"جابك الله في زحام العمر صدفة "

51

~~~ في بيت ابوفهد ~~~
ابوفهد : ياهلا بالمقفي
فهد : اعذرني يبه انت تعرف ان شغلي هناك
ابوفهد : انا ليش اعذرك ؟
فهد : يعني مانت زعلان مني
ابوفهد : لا حشى انا زعلان على بنت الناس الي تاركها ورايح
فهد : كلكم تعرفون ان شغلي فالرياض
ابوفهد : عجزان تاخذها هي اصلا ليش تقعد هنا دام زوجها ماهو هنا ها جاوب تكلم
ام فهد : ولا حن قلبك لها تدق تسال تطمن عن حالها وحال ولدك ؟
فهد : ولدي ؟
ابوفهد : اي بعذرك ناسي حرمتك قامت تتحوم وانت ماتدري ولا وقفت جنبها ولا دريت وش الي ببطنها انت حتى مادريت اذا هي حامل ولا لا
فهد : هي ماقلت لي شلون بعرف
ابوفهد : اذا سالتها بتعلمك بس وش ارجي من وراك للحين اسمعني يافهد انا وامك اكثر ثنين نفهمك هنا وفاهم نواياك الي مبيتها بس والله ثم والله ان كان الي ببالي وببالك جد انت مسويه انا لاني راضي عليك ولا فعلتك بخليك تكمل حياتك معها مثل ماانت تبي بس كانك بتجي وبتدور رضاي لاتدوره غضبان عليك ليوم القيامه
فهد : يبه لاتغير كلامك انت قايل لي بس تزوج بنت عمتك وبعدها انت بتروح معي اخطب البنت الي ابيها
ابوفهد : ماوعدت ولا شى قلت لك انساها مالك غير بنت عمتك
فهد : يبه لاتجحد اخواني شاهدين
ام فهد : يعني للحين هي ببالك
فهد : اي
ندى : بسم الله زينب وش تسوين هنا ليش تبكين بسم الله عليك
زينب : سواها ياندى سواها
ندى : فرح تعالي دخلي القهوة عليهم
شهد : فرح فالحمام انا بودي زينب دخلي القهوه
ندى : طيب
شهد : تعالي تعالي وش سمعتي
ندى : السلام عليكم شفيكم اصواتكم برا
ابوفهد : حطي القهوة واطلعي
ندى : طيب
فهد : الحين وش تبون مني
ابوفهد : رح شف حرمتك وش ابي منك الا قل وش باقي انتظر منك
ام فهد : وش بنسوي انت تعرف ابوخالد لو درا والله لايقوم الدنيا
ابوفهد : ماعاد ادري شسوي ياام فهد ماعاد ادري
هايل : وشفيك يبه
ابوفهد : جاتس نقال العلوم
هايل : افا يابوفهد ولدك نقال علوم
ابوفهد : صب صب قهوه
هايل : لا انا بطلع وانت صب لام فهد مابي اخرب عليكم
ابوفهد وهو يضحك : صب لاكبها عليك
هايل : اي كذا نبي نشوف ضحكه ابوفهد جعلنا ماننحرم منها ومن ام فهد
ام فهد : ههههههههههههههههههههههههههههههه ماكذبت يوم قلت ولدتس لكيع
ابوفهد : مااتسذب انا
هايل : يبه يمه بشاوركم بشي
ابوفهد : لا
هايل : صل عالنبي يابوفهد وخلني اتكلم
ابوفهد : اللهم صلِ وسلم عليه تكلم
هايل : انا فكرت اشتغل
ام فهد : وشغل ابوك
هايل : لا ابي اشتغل شغل على مكتب واحط لنا بيت واشتري لنا سياره فخمه وجديده
ابوفهد : ليه بيتنا ماهو عاجبك
هايل : حشى لا والله ماقصدي وقصدي بييت ان نحطه بمكان غير القريه
ابوفهد : لاتتعب عمرك ماحنا طالعين من القرية
هايل : يايبه ياحبيبي العناد ماينفع ندى تبغى تكمل دراسه مثلها مثل باقي هالبنات واخواني وحريمهم يبون قرب اهلهم صح كلامي يمه ولا لا
ام فهد : كلامك صحيح بس احنا تعودنا عالقريه
