لو عرفتموه (الجزء الثاني 💜) مكتملة

131💜

#لو عرفتموه لاحببتموه
يلا صلوا على النبى
صلح الحديبية (ج2)

شفنا امبارح إن قريش كانت عائق كبير بين النبى ﷺ و الدعوة .. و كانت قريش بتمنع باقى القبائل فى إنها تسمع للنبى عليه الصلاة و السلام.. و رغم كدة النبىﷺ مش حيحارب قريش و لكن حيسعى لمعاهدة سلام بينه و بينهم ..

النبىﷺ حيشوف رؤية فى المنام .. إيه تفاصيلها ؟ النبىﷺ شاف نفسه لابس لبس الإحرام و رايح مكة يعمل عمرة ♡.. و بيقول: لبيك اللهم لبيك..( يا جماعة إحنا دلوقتي فى سنة 6 هجرية و داخلين على 7، يعني النبيﷺ بقاله 6 سنين محروم من مكة.. فتخيلوا السعادة اللي النبي و الصحابة هيكونوا فيها لما النبى عليه الصلاة و السلام يبشرهم بالرؤية دى )

فى بقية الرؤية النبى بيشوف إن كل الصحابة وراه و بيطوفوا حوالين الكعبة .. فيصحى النبى ﷺمن النوم و يفهم الرسالة.. و زى ما إحنا عارفين إن رؤيا الأنبياء حق..
فيروح النبىﷺ و يقول للصحابة: " أيها الناس إني رأيت في المنام أني مرتحل للعمرة فارتحلوا..إنتم متخيلين قلب الصحابة؟ ياا.. معقول حنطلع عمرة ؟!

يا جماعة ده اللي راح مننا الكعبة و عمل عمرة واحدة بيرجع منها و قلبه متعلق بها هناك.. و نفتح التلفزيون و نتفرج على الكعبة و ندعى و نقول: يارب رجعني... فما بالكم بالصحابة اللي كانوا عايشين هناك و كانت مكة دى هى بلدهم !! فتخيلوا قد ايه هم كانوا مكسورين من الحزن و تخيلوا فرحتهم حتكون إزاى لما النبىﷺ يقول لهم يللا كله يجهز إحنا طالعين عمرة ..

المهم  الصحابة روحهم المعنوية ارتفعت جداً.. فيبدأوا يقولوا لبيك اللهم لبيك.. و يبدأوا يجهزوا نفسهم للعمرة.. و يحصل حاجة عجيبة جداً ، الصحابة حيلاقوا النبىﷺ بياخد معاه خرفان.. فالصحابة مش فاهمين هو النبيﷺ واخد معاه خرفان ليه، إيه علاقة العمرة بمعاهدة السلام مع مكة؟ و ليه النبى واخد خرفان؟.. قال تعالى : " وأَتِمُّوا الْحَجَّ وَالْعُمْرَةَ لِلَّهِ فَإِنْ أُحْصِرْتُمْ فَمَا اسْتَيْسَرَ مِنَ الْهَدْي " (البقرة - 196) يعني لو اتمنعتوا و ما قدرتوش تعملوا عمرة فأذبحوا الهدى ..يعنى الخرفان فداء.. فالرسول ﷺحاطط إحتمال أن ممكن قريش تمنعه هو و الصحابة من الدخول للحرم..

حياخد النبى ﷺو  الصحابة الخرفان و كمان حيطلعوا من  غير سلاح .. طيب ليه؟ أصل النبىﷺ عايز يحط قريش فى موقف محرج .. بحيث أن لو قريش حاولت تقاومهم فساعتها تبقى قريش بتتعرض لناس مسالمين بدون سلاح..

طيب خرج النبىﷺ و المسلمين لمكة..  يا ترى حيقدر النبى عليه الصلاة و السلام  يعمل معاهدة سلام مع قريش؟
بصوا النبيﷺ وضع احتمالات لرد فعل قريش، الإحتمال الأول : إن قريش تمنع المسلمين من العمرة و ده الغالب ، و ده اللى سيدنا محمد عايزه ..طيب ليه؟ أصل قريش واخدة زعامة و مكانة وسط القبائل، فلما تصد حد عن بيت الله الحرام فكدة قريش حتبقي عنصرية و باقى العرب حيتضايقوا من موقف قريش لأن المسلمين مش معاهم سلاح.. و الصحابة اللي طالعين العمرة 1400 صحابي فالعرب كلها حتتفرج ، و حيشوفوا قريش و هيَّ بتمنع محمد بن عبد الله بن عبد المطلب اللي جده حفر بئر زمزم .. فمعقول قريش تمنعه من دخول الحرم !! فبكده قريش حتفقد زعامتها وسط قبائل العرب و ساعتها يمكن العرب يتعاطفوا مع المسلمين و حيبدأوا  يسمعوا الدعوة بتاعة النبى.ﷺ. و هو ده المطلوب💪🏼

الإحتمال التاني: إن قريش توافق على دخول النبى لأداء العمرة.. و لو ده حصل فساعتها باقى قبائل العرب حيقولوا ان خلاص محمد و قريش اتصالحوا فبالتالى مش حيخافوا من قريش و  حيسمعوا دعوة النبىﷺ.. و ده المطلوب💪🏼.

الإحتمال الثالث: إن قريش لما تلاقى أن المسلمين جايين فتحاربهم ، فساعتها العرب كلها حتشوف أن قريش طالعة تحارب ناس جاية تعتمر و كمان مش معاهم سلاح ،فحيتعاطفوا مع النبى ﷺو يمكن يتحالفوا معاه ضد قريش..

الإحتمال الرابع: إن قريش تتحط فى موقف محرج و تشوف إن الحل هو رجوع المسلمين بهدوء و ساعتها بقى المسلمين يشترطوا إن قريش تعمل معاهم معاهدة سلام .. فبكل الإحتمالات اللى قلناها دى حنشوف ان النبىﷺ كسبان جداً و بيحقق هدفه من غير  نقطة دم واحدة ..بس خدوا بالكوا الصحابة لحد دلوقتي مش فاهمين القصة دي و مش عارفين النبىﷺ ناوى على إيه، هم بس فرحانين جداً بالعمرة ♡ وإنهم حيشوفوا بلدهم بعد  6 سنين هجرة..

طيب خرج النبىﷺ و الصحابة برة المدينة و بدأوا في التلبية (لبيك اللهم لبيك..لبيك لا شريك لك لبيك ) المسلمين ماشين ماشين.. و في نص الطريق  قريش عرفت إن المسلمين جايين على مكة ... فأتخضوا جداً و قالوا إن لو محمد وصل لحد باب مكة ساعتها مش حينفع نمنعه من الدخول لأن ده حيدمر زعامتنا قدام القبائل.. فقريش فكرت و قالت أن الحل الوحيد إن يتمنع محمد من نص الطريق .. من قبل ما يوصل لمكة اصلاً.. شايفين  قريش ذكية قد إيه .. طيب حيعملوا ايه ؟

حنعرف بكرة إن شاء الله ❤
#السيرة_النبوية_بالعامية_لنورهان_الشيخ