"جابك الله في زحام العمر صدفة "

86

~~~ صباح يوم جديد ~~~
ابومحمد : اقمز يامحمد شف من هالي عند الباب
عزام : اقعد يابوسالم انا بقوم
ابوفهد : كانه بدري من جاييكم هالوقت
ابومحمد : والله علمي علمك الحين نشوف اللهم اجعله خير
~~~~ عن الباب ~~~~
عزام : وعليكم السلام وش بغيت ياخوي
حسين : انا حسين من قناة الشعر جاي خصوصي لواحد اسمه هايل شاعر
عزام : شعرفك فيه من دلك عليه
حسين : ابوسطام دلني عليه
عزام : عمي ابوسطام الله يذكره بالخير اي تفضل تفضل يبه عماني جايينا ضيف تفضل
~~~~ فالمجلس ~~~~
ابومحمد : من هالضيف يامرحبا ياولدي
حسين : اهلا فيكم
عزام : يقول انه من قناه الشعر وجاي خصوصي لابوالهيل مرسله عمي ابوسطام هنا
هايل وهو شرقان : من يبي انا شمسوي
محمد : صحه صحه
ابوفهد : اي تفضل ياولدي انا ابوهايل ارتح ارتح صبو له قهوه
حسين : الله يرفع قدرك ياعمي مثل ماقال ولدكم انا من بودكاست شعر واعرف ابوسطام وطلبته اذا يعرف شعار جدد ودلني على ولدك هايل
ابوعزام : ياماشاء الله ابوسطام يعرف الكل الله يذكره بالخير ويطيب ذكراه
هايل : يالله حييه انا هايل بنفسي
حسين : تشرفنا ياخوي سمعت قصايدك براديو
هايل : راديو دحيم وش وصله لكم
حسين : سمعني اياه ابوسطام مثل ماقلت انا اعرفه وقلت له ابي اقابلكم واعرض عليك هالعرض
ابوفهد : اي عرض
عزام : اخس يابوالهيل قام حظك
حسين : انا عندي بودكاست للشعر اتوقع مافهمتو المقصد قناه عالتلفزيون حقت شعر ومن هالناحيه يعني واستضيف شعار يقولون شعر ونعرف اسبابهم وهكذا ف جاي بعطيك هالعرض طبعا بكل حلقه نستضيفك لها سعر خاص لها واذا زادت الطلبات على استضافتك نرفع لك السعر باللي تبيه انت مارح نتخالف من هالناحيه
ابوفهد : ايه قلت لي تلفزيون ولدي ماهوب ممثل عشان يطلع عالتلفزيون والله ماودنا جيتك تصير عالفاضي بس ولدي ماعنده هالسوالف
حسين : ودي اسمع من ولدك افضل شرايك ياهايل
ابومحمد : اهدا انت ماتدري وش الرزق الي وراء هالتلفزيون
هايل : والله مدري ياخوي تفاجئت انا صحيح اكتب شعر بس موب لدرجه اطلع عالنلفزيون واقوله والراديو الي سمعته ولد عمي سجل الاشرطه بدون مادري ومثل ماقال ابوي ماظنتي يناسبني هالعرض
حسين : هي كلها مقابله ومافيه غير انا وانت وانت تقول شعر وتعلمنا وش سالفه هالشعر بس ساعه بالكثير وخالصه الحلقه
هايل : والله ياخوي جديده علي ذي الامور وانا موب من سكان هالديره الصراحه ف صعب علي اجيكم من قريتي
حسين : موب مشكله نرتب معك مواعيد تناسبك وهذا رقمي فكر ولامنك وافقت دق علي ولاتستعجل بالفرص هذي فرصه زينه يعطيكم العافيه
عزام : تستهبل وافق يالخبل
ابوفهد : وش يوافق انهبلتو انتم تبونه يطلع على التلفزيون ويشوفونه كل الناس
ابومحمد : ووشفيها ياخوي
ابوفهد : ماجازت لي الله يصلحك يابوسطام محد معطيه وجهك غيرك
فهد : ماهيب مشكله تجي عندي ف شقتي محد عندي
ابوفهد : وراك تفكر لاتفكر مافيه
هايل : طيب طيب
عزام : وين رايح يالبزر
هايل : بطلع اقول له لا مايحتاج افكر
عزام : تستهبل فرصه حلوه ذي يالمهبول ترفضها كذا وشفيها اذا طلعت بمقابله وقلت شعرك
هايل : تستهبل شعري مغير خرابيط وش اقول
عزام : الرجال سمع شعرك بالراديو وعجبه مالك عذر
هايل : مدري وابوي معيي بعد خلاص مافيه امل
