"جابك الله في زحام العمر صدفة "

9

~~~ في بيت فاتن وميهاف ~~~
فاتن : وهذي البهارات وجت ليه تبكين ؟
ميهاف : فيني اكتئاب يافاتن احس بموت صياح
فاتن : وش صاير رحت دقيقتين ورجعت تبكين
ميهاف : لا ابكي بسبب البصل وسويت سيناريو براسي
فاتن : خرشتيني يالهبلاء احسب بتس بلاء اوف
ميهاف : وين رايحه تعالي قطعي الخضار معي
فاتن : اقطعهم بعباتي بروح افصخ
ميهاف : اي يلا تراني انتظرتتس
هايل : شكل سحورنا خبز وشاهي
عبدالرحمن : ننتظر سحورهم طولو تنقز تجيب سحور من اهلك
هايل : اهلي الحين تلقاهم تسحروا وخلصو ونامو
عبدالرحمن : صوت صراخ
ميهاف : فاتن تكفييين سوي حاجه
فاتن : اصبري احدد الهدف واقنص السيف
ميهاف : مو وقت نكتس الحين اذبحيه اخلصي
فاتن : خليه يوقف وين اختفى
ميهاف : طلع برا الحقيه
عبدالرحمن : قم نشوف وش صاير يابنت وش مطلعتس
فاتن : يمه شجابكم ، انحاشت للمطبخ مره ثانيه وبدال ماتبخ الصرصور بخت الضحيه عبدالرحمن من الخوف
عبدالرحمن : يعني بخيتي كل شى الا الصارور
هايل : ههههههههههههههههههههههههههههههه يعع ريحتك خايسه
عبدالرحمن : انا وذي ياقاتل يامقتول
فاتن : يمه
ميهاف : شصار وش سويتي قتلتيه صح قتلتيه مابيرجع
فاتن : اي قتلته وبخيت ع دحيم فليت بالغلط
ميهاف : ههههههههههههههههههههههههههههههه وش جابه عندنتس
فاتن : سمعو صراخك يالرخمه وطلعو وجت براسه يستاهل
ميهاف : ريحه حريق تشمين
فاتن : اي والله ريحه حريق
ميهاف : القدررر اشوا ماحترق جهزي الصحون
فاتن : كل شى جاهز
ميهاف : يلا بحطه
هايل : اخيرااا بطني قام يطلع اصوات
عبدالرحمن: ذا درس لك ماعاد تعزم نفسك علينا
هايل : بذوق طبخ زوجتي بالمستقبل
عبدالرحمن: ريحه حريق ولا خشمي فيه شى
هايل : خشمك فيه شى اكل اكل بس واضح لذيذ
~~~ في بيت ابو محمد ~~~
شهد : تو مانور البيت ياهدى يختي من زمان مفروض جايين عندنا
هدى : منور باهله ياروحي
ام محمد : شلونتتس شخبارتتس يبنتي
هدى : والله ياخالة ماينسئل عن حالي
ام محمد : ليه عسى ماشر
هدى : انتي اعرف ياخاله بالمرض الي اعاني منه وعلاجهم قوي واحس جسمي مايتحمله
شهد : مافيه شى سهل ياام سالم وانتي اعرف حملتي وولدتي وربيتي ماجت بالساهل بس لاتفقدين الامل ربي الي حطه فيتس ربي الي بشيله منتتس
هدى : املي بربي كبير
ام محمد : شعرتتس كانه بدا يطيح
شهد : يمه مو وقتتس تسالين كذا
ام محمد : شى لاحظته بقوله وشفيها
هدى : مافيها شى وصادقه شعري بدا يطيح بسبب العلاج الي اخذه
ام محمد : الله يشفيتس وعاد تشافي بسرعه وجيبي لنا اخ لسالم بدال الي طرحتيه
هدى : وبعيون مليانه دموع وكانت كل كلمه من ام محمد مثل السهم بقلبها كانت خايفه يشوفونها بشكل غير الي اعتادوا عليه فيها وشافوها وانكسرت بكلام يهشم القلب ، ان شاء الله يخاله الي كاتبه ربي بيصير بروح اشوف سالم
شهد : يمه ماله داعي تقولين هالكلام قدامها هي لو بيدها شى كانت عالجت نفسها
ام محمد : ماقلت شى كل الي قلته صح نبي اخ لسالم ٧ سنين وولدي محروم ويوم حملت سقطتت ومرضت شذنب ولدي
شهد : يمه ولدتس يحب هدى انتو ليش مو راضين تفهمون ان الي يحب بيحب الشخص بكل حالاته وهو اعرف لمصلحه نفسه لو مايبي هدى ويبي اطفال راح واتزوج ولا اهتم بس هو يحبها ومايبي غيرها افهموا
ام محمد : اي اي روحي وراها محد نافع ولدي غيري يروحي عليه يشكي ويبكي لمن مالت على حظك يامحمد
