"جابك الله في زحام العمر صدفة "

74

~~~~ يوم جديد فالقريه ~~~
~~~~ فالمستشفى ~~~~
هايل : يله وينك يادحيم تاخرت
عبدالرحمن : ماتاخرت وراك مستعجل انت
هايل : بروح للحديقه رايح لاهلي ياخوي شلون ماتبيني استعجل
عبدالرحمن : ها شنطتك وجهزت وعلاجاتك حطيتهم بهالكيس عشان فالطريق تاكلهم
هايل : ليه ماهو انت الي بتوديني ؟
عبدالرحمن : لا
هايل : تستهبل من بيرجعني
عبدالرحمن : لاتموت خلاص بترجع للقريه اخوك سياف فالطريق جاي ياخذك
هايل : وليه ماهو انت
عبدالرحمن : شتبي فيني ماتبي مني الفكه
هايل : تستهبل انت ووجهك متى قلت هالكلام انا
عبدالرحمن : من قال لي تزوج ابفتك منك
هايل : اما انا كنت استهبل معك وكنت عارف انت
عبدالرحمن : الحين باخذها على محمل الجد يله سلام
هايل : وقف ياورع بدون استهبال عاد وحركات بزران
عبدالرحمن : وخر وخر مانيب موقف بروح وانتظر اخوك لحالك
هايل : وش هالمبزره الي عليك
عبدالرحمن : انت بعظم لسانك قايل ماتبيني
ابوفاتن : السلام عليكم الحمدلله لحقت عليك
هايل : احم وعليكم السلام ياهلا بعمي قم سلم على ابوحرمتك
عبدالرحمن : هلا عمي عسى ماشر
ابوفاتن : مامن شر يولدي دام ولد عمك بيطلع هالمستشفى الكئيب ولا ياهايل
هايل : الا صادق الله يطول بعمرك تفضل
ابوفاتن : شكلك كنت طالع بس ماشفت احد من اهلك برا
هايل : كنت بطلع اتحراهم
ابوفاتن : وين يولدي الساعه ١٢ الظهر بهالحر توقف تنتظرهم
هايل : شورك وهدايه الله
ابوفاتن : شلونك يابوي عساك بخير
هايل : والله بخير الحمدلله صرت افضل من قبل ياعم انت شلونك
ابوفاتن : انا بخير الحمدلله شلونك يالنسيب
عبدالرحمن : بخير اللهم لك الحمد وماقصرت ياعم بيض الله وجهك على جيتك
ابوفاتن : والله حرمتك نشبت براسي الا اروح عاد انا قلت كله بسبب عبدالرحمن لازم اشوف له تصريفه ماياخذ بنتي
عبدالرحمن : افا ياعم مشينا لبيتك مايستاهل مواجيب
هايل : اخسس وقبل شوي مسوي زعلان
ابوفاتن : ههههههههه اقعد اقعد بس خلك عند ولد عمك بس ها ياهايل ماهو تروح وماتجي تحضر عرس بنتي
هايل : مبروك مبروك على من
عبدالرحمن : اكيد انا يالخبل
ابوفاتن : على ولد خويي
هايل : ههههههههه الله يوفقهم انا اول الحضور
عبدالرحمن : من وين طلع ولد خوييك ياعم اخبر خوياك اعرفهم واحد واحد
ابوفاتن : ابوك مارح يصير خويي؟
عبدالرحمن : اوه الحمدلله الله يطول بعمرك
سياف : السلام عليكم احم شلونك ياعم
ابوفاتن : بخير الحمدلله يابوي يله انا استاذن قمت بالواجب وانتظر نسيبي يقوم به ان تاخرت ترا مالك نصيب عندي انا كلمت ابوك وعطيت الموافقه الباقي عليكم
عبدالرحمن : مايصير خاطرك الا طيب
ابوفاتن : يله استودعتك الله ياولدي وانتبه فالقريه على نفسك واهلك وسلمني عليهم سلام كثيير
هايل : الله يسلمك يوصل ماقصرت ياعم الله يطول بعمرك
ابوفاتن : فمان الله
سياف : يله ياهايل مشينا فمان الله دحيم ماقصرت على وقفتك ذي
عبدالرحمن : طيب ليه ماروح معكم
