لو عرفتموه (الجزء الثاني 💜) مكتملة

204💜

لو عرفتموه لاحببتموه
الحلقة الأخيرة فى تنوية فيها مهم جدا 👇:') ❤
يلا صلوا على النبى
#وفاة_النبى (ج8والأخير)

أندفن رسول الله عليه الصلاة والسلام .. الصحابة رجعوا بيوتهم فبيقولوا : والله كنّا لا نكلم بَعضُنَا البعض .. ولا يتحدث احدنا الي أهله فظللنا نبكى حتى آذان الفجر .. ودلوقتى حيحصل حاجه من أصعب المواقف اللى مر بيها الصحابة .. فى يوم بعد وفاه النبى وقت صلاة الفجر ..لازم نأذن للصلاة .. ولازم الحياة تستمر ..  فيطلع بلال يقف علي المنبر .. ويبدأ بلال يؤذن .. الله أكبر الله أكبر اشهد ان لا اله الا الله اشهد ان محمد!!! و يتخنق صوته من العياط فميقدرش يكمل الآذان ..فيحاول تانى و يتماسك و يعيد الاذان..و برده ميقدرش يكمل.. مش مصدق انه مش حيشوف النبى و هوه فاتح الستر و جى يصلى معاهم ف المسجد ..

فينزل بلال ويروح سيدنا بلال لأبو بكر الصديق .. ويقول له يا خليفة رسول الله اعفني من الاذان .. والله ما عدت أستطيع ان أؤذن لأحد بعد رسول الله فأبو بكر يقول: يابلال لا تتركني .. انا محتاجلك .. فيقول بلال : يا خليفة رسول الله ، اعفني.. فقال ابو بكر : لك ما أردت يا بلال .. الجميل ان بلال بعد فترة مقدرش يعيش في المدينة .. كل شبر في المدينة بيفكره برسول الله .. بلال كان ملازم للنبي .. فبلال مش قادر يعيش .. فيروح لأبو بكر و يستاذنه انه يذهب إلي الشام .. فقال ابو بكر : أتتركني يابلال!! لاتتركني يابلال ..لكن من حزن بلال ..يوافق ابو بكر على انه يسمح له يسيب المدينه.. و يروح بلال الي الشام يعيش في بلد اسمها داريه .. ويعيش هناك ويتزوج ..

ولما يروح سيدنا عمر للشام .. فسيدنا عمر يطلب من بلال يأذن لكن سيدنا بلال ميقدرش  يكمل الآذان ..
فبيقول الرواه : والله ما عرفنا يوما أشد بكاءا ولا عويلا بعد وفاة رسول الله كذلك اليوم الذى اذن فيه بلال وقال اشهد ان محمدا رسول الله .. صلي الله علي حبيبى محمد.. صلي الله عليه وسلم ..

خلصت السيرة النبويه بس لازم نعرف كام حاجة .. اول حاجه هى أن ربنا سبحانه وتعالي قال : " واعلموا ان فيكم رسول الله " .. فيكم .. ده مش فى الماضي .. ده في الحاضر والمستقبل .. فالنبي مات بجسده .. لكن النبي عايش فى كل واحد فينا بدينه و بسنته و بحديثه و بعقيدته .. النبى فينا بسيرته صلى الله عليه و سلم ..فمش معني ان النبي ميت يبقى مش معانا .. لأ هو معانا وفينا بالصلاة عليه ..

اكبر دليل ان النبي موجود هو أنك بتحيي سنته .. وانك لما بتصلي عليه صلاة واحدة فياخدها منك الملائكة و تروح تبلغ النبي و تقول : يارسول الله ان فلانة / فلان (بالإسم ) يسلم عليك ، فيقول صلي الله عليه وسلم : وعلي فلانة/ فلان السلام .. فواحد من الصحابة بيقول له: يارسول الله احنا حتبقى عارفنا يوم القيامه ،طب و اللى هييجوا من بعدك و بعدنا حتعرفهم ازاي ؟ فقال صلي الله عليه وسلم : بل اعرفهم باسمائهم وأنسابهم ♡ ..
تانى حاجه لازم نعرفها ان فى السيرة عرفنا ان فقد النبي هي اكبر مشكلة و اكبر مصيبه بتواجه الانسان .. يعني اي حاجة تهون بالمقارنة اننا فقدنا رسول الله . قال النبى : اذا اصاب احدكم مصيبة فلذكر مصيبته بى فإنها اعظم المصائب ..