شهد : تبكين ياهدى تبكين
هدى : ماسمعتي كلام امك وش تقول جرحتني ياشهد وهي تعرف ان سبب اخفائي لمرضي مابي احد يشوفني وانا باسوء حالاتي ويعيب ويشفق
شهد : امي تمزح معك ياهدى وانتي جميلة بكل حالاتس بالله كلام امي او اي احد ثاني وش بتستفادين منه يكفي محمد يشوفتس بكل حالاتس ملاك ودائمًا يقول عندي شى مو عند اي احد يكفيتس محمد
هدى : صح انا يكفيني محمد بس لو امك قالت له يعرس شهد انا حتى لو اموت مابي مراه ثانيه تربي ولدي مابي
شهد : بس ياهدى محمد مافكر كذا مفروض تكونين واثقه فيه واثقه انه مارح ياخذ بديل لتس تدرين وش قال لنا لما جانا اليوم
هدى : وش قال
شهد : قال انا مكتفي بهدى ومابي غيرها والله لايقوله لو يصيبها مكروهه عهد عليه يوفي لتس الين ينقبر معتس ويربي ولده لحاله من وين جاب هالكلام من وين؟ اكيد من حبه لتس
هدى : اهخ الله يخليه لي ولسالم حتى انا احبه والله
شهد : ويخليتس لهم ولنا محظوظ فيتس محمد
هدى : الله يجبر بخاطرتس مثل ماجبرتي بخاطري
شهد : يلا عاد اضحكي
هدى : هههههههههههههه ابشري
______________________________
صباح يوم جديد ويوم العيد الكل فرحان والكل مبسوط ويعايدون بعض والي يوزع عيديات والبزران يلعبون وريحه القهوة والبخور تعج بكل القريه "العيد كالعاده في بيت ابو فهد"
ندى : دائمًا بالعزايم ينكسر ظهري
عفراء : صدق تعبت واختس منسدحه واحنا نكرف
ندى : يلا عروس ندلعها الين تمشي
عفراء : انتظر يوم زواجها عشان قبله بنفذ حطه اخوتس هايل ونهبل بها
"كتذكير : هايل جمعهم وخططوا ينرفزون فرح ويعصبون عليها بليلة زواجها "
ندى : اي والله متى يعدي كل شى على خير هرمنا لاجل هاللحظه
زامل : وين الدله يله
عفراء : هذي هي امسك
ام فهد : ندى ياندى تعالي
ندى : لبيه يمه
ام فهد : وين القهوة قهوي ضيوفنا
ام عزام : من زمان عن هالجمعة الحلوة شلونتس ياهدى
هدى : بخير ماعلي
~~~ في بيت ابو فهد من جهه ثانيه مجلس الرجال~~~
هايل : ليه ماجت للحين
سياف : من تقصد
هايل : محد وين دحيم تعال
عبدالرحمن: ها شتبي يالغثيث
هايل : يوم تجي وين الدكتورات
عبدالرحمن: في جيبي يعني وين اكيد فالبيت
هايل : تتوقع عازمينهم
عبدالرحمن: اي معليك تطمن اختي بكل شى تحشرهم وتجيبهم
~~~ في بيت ميهاف وفاتن ~~~
فاتن : يلا تاخرنا
ميهاف : اي يلا خلصت شكلي حلو
فاتن : اي تهبلين يلا مشينا
ميهاف : اي يلا
~~~ عند ابو فهد ~~~
عبدالرحمن: يلا خذ جو اشبع عيونك
هايل : تمشي وينبت تحت ثراها الياسمين
وتوقف فراشات الصبح بكتفها
من طهرها تشبه شعور الطيبين
ومن حسنها يذوب فيها ظلها
سياف : صح لسانك بس من المقصودة
هايل : ميهاف
سياف : ومن ذي ميهاف
هايل : الدكتورة
سياف : وانا اخر من يعلم ماشاء الله عليك يخوي
هايل : بعلمك بعدين بكل شى رح صب قهوة لهم
عبدالرحمن: رجع لك شغف الشعر
هايل : الشاعر مايكتب قصيد الا لملهمته وانا لقيتها وكل شعري هي الي مقصوده فيه
عبدالرحمن: يحظها والله
~~~ في مجلس الحريم ~~~
شهد : اخيرا جيتو يشيخه مابغيتو
فاتن : والله كنت بروح لابوي بس عشانك جيت
شهد : الله يحيكم وعيدكم مبارك وكل عام وانتو بخير
ميهاف: وانتي بخير
شهد : تفضلو تفضلو
جهير : يله حيه بالدكتورات
سلمى : وهم بكل عزيمه بيجون ماصارت
فاتن : ذيك مارح اسلم عليها من الحين اقول الكريهه هي وامها
شهد : سلمي ماعليتس منهم
ميهاف : عيدكم مبارك
