لو عرفتموه (الجزء الثاني 💜) مكتملة

134💜

#لو عرفتموه لاحببتموه
يلا صلوا على النبى :)
صلح الحديبية (ج5)

شفنا المرة اللى فاتت محاولات قريش إنها تتفاوض مع النبى عند منطقة الحديبية ووصل عروة بن مسعود من قريش و شفناه وهو بيحاول يستفز النبى ﷺو الصحابة.. و انتهى كلامه مع النبىﷺ بدون أى نتيجة .. بس وقف عروة يبص على أصحاب النبي صلى الله عليه وسلم وهما بيتعاملوا مع النبىﷺ، فأستغرب قوى وقال عروة : فوالله ما تنخم محمد نخامة إلا وقعت في كف رجل منهم فدلك بها وجهه وجلده ( أى شئ حتى الوضوء اللى ينزل من أنفه.. قلنا قبل كدة إن النبىﷺ له صفات مش زينا و كان عرقه مسك)

و يكمل عروة كلامه عن الصحابة و يقول : وإذا أمرهم نبيهم ابتدروا أمره ، وإذا توضأ كادوا يقتتلون على وضوئه ، وإذا تكلموا خفضوا أصواتهم عنده ، وما يحدون إليه النظر تعظيماً له .. و يحكى عروة لأصحابه من قريش ويقول : يا قوم ! والله لقد وفدت على الملوك و وفدت على قيصر و كسرى و النجاشى ، فوالله ما رأيت ملكاً يعظمه أصحابه كما يعظم أصحاب محمد محمداً.. طيب دلوقتى حيبدأ النبىﷺ يكون هو المبادر فيحاول يبعت مراسيل لمكة عشان يأكد لهم على فكرة "ماجئنا لقتال" ..فيقول النبى عليه الصلاة و السلام : قُم يا عمر بن الخطاب و قل لهم إننا ماجئنا لقتال .. فيرد عمر و يقول "يا رسول الله لست أنا الرجل المناسب .. يا رسول الله هم يهابوننى و قبيلتى ليست من القبائل القوية فى مكة .. و لكن يا رسول الله عليك بعثمان " و عثمان من قبيلة بنى عبد شمس و دى قبيلة محبوبة جداً فى قريش

عارفين عمر عنده حق قوى فى الكلام ده.. أصل أهل قريش كانوا بيحبوا سيدنا عثمان حب عجيب .. لدرجة إن لما كانت المرأة تلد كانت تغنى لمولودها و تقول: أحبك و الرحمن حب قريش لعثمان ♡

سيدنا عثمان كان إنسان محبوب قوى قبل الإسلام و بعد الإسلام .. فيقول النبىﷺ : صدقت يا عمر .. و يقول: قم يا عثمان ..و عثمان يقول: حاضر يا رسول الله ..

و يدخل عثمان قريش و أول ما يدخل يجرى عليه واحد اسمه أبان بن سعيد من سادة قريش و ياخد عثمان فى حضنه و يقول يا معشر قريش دخل عثمان مكة وعثمان فى جوارى لا يؤذيه أحد و لا يسبه أحد و لا يمسه أحد فكل قريش تقول قد أجبنا ما قلت يا أبان ..و لما عثمان يروح مكة فيقول واحد من الصحابة عند رسول اللهﷺ: هنيئاً لعثمان الآن يدخل و يطوف بالبيت .. فيرد النبى ﷺ و يقول : لا والله ما كان لعثمان أن يفعلها أبداً !! و فعلاً يدخل عثمان مكة و هو داخل عيونه على الكعبة فييجي له واحد من كبراء قريش و يقول له: يا عثمان اذهب فطف بالبيت.. فيرد عثمان: " لا والله !! ما كان لى أن أطوف بها و يشتاق إليها رسول الله "

فيدخل عثمان بن عفان و يبدأوا المفاوضات.. تقوم قريش عاملة لعبة شديدة جداً .. يأخروا عثمان و يعطلوه و يقولوا له طب استنى حنفكر.. و بعدين قامت قريش مطلعه إشاعة عند الحديبية إن عثمان قُتل .. عشان النبىﷺ يحاربهم .. فساعتها يظهر قدام العرب إن محمد جى للحرب .. فقريش عطلت عثمان و طلعت إشاعة أن عثمان اتقتل.. و كله إلا الغدر عند رسول اللهﷺ .. فاكرين بنى قريظة ؟! فاكرين بئر معونة ؟! كله إلا الغدر عند رسول الله ..