سياف : والله ابوك الي معيي ولاتنسى كلمتك قبل شوي لابوفاتن
هايل : لا صدق ليه مايروح
سياف : ابوي وابوك عيو باختصار نبي نقعد مع هايل فتره كذا بدون مايطلع كعايله وانت تعرف اذا جيت حياك الله والعين اوسع لك من المكان بس خواتي مارح يرتاحون وهم اولى يشوفون هايل ويقعدون معه
عبدالرحمن : اها ههههههههه طيب قل كذا من البدايه خلاص فمان الله انتبه لنفسك
عزام : استويت بالسياره وماجيتو اخلصو
هايل: هذا عزام بيجي
سياف : لاتنسى اهله فالقريه
هايل وهو يحضن عبدالرحمن: صح دحيم استودعتك الله لاتقطع الاتصال وتعال بعد اسبوعين كذا
عبدالرحمن : ماظنتي اقدر اجي ببدا بموضوع زواجي
هايل : الله يكتب لك الي فيه الخير
عبدالرحمن : ماجيت بسياره جابني محمد وراح فيها رجعوني للبيت معكم
سياف : يله
عزام : لازم ينشب بحلقونا
عبدالرحمن : اي اي بنشب
~~~ بيت ابومحمد~~~
ابومحمد : يامرحبا والله بالغالين عيال الغالي ليه مستعجلين بالطلعه من الرياض ماجازت لكم
سياف : لا والله ياعمي بس تعرف هايل توه طلع من المستشفى واهلي مشتاقين له
ابومحمد : اي من حقهم قدامك العافيه ياولدي وها انتبه من الروحات والفزعات الي مالها داعي الحلال والفلوس والاغراض يتعوضون بس الضنى مايتعوض
هايل : على هالخشم
ابومحمد : بعني خلاص نقول اخيرا دحيم بيرجع لنا
عزام : اي اي الحمدلله ياعم بنفتك منه الله يعينكم عليه
ابومحمد : يوه ماتبونه بخدمه فالقريه
عبدالرحمن : يبه ترا ارجع معهم الحين
ابومحمد : ههههههههه تروح عليك الي تبيها عاد كيفك
محمد : يله لايتاخرون يايبه خل يمشون قبل تغيب الشمس انتبهو فالطريق واي شى تبونه دقو علينا
سياف : ماتقصر يابوسالم
ابومحمد : جيتك الثانيه جب حفيدنا ترا مشتاقين له
سياف : على هالخشم ابشر يله فمان الله
ابومحمد : بحفظ الرحمن يابوي
محمد : تبي ادلك على غرفتك ولا للحين تذكرها
عبدالرحمن : يوهه بتاخذوني طقطقه صح
ابومحمد : اي الي يطلع من داره يقل مقداره
عبدالرحمن : يابعد قلبي يابومحمد ماتقدر انام واقوم القاكم راضين
ام محمد : لا لا ابوك يرضى انا مانيب راضيه اجل هذي حركه تسويها توصل بولد عمك ووصل امك وابوك تاركهه
عبدالرحمن : والله ياحلوه اللبن انكم على بالي وادق على محمد يطمني عليكم
ام محمد : وليه تدق على محمد ليكون ارقامنا انحذفت بعد
محمد : لاتخطبون له الي يبيها هذا عقاب له
عبدالرحمن : انت اسكت لاتزيد الطين بله
ام محمد : اي ٧ شهور عند ولد عمه بعدين يبيني اخطب له الي يبيها وبعدين يقعد عندها طول العمر وانا بس احمل واولد واربي واكبر واخاف عالفاضي اسمعني يادحيم سالفه تعرس وانت توك بزر هذي مانيب راضيه عليها ولا يغرك كلام ابوك وابوها مانت داخل عالبنت وانت بهالعمر ولا وظيفه ولا بيت باي وجهه تبي تعرس تبيها هي تصرف عليك عشانها دكتوره
عبدالرحمن : لا يمه تكفين ابوها قال لي هالمره ان ماتم كل شى ماعاد لي بنت عنده