فاتن : كل عام وانتو بخير وكل عام واحنا ناشبين لكم
كلهم : ههههههههههههههههههههههههههههههه
ام فهد : تو مانور البيت
ميهاف : بنورتس ياخاله
ام محمد : فاتن تعالي اقعدي جنبي بتاملتس
فاتن : انا اخاف من الحركات ذي
شهد : روحي روحي ههههههههههههههههههههههههههههههه
فاتن : ابشري ياام محمد
ام محمد : افا صيري ناديني خالتي او مثل هدى ياخاله وحتى اعتبريني امتس
فاتن : ههههههههههههههههههههههههههههههه ابشري ياخاله
ندى : شكل العرس الجاي فاتن واخوتس
شهد : مو منجدتس قلت انتي له
ندى : امتس واضح تبي فاتن الله يوفقهم
شهد : يوه ياندى ياحبتس للدراما
جهير : وين عروستنا ماشفتها
ام فهد : تتزين تقول مابي عمتي تشوفني ووجهي اصفر
جهير : يوه هي بكل حالاتها تجنن
فرح : تتكلمون من وراي السلام
جهير : هلا هلا بكنتنا يالله تجعل هالايام واشوفتس مع خالد
فرح : هلابك ياخاله شلونك
جهير : بعد شوفتتس صرت بخير
زينب : وشذا الحب كله يمه ترا انا وساره نغار
ساره : خليها تحب كنتها بس ها خليها تهمز رجولك بدالي اي
كلهم : ههههههههههههههههههههههههههههههههههههههههههههههههههههههههههههههههههههههههههه
جهير : افا وانتي وينتس
ساره : تحبينها اكثر مني حتى خالد يحبها اكثر مني
فرح : ها بنصير انا وانتي نتغاير من الحين
ساره : تم
جهير : ها تبينا نزوجتس انتي بعد
ساره : من بتزوجيني الله يخلف الحلوين سياف وهايل ولا عبدالرحمن وعزام
جهير : بعد شف شف العوباء
ام محمد : لا عاد اعذرينا ياساره كان ودنا تصيرين كنتنا بس ولدي له وحده حاطتها براسي
فاتن : وع الله يعينها
ام عزام : ولدي مسافر يشتغل مالكم نصيب
ساره : شفتي يمه حظي حتى بالحلوين خايس مالت
ام فهد : ههههههههههههههههههههههههههههههه يحليلها تنوكل
زينب : عيب محد يتزوج الا الكبير
ساره : هذا خالد وفرح بزران وبيعرسون
فرح : يازين كلامها ههههههههههههههههههههههههههههههه
فاتن : ميهاف بنت هيه
ميهاف : ها وشفيتس
فاتن : شكل هايل ماخذ توب ون بالقريه مستهدف
ميهاف : توب ون ولا توب الف هو يبيني وانا ابيه
فاتن : شفته واحنا جايين شلون يناظر شوي وبياكلتس
ميهاف : ههههههههههههههههههههههههههههههه الحب ومايفعل
فاتن : اقول الله يستر ذي الي جنبي تقول فبه وحده تبيها لولدها وتناظرني يارب مو انا
ميهاف : وليه يارب مو انتي ترا دحيم شخص حلو وطيب وش تبين احسن من كذا
فاتن : حبيبتي انا ابي واحد من المدينه مابي اسكن بالقريه
ميهاف : ترا هو من المدينة شوفي اهله كلهم بالرياض الا هو
فاتن : هذي المشكله اني باخذه ماباخذ اهله
ميهاف : يمكن ماتقصدتس ارتاحي
فاتن : يارب
~~~ في مجلس الرجال ببيت ابو فهد ~~~
ابو خالد : وين ولدنا مااشوفه
ابو فهد : بالرياض والله صار له شغل تعرف غاب واجد
ابو خالد : عيد من يداوم
ابو فهد : والله تعرفني يبو خالد ماافهم بذي السوالف بس ان شاء الله يلحق يجي سياف دق على اخوك
سياف : ابشر يبه
محمد : مارد عليك صح
سياف : اي وش السوات وش اقول لابوي الحين
محمد : الله يصلحك يافهد دايم ناكبنا اسمع اطلع برا وكانك بتكلمه وبعدها تعال وقل انه يقول سيارته خربانه وانا وانت بنروح نجيبه
سياف : تم يبه انا بطلع اكلمه بالهدوء برا وبجي
ابو فهد : زين زين
سياف : رد يافهد رد عالاقل طمنا عليك
هايل : وش السالفه وشفيك متوتر
سياف : مافيني شى ادخل وقم بالواجب عني
هايل : مااقتنعت بس بتعلمني وشفيك بعدين