هايل : ميخالف نبقى فيها الين تغيرون رايكم بس انا رجال ابغى اشتغل واكون نفسي وارفع روسكم وراتبي كله لكم من لي غيركم بهالدنيا غير انتم وندى
ابوفهد : اهجد عن هالكلام مصيرك بتعرس
هايل : حتى لو بعرس مالي بيت وانتم مانتم فيه وهذا كلامك يبه كانك نسيت دايما تكرر علينا الرجال الي ماعنده وظيفه وماكون نفسه وحياته وش له مجلاس بهالدنيا ومجلاس بمجلس الرجال
ابوفهد وهو يضحك : زين احد منكم ياعيالي كلامي ماثر فيه
هايل : كلنا ياابوي كلامك انت وامي دايما بين عقلي وقلبي
ابوفهد : عطنا الزبده
هايل : ابغى اشتغل
ابوفهد : وين
هايل : سعود قال لي انه بيكلم ابوه يشوف لي شغله عندهم فالبنك
ابوفهد : يعني وين فالرياض ولا وين
هايل : لا فالشرقية
ابوفهد : لا بعيده
هايل : يايبه انا رجال وكبرت ماني ذاك البزر الي تخاف احد يجيه ومعي هناك العيال وحاطين استراحه انا يايبه مافكرت وصملت على هالموضوع الا ان كلمه صقر كسرتني يوم قال بترك ولد اخوي المحامي وبزوج بنتي بياع
ابوفهد : خلني افكر انا وامك
هايل : طيب انتظركم
~~~ في غرفه زينب وفهد ~~~
شهد : وش فيتس وش سمعتي
زينب : للحين يبيها ياشهد للحين ويفكر يتزوجها
شهد : الله يهديتس على صياحتس ذا احسبه جايبها معه
زينب : يسويها لاتستبعدين
ندى : اهجدي عاد مايسويها اخوي
زينب : والله لو سواها لاتطلق
فهد : ندى
ندى : جاء هلا بالطش والرش والبيض المفقش
فهد : هلابتس ياامي وين زينب
ندى : وين هديتك
فهد : وشتبيها
ندى : من قال لي اقصد لها تراها حامل وبتجي اليوم الدكتوره تسوي كشف جماعي
فهد : لمن
ندى : لحرمتك وحرمه سياف وفرح
فهد : والله من الغثى
ندى : تراها جالسه تصيح خذ بخاطرها واعتذر منها
فهد : مدري الى متى بجامل الله يعين
ندى : اصبر زوجه سياف فيه شهد اطلعي بيدخل فهد
شهد : اي اي يلا لاتسوين مشاكل يمكن عذره معه
زينب : حتى لو جايب اعذار الكون بيكون العذر اقبح من صاحبه
فهد : احم السلام عارف مارح تردين بس ليش ماقلتي لي انتس حامل
زينب : شلون تبيني اقول لك افتح جوالك شف كم اتصال وكم رساله مرسلتها
فهد : هدي هدي ماله داعي الصراخ والصياح
زينب : هههههههههههههههههه ماله داعي طيب طيب اطلع وسكر الباب وراك
فهد : ماني جاي ازيد الطين بله جاي اعتذر مثل الرجال واخذ بخاطرتس
زينب : انت صر رجال بالاول بعدين اعتذر مثلهم
فهد : زينب لاتخليني اسقط الي ببطنتس
زينب : هذا الي تبيه بترمي ولدي وتحتضن عيال هيام صح ولالا
فهد : وش قاعده تخربطين انتي
زينب : اهلك مايعرفونك كثر معرفتي فيك انا سمعت كل شى قلته لابوك
فهد : كم مره قلت لاتقولين كذا وقولي خالي
زينب : تبيني احترم ابوك وانت ماتحترم ابوي يشيخ رقمك من بعد ليله زواجنا ماجاء بجوال ابوي عكس اخوي خالد اسال ابوك اذا يتصل عليه ولا لا
فهد : ابوي خالتس قبل لاانا اخذتس
زينب : ماتجي تعلمني من احترم وشلون اتكلم انت بس تعلم شلون تواجهه اذا تبي تاخذ حبيبتك طلقني وخذها