محمد : بالغتي يام محمد ازعلي منه ولا تكلمينه بس تكفين لاتخلينه يرجع لخباله زوجوه هالي يحبها
ام محمد : يبيها يصير رجال ويقوم على حيله ويتوظف وبعدين وش هالاستعجال مازوجت اخوك محمد الا عمره ٢٥ او ٢٦ ليه مستعجل
عبدالرحمن : مستعجل لاني ابيها يايمه ابوها ماهو قاعد ينتظرني ماهو ضامن نفسه يبي يامن بنته قبل يموت
ام محمد : الي عنده قلته مثل ماخربت موضوع زواج محمد من بنت ابوسطام اعرف شلون اخرب زواجك انا قايله لك مالك غير بنت عمك ابوفهد ندى لاهي يم وظيفه ولا دراسه ولا تعرف الدنيا مع وين بنت قريه وبتتحملك وتتحمل ربادتك ولاتقدر تطلب الطلاق ووراها ابوها اما ذي دكتوره وشغلها مختلط وانا اعرفك ولدي واعرفك مانت راضي تختلط وتبي تروح لصديقتها وتبي تروح لابوها وبتخليك سواق عندها وعند ابوها من شفتها شارطه تسكن عندهم غسلت يدي منها ومنك
عبدالرحمن : يبه قل شى تكفى
ابومحمد : موضوع ان ماعندي وظيفه امك صادقه وموضوع ان توك صغير على مسووليه العرس صادقه بس يام محمد لاتدخلين عيال اخواني انتي تعرفيني ماكانت راضي اخذ اقارب بس عشان اخوي طلبني عطيتهم شهد عبدالرحمن بياخذ الي يبيها بس بعد وش
عبدالرحمن : وش
ابومحمد : تبدا تداوم عندي
عبدالرحمن : ابد تم لو تبي من بكرا اباشر بس تكفى يبه لاتروح علي فاتن
ابومحمد : ماهي رايحه وراسي يشم الهواء اصبر تخلص عروس عيال عمك ونحط عرسك
عبدالرحمن : والملكه
ابومحمد : انت تبي الي يشهد لك هايل ولا ماتبي
عبدالرحمن : ابي
ابومحمد : اجل انتظر هايل يضبط اموره ويقعد مع اهله فتره ونحط الملكه
عبدالرحمن : الله يخليك لي انت وامي واعذريني يام محمد
ام محمد : عذرتك وان عدتها لانت ولدي ولا اعرفك
عبدالرحمن : لا الله لايقوله ولا يعيد ذيك الايام ابشري على هالخشم
~~~ في بيت ابوفهد ~~~
ام فهد : كانهم تاخروا الشمس غابت
زامل : اهدي يايمه الحين تلقينهم بمدخل القريه
ام فهد : مقدر مقدر يامك قلبي خايف
عبدالله : بابا برا برد وماجو
زامل : ادخل داخل
عبدالله : لا بشوف عمي هايل
ابوفهد : ماله داعي نتتظر برا تقل ماعندنا ولد غيره يله يله كلكم داخل
ام فهد : وش جاك فجاه يارجال
ابوفهد : وقفتتس بهااشارع ماهي زينه ادخلو فالحوش مصيره بيدخل البيت هو ماهو قاعد برا يله ندى يله فرح داخل داخل البزران بردو وهم ماجو اذا جو علمتكم
زامل : مسموح للي ماهو بردان يقعد ينتظرهم
ابوفهد : اي اي قاعد تحراهم
زامل : ليه دخلتهم يبه
ابوفهد : ماهي زينه وقفه حريم بالشارع
زامل : لاني عارف وش تفكر فيه بسكت
ام فهد : تاخروا صح كم الساعه شهد دقي على سياف اساليه
شهد : الله يهديك ياخاله ابشري ادق عليه الحين
زامل : جو جو بمه جاء هايل
ام فهد : يمه ولدي جاء
فرح : اخيرااا اخيرااا بينور بيتنا
ندى : زامل خله يدخل
هايل : يبه
ابوفهد : وينك كل هالغيبه
هايل : اعذرني يالغالي ماهو باليد
ابوفهد : ان شفت رايح لحالك يمين يسار ماتلوم الا نفسك
هايل : ابشر زامل
