لو عرفتموه (الجزء الثاني 💜) مكتملة

182💜

#لو عرفتموه لاحببتموه
يلا صلوا على النبى :)
#غزوة_تبوك (ج2)
فقال ﷺ: أبشر إن الله عزوجل قد قبل صدقتك ♡

شفنا المرة اللى فاتت النبى عليه الصلاة و السلام وهو بيجهز جيش غزوة تبوك أو العسرة و وقف على المنبر و قال: من يجهز جيش العسرة؟و يقول: أيها الناس تصدقوا.. فيسمع سيدنا عمر بن الخطاب نداء النبى.. فيقول فى نفسه : " اليوم أسبق أبا بكر"..(بيتنافس معاه على طاعه الله عزوجل ^_^) فدخل سيدنا عمر بيته و قسِّم كل حاجة يمتلكها بالنص.تخيلوا!! و خلى نصها لله و ساب نصها له و لأهله..طبعا صعب جدا ان حد بسهوله يتصدق بكل ده.. يعنى قسم أكله وشربه و فلوسه و كله

المهم جمع سيدنا عمر نص حاجته كلها و حطها أمام النبى, فالنبى بص عليهم لقاهم كتير أوى, فقال له: "يا عمر, ماذا تركت لأهل بيتك؟", فقال: "يا رسول الله, تركت نصفهم", فيفرح النبى اوى. المهم راح سيدنا عمر يستخبى بعيد عشان يشوف سيدنا أبو بكر هيقدم ايه للنبى, و ييجى سيدنا أبو بكر و يقدم الصدقه بتاعته قدام النبى.. فالنبى يحس انها كتير فيقول له: "ماذا تركت لأهل بيتك يا أبا بكر؟", فقال ابو بكر "تركت لهم الله ورسوله .. تخيلوااا!!(يعنى مسبش لأهله حاجة خالص )".. فبيحكى سيدنا عمر و يقول انه ساعت ماشاف كده قال فى نفسه: "ما بالك يا أبا بكر لا احد يسبقك أبدا"..

و يسمع صحابى نداء النبى : تصدقوا.. و كان صحابى صغير فى السن عمره اقل من عشرين سنه و كان شديد الفقر و كان اسمه "علبة", ففضل يبكى لانه معندوش حاجه يتصدق بيها. بس بعد كده جت لعلبة فكرة فقام و صلى ركعتين و دعا ربنا و قال : يارب إنى أتصدق بعرضى على المسلمين.. طب ده معناه ايه ؟ يعنى الحسنات اللى كنت هاخدها يوم القيامة بسبب حد غلط فيا أو اغتابنى فأنا مش عايزها و هتصدق بيها للمسلمين ... ودى من أشرف الصدقات..لأن بسببك حتخلى ميزان حسنات المسلمين يزيد فممكن بسببك حد ينجو و يدخل الجنه.. المهم دعا علبة و دخل نام ..و مكنش متخيل ان ممكن ربنا يقبل الصدقة دى..قال تعالى: وَلْيَعْفُوا وَلْيَصْفَحُوا ۗ أَلَا تُحِبُّونَ أَن يَغْفِرَ اللَّهُ. [سورة النور]

و المفاجأه أن فى صلاة الفجر, وقف النبى عليه الصلاة و السلام على باب المسجد و قال: "أين المتصدق بعرضه البارحة؟", فسمع علبة النداء و جرى بسرعه على النبى وقال : "أنا يا رسول الله", فالنبى قال له: "أبشر, فإن الله عزوجل قد قبل صدقتك".. تخيلوا ربنا اوحى للنبى عشان يفرح قلب علبة بقبول الصدقه دى :) شايفين اد ايه صدقه العرض غاليه على ربنا.. لان دى بتحقق الايه الكريمه

طيب دلوقتى النبى بيجهز الجيش فحتيجى مجموعه اسمها الأشعريون" و دول قبيلة "أبو موسى الأشعرى", و قالوا للنبى :"احملنا", يعنى اعطينا ناقة أو بعير نركب عليها عشان نطلع الغزوة و ندافع عنك يا رسول الله.. احنا معناش فلوس نشترى., فالنبى قال لهم ان عدد البعير صغير و انه مش معاه..,

فمشوا و بكوا :(.. عشان كان نفسهم يطلعوا مع النبى عليه الصلاة والسلام ... فينزل قول الله تبارك وتعالى فيهم: لَّيْسَ عَلَى الضُّعَفَاء وَلاَ عَلَى الْمَرْضَى وَلاَ عَلَى الَّذِينَ لاَ يَجِدُونَ مَا يُنفِقُونَ حَرَجٌ إِذَا نَصَحُواْ لِلَّهِ وَرَسُولِهِ مَا عَلَى الْمُحْسِنِينَ مِن سَبِيلٍ وَاللَّهُ غَفُورٌ رَّحِيمٌ,
وَلاَ عَلَى الَّذِينَ إِذَا مَا أَتَوْكَ لِتَحْمِلَهُمْ قُلْتَ لاَ أَجِدُ مَا أَحْمِلُكُمْ عَلَيْهِ تَوَلَّوْا وَّأَعْيُنُهُمْ تَفِيضُ مِنَ الدَّمْعِ حَزَنًا أَلاَّ يَجِدُواْ مَا يُنفِقُونَ"[سورة التوبة]

بس ربنا حيجبر بخاطر الأشعريين , و حيزيد عدد البعير واحد و حيناديهم و حعطيهم البعير و فرحوا جدا جدا انهم حيقدروا يخرجوا مع رسول الله

نكمل بكرة إن شاء الله ❤

#السيرة_النبوية_بالعامية_لنورهان_الشيخ