لو عرفتموه (الجزء الثاني 💜) مكتملة

194💜

# لو عرفتموه لاحببتموه
يلا صلوا على النبى :)
ماريا القبطية "أم إبراهيم بن النبى محمد صلى الله عليه و سلم "(ج4)

ماريا بتولد وتروح لها بسرعه اختها سيرين .. المدينة كلها كانت فرحانة والنبى عرف الخبر فبسرعة راح لها .. وأول ما النبىﷺ دخل كان ابنه لسه مولود فأخده النبىﷺ وحضنه وسماه ابراهيم تيمناً بسيدنا إبراهيم عليه السلام ويشاء الله انه يكون ابراهيم ده آيه فى الجمال وكان شبهه النبى محمد اوى .. النبىﷺ حبه حب غير طبيعى وكان يشيله وفرحان بيه اوى ..

ويبدأ ابراهيم يكبر ويبقى شبه النبىﷺ أكتر كل يوم و يعدى شهر وأتنين لحد ما يبقى ابراهيم عمرة سنه و 8 شهور .. وقبل الفِطام بشهرين تيجي لإبراهيم حمى شديدة هيسخن وتجيله حمى شديدة ، وتبدء مارية تبكى وتيجى سيرين جرى وتلاقى شكل الولد متغير والسخونية مش بتروح فيبعتوا للنبىﷺ بسرعة .. فالنبىﷺ ييجى جرى فيدخل يبص على ابراهيم فيفهم .. فييجى ياخد ابراهيم من مارية .. مارية ماسكة فى ابراهيم حضناه وبتعيط .. فأخده النبىﷺ وبدء إبراهيم يحشرج الروح هيموت فى صدر النبىﷺ فنظر النبىﷺ له وبكى وقال : يا بُنى أما إنى لا أملك لك من الله شيئا ( مقدرش أعملك حاجة ) ويبدء إبراهيم يحشرج فى صدر النبيﷺ والنبى يبكى ( ابنه بيموت ) فواحد من الصحابة جه جمب النبى فقال له: أتبكى يا رسول الله ؟ فقال النبى نعم إنما هى رحمة يضعها الله فى قلوبنا ..
ويبدء جسد إبراهيم يرتعش وتخرج روحه رضى الله تعالى عنه وهو فى صدر النبيﷺ ويموت ابراهيم فتتقل راسه ويبرد جسمه فيعرف النبى انه مات فيبكى النبىﷺ ويقول أما إن العين لتدمع وإن القلب ليحزن ولا نقول الا ما يرضى ربنا وإنا على فِراقك يا ابراهيم لمحزونون .. النبىﷺ دفن أولاده كلهم الا فاطمة لأنها ماتت بعديه ب6 شهور و وقت وفاته صلى الله عليه و سلم هيقولها انتى هتموتى بعدى.. فالنبىﷺ حتى كان عارف أنها ميتة .. فأد ايه استحمل و صبر صلى الله على محمد ❤.

و يقول النبى إن الله عز وجل يُنادى يوم القيامة على أطفال المسلمين الذين ماتوا قبل الحُلم ويقول: ادخلوا الجنة فيقولون: يا رب لا ندخلها حتى يدخلها أباؤنا وأمهاتنا فيقول الرب: ادخلو الجنة أنتم و آبائكم وأمهاتكم .

أشد بلاء يا جماعة فقد الأولاد مهما كان اللى فقدته عزيز على قلبك لكن أشد فقد هو فقد الأولاد عشان كده أعظم أجر هو أجر فقد الأولاد ربنا يعافى أولادنا أجمعين ... فيبكى النبى ﷺ ويقول لأبراهيم وهو ميت فى حضنه كلمة عجيبة أوى يقول له : والله يا ابراهيم لولا أن وعد الله حق لكان حزننا غير هذا الحزن ( بيقول له لولا أن أنا واثق و متأكد من وعد ربنا أن قدر ربنا اكيد لمصلحتى و أن ربنا هيعوضنى فى الجنة لكان حزنى هيبقى حاجة تانية خالص .. حاولوا تقولوها لنفسكم فى البلاء لما يحصلكم بلاء شديد و تحسوا أن الدنيا ضيقة وأنكم لوحدكم وأنكم تعبانين قولوا كده.. لولا أن وعد الله حق لكان حزن غير هذا الحزن كنت هزعل اوى بس أنا عارفة يا رب أنك بتعمل كده علشان مصلحتى)

لما الطفل يموت يقول الله سبحانه و تعالى فى الحديث القدسى : يا ملائكتى أقبضتم ولد عبدى ؟ وهو أعلم سبحانه وتعالى ، فتقول الملائكة بلى يا رب .. يقول يا ملائكتى أقبضتم فلذة فؤاد عبدى؟ فيقولون نعم يارب..فيقول الرب عز وجل يا ملائكتى ماذا قال عبدى ؟؟ قالوا: حمدك و استرجعك " قال انا لله وانا اليه راجعون ..فيقول ياملائكتي ابنوا له قصراً وسموه بيت الحمد
ماريه حزنت علي وفاة ابراهيم حزن شديد .. والنبي عليه الصلاة والسلام قال :  يُكمل إبراهيم الآن رضعته فى الجنة ..
ويموت ابراهيم و يتدفن فى البقيع .. و حيموت النبى بعد إبنه ابراهيم ب 6 شهور و مارية هتموت بعد النبى ب حوالى 5 سنين و من يوم ما هيموت ابنها مش هتخرج من بيتها أبداً إلا عشان تزور إبنها فى البقيع و بس و لما تموت حتُدفن بالبقيع رضى الله تعالى عنها وأرضاها ..
و زى ما قولنا أن بسبب السيدة ماريا.. مصر أخدت فضل و منزلة عند رسول الله , فقال النبى عليه الصلاة والسلام: اذا فتحتم مصر فأستوصوا بأهلها خيراً فإن لهم نسباً وصهرا ❤ ( مين النسب ؟ مارية ( فلولا مارية أمنا العظيمة مكنش هيبقى لمصر فضل فى السنة النبوية  طبعاً القران مدح مصر بس أحنا بنتكلم عن السنة النبوية) .... فى موقف حصل بعد ما مات ابراهيم عليه السلام ان حصل كسوف للشمس فقالوا كسفت الشمس لموت ابراهيم ..فنفى النبى ذلك و قال ان الشمس و القمر آيتان من آيات الله لا يخسفان لموت أحد .. فقال النبى ده حصل قدراً وصادف موت ابراهيم ابنه ..

نكمل بكرة إن شاء الله ❤
#السيرة_النبوية_بالعامية_لنورهان الشيخ