عزام : عمي خله على ابوي وعمي ابومحمد يقنعونه انت بس اقتنع
هايل : بعدين امي تعبانه وفيه توتر فالبيت ماهوب وقته ياعزام
عزام : قال لك بيرتب لك مواعيد تناسبك خلصنا وافق بس لو درى دحيم يويلك منه تذكرت ابكلمه اعلمه
هايل : لاتشغله يالنشبه بشهر العسل هو
عزام : يوه نسيت
هايل : لا لا ماش مارتحت
عزام : انثبر بس ماتدري وش الرزق الي بيجيك بعد هالقناه
هايل : تستهبل من قال لك ابي اشتهر انا حدي اكمل هالجامعه غصب بعد عشان القى لي وظيفه وخلصنا
عزام : يمكن ماتحتاج للوظيفه مع هالشهره فكر فالمستقبل لاتفكر الحين وش بيصير فيك كلها محلوله وانا بسكن فالرياض تبي تجي عند اختك ولا تبي تروح عند اخوك فهد ابد
هايل : شعندك تقنع فيني انت
عزام : ابي لك الخير يالهطف
هايل : اذا وافق ابوي اول فلوس يعطوني اياها النص بالنص
عزام : اي ذا التفكير السليم
هايل : مايرفض الفلوس انت نسيبي الحين لحول بس
عزام : وولد عمك قبل
~~~~ فالمجلس ~~~~
ابوفهد : لاتقنع لا يعني لا كل شوي وانا معطيه وجهه من متى عيالي يدرسون جامعه ولا يسافرون والحين طالع لي بموضوع شعر يقعد بس ويخلي شعره بدفتره
ابومحمد : الحين انت يوم انك حاشر نفسك بحياه عيالك ليه
ابوفهد : وشهو قلتها عيالي
ابومحمد : عيالك يوم كانو صغار مايعرفون ياخذون قرارت بانفسهم ومراهقين وتفكيرهم بالسوء الحين كبرو خلاص يابوفهد مايصير تتحكم فيهم بالله قد يوم جيت وسالتهم اخذت رايهم انت بتعيش حياتهم ولا هم الي بيعيشونها قل شى يابوعزام
ابوعزام : كلام ابومحمد صحيح يابوفهد جاء الوقت الي تخليهم ياخذون قراراتهم بنفسهم ولامنك شفت غلط تدخل
ابومحمد : حتى لو غلطو لازم ياخوي يغلط عشان يتعلم للحين تعاملهم وكانهم بزران
ابوفهد : عيالي واعرف بمصلحتهم
ابومحمد : مصلحتهم انك تسالهم تاخذ رايهم تحط لهم راي وشور حتى الرجال الي جاء قال لك خلني بسمعها من ولدك تقرر انت الله يهديك وكان ولدك ماعنده شخصيه من متى ابوي ربانا كذا ابوي خلانا نعتمد على انفسنا وخلانا نغلط ونطيح ونقوم مره ثانيه اجل تبي لو صارت لهم مشكله صغيره يجون ويفتزعون فيك مايصير ياخوي الله يرضى عليك انت كذا توضح لهم انك ماتثق فيهم
ابوفهد : اي اسمع كلامك واتركهم يهيتون ويطيحون باصحاب السوء
ابومحمد : ووشفيها لاطاحو وقامو ماقولك يوصلون لارذل الطبع بس وشفيها لا سافر لحاله وش فيها لاصار عندهم اخوياء غير عيال عمهم والي نعرفهم خلاص عيالك كبرو وجو عيالهم وغمض وفتح تلقى عيال عيالهم بعد
ابوفهد : وراه عرس لا يطيح بهالتلفزيون ويسحب عالعرس
ابومحمد : لاحق عالعرس المهم يكون نفسه الى متى عايشين تحت حلالك الي فالقريه الي اصلا ماعاد بقى فيها الا انت وابوعزام حاكرهم بهالقريه لاحولهم سعه صدر ولا محلات ولاناس يسولفون معهم وتقول ليه اخليهم يسافرون هايل ولدك بيكمل جامعه ويبي يتوظف ويعزك ويعز نفسه اتوقع اكتفى من انه يعيش تحت ظلك يابوفهد ماانت دايم لهم بعد عمر طويل زوجت بناتك بدون مايكملون دراستهم بس ربي بيعوضهم برجالهم يخلونهم يكملون فهد غصبته يعرس وها الحين ماشاف ولده من انولد وزامل عاملته بتفرقه وشف الحين وين راح ابعد كل البعد عنك وسياف خليته يمسك حلالك الي اصلا ماكان له فايده ووش صار فيه ياله لقى وظيفه تقبل شهاده الثانوي الي معه ولولا الله ثم انا وابوخالد كان ماخليتهم يدرسون ابد الي عشناه بزمنا يابوفهد مانكرره بزمن عيالنا الموضوع مو انك غلطت عليهم بالعكس ربيتهم وكبرتهم وصارو ارجل الرجال ويشرفون كل مجلس وماقول هالكلام عشان بس تقتنع هايل يطلع على هالقناه اقوله لك بالمجمل جاء الوقت الي تطلع من حياه عيالك وبناتك
