لو عرفتموه (الجزء الثاني 💜) مكتملة

166💜

# لو عرفتموه لاحببتموه
يلا صلوا على النبى :)
#فتح_مكة (ج6)

جيش المسلمين فى طريقة لمكة .. 10 آلاف جندى مسلم .. طبعاً كفار قريش لا يمكن تتصور إن كل العدد ده على بعد أربع أميال من مكة.. طيب مين طالع مش قادر يصبر و عايز يعرف الأخبار؟ سيدنا العباس عم رسول الله.. و ده كان مسلم و كاتم إسلامه علشان يساعد المسلمين و يبقى زى المخابرات وسط كفار قريش ..
بس مابقاش قادر يقعد كل ده بعيد عن النبى عليه الصلاة و السلام فخرج من مكة و جمع ولاده و مراته و هاجر للمدينة فقابل النبي ﷺ فى الطريق. . و حضنه النبى عليه الصلاة و السلام و قال له : يا عمى أنت آخر مهاجر .. فلا هجرة بعد فتح مكة ..سبحان الله لو سيدنا العباس كان أتأخر شوية ماكانش هيتكتب من المهاجرين.. هو آه صحابي بس ماكانش هيبقي مهاجر،،
قال تعالى :{ لاَ يَسْتَوِي مِنْكُمْ مَنْ أَنْفَقَ مِنْ قَبْلِ الْفَتْحِ وَقَاتَلَ أُولَئِكَ أَعْظَمُ دَرَجَةً مِنَ الَّذِينَ أَنْفَقُوا مِنْ بَعْدُ وَقَاتَلُوا وَكُلاًّ وَعَدَ اللهُ الْحُسْنَى وَاللهُ بِمَا تَعْمَلُونَ خَبِيرٌ} [الحديد: 10]
علشان كده لازم ما نتأخرش على الطاعة عشان ثوابها ما يقلش أو يضيع ثوابها الكبير مننا..

دلوقتى خلاص إنضم العباس لجيش النبىﷺ.. و النبى ﷺقرب قوى من مكة .
هتعمل إيه يا رسول الله؟ حعمل حرب نفسية.. طب إزاى؟.. حيأمر النبى ﷺ الجيش.. إشعلوا النيران ،،عشرة آلاف شعلة نار فى إيدهم..منورة بالليل ..  النبىﷺ ليه عمل كده؟ علشان أهل مكة يخافوا و يستسلموا..  و ده أكبر دليل على إن النبى ﷺ عايز يفتح مكة بسلام بدون نقطة دم واحدة..

فالعباس ركب بغلة النبىﷺ و راح يفهم أهل قريش الوضع عشان ما يقلبوهاش حرب .. فيقابل مين؟ أبو سفيان .. أصل الاخبار إنقطعت عن مكة ..فطلع بنفسه يشوف فى إيه ! و طبعاً ميعرفش إن النبيﷺ على أبواب مكة..المهم طالع أبو سفيان و معاه حكيم بن حزام ،،فشاف النيران فدب الفزع جواه فقال أبو سفيان: ما هذه النيران!!، فقال حكيم: لا أدري لعلها  قبيلة خزاعة.. فقال أبو سفيان : خبت و خسرت فإن خزاعة أقل من ذلك وأذل ،، فقال: لعلها قبيلة هوازن ، قال :خبت وخسرت هوازن أقل من ذلك و أذل ..

فيسمعهم العباس رضى الله عنه و يقول: يا أبا حنظلة (دى كنية أبو سفيان) فقال أبو سفيان من الصوت ؟ فقال أنا العباس.. فقال أبو سفيان ..لمن هذه النيران؟  فقال: هذا رسول الله و معه عشرة آلاف مسلم من العرب لفتح مكة، و والله لو فتحها عنوة لهلكت قريش... يا أبا سفيان بيدك الأمر ،فقال ماذا أفعل ؟ قال العباس: سلم مكة للنبى محمد الآن!..
فقال: سأفعل!!
((ياه .. إنتم متخيلين ..شايفين كام صحابى إتقتل و إتعذب فى قريش.. قد إيه الرسولﷺ أتأذى من قريش..دلوقتى جه يوم النصر للمسلمين و جبر الخاطر )) فرد العباس على أبو سفيان و قال: إذاً تعالي معي..

أبو سفيان كان  خايف أنه يتقتل ف علي بن أبي طالب..  يقول له : يا أبا سفيان لا تخف إذهب إلى رسول الله  ، فقل له كما قال إخوة يوسف ليوسف: {قَالُوا تَاللَّهِ لَقَدْ آَثَرَكَ اللَّهُ عَلَيْنَا وَإِنْ كُنَّا لَخَاطِئِينَ} [يوسف: 91]. فإنَّه لا يرضى أن يكون أحد أحسن منه قولاً..

وافق أبو سفيان إنه يسلم مكة و ركب ورا العباس .. مين قائد المعسكر اللى فيه النبىﷺ ؟ سيدنا عمر بن الخطاب.. طب و حيعمل إيه لما يشوف أبو سفيان ،

حنعرف المرة الجاية إن شاء الله ❤
#السيرة_النبوية_بالعامية_لنورهان عصام ال الشيخ