سياف : احم يبه دقيت على فهد وقال ان سيارته بالورشه وماتطلع الا الاسبوع الجاي
ابو فهد : ماهي سالفه ذي نبيه يتعيد معنا ويحضر عرسه الي بعد كم يوم
محمد : ابروح انا وسياف نجيبه بسيارتي تطمن ياعمي
هايل : ليش تكذب برا ماكلمت احد
سياف : خلاص يالملقوف لارجعت قلت لك
هايل : اي ماتمشي المويه من تحت رجليني وانا اتفرج
عبدالرحمن: يالقفك صب صب قهوة لهم
الجد محمد : السلام عليكم
ابو فهد : هلا هلا بابوي تو مانور مجلسي عيدك مبارك يالغالي
الجد محمد : ياهلا ياهلا عيدكم مبارك كلكم وكل عام وانا موجود بحياتكم
ابو محمد : ههههههههههههههههههههههههههههههه امين امين الله يطول بعمرك
الجد محمد : جايب لي ضيوف
عبدالرحمن : هلا بعمي
ابو فاتن : عرفتني وعرفتك ها
عبدالرحمن: ههههههههههههههههههههههههههههههه وهل يخفى القمر ياعم
هايل : القمر وعمي هو ابو الدكتوره الثانيه صح
عبدالرحمن: ماتطس انت وتخليني ابني مستقبلي بما انه قدامي
هايل : الحين انا تبيني اطس افضحك قدام ابوك
عبدالرحمن : اصلا ابوها يعرفني لما كنا بالمستشفى بالرياض ووصاني عالدكتورتين يعني مابيني وبينهم شى اما انت
هايل : افا يادحيم كذا نظامك افضحك تفضحني
عبدالرحمن: اجل تفضحني وانا اسكت واصفق لك
هايل : اسحب قصايدك عنك اجل
عبدالرحمن : احسن من زينها
هايل: ماعاد تمتثل فيها انت بشوف لي صديق ثاني
ابوعبدالعزيز: السلام عليكم
ابوفهد : يامرحبا هايل صب لهم قهوة وش تنتظر
عبدالرحمن : يلا يالصبابه
هايل : هلا بعمي صقر
ابو فهد : وش جابك بيتي ياصقر
صقر : كذا تكرم ضيوفك يبو فهد
ابو فهد : ضيوف ماهم معزوبين مايلزموني
ابوعبدالعزيز : افا تطرد ضيوفك
ابوفهد : الي نضيفه ومايحشم مجلسي لايجيه مره ثانيه
صقر : لاتنسى بنتي ماخذه ولدك
ابوفهد : ان كانها بنتك فهي معززه ومكرمه وفي بيتها محد طردها وان كانك بس تعتبرها بنتك فانا صرت الاب لها قبل تتزوج امها لنا ماضي ياصقر لاتنساه
صقر : مجلس مايكرمني مالي قعده فيه بس ترا ابوك الي عازمنا مشينا يااخوي
ابو فهد : الباب لكم اوسع من الجمل
عبدالعزيز: كان ودي اتعرف عليكم اكثر ياهايل بس ماعليه الا ماتزين ونرجع
هايل : ياعم صقر اهدا ابوي معصب بس اكسروا الشر
ابوفهد : هايل من قال لك تتكلم عني انا ان قلت كلمه ماارجع عنها
ابوعبدالعزيز: ماكان هذا العشم فيك يبو فهد كنت طيب بايامك القديمه الحين عاداتك وتقاليدك اثرت عليك
ابوفهد : مااثر علي شى وابو فهد مايتغير ولنا ماضي سوا بس لاتنسى فعايل اخوك يوم كنا نسوي الجميل ونساه
صقر : ان كان نيتك تذلنا بماضينا فلا تنسى يبو فهد ترا ماضينا سوا
الجد محمد : خلصتو الضيف الي انا اعزمه مايطلع من المجلس وماربيتك تطرد ضيوفنا يولدي
ابوفهد : يبه انت اعرف وش صاير بيننا وانا اكرمته لاخر حفيد لي وقوم الدنيا علينا ولا قعدها
هايل : وش الماضي الي بينكم وحتى لو هو ماضي خلاص انسوه
ابو فهد : انت اسكت كلامي ماخلص عطيتك ياصقر اغلى خواتي ورديتها لنا بكفنها وابعدتنا عن بنت اختنا واحنا يوميا نشوفها بس مانقدر نقول شى قدامها وماكفاك انكرت وجود اختي وهي تحت المقبره وكذبت على بنتك بام ثانيه حتى الام الثانيه البنت ماشافتها ماكفاك الي سويته ورحت تزوجت ام زوجه ولدي لاجل ترجع تقرب علاقاتنا وحاولت اصلح معك من جديد بس الردي ردي