ابوفهد : وان صار به بلاء تتحمل
ابومحمد : اي اتحمل لاتشيل همه هايل اعتبره ولدي
ابوفهد : خلاص اجل نشوف
ابومحمد : اخيرا نشفت ريقي كل مره كذا اذا صار الموضوع يخصهم الله يهديك
~~~~ في غرفه شهد ~~~~
فرح : شهد ليه مارحتي مع سياف
شهد : متهاوشين
فرح : ياكثر هوشاتكم وش عليه بعد متهاوشين
شهد : اقول له خلنا نجيب شغاله معيي
فرح : تستهبلين ممداه توظف علطول طلبات
شهد : طيب انا معي هايل يبيله من يهتم له وببطني واحد ثاني شسوي بنفسي
فرح : وشو وشو شقلتي
شهد : قصري صوتتس يوهه خربت المفاجاه
فرح : مفاجاه ايش
شهد : انا حامل
فرح : ابي اصرخ
شهد : تكفين اسكتي لايعرفون الباقيين ابيها مفاجاه
فرح : متى
شهد : اول مامشينا للرياض حسيت بتعب وغثيان ورحت للمستشفى وطلعت حامل لي اسبوعين
فرح : ياعمري وهايل كم عمره
شهد : هايل الصغير بيدخل سنتين بعد كم شهر
فرح : امم حلوو صح مابين عزيز وهايل شى
شهد : عزيز اكبر صح
فرح : اييه يمكن اكبر من بشهور متى جبتي هايل
شهد : بدايه السنه
فرح : اي اجل عزيز اكبر يوم ينولد هايل وهو عمره ٥ شهور
شهد : اي ف اقولتس قلت له نجيب عامله وعيا
فرح : اصبري عليه يمكن مامعه ترا توه بدا يشتغل
شهد : اي وهو فالشغل نص اليوم محد يساعدني ف قلت له يحطني ببيت اهلي واذا خلص شغل يجي ياخذني وهكذا تساعدني امي عالاقل وزوجه دحيم ومحمد
فرح : متى عرس محمد الا
شهد : والله مدري هم سافرو للجنوب لان محمد قال ماوده يعرس الحين وبنفس الوقت امي تغصبه يعرس لان دحيم بيجي يعيش عندنا ومحمد تارك شقته وجاينا ف بيصير صعب عليه وعلى فاتن عرفتي مارح ياخذون راحتهم ف هو قال بيروح لشقته ماهي مشكله بس امي عييت مايسكت لحاله بدون حرمته
فرح : مفروض عبدالرحمن ياخذ شقه محمد دام محمد للحين مايبي يعرس
شهد : امي معييه تخاف فاتن تاخذ عقل عبدالرحمن
فرح : الله يهدي امتس بعد
شهد : والله احترت يافرح
فرح : عمي وينه مايحل هالموضوع وتفتكون مصير دحيم بيطلع ببيت لحاله ماهو قاعد طول العمر عند اهله
شهد : ذا المتعارف عليه بس وش يقنع امي تبيه طول حياته عندها وقدامها بعد
فرح : والله امتس غريبه
شهد : الا عالطاري صدق اخوتس هايل يحب رغد يعني صدق بيتزوجون وطيب الي كان يحبها
فرح : والله كلنا كان ودنا ياخذ الي يحبها بس راحت بنصيبها غير هايل وموضوع رغد للحين ماقعدت معه وسالته ذكرتيني برسل له ماشفته من جينا عندكم ومنه بساله وبجيتس
شهد : لاتتاخرين
فرح : رغد وينها اخاف تسمع
شهد : امس نمتو بدري انتم عييت امها تقعد هنا تقول مالهم مكان وحلفت عليها امي وخالتي بس عييت وراحو بيتهم
فرح : راحت بدون ماتسلم علينا اوريها
شهد : هي يله قامت مع امها عشان يروحون وداهم سياف الصبح وراح لشغله
فرح : مصيرنا بنداهمهم فالبيت امي ماتبطي عن خالتي بروح اشوف هايل
شهد : يله
~~~~ فالمطبخ ~~~~
ام فهد : وش هالسالفه الي طلعت لنا بها ياولدي ماصدقنا على الله تقوم من ذيك الغيبوبة تبي ترجع تدخل
