لو عرفتموه (الجزء الثاني 💜) مكتملة

78💜

الحلقة78
لو عرفتموه لاحببتموه
يلا صلوا على النبي :)
رد شبهة زواج السيدة عائشة من رسول الله في سن 9 سنوات (ج1 ❤ )

نبدأ بقى في موضوع زواج النبي من عائشة.. عن هشام بن عروة عن عائشة أن عائشة قالت تزوجني رسول الله و أنا بنت تسع سنين... طيب إزاي!! دي كده تبقى طفلة صغيرة؟؟ لأ.. تعالوا بقى نتكلم بشكل علمي و منطقي.. في مستشرق ده واحد من الأجانب متخصص في تاريخ بلاد الشرق و كان اسمه بودلي و كان غير مسلم.. بودلي عاش ومات غير مسلم وعمل كتاب موجود في كل حتة بيقول فيه: لقد أخطأ الغرب إذ يقيسون زواج محمد على مقاييس زماننا هذا .. فهم يهدرون فروق البيئة والزمن والثقافات (بودلي مش مؤمن أن سيدنا محمد رسول بس مؤمن إن محمد إنسان عظيم و بيقول بودلي إن مينفعش أنك تقيس ظروف جواز إنسان من 1400 سنة على ظروف حياتك النهاردة بدون ما تهتم بفروق الزمن والبيئة والثقافات)

يعني مثلاً في المدن هنلاقي إن جرت العادة إن البنت بتتجوز بعد ما تخلص كلية في المتوسط يعنى.. لكن مثلاً في الأرياف معندهمش كليات فبرضه في معظم الأحوال هنلاقي إن البنت بتتجوز بعد الثانوية مثلاً.. طيب لو رجعنا لبلد من 1400 سنة.. مكنش فيها لا جامعات ولا مدارس يبقى التدرج الطبيعى و النسبة و التناسب هنلاقي إن البنت هتتجوز بعد البلوغ على طول... طيب هل الرسول في زواجه من عائشة معارضة للتقاليد بتاعت بلده وقتها؟ طب تفتكروا هل لو كان النبي عمل حاجة عيب أو حاجة غير إعتيادية و اتجوز طفلة لا تصلح للزواج هل كان كفار قريش سكتوا؟؟
طبعاً مستحيل إنهم يسكتوا.. بالعكس.. دول كانوا هيؤذوا النبي و كانوا زمانهم بيحاربوه.. و إحنا على مدار السيرة شفنا إن قريش كانت بتبذل أقصى جهدها عشان تؤذي النبي ولو كان وقتها زواج النبي من عائشة في سن صغير عيب أو خطأ، كان زمان قريش مفوتتش الفرصة دي للطعن في رسول الله. إذاً النبي لم يخالف تقاليد مجتمعه وقتها لأن ده كان العُرف السائد في المجتمع.. أبو سُفيان شخصياً كان متجوز كده.. لأن ده كان السائد في المجتمع.. و على فكرة النبي لم يعارض أعراف مجتمعه بس.. لأ.. ده كمان لم يعارض الأعراف العالمية المحيطة بيه..

اليهود مثلاً هنلاقي السيدة صفية بنت حُيي بن أخطب (بعد كده هتُسلم وتبقى أم المؤمنين و زوجة رسول الله) النبي تزوج صفية و هي عندها 14 سنة.. طيب دي مش المشكلة.. المشكلة و المفاجأة إن النبي كان تالت زوج لصفية يعنى لو حسبناها تقريباً نلاقى أن أول زواج لصفية كان سنها في نفس سن زواج السيدة عائشة يعنى تسع سنين.. و بعدين اتجوزت تاني و كان التالت رسول الله وكانت وصلت لسن ال 14 سنة..

طيب تعالوا نروح للعالم الغربي، حنلاقي إنه ثابت في كتب التاريخ الغير عربية إللي بتؤرخ التاريخ الرومانى والتاريخ الفارسى إن في سنة 545 م اتجوز الملك البيزنطى الثانى أليكسيوس الثانى من الأميرة أجنيس وهي عندها تسع سنين، و في سنة 560 م الملك البيزنطى أيزك اتجوز الأميرة المجرية مارجريت وهي عندها تسع سنين.. طيب تخيلوا إن ده كان عادي و وقتها كان بعد النبي بكتييييير، فما بالك بوقت زواج النبي؟!.. أكيد وقت زواجه كان ده شئ عادي أكتر و أكتر لإنه كان في زمن أقدم... طيب لو أننا اقتنعنا أن زواج عائشة وهي عندها تسع سنين شئ عادى و مقبول وقتها، هل عائشة وهي في السن ده كانت ناضجة كفاية؟ يعني هل كانت امرأة ناضجة ولا طفلة صغيرة لا تصلح للزواج وقتها؟

