لو عرفتموه (الجزء الثاني 💜) مكتملة

169💜

# لو عرفتموه لاحببتموه
يلا صلوا على النبى
#فتح_مكة (ج9)
قال ﷺ لنساء كفار قريش حديثات الإسلام : أبايعكن على ألا تزنين.. فقاطعت هند النبى ﷺ وقالت: أتزنى الحرة !!
نبدأ حلقتنا مع كفار قريش اللى بدأوا يدخلوا الإسلام زى هند بنت عتبة ..دى زوجة أبو سفيان.. و لما أسلم أبو سفيان فضلت تزعق و تقول: لا تتبعوه إنه مجنون،، بس بعد ما الإسلام دخل مكة جلس النبي ﷺ فى مجلس و قعد مع مجموعة من السيدات بيبايعوه على الإسلام.. فلبست هند النقاب و قعدت وسطهم ،،فالنبي ﷺ بدأ يقول للنساء :أبايعكن على ألا تشركوا بالله شيئا .. و يقول: أبايعكن على ألا تزنين.. فقاطعت هند النبى عليه الصلاة و السلام و قالت : أتزنى الحرة !! (هند مستغربة لأن أيام الكفر العلاقات اللى بدون جواز كان اللى بيعملها العبيد.. فهند كأنها عايزة تقول أننا ما بنعملش ده أصلاً.. لكن النبىﷺ عارف اللى حيحصل بعد مئات السنين بين شباب و بنات المسلمين..فبص النبىﷺ لهند و سكت)
و يكمل النبي ﷺ كلامه فيقول النبي ﷺ : أبايعكن علي ألا تسرقن،،فقالت هند من غير ما تركز : يا رسول الله إن أبا سفيان رجل بخيل ،أتري إن أخذت من ماله.. أهذه سرقة؟.. فلما سمع النبى ﷺ كده عرف أنها هند زوجة أبو سفيان، فقال لها : أنتِ هند بنت عتبة !! (هي اللى قتلت عم النبى ﷺ سيدنا حمزة و نذرت أنها تمثل بجثته.. و النبى ﷺ بكى كتير على عمه و كان قلبه محروق) فالمهم بسرعة قالت هند :أقسمت عليك أن تعفو عني ،عفا الله عما سلف،، فقال النبيﷺ عفوت عنكي .. تخيلوا بعد كل ده عفا عنها !! صلى الله على حبيبنا محمد
فالنبي كمل كلامه و قال؛ ولا تقتلن أولادكم فقالت هند: ربيناهم صغاراً و قتلتهم أنت فى غزوة بدر كبارا،، فعمر بن الخطاب ضحك لحد ما كان حيقع على ظهره من الضحك.. فرحان بعزة المسلمين و أصلا غزوة بدر كفار قريش هم اللى أتسببوا فيها و ربنا نصر المسلمين... المهم يكمل النبىﷺ كلامه و يقول : و لا تعصون رسول الله فى معروف.. فترد هند و تقول: والله جئنا نبايعك و ليس فى أنفسنا إلا أن نطيعك... و أسلمت هند و باقى النساء.
و حتشارك هند فى معركة من معارك جيش المسلمين.. و كان فى مجموعة من جيش المسلمين راجعة بسبب شدة المعركة فتقوم تقف هند مع السيدات المسلمات صف و تخليهم يمسكوا السيوف و وصتهم أن اللي تلاقي جوزها راجع بسبب شدة المعركة تهوشه بالسيف و تشجعه أنه يرجع.. أسلم كمان أبو قحافة و ده يبقى أبو سيدنا أبو بكر الصديق.. فجه يُسلِم بين يدي رسول الله، و بكي سيدنا أبو بكر فسأله النبيﷺ عليه الصلاة و السلام : لماذا تبكي يا أبا بكر؟.. فقال: تمنيت لو كان أسلم عمك أبو طالب بدلاً من أبى لأن هذا سيسعدك أكثر يا رسول الله..

دلوقتى المسلمين فى مكة و يطلع سيدنا بلال بن رباح و يأذن .. يااا أخيرا بعد سنين صوت الآذان بيجلجل فى أنحاء مكة، و بعد ما خلص الآذان فى واحد واقف على جنب و عمال يخطط.. مين؟ أبو سفيان.. رغم أنه أسلم بس قلنا قبل كده أن النبى ﷺ حس أنه ماقالش الشهادة من كل قلبه و ما زال مش قادر يخضع أن محمد رسول الله بعد كل سنين الحرب دى..

المهم سيدنا بلال أذِّن و كان قاعد على جنب أبو سفيان و معاه واحد اسمه عتاب بن أسيد و كانوا قاعدين لوحدهم و مامعهمش حد.. فيقول عتاب: الحمد لله الذي أمات أبي أُسيد قبل أن يسمع من بلال ما يغيظه.. فقال أبو سفيان: يا عتاب أخشي إن تكلمت أن تخبر الحصي محمد بما نقول!
فبعد شوية جه النبيﷺ و قال : يا عتاب الحمد لله الذي أمات أباك قبل أن يسمع شرف بلال فوق الكعبة،، و يا أبو سفيان لو تكلمت لأخبرني الحصي!! فقال عتاب: نشهد أنك رسول الله..

و فى مرة تانية كان أبو سفيان قاعد لوحده بيخطط أنه يحارب المسلمين علشان يخرجهم من مكة ..فكان قاعد سرحان و هو بيفكر فى كده فى سره.. فمين يعدى من جنبه؟ سيدنا النبي عليه الصلاة و السلام .. فبص له النبي ﷺ و قال له: إذاً يخزيك الله يا أبا سفيان! فقال أبو سفيان: أشهد أن لا اله الا الله و أنك رسول الله..( ربنا أوحى للنبى ﷺ كل اللى بيفكر فيه أبو سفيان) و على فكرة أبو سفيان كان مسلم بس بلسانه لكن بعد كده حيسلم من كل قلبه و حتروح عيونه فى سبيل الله فى معركة اليرموك حنحكيها فى خلافة أبو بكر الصديق بعد كده ..

نكمل بكرة ان شاء الله
#السيرة_النبوية_بالعامية_لنورهان_الشيخ