ابوعبدالعزيز: الي صار ماضي يبو فهد وكلها كانت غلطه ماله داعي تعيد هالاشياء قدام عيالنا وانت تدري ان محد يدري
هايل : كانت عندنا عمه غير جهير
ابوفهد : اطلع برا ياصقر وابوعبدالعزيز
صقر : طالعين وتراب اختك للحين ماجف اسقيه كل يوم من محبتي لها يبو فهد وبنتي لحد يقرب صوبها من عائلتكم الوصل الي بيننا انقطع من وفاة امها
ابوعبدالعزيز: تعلم شلون تكرم ضيوفك المره الجايه
ابو فهد : انا اكرم الضيوف الي فيها خير مو الي رديه
الجد محمد : انت شلون تتكلم كذا
ابوفهد : كانك سامحتهم يايبه فانا مو مسامحهم انا ظلمت اختي مع واحد كنت احسبه سند ويد عون لنا طلع واحد ردي ونذل انتظر يناسبنا ويقلب علينا وحط الحره ببنتك يايبه الين قتلها وش قتل امي تكلم يايبه وش قتلها مو قهرها على بنتها كل الي صار انا المسؤول عنه لاني انخدعت ومارح اضيفهم ببيتنا وهم اكرمونا بكفن اختنا
ابوعزام : فتحت جروح عجزنا نسكرها يبو فهد
هايل : احد يعلمنا ابوي وش يقصد
ابو محمد : الله يرحمك يالغاليه
خالد : يتكلم من جد هذول ولا فيه كاميرا مخفيه
عبدالرحمن: شكله جد
ام فهد : وش فيك يبو فهد ليه تبكي
ابوفهد : مافيني شى خلتس عند ضيوفتس
ام فهد : وين رايح لاتروح وانت حالتك كذا
هايل : يبه وين بتروح بعد ماقلت هالكلام كله متى كنتو ناوين تعلمونا؟
ابوفهد : خلك عند عمانك ياهايل وضيفهم انا رايح وبرجع
هايل : وش يقتل فضولي الحين
عبدالرحمن : يبه مارح تقول شى
ابومحمد : كل شى بوقته حلو
الجد محمد : انا ماسامحته يولدي ماسامحته انا كلما اشوفه اشوف بنتي بعيونه
ابومحمد : لاتضيق صدرك يايبه انت تعرف ابوفهد ينطل كلام ومايعرف ثقله عالطرف الثاني
الجد محمد : الله يخليكم لبعض انا ماشي للرياض وبما ان جيتي هنا دايما تجيب مشاكل انا راجع لعزبتي ومجلسي
ابومحمد : ومن بيخدمك يايبه
الجد محمد : اخدم نفسي يولدي للحين ماعجزنا
ابوخالد : ياخالي خلك اليوم هنا ونجلس الين عرس احفادك وبعدها نمشي وتجي معنا شرايك
الجد محمد : عرس من
ابو خالد : ولدي خالد على بنت ابو فهد فرح وبنتي زينب على ولد ابوفهد فهد
الجد محمد : مبرووك مبرووك وين فهد مااشوفه
هايل : راحو يجيبونه سياف ومحمد
الجد محمد : زامل يولدي ودني مجلس الحريم بسلم على بنيتي وببارك لحفيداتي
زامل : على خشمي ياجدي يلا امش
~~~ في مجلس الحريم ~~~
سالم : ماما ماما
هدى : هلا حبيبي
سالم : قبل شوي جاء عمو صقر وعمو ابوعبدالعزيز بس عمو ابوفهد طردهم وقال لعمو صقر انه قتل اخت عمو ابو فهد يعني كان لعمه جهير اخت ؟
جهير : وش جاب هالطاري
سالم : هم قالو كذا حتى قالو ان عمو صقر كذب على بنته بام ثانيه وان امها ماتت من زمان وبسبب موت اختكم ماتت جده سلمى
فاتن : وش يهذر فيه هالورع
ام فهد : الله يصلحك ياسالم سكتيه ياهدى
ام محمد : من فتح هالدفتر القديم
ام فهد : وانا اشوف ابو فهد طلع وهو متضايق
ميهاف : وش يقصد سالم
ام عزام : بزر سمع بالغلط وفسره على كيفه قومي سلمى صبي قهوة
ندى : عمتي جهير عندك جد اخت
جهير : انتي ليه ملقوفه فكيني من شرتس
شهد : كلهم اختبصو وتوترو واضح فيه شى
زامل : احم ياحريم خذو طريق جدي محمد بيدخل
فاتن : فيه غرفه فاضيه
ندى : روحو للمطبخ
هدى : تعالو وراي
الجد محمد : مبروك ياامي فرح وزينب صونو ازواجكم وحافظو عليهم وحبوهم مثل حبي انا وجدتكم سلمى
فرح : الله يبارك فيك ياجدي وعيدك مبارك
زينب : ابشر ياجدي