زامل : وينك ياخوي بس الحمدلله من طالت غيباته جاب الغنايم
هايل : والله شوفتكم بحد ذاتها عافيه
عزام : هلا والله ياعمي
ابوفهد : هلابك ياولدي
عزام : ماودي اطول عليكم مشتاق لاهلي بعد
ابوفهد : سلمني على ابوك ماقصرت ياولدي بوقفتك ذي رايتك بيضاء
عزام : ماسويت شى ياعمي الله يرفع قدرك
هايل : مغير نايم ويطقطق علي
ابوفهد : عاد انت مايبان بعينك شى
عزام : عطاك الرد عمي يله فمان الله لو بغيت شى يالجحود لاترسل
هايل : ههههههههه طيب طيب
سياف : يله يله ادخلو تقل بدت ديرتنا تبرد
هايل : يمه
ام فهد : يمه ولدي واخيرا شفتك قدامي واقف يامك وش سويت فينا وش سويت
هايل : يابعد قلبي انتي والله اني اسف وان شاء الله ماتنعاد
ام فهد : ماتنعاد ان شفتك ياهايل رايح لمكان لحالك ولا سمعت انك متهاوش مع احد لا انت ولدي ولا اعرفك
هايل : لا افا كل شى ولا زعلكن كلامتس اوامر ام عزيز
فرح : لاتكبرني يالاعوب ابقى اصغر منك
هايل : اصغر مني وصرتي ام
ام فهد : لاتستعجل فتره واخليك تصير اب
هايل : اوه فيه حوارات جديده ومواضيع نتناقش فيها شعندتس ماتسلمين
ندى : احسك موب حقيقي
هايل : فالتس ماقبلته تعالي تعالي سلمي
ندى : والله اني بصيح مقدر امسك دموعي
سياف : ههههههههه طول عمرتس ام دميعه ماهي جديده
ندى : جهزت الشاهي والفصفص
هايل : من الحين
ندى : اي اخاف ياخذك الوقت مره ثانيه واحنا ماسهرنا
هايل : ههههههههه لا لا بقعد على قلبتس
عبدالله : عمي اخيرا جيت
هايل : هلا هلا بحبيب عمه
سياف : ماسلمت على سميك؟
هايل : يامرحبا والله ماجملك الا ان سياف ابوك ولا انا مجرد اسم
سياف : ماحلاه وزود حلاه الا انه سميك
هايل : جعله يبر فيك انت وامه مابعد حطيتو تمايمه صح
سياف : اي صح
هايل : تمايمه علي زامل وين بنتك
زامل : والله ياخوك هالجوالات صارت لاعبه بعقولهم اخوها مشغل لها اغنيه تسكتها بجوالي
هايل : ياحبيبي تطورت الدنيا بسبع شهور
عبدالله : شسوي ياعمي ماتسكت مغير تصيح
فرح : شف ولد اختك طالع حلو على امه صح
هايل : اي والله حلو تقل يشبهني
فرح : ههههههههه ياحبك للمدح
ابوفهد : شبلاتس انتي انغشى عليتس
ندى : مقدر يابوفهد مقدر امسك دموعي وش هاللحظات السعيده الي الله يديمها
زامل : ياحبتس الدراما يام دميعه
ندى : ام فهد شوفيهم
هايل : اجل حاشريتس فقدتي الي يسلك لتس
ندى : والله بهذي صح
ابوفهد : يله يله ادخلو نتقهوى وجهزو العشاء ترا ميتين جوع
ندى : من عينيا وش مشتهي نسوي
ابوفهد : مدري اسالو هايل
هايل : شدعوه يابوفهد صرت انا الي اختار وش يطبخون
ابوفهد : هاليومين بس بعدها اعلمك الجد
هايل : حلوو علمتني عشان اتدلع عليك هالفتره
زامل : انتم اليوم ارتاحو بينطبخ العشاء انا وسياف
سياف : تعزم علي
زامل : بنشوي لكم بتاكلون اصابعكم وراها
فرح : نتعشى ان شاء الله الفجر
ابوفهد : تشوون من
زامل : دجاجه يله يله ياسياف شغل المنقد وحط الفحم
سياف : ابشر
ام فهد : يوجعك شى يامك تحس بشي
هايل : لا يمه ماحس بشي الحمدلله