فهد : مارح اجي واسالتس وش بسوي والشرهه على الي جاي ياخذ بخاطرتس ماتستاهلين
زينب : انت الي ماتستاهل هاللي ببطني ماكنت ابي شى يربطني فيك لان نيتي اتطلق منك لانك بكل ماتعنيه الكلمه ماتستحق انسانه مثلي وصدقني لا حبيبتك ولا بنت ثانيه بتقدر تصير مثلي وكلامي هذا رح تتذكره بعد مانتطلق وكلامي حطه باذنك اذا ناوي تاخذها طلقني
فهد : خلينا من كلامتس الي ماله فايده باي شهر انتي
زينب : مايخصك
فهد : زينب اهجدي وجاوبي احسن لتس
زينب : مدري
فهد : شلون بديتي تتوحمين
زينب : كاي حرمه تتوحم
فهد : يعني ماتعرفين باي شهر
زينب : لو كنت ترد علي كان عرفت انا باي شهر
فهد : ووش دخل ذا بذا
زينب : كنت ابي نروح للمستشفى مع بعض واكشف بس مايحتاج فشلتني عند بنت الناس كل شوي رايحه راجعه علي
فهد : قومي اخذتس للمستشفى
زينب : مابي
فهد : خلي العناد وقومي
زينب : قلت مابي بتاخذني بالغصب خذني
فهد : الله يصبرني قومي يابنت الحلال
زينب : ليش رحت ليش مارديت علي ليش تكذب علي ليش تحطني في حيره ليش ماتحس باللي احسه ليشش بس تفكر بنفسك وبالاشياء الي تبيها ليش مافكرت ان ممكن انا بعد مابيك او وش بيصير فيني وش بيقولون الناس عني تزوج عليها وهي حامل ليش مافكرت فيني مثل ماافكر فيك انت عارف اني مانمت ايام وكنت خايفه ليكون فيك شى ولو ماجيت اليوم كنت بطلب من اخوي يجي يوديني للرياض عشان اتطمن عليك واتفاجى جاي وجايب معه طاري حبيبته حط نفسك بمكاني لو دقيقه لو جبت طاري شخص احبه قدامك وش بتسوي ؟ انا وانت نعرف وش بتسوي فيني بس انت ماتعرف وش بسوي فيك لان بكل وضوح البنت ماتقدر شى والشرع حلل اربع بس لا هنا وتوقف يافهد بنت ابوخالد ماينجاب فوقها ضره طلقني وبعدها كيفك لو تاخذ عشر والحين اطلع مابغى البنت تجي عالفاضي رح انت للمستشفى وعالج عقليتك المتخلفه يالاناني
فهد : كويس خلصتي ضيعت وقتي اسمع كلامتس التافهه
شهد : خليني ادخل ادعس اخوتس
ندى : يقهر توقعت بيهديها بيطلب السماح منها
شهد : لو سياف كذا مدري وش بسوي فيه بس مستحيل اخليه يطلع كذا بكل بروح
ندى : اهربي بيطلع فهد
فرح : شفيكم رايحين راجعين
شهد : تعالي بنروح غرفه زينب
عفراء : ليش وشفيها
ندى : يوه ذي عرفت بتعرف القريه كلها
عفراء : ترا لسانتس طايل
شهد : خلاص امشوا ولا اقعدوا
زينب : الله يحرق قلبكك مثل ماحرقت قلبي
شهد : زينب حبيبتي انتي اهدي
زينب : شفيكم
ندى : ها لا مافينا شى بس جايين عندتس يازوجه اخوي الكبير
زينب : وين قشكم
فرح : قش ايش
زينب : ماحب الي يجي ويده فاضيه
شهد : جويي
عفراء : اقعدو انتم حوامل قومي معي ياام لسان طويل
ندى : تطقين صدرتس وتناديني يالغثيثه
عفراء : قومي قومي بس
فرح : من بيجي اشوفكم مشغلين دخون
شهد : بتجي الدكتوره فاتن ياحبي لها زوجه اخوي ماتقصر
فرح : زوجه اخوتس من
شهد : يعني من ماغيره دحيم المهم انها بتجي عشان تكشف علينا وكذا
فرح : تكشف فالبيت