الجد محمد : لما تزوجت جدتكم سلمى كانت صغيره مره وكنا مانحب بعضنا انا وهي لان كنا نتهاوش بالشارع عالكوره كانت جدتكم قويه وزوجونا شبهه غصب ليله العرس كنت مستحي بس هي كانت تسال وين العشاء
كلهم : ههههههههههههههههههههههههههههههه
ام فهد : اخبرك ياعمي قلت لي هالقصه يوم اخذ ابو فهد
الجد محمد : ابقولها لكل الي بيعرس ولو مت علموها احفادكم
فرح : كمل كمل ياجدي تحمست
الجد محمد : وين وصلت اي كانت تسال وهي شرهانه وخدودها حمراء وقالت لي وين العشاء ساعتين يزينوني لك ومااكلوني شى وقالو زوجك بيحط لك الاكل واخر شى ماحطيت لي عشاء وانا كنت مستحي واناظرها ومنصدم من وين جايبه هالجرآة ورحت جبت لها عشاء وكانت تاكل وانا اطالع لها الين قالت ليه تناظر تبيني اغص واموت اكل معي ههههههههههههههه يالله اذكر هالليله مثل الحلم المهم قلت لها من باب اني مستحي قلت ماني جوعان قالت اكل الحين ترا مافيه اكل غيره بتموت جوع وكسرت الخجل الي كنت انا فيه كانت جدتكم حركاتها حركات رجال وشوي شوي بدينا نتقبل بعض وطلع عندها مشكله بالحمل كل الي حولي قالو تعال نزوجك وطلقها ماتنجب بتحرمك وكانت هي تحزن من كلامهم وكرهتني بعدها تحسب اني بسمع كلامهم الين جيتها وقلت لها يابنت الناس غيرتس انا مابغى وان كانتس ماتجيبين ضنا فانا مابي لي عيال يكفيني انتي وتعلقت فيني زياده وانا كنت احبها لدرجه مااشوف اي احد عندها كنت اكتب فيها القصايد وكانت تقول لاتكتب القصيد وانت ماتسويه طبعا هي تقول كذا لان ماتبيني اكتب لانها صارت تستحي وجلست تعالج حول ٩ سنين وبعدها ربي رزقنا بابو فهد والحمدلله جابت العيال تحت بعض والحين اوصيكم كلكم حبو بعض مثل حبنا انا وسلمى الي نبيع الكل عشان مانخسر بعضنا
فرح : الله ياقصه حبكم ياجدي ليت كل المحبين انت
الجد محمد : خالد حليل وطيب وتراه يحبتس واما انتي يازينب تحملي بيحبتس فهد
زينب : صادق يمكن نصير مثلكم مانحب بعض بعدين نحب بعض
الجد محمد : الله يهنيكم ويجعلها زواجه الدهر وعقبال كل حفيداتي احضر زواجكم
ندى : امين امين ياجد ادع لي اتزوج وافتك من هايل
الجد محمد : اغلى حفيد عندي وش مسوي لتس
ندى : مجنني ياجدي مغير يامرني اسوي له اكل
الجد محمد : الحين انتي لو تعبتي من بيقوم فيتس من بيوديتس المستشفى
ندى : اخواني
الجد محمد : زامل مثلا مشغول مع حرمته وعياله فهد توه معرس سياف مع ابوتس بالشغل من الي ٢٤ ساعه قاعد عندتس
ندى : هايل
الجد محمد : اجل محد بيقوم فيتس الا هو اخدميه ويخدمتس واذا زودها علميني
ندى : تم الله يطول بعمرك يااحلى جد
الجد محمد : تبون شى توصون شى حريم عيال وبنتي جهير ناقصكم شى مضايقينكم عيالي
ام محمد : اي والله ياعمي ولدك ازعجنا بالقريه
الجد محمد : اعذريني ماالومه من مايحب قريتنا
ام محمد : معك حق
الجد محمد : يلا نستودعكم الله ولدي زامل تعال رجعني لمجلس الرجال
زامل : ابشر ياجدي يلا من هنا
ميهاف : سمعتي وش قال سالم يافاتن
فاتن : سمعت وسمعت اسم ابوتس بس وش قصدهم تعرفين ياهدى شى
هدى : لا والله مااعرف شى حتى محمد ماعمره قال لي شى شكل محد يعرف بذي السوالف الا الشيبان
ميهاف : بس وش قصده ان ابوي لعب علي بام ثانيه وان امي تصير اخت هذولي
ام فهد : شكل البنت عرفت وش نسوي ياام محمد
ام محمد : احنا مالنا دخل ذي سوالف بينهم وان كان البنت فيها فضول تعرف تروح تسال ابوها
ام فهد : صادقه انقلب هالعيد كله