فرح : وش قالو لك المستشفى
هايل : بيحطون لي مواعيد وبيرسلونها واجيهم
ندى : قالو لنا انا وامي ام لازم ننتبه لك جبنا لك دفتروقلم تكتب كل شى واذا حسيت انك ناسي ولا شى تعال لنا علطول زين
هايل : ههههههههه زين زين
ندى : يمه شوفي ولدتس ينطل علي الجمر
ام فهد : شبلاك على اختك
زامل : احب اجننها
ابوفهد : اظن انك عرفت بموضوع زواج خواتك وزامل وعيال عمك كلهم كلهم اعرسوا
هايل : اي عرفت الله يوفقهم يارب ويرزقهم الذريه الصالحه
ابوفهد : امين وانت متى دورك
هايل : يابوفهد لو اعرست من بيقعد عندك انت وام فهد
ام فهد : انت اعرس وماعليك من الباقي
هايل : خلاص دوري لي حرمه ها شرايك يابوفهد
ابوفهد : ترا الحريم ماينمزح معهم بتاخذ امك الموضوع صدق وبتدور لك
هايل : لا لا يام فهد امزح ترا انا ان شاء الله مافكر اعرس افكر اكمل دراسه
ندى : صدق
ابوفهد : بسم الله ارفقي يابنت
ندى : صدق بتدرس
هايل : اي والله فالمستشفى جبنا طاري الوظايف والدراسه وقال لي محمد ليه ماتكمل جامعه واحس جازت لي الفكره
ام فهد : ماعندنا جامعه فالقريه وين بتدرس
هايل : تبون تزوجوني عشان تفتكون مني بس الدراسه لا تبوني عندكم
ابوفهد : ناخذك على قد عقلك ووش ناوي تدرس
هايل : والله مدري بسال عزام هو الوحيد خريج جامعه بعايلتنا
ابوفهد : عزام وش تخصصه
هايل : اسلامي
ابوفهد : ادخل مثله حلو الاسلامي
هايل : والله درجتي فالثانوي ماهي هذاك الشي انا بخلي عزام يقدم علي وبساله وش موجود بس قبلها بقترح عليكم اقتراح وأسمعوني
ام فهد : بعد غير الجامعه وش
هايل : دام ان مافيه جامعه بالقريه فمضطرين نطلع منها صح ولالا
ابوفهد : لا
هايل : خلني اكمل الله يطول بعمرك ننقل وينقل معنا عمي ابوعزام وانا ادرس جامعه وانت وامي وعمي ابوعزام وحرمته ترجعون تدرسون بعد منه تتعرفون على ناس جديده ومنه تتعلمون ودام خواتي واخواني كلهم محد ساكن فالقريه ف ماعندنا سبب نسكن فيها
سياف : فكره حلوه يبه ويمه
زامل : ماقدرنا ياهايل نقنع ابوي نحط عروس خواتي فالرياض عشان تقنعه يطلع من القريه مره وحده
هايل : ابوفهد تجوز له افكاري
ام فهد : يعني هناك يعلمونا القراءه والكتابه وفيه حريم معي ولا انا لحالي
هايل : اي يابعد الدنيا يعلمونتس كل شى وفيه معتس حريم وحتى زوجه عمي ابوعزام بتصير معتس
ابوفهد : ووش الي ضامن لك ان ابوعزام بينقل للرياض
هايل : انا اعرف عمي ابوعزام علطول يقتنع فاقنعك انت اول وهو امره سهل
زامل : تقل ابوي اقتنع
سياف : والله مستحييل ابوي يطلع من القريه
فرح : عيون ابوي عيون المقتنع
هايل : لانفكر الحين بهالموضوع انا قلت بقترح عليكم تعرفوني ماعرف اسكت وانتم بكيفكم بس يايبه لاتطلون مابقى شى ويخلص الترم الاول ابي اسجل فالجامعه الترم الثاني
ابوفهد : كم بقى ويخلص
هايل : شهر اظن
ابوفهد : فكرتك مالها داعي بعدين بعدين نتكلم فالموضوع
هايل : تم

انتهى البارت
قراءة ممتعه يااصدقاء💞