"جابك الله في زحام العمر صدفة "

50

~~~ في بيت ابوفهد ~~~~
هايل : ندى تعالي ابيتس
فرح : وش مسويه
ندى : ماسويت شى واصلا من يخاف من هايل
فرح : الله يستر بس
ندى : هلا وش بغيت
هايل : وراتس شى
ندى : لا شغل البيت المعتاد ليش
هايل : اجل اقعدي ماوراتس شى
ندى : اي بقعد اخلص قل وش تبي فلوس ولا بلعه ولا وش
هايل : انا دايم اطلب منتس هالاشياء يالنصابه
ندى : انت حتى جدران البيت شاهده اخلص تكلم لاتسوي نفسك جدي
هايل : خلاص خلاص بتكلم اسمعي كلامي زين وخذيه بنيه ان ودي تكونون لبعض ولا هو اجبار ولا هو غصب وانا اخوتس السالفه ومافيها ان عزام امس رجع للقريه وتهاوش مع اهله والحين هو نايم ببيت دحيم
ندى : وانا وش دخلني فيه
هايل : ابختصر لتس هو جاني انا وسياف ويبي يعرف ليش رفضتيه وهو يبيتس وشاريتس وتهاوش مع اهله عشانتس وانا من باب انه ولد عمي وخابره زين وودي يكون نسيبنا جيت افاتحتس بالموضوع
ندى : بس انا رفضته ماله داعي هالحركات كلها يروح يشوف له نصيب ثاني
هايل : طيب جربي استخيري مره ثانيه
ندى : هايل وش موقفي قدام ابوي كل شوي لي راي
هايل : لاتشيلين هم ابوي سياف راح يقنعه الحين نرجع نفتح موضوع الخطبه ويرجعون هم يخطبون مره ثانيه فعشان كذا جاي انا اسالتس تبينه ولا مانخليهم يتعنون مره ثانيه وانتي بترفضين
ندى : مادري ياهايل ماحس اني ابيه
هايل : هي ماهي على ابي ومابي فرح وسياف وفهد وزامل ماتزوجو باختيارهم ابوي الي اختار لهم وغصبهم يوافقون عكستس عطاتس الكلمه والشور
ندى : بستخير وبرد لك
هايل : خذي راحتتس بس اذا تبين رايي عزام رجال وقد كلمته وهو يبيتس ويحبتس وجاء قالها بوجيهنا واحنا اخوانتس وماخاف وكان ناوي يروح لابوي ويقول له بس وقفناه انا وسياف
ندى : الموضوع ماهو بيدي انا بصلي استخاره وبعلمك وعاد كل شى بيرد ربي لايتامل واجد هو
هايل : خلاص بكرا ردي لي خبر
ندى : طيب
هايل : متى بيخلص الغداء
ندى : بكرا
هايل : فيه احد فالمطبخ من حريم اخواني ؟
ندى : اي كلهم متجمعين
هايل : امحق تجمع فالمطبخ واذا قلنا لهم البنت مالها الا المطبخ زعلو
ندى : رح رح لادق لهستك فالمطبخ
هايل : رايح رايح ياهالنفسيه
~~~ فالمطبخ ~~~
فرح : ماشفت فهد من جيت وينه
زينب : تساليني
فرح : ومن غيرنا هنا يعرف وين يروح ووين يجي
زينب : جربي اساليه انتي بالنهايه اخته
فرح : انا شفته عشان اساله
زينب : خلاص اذا شفتيه اساليه
شهد : خليها خليها هي بعد نفسيتها تعبانه
فرح : وانا وشدخلني تحط حرتها فيني
عفراء : السالفه ومافيها ان هي حامل وتبي تعلم زوجها كاي بنت بس هو طويل العمر مختفي له ثلاث ايام ومحد داري وينه
فرح : اما حامل ليش محد علمني !