هايل : وليه ادخلها يايمه
ام فهد : عيون الناس ماترحم ياامك وش تبي بهالسالفه يولدي كمل جامعتك وبس
هايل : يمه انتي تدرين اني احب الشعر وفالقريه دايم اكتب واقول شعر يوم جت الفرصه قلتو لا
ام فهد : ابوك وش قال
هايل : عيا فالبدايه بس بعدين وافق
ام فهد : خلاص بس حلقه وحده واقعد
هايل : خلاص اذا ماجاز لي الوضع بعد الحلقه الاولى برفضهم
ام فهد : الله يسهل دربك
فرح : يمه وش تسووين فالمطبخ
ام فهد : اسوي معصوب مشتهيته شهد
فرح : ياهلا يابوالهيل وينك مختفي
هايل : ياهلا ومرحبا بشمعه هالبيت وعائلتنا كلها ياهلا بام عزيز ياهلا بفرحتنا الاخيره وضي عيني سمي وش بغيتي
فرح : ههههههههه عاد توك مفطر مايمدي اقول هالمدح عشان احط لك اكل
هايل : لا تغيييرنا يام عزيز
فرح : ماعاد نشوفك عشان نشوف تغيرك
هايل : شسوي كله فمجلس الرجال ولا فالحوش هنا حريم اقلط عندكم
فرح : لا يعني ترسل شى ماعلينا يمه هاتي انا اكمل عنتس روحي ارتاحي
هايل : تعالي يالغاليه
فرح وهي تمسكه : تعال وين راح انت المطلوب
هايل : شصاير بعد
فرح : ابد بعرف اخبارك
هايل : بشرط
فرح : بعد بشروط
هايل : طبعا مع كل شى تحطينه بذا الاكله تعطيني تعرفيني ماتكلم بدون مااكل
فرح : الناس وقت الاكل تسكت وانت تتكلم ها امسك تمره وش كنت تقول لامي قبل اجي
هايل : مادريتو جانا رجال اليوم مرسله عمي ابوسطام هو حق برنامج شعر وطلبني اطلع ببرنامجه اخوتس بيصير مشهور اهخ يانياقي لو تدرون صويحبكم بيصير شاعر
فرح : زييين احد بيعرف شعرك غير نياقك وطيب ابوي وامي وافقو
هايل : طبعا يام عزيز عيو فالبدايه بس بعدين وافقو
فرح : والله حماس متى بتطلع
هايل : للحين ماعطيته الموافقه مسوي ثقيل
فرح : الله يفتحها بوجهك
هايل : يله تبين شى بروح
فرح : انثبر ماخلصت وش مووضوع زواجك انت ورغد المفاجئ اشوف احنا اخر من يعلم
هايل وهو شرقان : هذاكم دريتو اصلا محد كان يعرف
فرح : ايه صحه صحه انتبه اي بس ماعلمتنا انك تبيها او بالاصح طلعت تحبها وماتبي غيرها وخايف تروح لغيرك
هايل : يوهه والله البلشه ذا الي ماحسبنا حسابه
فرح : ليييه وانت قبل ماكنت تبيها
هايل : نتغير يعني مانتغير
فرح : هايل يمديك تتسذب عالكل الا علي انا اعرفك زين قل شفيك وش هالقرار المفاجئ وانت دايم تقول ماتبي تتزوج غير حبيبتك
هايل : اي كنت بس الي احبها اعرست وبتجيب عيال وانا اقعد اعد خطى الرجوع المستحيله يام عزيز
فرح : اي لاتقعد بس رغد بالذات ليه
هايل : البنت ماقصرت وقفت معي بموضوع الجامعه وحليله بتعاملها مع امي وذا اهم شى وبنت خالتي فيه احسن من كذا
فرح : هايل ليه قلت انك تحبها وانت عيونك مافيها ذره حب
هايل : قلت كذا عشان مانرجع للقريه بس انا ابيها الصراحه والحب يجي بعد الزواج ماتدرين
فرح : اييييه اذا نسيت ميهاف قل هالكلام
هايل : وش تبين اسوي يوم كنت مابي اعرس وكلكم مزعجيني اعرس وانساها والحين قلتو لا
فرح : ماقلنا لا بس رغد غييير ياهاييل غييير عني وعن ندى وعن شهد ويمكن غير عن ميهاف وغير عن حنيه امي الي متعود عليها رغد متخليه لو حست انك ماتبيها بثانيه تتطلق مايمديك تلعب عليها بمشاعر وهميه عشان تحاول تنسى ميهاف البنت قويه ترا وانت كيفك
هايل : شلون يعني قويه