~~~ في بيت فهد ~~~
سياف : قم تحرك والبس وامش معنا ابوي يبيك تجي
فهد : مارح اجي
محمد : زواجك حطوه بتاريخ ٥/١٠ قل انك مارح تحضره بعد
فهد : رح احضره لاجل ابوي وفرح بس والله لاقلب حياتها لجحيم وشوفوني حلفت والله لاخذ البنت الي احبها
سياف : خذ الي تبي بس الحين ابوي وابو البنت يسالون عنك وابو خالد مايعرف وش صاير ومايدري انك تحب وحده ثانيه فقم واكسر الشر يافهد
فهد : طيب خلاص ياكثر هرجكم جاي
محمد : ماشفت اعند منه الو هلا عبدالرحمن صاير شى
عبدالرحمن: وش بقى ماصار عمي ابو فهد تهاوش مع ابوعبدالعزيز وصقر وطردهم وتكلمو بمواضيع غريبه وان عندنا عمه بس ميته والحين جالسين ندور على عمي ابو فهد اختفى بعد الي صار
محمد : كل ذا صار بغيابنا يالله بالمشاكل
سياف : وش صاير
محمد : سالفه طويله بقول لكم بالطريق يلا يافهد
فهد : يلا يلا شغل الموتر جاي
~~~ في القريه عند ميهاف ~~~
ميهاف : ممكن اعرف يبه وش صاير بينكم بالمجلس وبايس كذبت علي
صقر : مسرع علموتس
ميهاف : علمني انت يبه انتظرك تتكلم
صقر : انا يبنتي كذبت عليتس بشي واحد قلت ان امتس حيه بس ماتبيتس وهي ميته
ميهاف : تبي الارض تنشق وتبلعها ولاتسمع هالكلام كان مجرد كلام بس هو سهم يغرص بقلبها بكت ايام وشهور وسنين على امها وانضربت من ابوها لاجل بس تروح نشوف امها وكرهتها واشتاقت لها ولامتها اخر شى طلعت ميته بكت وحزنت وذبلت لاجل انسانه مو موجوده اصلا ، تمزح يبه صح هذا الكلام مو صدق امي عايشه انت قلت لي امي عايشه
صقر : مابيتس تعرفين اخوانها فقلت انها عايشه وهي بالاصل ميته
ميهاف : استرخصت فرحه بنتك خليتني وحيده طول عمري اتمنى بنات خال او بنات عم وماكفاك كذبك وحرمانك لي جبت اقسى انسانه وتبيني احبها مثل امي يبه وش باقي بتسوي وش باقي ليه عشت حياتي عني لي كذبت طول فتره ٢٢ سنه ليه عالاقل ماقلت امك ميته كان بكيت لموتها مو لاختفائها وكرهها لي خليتني اكره امي لانك كذبت علي ليه يبه ليه
صقر : كله كان ماضي يبنتي انا مابيتس تتقربين من اهل امتس بيننا دم يابنتي مااابيهم يضرونتس
ميهاف : ابوي ضرني لدرجه انزف داخليا يايبه ف ماينلامون الناس لو ضروني
فاتن : اهدي ياميهاف تكفين اهدي يالله وش صاير
ميهاف : ٢٢ سنه ابكي على انسانه ميته طول ٢٢ سنه كنت احلم واتخيل امي وكل من قال قلت امي موجوده بس ماتبيني خلاني اكرهها وهي تحت القبر خلاني الومها وهي ميته ماكفاه يافاتن ماكفاه كرهه لامي ولي صار يقول مابيتس تتعرفين على اهل امتس انتي تعرفين قد ايش كنت اتمنى قرايب بنات كنت طول عمري وحيدة كسرني ابوي يافاتن كسرني
فاتن : بسم الله عليتس تكفين وقفي صياح احنا بالشارع
ميهاف : ماني قادره ماني قادره يافاتن بطرش قهر كل هالايام الي مرت انا كنت قرب خوالي وانا مااعرفهم من جيت للقريه وانا حاسه بامان عندهم بس ماكنت ادري انهم اخوان امي ماكنت ادري
فاتن : طيب بما انك عرفتي مفروض تفرحين ليه تبكين
ميهاف : افرح افرح وهم بينهم دم زوجه ابوي قالتها عشتي وحيده وبتموتين وحيده
هايل : لاتبكين ياحبيبه الروح لاتبكين
والله لو على كيفي حطيتس بين احضان الامان
حميتس من الكل وصرت لتس الاقارب والاخوان
وحطيتس بين جفن عيوني وبين الاحضان
عبدالرحمن : رجع ابوك للبيت
هايل : لا بس طلع بالمزرعه مايبي احد عنده
عبدالرحمن: تقطع قلبي عليها وهي تصيح
