةً إِن وَهَبَتْ نَفْسَهَا لِلنَّبِيِّ إِنْ أَرَادَ النَّبِيُّ أَن يَسْتَنكِحَهَا خَالِصَةً لَّكَ مِن دُونِ الْمُؤْمِنِينَ قَدْ عَلِمْنَا مَا فَرَضْنَا عَلَيْهِمْ فِي أَزْوَاجِهِمْ وَمَا مَلَكَتْ أَيْمَانُهُمْ لِكَيْلَا يَكُونَ عَلَيْكَ حَرَجٌ وَكَانَ اللَّهُ غَفُورًا رَّحِيمًا" سورة الأحزاب. يعنى دلوقتى البنت لا تهب نفسها لأحد, ولا ينبغى أن تعرض الزواج على أحد, يعنى دى من خصائص النبى فقط, و رغم كدة النبى لما كانت بتيجى امرأة توهب نفسها له.. كان بيرفض أنه يتزوجها إلا امرأة واحدة فقط و هى السيدة "ميمونة بنت الحارث" وهنحكى قصتها يوم فتح مكة بعد كدة.. 

فى حاجة مهمة لازم نعرفها و هى ان فى حديث عن السيدة عائشة بيقول: "والله, ما مات رسول الله إلا و قد أحلت له النساء" دة معناه إيه؟ إحنا قولنا أن النبى كان بيتزوج بأمر إلهى.. وربنا أمره أنه لا يطلق و لا يتزوج تانى أبدا، فالسيدة عائشة قالت أن النبى قبل ما يموت بفترة ربنا سمح له بالزواج يعنى يا محمد لو عايز تتزوج لك الحرية فى الزواج .. بس النبى اختار أنه ميتجوزش تانى.. طب ليه ربنا سمح له بالجواز بعد ما أمره بأنه ميتجوزش؟

عشان ربنا حب يبين أن النبى هو اللى رفض الزواج بعد التسع زوجات بإرادته.. طيب إيه الحكمة من انه يبان أن النبى رفض بإرادته؟ الحكمة هى أن ربنا بيحمى النبى من أن أى حد يقول أن النبى متجوزش عشان بس ربنا كان مقيد النبى بال9 زوجات فقط.. فيقولوا ان محتمل أن النبى يكون كان عايز يتجوز 20 أو 30 ست بس كان غير مسموح له بده..فربنا بعد كدة سمح للنبى بالزواج بعد ال9 عشان يحميه من الكلام ده ♡، ويخلى البشرية تعرف قد إيه النبى كان لا يقبل أبدا التعدد بهدف الرغبة..

و على فكرة النبى كان من السهل جدا أنه يتزوج لأنه كان جميل وكان لا يشيب, على الأقل كان ممكن يقبل السيدات اللى عرضوا نفسهم عليه(وهبوا نفسهم له) لكن النبى اختار أن لا يتزوج بعد ال 9 زوجات أبدا.. صلى الله عليه و سلم   و بكدة خلصت رد شبهة التعدد♡

ميعادنا الحلقة الجاية إن شاء الله  ❤
#السيرة_النبوية_بالعامية_لنورهان_الشيخ