شهد : اي تجي وتجيب عدتها معها الحبيبه هي المفروض ماتجي بس انا خطر علي اركب سياره او اتحرك او اشيل ثقيل وزينب
زينب : وانا فهد مايرد ولا يبي يوديني
فرح : ترا على فكره اخوتس مثل اخوي
ندى : احم احم يلا كلو جبت لكم الي مشتهينه يالغثيثات
زينب : ليش اخوي وش مسوي فيتس
ندى : مو مسوي شى كلو كلو
شهد : كانها تاخرت
ندى : منهي
شهد : بمشي وبعيد كلامي زوجه اخوي
ندى : اها قصدتس فاتن
شهد : اي
عفراء : زوجه اخوتس الي ضنتي ماهي صايره
شهد : لا بتصير بس ننتظر يتم موضوع محمد ونخطبها لدحيم عبدالرحمن ناشب بروسنا الا يبيها ويبي يوفي بوعده
ندى : اي الله يوفقهم
~~~ في محل ابوفهد ~~~
سطام : ياعيال شرايكم نسافر
عبدالرحمن : كانك فليتها ؟
هايل : من مين الرساله
عبدالرحمن : شدخلك؟ يامرحباا
"محتوى الرساله" شفتك وانا جايه لاتتعب نفسك بالشغل بعيشك على حسابي "
عبدالرحمن : تخسين مااعيش على حساب حرمه بعدين دقيقه وش قصدتس بعيشك على حسابي ؟ يعني موافقه تتزوجيني
هايل : اخلص قل من مين
عبدالرحمن : موافقه ياعيال موافقه
سطام : منهي
عزام : السلام عليكم
عبدالرحمن : وافقت ياعزام وافقت وش اسوي وين اروح لمن اقول
عزام : الله يخرشك يارجال وش فيه هالمهبول
ابوفهد : علامك انت طاير يمين يسار وش قابض رجولك
عبدالرحمن : وافقت ياعمي وافقت تتزوجني
ابوفهد : افا ياذا العلم ومنهي تعيسه الحظ
هايل : لاتقولها ماغيرها
عبدالرحمن : اي اي
هايل : اخس والله وخليتها توافق بدون لا كلام حلو ولا رسايل ولا هدايا اهنيك ياولد العم
سطام : فهمونا
عزام : لاتسال دام فيه عمي ابوفهد لايحوس فرحته عليه
سطام : اوه تمام تمام سكت
عبدالرحمن : الووو شهد
شهد : الله يستر وشفيك
عبدالرحمن : فاتن جايه لكم صح ؟
شهد : اي شدراك بسم الله
عبدالرحمن : وافقت ياشهد تتزوجني
شهد : اثباتك
عبدالرحمن : الله يبلشتس لازم
شهد : اكيد
عبدالرحمن : ارسلت لي ومن ضمن كلامها ان لاتتعب نفسك بالشغل بعيشك على حسابي
شهد : ومن كلمتها ذي وانتي تقول موافقه شدراك يمكن تطقطق عليك
عبدالرحمن : لا حتى لو تطقطق اخر عصبتها تعيشني على حسابها
شهد : يعني خلاص الحين اقدر اقول قدام الكل ان فاتن زوجه اخوي
عبدالرحمن : اي اي
شهد : هذي هي جت بحشرها
عبدالرحمن : لا يابنت شهد يويلتس يليل ذي محد يقول لها شى
هايل : يله يخوي افرح عالاقل واحد منا انتصر حبه
عبدالرحمن : زعلان
هايل : ليش ازعل بالعكس فرحان لك
عبدالرحمن : دائمًا كنت متردد اتزوجها ولالا حتى رغم حبي لها اجبرت نفسي ماكلمها خفت اعلقها فيني ومااقدر اخذها
هايل : وليش ماتقدر تاخذها
عبدالرحمن : لانها صديقه حبيبتك خفت تزعل مني
هايل : وش اهبدك فيه تحسبني مثلك اذا ابتعدت عن احد ابعد كل الي حولي عنه
عبدالرحمن : هذا جزى الي شاري خاطرك
هايل : محد قال لك اشتر خاطره ورح تاخذها غصب عنك شئت ولا ابيت
عبدالرحمن : باخذها باخذها لاتخاف من هذي الناحيه وانت الله يعوضك