فرح : مارح تشوف الحب الي شفته من ميهاف والاسلوب الزين برغد مارح تلقى كلام زين منها البنت جافه شوي من ناحيه سوالف الحب واهم ماعليها امها ووظيفتها وانا اشوف ان شخصيتك ماتناسب مع شخصيتها
هايل : اما عشان الشخصيات والكلام الزين الي مااستفدت منه
فرح : ههههههههه فرق بين حب وبين زواج رغد قاسيه شوي
هايل : حددي لي من اي ناحيه انا شفت البنت فالمستشفى طيبه وحليله وسمعت اسلوبها مع امي زين
فرح : ايه هي مشكلتها مو مع امي هي مشكلتها معك هايل البنت تعرف انك تحب ميهاف وتدري المشكله وين ؟ هي ممرضه عند ميهاف مستحييل تشوف رغد تركض وراك وتدور رضاك وحبك وهي تعرف ان بقلبك شخص ثاني وحتى لو حبيتها بتصير هالاشياء عليك انت احيانا احس رغد منجد تكرهك يمكن عشانها دايم تسمع امي وامها يقولون انها بتعوضك تكرهه تكون بديل
هايل : شسوي مالبيد حيله
فرح : عندك واجد ندور لك ماهي مشكله
هايل : عطيت ابوي وامي كلمه خلاص انا بصبر عليها الغلط مني ومنكم يوم علمتوها عن ميهاف
فرح : ماتوقعنا انكم بتتزوجون اصلا كلما نجيب طاريك هي تقوم ولا تشغل نفسها بشي
هايل : بس هي راضيه بالزواج مني
فرح : ماظن امس رده فعلها غيير زعللت وانا متاكده ان هي الي اصرت على خالتي يروحون بيتهم
هايل : انا بحاول يافرح والله بحاول البنت مالها ذنب لا بعلاقتي الجديده ولا بقراري المفاجئ بس امها وامي يبونا لبعض خلاص مارح تصير مشكله لو اعرسنا
فرح : صح بس احس الموضوع فيه غلط انت مو انت ودام هي موافقه فهذي مو رغد الي اعرفها عندكم اسباب بس مصيرنا بنعرفها
هايل : ها لا لاتوسوسين بس وخلصي معصوبتس مافيه الا كل خيير انا رايح جهزو هدايا حلقتي لاوصيكم
فرح : خل الزوجه المستقبليه تحتفل فيك
هايل : زوجه مستقبليه طل هالجافه
ندى : شقال
فرح : للحين يبيها ويقول الحب يجي بعد الزواج
ندى : انا ماحبيت اتدخل لاني ادعم زواجه منها
فرح : تستهبلين تبين يكرر غلط فهد وزامل ويمكن سياف بعد
ندى : لاتتوهمين فهد لو ترجعين تسالينه بيقول لتس ابي زينب هيام كانت غلطه عمره وتحاسب عليها الحين ونادم اشد الندم انه خسر زينب وزامل ماكانت مشكلته مع الحب مشكلته ان عفراء قليله ادب مع اهله ومستحقرته وتقارنه باخوانه وسياف لو تسالينه تبي شهد ولا حبيبتك الي قبل ٦ سنين بيقول شهد والسوال لتس بعد ترجعين لخالد ولا تاخذين صالح
فرح : وش هالسوال
ندى : لانتس مثال برضو وانا بعد مثال لو ترجعين تساليني بقولتس لا ابي عزام لان باختصار يافرح الشي الي تحبه وتبيه ومتعلق فيه يمكنه شر عليك والخير بالشي الي ماتبيه
فرح : صح لو يرجع فيني الزمن ماخذت خالد
ندى : خلاص لاعاد تفتحين موضوع رغد مع هايل ماتدرين يمكن البنت تبيه بعد ليش حكمتي انها جافه وتكرهه ومن وين جبتي سالفه كلما جبنا طاريه اشغلت نفسها رغد طول عمرها مااهتمت لهايل واحنا سالناها دايم تقول اعتبر كل اخوانكم اخواني ماقد فكرت من ناحيتهم بالحب اهجدي يافرح وخلي هايل ينسى ذيك الي مافيها خير رغد تستاهله وبقوه وهو يستاهلها بعد ومثل ماقال دام امي تحبها وتبيها هذا يكفي ولا تبينها مثل عفراء
فرح : انا يهمني اخوي وماشوف رغد زوجه مناسبه
ندى : حاولي تشغلين نفستس باشياء تخصتس محد حاس بهايل كثري شلون عانى بسبب الي ماتنقال ميهاف وشلون حاولت انا وسياف نطلعه من التعب الي جايه لو سمحتي فرح خليه يشوف العوض مع رغد وانا متاكده انها الشخص الصالح الي بينسيه ميهاف