هايل : لازم نعرف زبده الموضوع ومالنا الا ابوك نساله
عبدالرحمن: تهقى يقول لنا
هايل : بنحاول فيهم امش
فاتن : قومي قومي خلينا نروح للبيت وتاخذين راحتتس اكثر
ميهاف : مكسوره يافاتن مكسوره
فاتن : بسم الله عليتس تعالي ياحبيبتي
~~~ في المزرعه ~~~
ابو فهد : ليت اقدر ارجع الماضي واعدل اخطائي خطيت بحقتس يااختي
الجد محمد : لاتحط اللوم عليك يولدي الردي يبقى ردي
ابوفهد : شلون ماحط اللوم علي يايبه وهي جتني وقالت لي ان صقر يضربها وورتني وقلت لها تحملي هذا زوجتس ماعندنا بنات يتطلقون وانت يايبه موصيني عليهم
الجد محمد : اذكر اني كنت احب القريه وانت كنت تحب الرياض وماتجي الا قليل للقريه والحين انعكست الادوار
ابوفهد : شلون تبيني اقعد بالمدينة الي اختي انقتلت فيها بسببي جهلي يايبه خلاني اندم طول عمري
الجد محمد : كلنا نخطي يولدي بس الي ابيه منك تعفي وتمشي
ابوفهد : اسامح الكل واعفي عن الكل الا صقر ولو على كيفي انا خذيت حق اختي من شريان قلبه
الجد محمد : لو بنمشي على هالمبدا الي يخطي بنقلته كان قتلتك ياولدي
ابوفهد : ليه
الجد محمد : جتني حمامه تشكي عن اهل دارها دارٍ يغصبون عيالهم كان ودك تكرر اخطاءك يولدي كررها على نفسك لاتظلم عيالك
ابوفهد : قال لك فهد صح
الجد محمد : حمامه دار علمتني لا فهد ولا اخو فهد
ابوفهد : انا مابي عيالي ياخذون من بعيد ونغلط غلطه زواج اختي زوجنا صقر وهو دياره بعيده عن ديارنا وندمنا اما الاقارب تنداس روسهم
الجد محمد : اجل ريح ضميرك واحفظ سلاحك دم اختك نشف ماعندها رجال ياخذ حقها
ابو فهد : يبه لاتدوس على عرقي تعرفني اسوي كل شى ولا ينقال عني مو رجال
الجد محمد : الرجال يولدي الي افعال الخير يسويها لعياله مايبحث عن دم وحده ميته ليتها ١٨ سنه
ابوفهد : ليش يبه انت مبرد اعصابك
الجد محمد : لاني وصيت ولدي يهتم لخواته اثره مايبي وحده منهم تطلق ويشوف ان طلاق البنت ينزل من كرامه العائله انا اخطيت يولدي يوم اني وصيتك عليهم ماكنت الحكيم الي على قلبي انا وامك ويلا امش كمل عيدك قبر اختك وامك مايجف وانا عايش
ابو فهد : الله يخليك لنا ويطول بعمرك
الجد محمد : يلا يلا مشينا يولدي الله يهديك
~~~ في بيت ميهاف وفاتن ~~~
فاتن : بجيب لتس مويه
ميهاف : فاتن خلينا نرجع للرياض
فاتن : وتطبيقنا
ميهاف : خلاص انا برجع للرياض وخلتس انتي بدالي
فاتن : ترجعين كم يوم
ميهاف : مارح اطول لاتخافين برجع بعد بكم يوم
فاتن : براحتتس
~~~ في بيت ابو فهد ~~~
عفراء : يعني الحين زامل يصير ولد خال اختي ميهاف ؟
ام فهد : ياحبتس للكلام الفاضي خلصنا اسكتي
ام محمد : الله يهديه زوجك بعد الا يفتح صناديق الماضي
ام فهد : الله يصلحه ابو فهد دائمًا ينطق بالوقت الغلط
ندى : هدى هدى وشفيك تكفين تكلمين
شهد : يمه يمه هدى اغمى عليها
ام محمد : بسم الله عليها بدق على محمد يجي يوديها المستشفى
~~~ في السياره ~~~
فهد : وش قاعد تقول يامحمد
محمد : هذا الي قاله لي عبدالرحمن
سياف : والله تحمست اعرف وش السالفه من يدق
محمد : امي هلا يمه وشفيكم
ام محمد : وينك مالقيتك بالمجلس تعال هدى طاحت واغمى عليها
محمد : ايش وش قاعده تقولين يمه
فهد : محمد انتبه للطريق قدامك شاحنه
سياف : محمد هد السرعه قدامك سيارات
فهد : محمد يولد انتبه ...

انتهى البارت
__________________________________
قراءه ممتعه واتمنى البارت يعجبكم