هايل : لاتشيل همي ياصويحبي والله وبشوفك عريس قبلي
عبدالرحمن : ليش تضرب طيب
هايل : مابيك تعرس
عبدالرحمن : اي اعترف انك بتفقدني وبتصير قريتكم خايسه بدوني اعترف اعترف
هايل : هو هالشي صحيح ومن جهه ثانيه كلما اشوفك يجيني حنين للماضي تذكر كيف كنا ورعان ونسرق من بقاله ابوسعيد وصرنا مراهقين وكنا بنطيح بشله سوء وضربنا اخوي فهد وزامل علم ابوي وابوك وكملو علينا ويوم تطيح صحن الذبيحه وحطيتها فيني واول ماتعلمنا السواقه ويوم انعزمو اهلنا وحرقنا مطبخ بيتكم عشان كذا مابيك تعرس
عبدالرحمن : ترا توني حتى ماكلمت ابوي وامي
هايل : تذكر قبل ثلاث سنين يوم كان عرس اخوك محمد وسمعنا ابوك وعماني يوصونه وقلنا مارح نعرس ولا رح نحب ابدا وبعد ثلاث سنين شف حالنا
عبدالرحمن : حالي مافيه شى لاتصيحني ياخوك
هايل : من اقصد فيه اذا اعرست
عبدالرحمن : ترا بعرس مارح اهاجر ناشب لك
هايل : الله يقدرني واشيل عرسك واكون الشاهد على زواجك واي شى تبيه وانا اخوك انا موجود مايبيلها توصيه لان هالكلام ماهو بيننا
عبدالرحمن : تحسب مارح اخليك تقط بتقط بعرسي غصب
هايل : تخسي ههههههههههههههههههههههههههههههه
عبدالرحمن : قم قم ابوك يناديك
~~~ في بيت ابوفهد ~~~
شهد : ها شصار
فاتن : زينب فالشهر الرابع لازم تاكلين وتكثرين ماء جسمتس ناشف وانتي يافرح فالشهر الخامس مو واضح جنس الجنين بس فيه شعر تحسين بحرقان صح
فرح : يوهه قمت اكل ثلج من كثر الحرقان
فاتن : جنينك شعره كثيير وانتي ياشهد فالشهر الرابع باقي اسبوع وتدخلين الخامس والي ببطنك مو واضح بس على حسب الي شفته والاعراض الي تحسين فيها فيمكن يكون ولد مبروك لكم جميعًا والله يسهلها عليكم
شهد : للحين تقولين شهد بس
فاتن : مافهمت غيرتي اسمتس
شهد : ناديني يااخت زوجي
فاتن : طويل الاسم حتى لو تزوجت اخوتس بقول شهد
شهد : قولي الي تبين بس تزوجي اخوي
فاتن : طايح بكبدهم العانس
شهد : بيموت على ماياخذتس شنسوي له
فاتن : ههههههههههههههههههههههههههههههه الله يرزقه الزوجه الصالحه اما انا او غيري
عفراء : من زمان العروس استعجلوا
شهد : اي كل شى جاهز واخذنا موافقه العروس بس ينتظرون جيتنا ترا حتى لو حامل مايعوقني شى بجي مع امي اخطبتس
فاتن : حياتس الله هههههههههههههههههه
فرح : خجلتوها خلاص
عفراء : غربيه ندى ساكته
ندى : شتبيني اقول يعني اذا تم كل شى مافيه غير اقول مبروك
عفراء : بسم الله شفيها ذي كلما جبنا طاري عرس دحيم زعلت
فرح : مافيها شى كملو سوالف بروح اشوفها
عفراء : وانا بروح اشوف الطبخه
فاتن : شهد عادي اسالتس
شهد : اي حبيبتي اسالي
فاتن : وش فيها زينب وندى والبقيه
شهد : زينب متهاوشه مع فهد كالعاده وشاكه انه رجع لحبيبته
فاتن : انا كنت شاكه من لما رحنا لشقتهم وشفت سيارته وهو كان قايل لها انه نايم عند اخوياه ووقتها هي قالت ماتبي تنزل لان بوقتها كلنا شكينا
شهد : الله يعينها عليه بصراحه مايستاهلها هي تستاهل الي احسن منه