فرح : ليش حكمتي طيب يمكن هي ماتبيه
ندى : شى راجع لها محد بيغصبها تقدر ترفض بس لو وافقت اسكتي ولا تغيرين نظره هايل عنها
فرح : خلاص كيفهم الي يصير يصير مصيري بتزوج وبهج عنكم
ندى : ايوه عشان كذا اسكتي
فرح : خلاص خلاص
ندى : لمن ذا المعصوب
فرح : لشهد
ندى : ماتاكله لحالها باكل معها
فرح : جيبي ملاعق
~~~~ في شقه ام رغد ~~~~
ام رغد : ليش مارحتي عالدوام يابنتي
رغد : دوامي مسائي ليه مليتي مني
ام رغد : لا بس بسولف معتس وقلت اتاكد دوامتس موب الحين تعالي اقعدي
رغد : لبيه
ام رغد : انتي سمعتي الي صار امس صح
رغد : وشو
ام رغد : هايل ولد خالتتس يبيتس
رغد : يوهه رجعنا على نفس الموضوع
ام رغد : نسيتي وش طلب امه يابنتي
رغد : مانسيت بس تشوف تصرفه سليم
ام رغد : خلي الملابس وركزي معي
رغد : تعرفيني يمه لازم اشغل نفسي اذا عصبت كملي اسمعتس
ام رغد : يابنتي انا بصير عند اخوتس ومرته وانتي وش بيصير فيتس
رغد : بدال ماتروحين عندهم تقعدين عندي وخلصنا وهم يجون بعد
ام رغد : وانا تحسبين بدوم لتس ياامي يارغد لاتضيعين هالفرصه هايل تربيتي
رغد : يمه قاعده تخطيني بين ناريين بين موضوع خالتي وموضوعتس يايمه تكفين انا ادري ان هايل مايبيني
ام رغد : لا هو يقول كذا لانه كان يحب وحده بس خلاص ذيك تزوجت انا ادري ان يضايقتس هالموضوع بس هايل طيب وحليل ومستحيل تشوفين منه شى يضايقتس
رغد : تحسبيني مهتمه يايمه بموضوع حبه انتي تعرفيني زين مافكر بالزواج الحين
ام رغد : وموضوع خالتتس ماتبينها تتعالج تبيني افقد اختي وعيالها وزوجها
رغد : نقدر نخطب كلام بس وبس تتعالج ننسى كل شى ولا كانه صار
ام رغد : تحسبين الموضوع سهل عالولد محد من اهله يدري ولا يقدر يقول لاحد وابوه شديد يابنتي هو اصلا قال كذا عشان مايروحون للقريه ومايصير فيه عذر لامه تتعالج مافيه غيرتس يابنتي
رغد : طيب مابيه يايمه مابيه هايل ماعمري بحياتي فكرت فيه اصلا ناسيه عندي ولد خاله بذا الاسم فجاه يطلع لي ويبي يتزوجني لا يمه والف لا
ام رغد : فالبدايه كنتي موافقه وش جاتس الحين
رغد : ماكنت موافقه بس امه الي كانت تتكلم وكنت اسلك عشان ترضى تدخل وتكشف
ام رغد : يعني شلون تبيني افقد اختي
رغد : وعادي بنتتس تتزوج واحد ماتبيه
ام رغد : والله يارغد لو ادري ان هايل شخص ماهو كويس ان ماتمسكين يده بس انا يدري ان بكل الاحوال من صالحتس الموضوع صلي استخاره يابنتي ها هذي ام فهد تدق
رغد : اوف اوف ليش تكلم ليش
~~~~~ فالليل فالمستشفى ~~~~~
رغد : شكلي بغير الشفت حقي
الممرضه : لازم بعد ماتخلصين الشفت ذا
رغد : بس الهدوء فالليل زين احسن من ازعاج الصبح
الممرضه : اي
هايل : احم لو سمحت وين القى الممرضه رغد
الاستقبال : هناك غرفتها
هايل : يعطيك العافيه يابوي
رغد : تفضل
هايل : السلام عليكم
رغد : يليل تفضل وش بغيت
هايل : احم المغرب لا العشاء جيت اخذت خالتي لبيت عمي وتعشت عندنا وبتنام بعد ف قالت لي اجيب لتس اكل لان بترجعين البيت مارح تلقينها ولا سوت عشاء لتس ماامداها
رغد : تعشيت ماقصرت تقدر ترجعه
هايل : تسحري عليه
رغد : غصب
هايل : لا بس مايصير ارجعه وهي تعبت عليه متى تكبرين يالبزر وماتخلطين المشاكل ببعضها
