لو عرفتموه (الجزء الثاني 💜) مكتملة

100💜

الحلقة 100
#لو عرفتموه لاحببتموه
يلا صلوا على النبى
غزوة أحد (ج8)
قال وحشى بعد إسلامه : قتلت بحربتى هذه خير الناس، وقتلت بها شر الناس .

شفنا المرة اللى فاتت مقتل سيد الشهداء سيدنا حمزة " عم رسول الله " على يد وحشى.. و شوفنا بكاء رسول الله و الإيذاء اللى اتعرض له الصحابة نفسيا بعد ما شافوا التمثيل بجثة سيدنا حمزة .. و قال النبى صلى الله عليه و سلم :" دم وحشى هدر" ..و ده قصاص طبعا .. بس وحشى بعد غزوة أحد، حيشرح الله صدره للإسلام.. و فى فتح مكة حيسلم وحشي و حيروح للنبى عليه الصلاة و السلام و هو متلثم  و يقف قدامه..و يكشف الغطاء عن وجهه و يقول: "أشهد أن لا إله إلا الله، و أنك رسول الله" فقال النبى: "من؟" قال: "وحشى" فقال النبى: "أنت وحشى؟" قال: " نعم يا رسول الله، و جئتك مسلما..قال النبى: "قتلت حمزة !!.. يا وحشى حدثنى، كيف قتلت حمزة؟" فيبدأ وحشى يوصف للنبى بالظبط مقتل سيدنا حمزة، والنبى ماكنش يعرف كل التفاصيل دى، فبكى النبى وقال له:" يا وحشي أقسمت عليك، غيب وجهك عنى" ..فيقول: "أجل يا رسول الله":'( ...

و يحكى وحشى و يقول : "فكنت أبتعد عن الطرقات التى يسير فيها النبى، حتى لا أؤذيه ( أضايقه بأنه يفتكر اللى حصل لحمزة )" ( النبى مستنكر.. مش مصدق .. إزاى قدرت يا وحشى تقتل حمزة.. ماشى وحشى أسلم.. و خلاص محدش حيقتله و لا حيقتص منه.. بس النبى مش قادر ، النبى مجروح و تعبان).. إحنا متأثرين أوى بمقتل حمزة .. حمزة اللى كتير دافع عن الإسلام و عن رسول الله .. حمزة اللى راح ضرب أبوجهل و دافع عن رسول الله بعد ما سمع أن أبو جهل فتح راس النبى و ضايقه .. و كل ده و كان لسه حمزة كافر.. فما بالكم باللى عمله عشان يدافع عن الله و رسوله بعد إسلامه.. :'(  مقتل سيدنا حمزة مؤثر أوى .. بس برده وحشى حاله صعب جدا، تخيلوا أنه أسلم والنبى هيبقى قدامه، بس مش هيعرف يتمتع بالنبى!! يعنى عايش مع النبى بس محروم منه ..والله الموت أهون من وضع سيدنا وحشى..

تخيلوا أن ده حيبقى حال بعض الناس يوم القيامة يقولَ النَّبِيُّ صَلَّى اللَّهُ عَلَيْهِ وَسَلَّمَ : "إِنِّي فَرَطُكُمْ عَلَى الْحَوْضِ ،مَنْ مَرَّ عَلَيَّ شَرِبَ ، وَمَنْ شَرِبَ لَمْ يَظْمَأْ أَبَدًا ،لَيَرِدَنَّ عَلَيَّ أَقْوَامٌ أَعْرِفُهُمْ وَيَعْرِفُونِي ، ثُمَّ يُحَالُ بَيْنِي وَبَيْنَهُمْ ، فَأَقُولُ : إِنَّهُمْ مِنِّي ، فَيُقَالُ : إِنَّكَ لَا تَدْرِي مَا أَحْدَثُوا بَعْدَكَ ، فَأَقُولُ : سُحْقًا ، سُحْقًا ، لِمَنْ غَيَّرَ بَعْدى" ..حتبقى صعبة أوى أن النبى يبقى قدامك بس مش عارف تبوس يده، فاللهم لا تحرمنا بذنوبنا و اهدنا الصراط المستقيم .. و يرجع تانى وحشى للنبى .. وحشى خايف يموت قبل ما النبى يرضى عنه.. و قبل وفاة النبى، يروح له وحشى.. فالنبى يقول له أنت وحشى!" فقال أجل يا رسول الله.. فيقول النبى : قتلت حمزة يا وحشى!" فقال وحشى: "أجل يا رسول الله، الحمد لله الذى أكرمه على يدى، ولم يهنى على يديه". ( ربنا أكرمه بالشهادة على يدى ) فاقتنع النبى وسكت .
وقال: " يا وحشى، اذهب، فقاتل فى سبيل الله، كما قاتلت فى الصد عن سبيل الله" وابتسم النبى له ، ففرح وحشى جدا.
و تلف الأيام و حنشوف ان قبل وفاة رسول الله صلى الله عليه و سلم حيطلع واحد كافر اسمه "مسيلمة الكذاب" الراجل ده ادعى أنه نبى.. فحيتربص له وحشى فى معركة اليمامة فى عهد خلافة سيدنا أبو بكر الصديق و يقول وحشى : "والله أنا قاتله" و يدخل المعركة و يعمل مع مسيلمة نفس اللى عمله بالظبط مع سيدنا حمزة وبنفس الحربة اللى قتل بيها سيدنا حمزة. يقف وحشى على هضبة فى أرض المعركة و ينشن على مسيلمة و يقتل مسيلمة..يبكى ويقول: "والله، قتلت بحربتى هذه خير الناس ، و قتلت بها شر الناس ، قتلت مسيلمة لأكافئ به حمزة يوم القيامة" .. رضى الله تعالى عن وحشى و أرضاه.