حقولك.. أول حاجة لازم نكررها إن ما ينفعش نقيس ظروف زمان بظروف النهاردة، زمان البنات وقتها كانت بتحيض بدري غير دلوقتى، خصوصاً المجتمعات الجبلية والصحراوية و اللي قال كده "بودلي" برده.. بودلي قال في كتابه إن النساء في هذا الحين في المجتمعات الصحراوية كانت تحيض مبكراً و قال إن الكلام ده موجود في ريف أسبانيا وفي شرق أوروبا لذلك كان الزواج فيها مبكراً (عارفين زي دلوقتى لو جبتي بنت بدوية عندها 10 سنين وبنت من القاهرة مثلاً و تكون في نفس السن هتلاحظوا الفرق الكبير ما بينهم في الجسم و في نمو البدن و علامات الأنوثة واضحة على البدوية وعلامات الطفولة لسه واضحة على البنت التانية، لأن البيئة الصحراوية بتساعد على النمو السريع فلو بنت سنها تسع سنين حتكون حاضت.. طيب كده اتبقى نقطة مهمة جداً لو إحنا فهمنا أن البنت في مناطق معينة بتنضج مبكراً و بتحيض.. طيب فهل ينفع بقى إني أجي دلوقتى أجيب بنت عندها تسع سنين و أجوزها لمجرد إنها حاضت؟ طبعاً لأ.. دي جريمة في حق الطفولة ولا يجوز وحرام والقانون إللي محطوط عندنا في مصر بتجريم و تحريم ده.. قانون صح جداً.. طب أمال السيدة عائشة اتجوزت في السن ده إزاي؟ عائشة لما اتجوزت في السن ده مكنتش ناضجة جسمانياً بس.. لأ.. كانت ناضجة ذهنياً ونفسياً والمجتمع كله حواليها كان متقبل هذا الأمر.

لكن النهاردة لو بنت حاضت و هي عندها تسع سنين فهي بتبقى ناضجة جسمانياً فقط لكن مش ناضجة ذهنياً و لا فكرياً والمجتمع إللي حواليها مش متقبل هذا الوضع ..فلا يجوز.. و مينفعش أبداً إنها تتجوز، لأن البنت الصغيرة اللي عندها تلات سنين أيام الرسول كانت تعرف تقول أبيات شعر و بتتكلم لغة عربية فُصحى.. النهاردة البنت الصغيرة ممكن تكون مش قادرة تتكلم حتى.. و أهلها لو اتأخرت في الكلام يخدوها لدكتور تخاطب ^_^ ..
الولدين اللي قتلوا أبو جهل كان سنهم حوالي 10 سنين.. و كان أقصى أحلامهم إنهم يقتلوا قائد جيش الكفار إللي بيسب رسول الله عليه الصلاة و السلام.. ففي فرق كبير جداً بين أطفال و بنات زمان عن دلوقتى.. زمان كانت البنت الصغيرة فصيحة.. بليغة.. لكن دلوقتي لو بنت في السن الصغير ده.. اتجوزت.. فده إجرام في حق الطفولة لأنها نضجت جسمانياً فقط لكن لم تنضج عقلياً ولا ذهنياً ولا مجتمعياً و لأن المجتمع حواليها مش متقبل فكرة زواجها في السن ده.. كمان فى دين الإسلام معروف أن أي تقليد بيتعمل في البلد .. لو مش بيخالف الشريعة إذن فهو دين و شرع يخص البلد..
طيب في ناس سألت ليه النبي  محددش للناس سن معين للزواج و نلتزم بيه؟ لأن النبي لو كان عمل كده كان حيبقى ظلم فئة من الناس لأن إحنا لسه قايلين إن كل بيئة وكل زمان ليه أوضاعه الخاصة بيه فما اقدرش أعمم وأظلم ناس في بيئات أخرى أو أزمنة أخرى، فالنبي سابها مفتوحة..

يعنى إحنا عندنا في مصر ..في المدن جرت العادة و المجتمع أن البنت بتتجوز فى سن العشرينات إذن فهو دين و حنتبعه.. أما السن ده عند الصعايدة و الفلاحين البنت لو فى سن العشرين بدون جواز يبقى خلاص فاتها سن الجواز ^_^ ..لأن عندهم البنت بتتجوز في سن 14 سنة فأنا لو ألزمتهم بقانون المدينة انهم يتجوزوا بعد العشرين فساعتها حبقى  ظلمتهم..

ففي المدينة من حقي كمجتمع أحدد سن و أتجوز فيه.. و لو أنا فى مجتمع البدو سن الجواز عندى 15 مثلا.. يبقى ساعتها مفيش مشكلة   مادام ده سن الجواز عندكم ..بس الأول نشوف هل البنت ناضجة عقلياً و مهيئة أنها تبقى مسئولة عن أسرة؟..اه ناضجة.. يبقى خلاص اتجوز و دي تقاليد  و ظروف مجتمعك.. فكان المجتمع و البيئة اللي عاشت فيهم السيدة عائشة عامل من العوامل الأساسية لزواجها في سن تسع سنين و كانت مؤهلة عقلياً و بدنياً و كان عرف سائد في العالم و ليس فقط عند العرب..
نكمل بكرة إن شاء الله❤
#