رغد : اول شى قصر صوتك ذي موب صاله ابوك مستشفى ثانيا صدقني ياهايل ماعندي وقت افضى لمواضيعك التافه واخر شى الموضوع بيني وبين امي مالك فيه
هايل : علمتني خالتي يالبزر فالطريق ترا ادري انتي ماتبيني وانا مابيتس بعد وقلت لتس هالشي الف مره بس عشان امي
رغد : حلوه ذي تخيل نفسك مكاني تاخذ وحده عشان امها وانت ماتبيها وهي ماتبيك وش شعورك ؟
هايل : والله يابنت خالتي اذا موضوع امها يمكن تفقدها بسوي الي تبيه وبجبر نفسي وبدال مالتفت لمشاعري بلتفت لليوم الي بيصير لها شى لاسمح الله وبعتبره بسببي لاني كنت اقدر اساعدها
رغد : بس ليش مانشوف من جهه ثانيه ان خالتي تقدر تبعد موضوع زواجك وتركز على علاجها هذا موب حل بعد
هايل : حل بس امي ماتبي خواتي ياجلون عرسهم كفايه يارغد تأجلت بما فيه الكفايه ومافيه سبب مقنع نقعد فالرياض الا زواجي وقدني عطيت ابوي كلمه انا ادري والله ادري اني غلطان اني قلت كذا بس والله يابنت الناس ان كنا شوي وبنمشي وماعاد عندي سبب اقوله
رغد : لا حول ولا قوه الا بالله يعني خلاص ماعاد فيه سبب نقدر نكنسل هالزواج فيه
هايل : يمكن يتاجل بس يتكنسل لا
رغد : ليه
هايل : لاني قلت لهم اني ابيتس ولو انتي ماوافقتي ف هم صاملين يزوجوني والصراحه ماودي بالغريب
رغد : ههههههههههههههههههه ماني عارفه وش موقفك بالضبط بس محد كسبان غيرك ولو انضريت ياهايل بمقدار شعره منك شعوريا او نفسيا بس بخليك تندم عاليوم الي قعدت قدامي فيه الحين وقعدت تعطيني اعذار تافهه خلص بريكي
هايل : بكرا بطلع على عالتلفزيون شوفوني
رغد : اوه عندك سبب يعني تقعد فالرياض
هايل : ابوي وامي يبون بس حلقه واسحب عليهم
رغد : وانا وش استفاد من شوفتك
هايل : لا يعني بس هو بودكاست للشعر
رغد : اكرهه الشعر عاد للاسف
هايل : موب مشكله بس يعني بغيت اقول لتس كلي لايبرد الاكل حق خالتي
رغد : يله يله خلص بريكي
~~~~ صباح يوم جديد ~~~~
عزام : تدخن تدخن
هايل : بتروح ريحته اتدخن قبل الروحه بشوي
فهد : تلبس بشت ولا شالوضع
محمد : شعندكم تقل ليله عيد
هايل : تعال فكني منهم ياولد العم
سالم : بيطلع ببودكاست مارح يروح للعرس
هايل وهو يشيله : يسلم هاللسان الي يتكلن بالصح تعلمو منه تعال ياحبيبي بس
فهد : يكفيه ثوب وغتره يعني
عزام : ايه حطيناها بالمغسله شعنده ماهوب متوتر ابوالهيل يالبزر وش بتقول فاللقاء مجهز شعر
هايل : لاتذكرني يابن الحلال
عزام : انثبر وخل سالم وجهز لك كلام
هايل : مايعلموني هم وش اقول
عزام : مرسلين لك الاسئله يالهطف قريتها
هايل : لا وين
عزام : لازم اتنازل عن وظيفتي ك مدرس واصير مدير اعمالك
هايل : لالا فكني تكفى ورني الاسئله خلنا نتدرب انت مذيع وانا هايل
عزام : احلف احسبك انا والله ماتفلح مع هالعقل يله بنبدا بسم الله الرحمن الرحيم
هايل : اقرا سوره الفاتحه بعد تقول اذاعه انت
عزام : ههههههههه توترت الله يقلع بليسك
فهد : هات اشوف السلام عليكم معكم مره ثانيه وبحلقه استثنائيه من بودكاست شعر اليوم معنا شاعر مبتدئ اعلاميا ولكنه معروف بقريته بحبه للشعر طبعا اكيد الاغلب متحمسين يعرفون بدايته وشلون تعرفنا عليه هايل ذا يهرج كلام واجد
هايل : خلاص ابدا بالاسئله اترك هرجه
فهد : طيب عرفنا عن نفسك
هايل : اسمي هايل عمري ٢٤ تخصصي