شهد : كيف محد علمتس عمتي وزوجتس ماعلموتس
فرح : لا والله محد قال لي شى
ندى : هذاتس عرفتي وشوله تكبير المواضيع
فرح : ماكبرت شى انا يوم عرفت اني حامل جيت وعلمتها شخصيًا ولا ليكون مسويه حزب مع ابوها ضدي
عفراء : ليش وش مسوي ابوها
فرح : ولا شى الله يخلف علي بس
ندى : نفسيه حوامل الله يصبرنا
عفراء : فعلا تقل محد حمل غيرهم
ندى : عاد طالعه منها انتي ؟
شهد : ماقلت شى انا ليش تجمعون
ندى : يوه ياانتي لو منتس اربع بزوجهم اخواني
عفراء : ها بدينا برمي الكلام
ندى : لا حبيبتي انا اقولها وبوجهتس مااطيقتس بعيشه الله
عفراء : عساس انا الي بقطع نفسي عشان حبتس يعني
~~~ فالمحل عند عبدالرحمن ~~~
عبدالرحمن : ياكثر الشغل وش السالفه صايره قريتنا وجهه العالم الثانيه
هايل : السلام عليكم
عبدالرحمن : وعليكم السلام
هايل : جبت معي فطور قم افطر
عبدالرحمن : اقعد عند مكتبي نفطر ماقدر اقوم
هايل : ليش وشبلاك
عبدالرحمن : وش قاعد تشوف
هايل : تهبد بهالاوراق وتناظر جوالك
عبدالرحمن : ابقوم اهبدك مشغول مشغول
هايل : خف علينا يالمشغول انشغل وسحب علينا
عبدالرحمن : سحبوك من رقبتك متى سحبت عليك انا
هايل : ابد توك الحين كرشتني
عبدالرحمن : كرشتك؟ فيني طاقه سلبيه قايم اطلعها عليك
هايل : تهايط انت ودقنك مدري وين حالقه تعال تعال
عبدالرحمن : لاتركض واصلك الين مجلس بيتكم
هايل : تعال خل الكرسي يرتاح منك
زامل : هيه هيه مجنن انتم تتهاوشون وشفيكم
هايل : ليش فكيتنا ياخي
زامل : شدراني عنكم كل شوي متماسكين بثياب بعض
عبدالرحمن : هالجني ذا مايخلي الواحد يشتغل
هايل : مالجني الا انت
عبدالرحمن : وش هالرقم
هايل : وش
عبدالرحمن : اقلب وجهك خلني اشوف احم "محتوى الرساله ، معليش اذا امس صرفتك بس فعلا كنت مشغوله اليوم جايه ومابغى ارجع للرياض بدون مااشوفك فاتن"
عبدالرحمن وهو يضحك : يابعد كل الجايين والراييحين تعال هايل بضمك
هايل : وشفيه ذا انهبل
عبدالرحمن : بتجي عشاني بتجي
هايل : منهي
عبدالرحمن : اليوم انا اسعد انسان احم وش ارد اذلف عن وجهي انت
هايل : الشرهه على الي جايب لك فطور بروح افطر مع عزام
عبدالرحمن : رح وح بكيفك
زامل : بفتح المحل
هايل : طيب راجع لك
~~~ في بيت عبدالرحمن ~~~
عزام : من
هايل : انا نسيبك
عزام : نسيبي
هايل : ها كانك ماتبي نصير نسايب
عزام : ماودي اتامل
هايل : صادق صادق انا الي علي سويته الشور يرجع لها
عزام : على خير ان شاء الله
هايل : جايب لك فطور قم افطر معي
عزام : يلا مصدق بردك
هايل : لا خابرك همك بطنك
عزام : طبعا بسالك
هايل : ياكثر كلامك اسال
عزام : وش صار عليك مع الدكتوره هذيك
هايل : يوه وين كنت عايش انت فاتك واجد
عزام : ان شاء الله خير ؟
هايل : خذاها النصيب ياعزام
عزام : وانت ساكت
هايل : ماكان بيدي شى الا وسويته بس النصيب
عزام : ماقالت لك من البدايه انتبه الشى الي مايرضي ربي مارح يرضيك يابني ادم
هايل : ماسويت شى مايرضي ربي
عزام : علاقتكم ياهايل الحب اعماكم وناسيين انه مايصلح تكلم بنت ترضاها على اختك
هايل : بس انا ابيها بالحلال ماكنت افكر فيها الا زوجه لي
