# لو عرفتموه لاحببتموه
يلا صلوا على النبى
#غزوة_حُنين (ج2)
مهما كانت شطارتك.. اعرف أنك ولا حاجه من غير توفيق ربنا
عرفنا المرة اللى فاتت ان قبيلة هوازن وثقيف جهزوا نفسهم لقتال المسلمين .. والنبى عليه الصلاة والسلام وصلت له الاخبار و جهز جيش ب 12 الف مقاتل و كمان بدأ يجهز الجيش على أعلى مستوى من السلاح و هيأجر اسلحه من صفوان بن اميه و نوفل بن الحارث و كمان هياخدهم معاه عشان يحرسوا اسلحتهم .. اهتم النبى كمان بالحراسه الليليه و حط عليها صحابى اسمه أنس بن ابى مرثد..
و من قيادات جيش المسلمين فى الغزوة دى كان خالد بن الوليد و الزبير بن العوام و سعد بن ابى و قاص.. و دول قيادات على مستوى عالى من الخبرة الحربيه..فالنبى عليه الصلاه و السلام مجهز الجيش تجهيز تام.. بس للأسف هتبدا تحصل مشكله كبيره لجيش المسلمين... هى الاعجاب بالنفس.. ازاى؟
اصل اثناء مسيرة جيش المسلمين ..قام طلع واحد من المسلمين من اللى همه حديثى الاسلام اللى اسلموا بعد فتح مكه و قال " لن نغلب اليوم من قله" يعنى ايه ؟؟ يعنى احنا عددنا كبير استحالة نتهزم.. و لسه مكة مفتوحة و معانا سلاح كتير... و للأسف بسرعة الجملة دى انتشرت فى الجيش و أنتشرت معاها حالة الثقة بالنفس و التعلق بالأسباب..و نسيوا يستشعروا ان التوفيق من عند الله..اصل مهما كانت قوتك و شطارتك اوعى تعتمد عليهم.. لان انت من غير توفيق ربنا ..اعرف انك ولا حاجه.
المهم كانت نتيجة اعجاب بعض المسلمين بنفسهم .. ان حصل تراخى فى جيش المسلمين و المسافه اللى المفروض تتقطع فى يوم مثلا .. قطعوها للأسف فى اكتر من كذا ايام .. فوصل جيش المسلمين وكانت النتيجه الاسوا ان جيش الكفار عسكر فى مكان اختاروه بمنتهى الخبث .. ايه المكان ده ؟ المكان اسمه حنين.. و ده مكان سىء جدا مليان وديان و منحدرات و ارضه مش مستويه و مليان اماكن مستخبيه ورا الجبال و دى طبعا هيستغلها العدو عشان تبقى كمائن له.
فبعت النبى واحد من الصحابه عشان يشوف فى كمائن ولا لأ بس للأسف رجع الصحابى للنبى وقال له : مفيش كمائن ..و كان ده طبعا مش صح.. بس النبى كان قلقان.. فبعد ما وصل الجيش و عسكر فى حنين.. بدأ النبى عليه الصلاة و السلام يديهم تعليمات انهم ينزلوا على دفعات عشان لو فى كمين فيقدروا يتكشفوه .. وفعلا تعدى اول دفعه بقيادة خالد بن الوليد
وللأسف حيطلع الكفار من الكمائن وحيهجم عليهم .. بس يا ترى المسلمين حيواجهوا ده ازاى ؟
حنعرف المره الجايه ان شاء الله ❤
#السيرة_النبوية_بالعامية_لنورهان_الشيخ
أنت تقرأ
لو عرفتموه (الجزء الثاني 💜) مكتملة
Espiritualالجزء التاني لو عرفتموه لمتم شوقا لرؤياه😍 كل القلوب الى الحبيب تميل.....ومعي بهذا شاهد ودليل أما الدليل اذا ذكرت محمدا........صارت دموع العاشقين تسيل 💜💜