فالنبى ﷺ يعرف بمقتل عثمان .. فيجمع الصحابة و يقول :"أيها الناس قُتل عثمان !! قُتل أخاكم عثمان بن عفان !! من يبايع على الموت ؟! فالنبىﷺ يحط إيده و يتكالب كل الصحابة على يد رسول الله و يرفع الرسول يده اليمنى و يحطها فوق إيد المسلمين و يقول " اللهم إنه قتل عثمان و هذه يد عثمان "..بس خلو بالكوا يا جماعة مش ملاحظين حاجة .. الحالة النفسية و الظروف اللى بيمر بها الصحابة .. فى البداية فرح بالعمرة و بعد كدة هنحارب و نرجع تانى للعمرة و نكمل الطريق و بعد كدة نقف عند الحديبية حنتفاوض .. و بعدين إشاعة ان عثمان اتقتل فخلاص حنحارب.. ف الصحابة مع كل التقلبات الرهيبة فى الظروف دى بيقولوا للنبىﷺ سمعنا وأطعنا .. طاعة غير عادية لرسول الله ..

المهم بايع  الصحابة النبى ﷺ على الموت بس بعد شوية  المسلمين لاقوا سيدنا عثمان رجع .. فأول ما عثمان رجع.. فعرف المسلمين إن مقتله كان إشاعة.. فالنبىﷺ خلاص قال مش حنحارب.. فالصحابة يستجيبوا..طب و بعدين قريش هتعمل ايه ؟؟ هتبدأ تتنازل فى المفاوضات .. فتختار قريش سهيل بن عمرو و يروح للنبىﷺ.. فالنبى يشوف سهيل جى من بعيد .. فيقول: أيها الناس جاء سهيل بن عمرو.. سهل الله لكم .. فيدخل سهيل فى منتهى الهدوء و يقعد و يتكلم مع النبى ﷺ و يقول " يا محمد ماتريد ؟؟ " فقال النبى عليه الصلاة والسلام: "جئنا لعمرة وإن أرادت قريش أن تماددنا مدة سنقبل" .. فقال سهيل أوافق .. و لكن بشروط  أولاً لا تدخلوا علينا هذا العام .. حتى لا تتحدث العرب أنكم دخلتم علينا مكة عنوة و رغماً عنا .. و لكن عودوا و أتونا العام القادم و حينها سنسمح لكم بالدخول و لكن بشرط أن تبقوا في مكة ثلاثة أيام فقط و لا تغرب شمس اليوم الثالث و رجل منكم فى مكة . فالنبى ﷺ يقول له: لك ذلك ..يعنى موافق..

و أول ما النبىﷺ قال كدة الصحابة استغربوا.. مش مصدقين..ايه ده.. مش حنعمل عمرة السنة دى!! مش مصدقين أن النبى ﷺ حيوافق على المفاوضات دى.. فيسألوا النبىﷺ .. فيسكت.. و يطلب النبى من سهيل إنه يكمل كلامه فيقول سهيل الشرط الثانى : من جائكم يا محمد من قريش مسلماً ترده إلينا و من جائنا منكم مرتداً لا نرده إليك .. فقال النبىﷺ : أجل يا سهيل .. فالصحابة يقولوا يا رسول الله أتقبل هذا ؟!! ..

فيسكت النبىﷺ و ما يردش و يكمل كلام مع سهيل و يقول : وما فى المقابل يا سهيل.. فيقول سهيل : هدنة بيننا و بينكم عشر سنوات..فقال النبىﷺ : قبلت و لكن بشرط "من أراد أن يدخل فى حلفكم يدخل و من أراد من العرب أن يسلم و يدخل فى حلفى يدخل .. يعنى إيه؟ يعنى ماتمنعوش العرب من دخول الإسلام.. ف اللى هيجي لى مسلم من قريش هو ده بس اللى حرجعه لكم زى ما طلبتم أما باقى القبائل لا .. فقال سهيل: قبلت ..

الصحابة طبعاً مش مصدقين إن المعاهدة تمت و أن فرحتهم راحت و مش حيعتمروا .. و خلاص حيرجعوا المدينة ..فقال عمر : يا رسول الله أقبلت !.. فقال النبىﷺ : نعم يا عمر.. فسيدنا عمر بيغلى بس مين اللى قاعد هادى؟ سيدنا أبو بكر الصديق.. و ينادى النبى على سيدنا علي عشان يكتب الوثيقة بينه و بين قريش.. حتتكتب الوثيقة و سهيل حيشترط أن الوثيقة تتكتب بشكل مستفز جداً.. يا ترى النبىﷺ حيتعامل معاه ازاى؟

حنعرف  بكرة ان شاء الله ❤
#السيرة_النبوية_بالعامية_لنورهان_الشيخ