عزام : ياولد العم لو كل واحد بيحب وبيفكر انها زوجته وخلاص بتصير زوجته كان ماحالك وحال مليون غيرك كذا انت وهي تماديتو بالحب ونسيتو ان الاقدار مكتوبه
هايل : سكتت ياعزام فالوقت الي مفروض انهار فيه مسحت دموعي بنفسي فالوقت الي كان ودي احد يمسحها لي قمت ووقفت من جديد وحاولت ارجع مثل ماكانت لحالي وانا ودي باحد اتكي عليه عشان يقومني هالاشياء كلها قاومتها لحالي متوقع اني حالي هذا مارح يتغير ؟ اقدر اتغير واقدر انساها حتى لو هو صعب بس انا مابي انساها
عزام : سامحني وانا اخوك ماكنت جنبك وقت ضعفك وانا بوقت ضعفي ماخليتني
هايل : ماقصروا البقيه يرجال وشغلك اهم
عزام : ليش ماتبي  تنساها ليكون نيتك بعد ماتعرس
هايل : اي والله ذي نيتي ليش اظلم بنت الناس معي وانا قلبي مع غيرها
عزام : غيرها قلبها مع غيرك تقعد كذا عشان بنت
هايل : ماتدري وش يصير فالدنيا يمكن اتغير واضحك على تفكيري وحركاتي ذي
عزام : صح نسيت ان توك ورع
هايل : رجعنا
عزام : اكل اكل برد ههههههههههههههههههههههههههههههه
هايل : اسمع وين بتسكن لو تزوجت
عزام : اكيد فالرياض
هايل : واختي ؟
عزام : برايك
هايل : بتخليها هنا عندنا
عزام : ووشوله معرس ومسوي فوضى ومزعج اهلي ؟
هايل : ليكون تحسب انك تقدر تاخذها للرياض
عزام : اجل تحسب بخليها عندك هنا ؟
هايل : اي اكيد
عزام : ماقلت هالكلام لخالد
هايل : خالد يفرق اخته عندنا واختنا عنده
عزام : بكل الحالات انت مانت مستفيد شى
هايل : الا من يطبخ لي لاجعت فالليل
عزام : اطبخ لنفسك
هايل : لا لا بروح اقول لها لاتستخيرين
عزام : خلاص خلاص لاتسبق الاحداث اذا ملكنا نتكلم بهالموضوع وش هالاخ النشبه
هايل : سبك ههههههههههههههههههه يلا عاد عطيتك وجهه ابوعبدالله يتحراني
عزام : من ابوعبدالله
هايل : جاك زهايمر انت اخوي زامل اسم ولده عبدالله
عزام : اها اي اي تذكرت ماقد ناديتوه بابوعبدلله فاستغربت
هايل : اي عالمود هي
عزام : يلا يلا اذلف انا بعد برتب المكان وبروح عند اهلي
هايل : محد سألك يلا سلام
عزام : كريهه ياسبحان الله
~~~ في شقه ميهاف وعبدالعزيز ~~~~
عبدالعزيز : مانتي ناويه تسوين لنا فطور
ميهاف : وش تبي
عبدالعزيز : خلاص خلاص بترجعين تفتحين مليون موضوع انا قايم اسوي لنا فطور
ميهاف : من طلب منك
عبدالعزيز : انا جعت وبسوي علامتس انتي
ميهاف : اي سو لك لحالك وانا اسوي لي لحالي
عبدالعزيز : اعوذ بالله منك يالشيطان خلاص سوي الي تبين عوفتيني حتى الفطور بنقلع للدوام وجعلي مارجع
ميهاف : غبي انت تدعي على نفسك استغفر
عبدالعزيز : مانيب مستغرب وخري
ميهاف : مارح تطلع غير لما تستغفر
عبدالعزيز : بدينا ياميهاف ابعدي بسرعه
ميهاف : لا مارح ابعد الى لما تستغفر نقطه وانتهى
عبدالعزيز : تخافين علي
ميهاف : استغفر
عبدالعزيز : خلاص استغفرالله بس اعترفي تخافين علي ؟
ميهاف : لا بس ابيك توفي بوعدك لي قبل تموت
عبدالعزيز : وعد ايش
ميهاف : تاخرت يلا رح
عبدالعزيز : احسبها بتقول اقعد خلاص بسوي لك فطور الله يخلف

انتهى البارت

قراءة ممتعة يا اصدقاء 👋🏻💕