لو عرفتموه (الجزء الثاني 💜) مكتملة

181💜

لو عرفتموه لاحببتموه
يلا صلوا على النبى
#غزوة_تبوك (ج1)

حنتكلم سوا النهارده عن اخر غزوة فى حياة رسول الله :(خلاص الوفاه قربت.. صلى الله عليك يا سيدى يا رسول الله..
غزوة تبوك كانت فى سنه 9 هجريآ من شهر رجب.. و اتسمت بالاسم ده لأنها كانت فى منطقه تبوك.. و كمان ليها اسم تانى فى القرآن فى سورة التوبه و هو غزوة العسره و ده بسبب صعوبة الغزوة دى و مشقتها و كمان اتسمت فى السنه "بالفاضحه" لأنها فضحت المنافقون..
طب إيه قصتها الغزوه دى؟ فاكرين غزوة مؤته لما انتصرنا على الرومان..فدلوقتى الرومان عايزين ينتقموا فحيجهزوا جيش من 40 ألف مقاتل ..

و حتوصل الأخبار للنبى صلى الله عليه و سلم و حيخرج طبعآ لمواجهتهم و حيكون معاه 30 ألف مقاتل من المسلمين و مش هيستنى لحظه.. و حيخرج بسرعه عشان الرومان مايهجموش على المسلمين فى المدينه ..
الغزوه دى كانت صعبه جدا ..لأن كانت المسافه بين المدينه و تبوك حوالى 1000 كيلو .. المسلمين كان معاهم بعير بس كان عددهم قليل فكان كل تلاته من المسلمين بيتعاقبوا على بعير واحد .. كل  واحد يركب شويه .. كمان كانت الغزوة فى أغسطس فى عز حر الصحراء..

و كمان يوم خروج المسلمين لغزوه تبوك كان قبل موسم الحصاد فى المدينه ب 4 أيام بس .. والمدينه بلد زراعى يعنى معتمدين على الزرع فكان خروج الصحابه للغزوة اختبار من ربنا كبير لأن هيبقى عندهم صراع داخلى مابين انى اطيع النبى و اخرج للغزوه قبل الحصاد ب4 أيام .. ولا اتخلف عن النبى و مطلعش الغزوة دى و استنى موسم الحصاد عشان أجمع فلوس وأجيب أكل لعيالى؟
و طبعا مينفعش النبى يستنى لمده 4 ايام و يخرج بعد موسم الحصاد .. عشان كده ممكن الرومان يدخلوا المدينه فى اى لحظه و يقضوا على المسلمين بكل سهوله فكان لازم النبى يخرج بجيشه بره المدينة..

فالمسلمين حيخرجوا مع النبى و من غير طعام ..يدوب كل واحد هيخرج و فى جيبه شويه تمر .. لدرجة ان الصحابى كان يمص التمره عشان تفضل معاه فتره اطول و كان يشرب حبه مايه و بس .. شايفين اد ايه الصحابه تعبوا !! كل ده عشان أنا وأنتو نعرف ربنا ونقدر نعيش فى سلام نفسى ..

طيب نكمل كلامنا عن النبى عليه الصلاه و السلام انه قرر يستعد لمواجهه جيش الرومان ..فبدأ يجهز جيش المسلمين ..فيقف النبى عليه الصلاة و السلام على المنبر ويقول "من يجهز جيش العسرة"؟ و تبدأ روعة الصحابه تظهر و مواقفهم الرائعه ماهمه طبعا تربية النبى عليه الصلاة و السلام.. فيرد على النبى سيدنا عثمان و يقف و يقول: أنا امد الجيش ب100 بعير بأحلاسها وأقطابها (يعنى بالأكل والسلاح بتاعها) فالنبى يبتسم و يهز راسه و يشكر عثمان..

و يقف النبى من تانى ويسأل "من يجهز جيش العسرة" ويقف سيدنا عثمان من تانى و يقول أمد الجيش ب200 بعير بأحلاسها وأقطابها.. فالنبى يبتسم لسيدنا عثمان و يشكره.. وللمره التالته يقف النبى ويسأل.. فيقف سيدنا عثمان ويقول أمد الجيش ب300 بعير بأحلاسها وأقطابها.. فيبتسم النبى ويقول : ما ضر عثمان ما فعله (يعنى مهما عمل سيدنا عثمان مغفور له.. بسبب العمل الصالح ده .. يعنى خلاص وجبت له الجنه رضى الله عنه وأرضاه ) ..
نكمل بكرة إن شاء الله ❤
#السيرة_النبوية_بالعامية_لنورهان_الشيخ