عزام : طولي ١٧٠ وزني ٦٠ كمل كمل تستهبل انت وش هالجواب
هايل : ها شقول
عزام : اول مايقول عرفنا عن نفسك قل يامرحبا حبيت اشكرك قبل كل شى على كلامك عني فالبدايه والله اني متوتر شوي بختصر تعريفي عن نفسي وقل اسمك وعمرك وتخصصك
هايل : انت تبي تغلطني بس
عزام : لازم ترحب بالي يتابعونك
هايل : طيب السوال الي بعده
فهد : متى بديت بالشعر
هايل : من مبطي
عزام : لحول ياخي تخصصك عربي ولا عندك اي جواب نموذجي
هايل : ترا توني مابديت ادرس يالهطف
عزام : انت قدام كاميره ومليون شخص يتابعك تقول من مبطي تستهبل انت
محمد : قل من يوم كنت صغير
عزام : يسلم راسك يابوسالم قل من يوم كنت صغير اكتب بدفتري بس ماكنت اتوقع اني بستمر بالشعر الين كبرت ومن هالكلام
هايل : خلاص الس بعده
عزام : الله يستر منك
فهد : الشعر تعلمته ولا بديت فيه لاارادي
هايل : كنت اشوف جدي الله يرحمه دايم يشغل الراديو ويقصد معه وكان يقص علينا قصص زمنا الاول وشلون الشعر كان مسليه بوحدته ويوم كبرت وصرت اقعد عند حلال ابوي النياق صرت اقصد لاارادي بس اشوف ان الي معلمني عليه جدي
عزام : اخيراا جواب زين
هايل : خلاص باقي الاسئله اجاوبها عندهم
فهد : اصبر يمديك تسوي سكب على اسئله
هايل : ليه
عزام : ماظنتي
فهد : فيه سوال من ملهمك بشعرك الي سمعوه بالراديو
هايل : بدور لي جواب
عزام : ماكان له داعي تعلمه بالسوال يافهد
فهد : حسيت ان مايبي يجاوب على ذي الاسئله
محمد : مابقى شى ياهايل مشينا ترا المكان شوي بعيد عنا
هايل : اي يله بس عطني فهد مفتاح سيارتك بجيب ثيابي وشماغي من المغسله
فهد : امسك
~~~~ الساعه ٥ العصر في بيت ابومحمد ~~~~
ابومحمد : شغلو القناه الي بيطلع عليها هايل
عزام : وش هي
محمد : هذي هي ياكثر اعلاناتهم
ابوفهد : بيطلع الحين قدامنا هايل
فهد : اي يايبه دقيت على زامل يفتح القناه وسياف راح مع عزام وهايل
ابوفهد : زين زين يله كانه طول
محمد : اعلانات
ابوفهد : رح علم امك يافهد
فهد : طيب يمه يمه افتحو قناه الشعر هايل بعد شوي بيطلع عليها
~~~~ في مجلس الحريم ~~~~
ام محمد : عطوني الريمونت
ندى : بسرعه ياخاله
ام فهد : يابعد عمري ياولدي
ام رغد : بروح اقوم رغد رغد رغد قومي
رغد : ها يمه ها وش صاير
ام رغد : قومي زوجتتس بيطلع عالقناه وانتي راقده
رغد : تكفين يمكن مارجعت من الدوام الا الظهر خليني تكفين
ام رغد : قومي اقول موصينا كلنا نتابعه قومي
رغد : اوف اوف طيب
ام رغد : من هنا الباب الله يخلف عليتس
~~~~ في مجلس الرجال ~~~~
ابوفهد : ياهلا يابوسطام
ابوسطام : عساكم كلكم عالتلفزيون
ابوفهد : اي تقل تنتظر اعلان رمضان ولا العيد
ابوسطام : الله يبارك له والله يفتحها بوجهه اعتز فيه يابوفهد
ابوفهد : والله ماكان ودي يطلع بس الشكوى لله
ابوسطام : نسيت ابوك شلون كان يحب الشعر ووده يطلع عالتلفزيون ها هذا حفيده طلع افتخر فيه يابوفهد هايل بيصير شى واذكرك
ابوفهد : يارب انت عساك قاعد عالتلفزيون
ابوسطام : ايه والله مجتمعين بالاستراحه حقت الشباب وعلمت ام سطام بعد تتابعه
ابوفهد : بس تقل تاخرو
ابوسطام : اي اعلانات لازم تشويق
سطام : مبروك لهايل ياعمي
ابوسطام : الله يبارك فيك يابوي
ابوسطام : يله يله حطو عالمذيع

انتهى البارت
قراءه ممتعه ياصدقاء 🌷🌷