لو عرفتموه (الجزء الثاني 💜) مكتملة

142

# لو عرفتموه لاحببتموه
يلا صلوا على النبى :)
عمرة القضاء (ج5)

شفنا امبارح السيدة ميمونة لما طلبت إنها تتزوج النبىﷺ.. والنبىﷺ وافق و شرحنا الحلقة اللى فاتت الموضوع ده و قلنا إن دى حالة خاصة بالنبى عليه الصلاة و السلام و أن لم يقبل النبىﷺ الزواج بالطريقه دى إلا من السيدة ميمونة لسبب... إيه هو؟ أول حاجة هى أن ميمونة من قريش . فميمونة قرشية أصيلة.. إيه ده يا رسول الله؟ حتوافق على الزواج من ميمونة؟

أيوه لأن حيبقى في نسب بينى و بين قريش و حيطلب النبى ﷺ ان الفرح يبقى فى مكة.. النبىﷺ عايز يشيل الخلافات اللي ما بين النبى ﷺ و بين قريش.. و الأفراح زمان ماكنتش زي بتاعة النهاردة.. الفرح زمان يعني وليمة كبيرة وييجى الناس ياكلوا و يشربوا و يمشوا..

فالمهم كفار قريش رفضوا  ..و واحد منهم قال : اخرج من أرضنا يا محمد.. فكان واقف صحابى أسمه سعد بن عبادة الأنصارى فزعل وقال : كذبت ياعدو الله ليست أرضك ولا أرض أبيك ولكن أرض رسول الله.. فقال النبىﷺ : دعه يا سعد .. و بص النبىﷺ للرجل و قال : لك ما أردت .. ثم قال  يا معشر المسلمين لا تغرب الشمس على رأس أحد منكم فى مكة ..و خرج النبى ﷺ من مكة ومعه ميمونة رضى الله عنها(وعلى فكرة السيدة ميمونة لم تتزوج النبىﷺ وهو محرم.. هو دخل بها بعد خروجه من مكة بعد ما تحلل من إحرامه)

وعلى فكرة السيدة ميمونة رضى الله عنها كان اسمها " بُرَة" أي الحلقة الحديد اللى بتتحط فى أنف البعير أو فى أنف المرأة للزينة.. فالنبيﷺ غير إسمها وقال لها لستِ بُرَة بل أنت ميمونة.. وأشمعنى اختار النبىﷺ اسم ميمونة ؟ لأنه من اليُمْن يعنى البركة..  يعنى يا ميمونة أنتِ بركة لحاجات حلوة كتير.. ...اسم ميمونة من اليُمن.. واللي يطلق اسم ميمونة على قرد أو ما شابه ده خطأ لأنه بيشبه اسم أم المؤمنين بكائن .. و ده اسم جميل جداً من الخير واليُمْن و البركة..
و بالمناسبة للسيدة ميمونة رضى الله عنها حتعيش بعد وفاة النبى ب 40 سنة .. وحتنقل لنا أحاديث كتير قالها النبى عليه الصلاة والسلام ..حتموت وهى عندها 80 سنة.. و حتحب النبى ﷺ حب شديد لدرجة إنها قبل ما تموت كتبت وصية إنها تدفن فى المكان اللى أتزفت فيه كعروسة لرسول الله ..طيب دلوقتى المسلمين خلاص خارجين من مكة ،بس في بنت صغيرة يتيمة حتروح مع المسلمين.. مين البنت دى؟

حنعرف المرة الجاية إن شاء الله❤
#السيرة_النبوية_بالعامية_لنورهان الشبخ