فاتن : بيجي يوم وبيعرف قدرها سوال ثاني
شهد : هاتي
فاتن : بس امانه جاوبيني بصدق
شهد : طيب وشو
فاتن : ندى تحب عبدالرحمن ؟
شهد : ها مدري
فاتن : وعديتي تقولين الصدق
شهد : تبين الصراحه اي هي تحبه من قبل وقالت لي بوقت ملكتي يوم كان عمي ابوفهد وابوي يبون ياخذون ندى لدحيم بس بوقتها دحيم رفض وقال لابوه انه مايبي قرايب وانه يحب وحده ثانيه وبياخذها
فاتن : من هي الي يحبها
شهد : انتي
فاتن : اها تذكرت بيوم ملكتس عطيته جوالي يصور لنا
شهد : ايوه ووقتها جاني وعلمني عنتس وقعد يحلف انه ماشاف صورتس ولا شافتس بس يبيني اسالتس والحين جد بسالتس انتي تحبينه ولالا
فاتن : هو يعرف
شهد : لو يعرف ماخلاني اسالتس
فاتن : مع وين اطلع
شهد : لاتتهربين وتكلمي هو معزم يبي يخطبتس
فاتن : لو ماحبه مارح اتزوجه
شهد : يعني تحبينه
فاتن : اي
شهد : وليش ماتقولين له
فاتن : تحسبيني خفيفة وعلطول اعترف لا حبيبتي
شهد : الله يخليكم لبعض وأخيرًا دحيم بيعرس وبياخذ احلى بنت بهالدنيا
فاتن : ياحبيبتي انتي سلميني عليهم تاخرت على ابوي بطلع
شهد : الي قلته لتس خليه بيننا
فاتن : ابشري
شهد : صح وشخبار ميهاف ؟
فاتن : والله حالتها حاله مع هالزوج هو يحبها وهي ماتبيه
شهد : مافكرت تعطيه فرصه
فاتن : قلت لها ونصحتها وان شاء الله تفكر بنصيحتي
شهد : اهم شى انه يعاملها كويس بعد الي سواه هايل بعرسهم
فاتن : لا يحليله ماقال شى
شهد : زين الحمدلله سلمينا عليها وان شاء الله المره الجايه نشوف بعض ببيتكم جايين نخطبتس
فاتن : يحليلتس يلا مع السلامه هههههههههه
شهد : يحليلها تنوكل هي وسوالفها
~~~ عند سياره ابوفاتن ~~~
عبدالرحمن : عمي يامرحبااا اشوف قريتنا منوره طلعت جاي
هايل : تراه يبي شى منك مايقول كذا عبث شلونك عمي
ابوفاتن : هلابكم يابوي شلونكم شخبار ابوانكم
عبدالرحمن : كلهم بخير عمي
ابوفاتن : سم يابوي
عبدالرحمن : عطني يوم يناسبك
ابوفاتن : ليش عسى ماشر
عبدالرحمن : مامن شر بجي انا واهلي نخطب
ابوفاتن : يازينها من قرابه يولدي تعالو باي وقت كل الاوقات عشانك تناسبني
عبدالرحمن : الله يخليك لنا ياعمي كم يوم وبنجيكم ان شاء الله حلالي لايروح
ابوفاتن : هههههههههههههه عسى حلالك تعجل وتطلع
عبدالرحمن : ماودك تنزل تاخذ لك فنجال
ابوفاتن : فنجالك مشروب يابوي
هايل : افا ذي ثاني مره تجي ولا نضيفك تفضل ياعم القهوه والتمر
ابوفاتن : الله يرزقك ياولدي البنت الصالحه الي تصونك وانت عاد بنتي صالحه مايحتاج وحده غيرها
عبدالرحمن : الله يطول بعمرك ههههههههههههههههههه
ابوفاتن : هذي هي طلعت توصون شى ياعيالي
هايل : سلامتك لاوصيك اقسى على دحيم
ابوفاتن : لاتوصي حريص ههههههههههههههههههههههههههههههه
عبدالرحمن : اقبصني احسني بحلم
هايل : عجول يوه نسيت اخذ منه الفنجال
ابوفهد : دحيم زبونك جاي امش
عبدالرحمن : جاي جاي ياعمي

انتهى البارت

قراءه ممتعة 🤎🤎🤎