لو عرفتموه (الجزء الثاني 💜) مكتملة

107💜

الحلقة 107
#لو عرفتموه لاحببتموه
*يلا صلوا على النبى*🙂
*غزوه ذات الرقاع  (ج2) و صلاة الخوف*

شفنا المرة اللى فاتت محاولة قبيلتى ثعلبة و محارب و هم فى طريقهم للهجوم على المدينة و شفنا جيش المسلمين و هو خارج يصد العدوان ب400 جندى.. ولما عرفوا ان النبى طلع بجيش المسلمين .. فخافت القبيلتين و انسحب الجيش بتاعهم و بعد ما انسحب الكفار.. رجع جيش المسلمين للمدينه و دى كان اسمها غزوه ذات الرقاع ..بس فى الطريق للمدينة حصل 3 أحداث.

اول حاجة حصلت هيه صلاة العصر.. جه وقت الصلاة فجيش المسلمين مش عارف يصلى .. طب ليه ؟ اصل المسلمين خايفين ان يكون فى حد بيراقبهم و يستناهم و أول ما يسجدوا فيقوم هاجم عليهم.. و فعلا حيطلع حد مراقبهم. المهم كان لازم المسلمين يصلوا بطريقة مختلفه. فى الوقت ده انزل الله تعالى ، سيدنا جبريل بتشريع صلاه الخوف و ده له اكتر من طريقه، فالمهم وقف النبى و بدأ المسلمين يصلوا ... (و على فكرة صلاة الخوف اتصلت كذا مرة فى اكتر من موقف فى السيرة .. وفى موقف منهم كان قائد المشركين هو خالد بن الوليد (قبل إسلامه) و لما شافها أستغرب جدا من براعه المسلمين .. و قال : الصلاة دي مش ممكن تكون اخترعها بني آدم إنما هي من رب العالمين .. و دي كانت أول حاجه من الإسلام تأثر فى قلب خالد بن الوليد  )
((طريقه صلاه الخوف فى اللينك ده : https://islamqa.info/ar/36896 )) طب دلوقتى الجيش صلى و اتحرك و بدأ يكمل الطريق للرجوع للمدينه،
و في نص الطريق جيش المسلمين قعد يستريح شويه .. محتاجين يناموا ،فالنبي عليه الصلاة والسلام ينام و أتنين من الصحابه كانوا لازم يفضلوا سهرانين عشان يحرسوا الجيش و همه سيدنا عمار بن ياسر و سيدنا عباد بن بشر .. و الاتنين فضلوا يتناوبوا طول الليل فى الحراسه.. فعمار نام الاول و عباد وقف يحرس الجيش ..فقال عباد فى نفسه أن مادام انا واقف لوحدي، طب ما أقف أصلى قيام ليل و فعلا بدأ يصلي .. بس للأسف طلع فى حد مراقب عباد.. و بدأ الراجل الكافر اللى مراقبه يرمي السهام على عباد .. و رشق السهم الاول فى ضهر عباد .. طيب و عباد عمل ايه؟

عباد شد السهم و كمل صلاه.. فأترمى عليه سهم تانى فرشق فى عباد 😢  فشد عباد السهم و كمل صلاه..و يترمى السهم التالت.. فعباد قام مخلص الصلاه بسرعه و صحى عمار بسرعه فعمار شاف عباد متعور فأتخض جدا فحكى له عباد على اللى حصل ..فقال عمار : يرحمك الله يا عباد .. لما لم توقظني من أول سهم.. فرد عليه عباد .. تخيلوا عباد قال ايه ؟ عباد قال : والله يا عمار كنت أصلى بسوره و لذهاب روحي و ذهاب الدنيا أحب إليا من أن أقطعها :') و لولا ان رسول الله كلفني بحماية الجيش ..ما كنت قطعتها أبدا حتى تخرج معها روحي.. كنت أقرأ سورة الكهف..

(الله  الصلاة هيه صلة بالله عزوجل عارف يعنى ايه ؟ الصلاة صلة برب العالمين يعنى موصول بالله بأسماؤه الحسنى.. لو مكسور!! حتبقى موصول بالجبار..مظلوم!! حتبقى موصول بالمنتقم..ضعيف !! حتبقى موصول بالقوى .. الصلاه دى ليك عشان تقويك و تمدك بكل اللى ناقصك .. عرفتوا ليه حتى وفت الخوف ربنا من رحمته خلى فى طريقه للصلاه..الصلاه فرض ليك انت و عشانك قال تعالى: "وَأَقِمِ الصَّلَاةَ إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ "
الفرض ليك انت عشان تقدر تعيش مرتاح دنيا و اخره.. عشان تتقوى و تقدر على الفتن اللى حواليك و تنجا منها.. انت مخير تصلى او متصليش ..و ربنا خلاك مخير فى العباده عشان تجيله بإختيارك و تجيله بحبك له.. اصل اختيارك للشئ دليل حبك ليه و اول حاجه حيتحاسب عليها العبد هى الصلاة  .. ربنا بيحبك و رايد يشوف انت اختارت ايه .. اصل دى الغايه "الحب و الجنة")