و في حديث تاني النبي قاله للصحابة وده اللي هيساعد الصحابه بعد وفاة الرسول فى انهم يتحملوا صدمه موته.. قال صلى الله عليه و سلم : حياتى خيرُ لكم و وفاتي خَيْرٌ لكم .. فالصحابة قالوا له ازاي وفاتك خير لنا يا رسول الله ؟ فقال حياتي خير لكم أهديكم الي الخير .. ووفاتي خير لكم تُعرض علي اعمالكم يوم الخميس فما كان فيها من خير حمدت الله عز وجل و ما كان فيها من شر استغفرت الله لكم

افتكروا دايما كلام النبى اللي قاله يوم حجة الوداع "أيها الناس لا تسودوا وجهي يوم القيامة (ماتكسفونيش قدام الناس يوم القيامة ) - احنا دورنا منتهاش .. لازم ندافع عن النبي بالعلم و ندافع عن سنة النبي .. النبي قال "من أحيا سنتي فقد احبني ومن احبني كان معي في الجنة " .. نعلم الناس سيرته صلي الله عليه وسلم .. لازم ندفع الشبهات عنه ..لازم نبرأ الاسلام و النبى عليه الصلاة والسلام من الاخلاق السيئه اللى بيعملها بعض المسلمين .. لازم نتوب ..

اعمل حاجه للنبى عليه الصلاة والسلام ..ممكن تنشر سيرة النبى بأى طريقه على الفيس بوك /واتس اب.. ومتسألش هتوصل للعالم كله ازاي .. مالكش دعوة ، اعمل اللي عليك ، وسيب علي ربك البلاغ .. سيدنا ابراهيم لما ربنا قال له : " إذن في الناس بالحج يأتوك رجالا " .. قال له: يارب الناس دى كلها هيسمعوا صوتي ازاي ؟ قال الله "يا إبراهيم عليك الاذان وعلينا البلاغ " .
لازم نلاقي للنبي عليه الصلاة والسلام وقت في حياتنا .. النبي له علينا حق .. انشروا السيرة واعرفوا انها غاليه و ليها اثر فى حياتكم .. ربنا أقسم بحياة النبى عليه الصلاة و السلام و بعمرة كله يعنى بسيرته النبوية.. قال تعالى: لعمرك [سورة الحجر آيه 72 ]♡

اللهم نسالك مرافقة النبى وآله وصحبه فى الجنة بفضلك و كرمك و عفوك يا ذا الجلال و الإكرام..

#هام_جدا
- يقول العلماء : إن من بركة العلم أن ينسب لصاحبه ..
يتقدم فريق صفحه: كن محمديا Reviving seerah   ( الصفحة الرسمية للأستاذة نورهان الشيخ )
بالشكر الخاص لمعلمتنا الجميلة نورهان الشيخ .. اللى نقلنا عنها كل حرف أتكتب فى الحلقات بأسلوبها وتحضيرها الجميل .. وقرينا واستمتعنا واتعلمنا وبكينا من قلبنا ونوينا أننا نخلى الدنيا كلها تعرف مين هو النبى محمد ..  ونحاول نعمل بأخلاقه وكل ده بسبب حضرتك الحمدلله .. زادك الله نورا على نورك و سدد خطاك وبشرك بما يسرك وطيب خاطرك زى ما حتطيبى خاطر النبى بأمته يوم القيامة إن شاء الله .. وشكرا لفريق كن محمديا على مجهوده فى أن الحلقات تجهز وتطلع للناس

#لكل_المتااااابعين_من_فضلكم 👇
1- أحنا حاليا بنعدل الحلقات عشان فى تفاصيل جوه بعض الأجزاء محتاجه تتصلح .. للحصول على النسخه المعدله برجاء التواصل مع صفحه الفيس بوك الرسمية للأستاذة نورهان الشيخ
كن محمديا Reviving seerah
[ لما تدخلوا على الصفحه حتلاقوا بوست مثبتينه فى الأول فيه التفاصيل ]
2- بيتم تعديل الحلقات وجمعها بالكامل فى ملف pdf وحنعلن عنه على الصفحه فى أقرب وقت بأذن الله .. يارب يعجبكم ❤
#السيرة_النبوية_بالعامية_لنورهان_الشيخ