"جابك الله في زحام العمر صدفة "

82

~~~ في بيت ابوفاتن ~~~
فاتن : ميهاف ميهاف
ميهاف : بسم الله شفيتس اهخ
فاتن : دقو على ابوي
ميهاف : منهم
فاتن : عائله عبدالرحمن وحددو العرس
ميهاف : كل هالصراخ والوناسه عشان حددو العرس ليتني امون على اخته واصورتس لها
فاتن : خليني ثقيله بنظرهم لاتفضحيني
ميهاف : ايه ومتى حطو العرس
فاتن : بعد اسبوعين
ميهاف : واحنا للحين ماخلصنا مقاضيتس
فاتن : لا يعتبر خلصنا
ميهاف : وين دفترتس الي كاتبه فيه كل شى شوفي لنا وش بقى تراتس اتعبتيني وانا بطني واصل لخشمي
فاتن : من لي غيرتس طيب ويوم عرستس من راح معتس
ميهاف : خلاص خلاص شوفي وش بقى لتس طيب
فاتن : باقي فستان العرس للحين ماخلص وماحجزت مشغل اسوي عنده والذهب للحين ماشريته الباقي كله تم
ميهاف : قايله لتس وش لتس بالتفصيل لو ماخذه فستانس جاهز
فاتن : لا لا ابي فستاني تفصيل الا تهقين بدو يحجزون القاعه تتوقعين بياخذ رايي
ميهاف : اي اكيد بيعطونكم موقع القاعه تروحين تشوفين الا صح بتحطين زفه
فاتن : انا ماودي بس اخته مرسله لي وقاعده تراكض وراه عشان يوافق ينحط صوته
ميهاف : حركااات والله اخته ذويقه وليش هو معيي
فاتن : لا انا ولا هو نبي
ميهاف : وليش بالعكس حلوو تنزفون
فاتن : مدري احس لا
ميهاف : انا اقول وافقي وترا محد بيقنعه غيرتس
فاتن : بس انا حاطه عليه بلوك مانكلم بعض الين ليله العرس
ميهاف : يان عليتس حركات
فاتن : يتحمل محد قال له يحبني
ميهاف : طيب انا تعبت اليوم الصراحه من كتابه اسماء اصدقاء ابوتس وصديقاتس وجيرانكم ابدق على عبدالعزيز يجيني وبكرا اذا عندتس مشوار كلميني
فاتن : طيب بحجز مشغل تبين احجز لتس معي
ميهاف : اي اي احجزي
~~~ صباح يوم جديد في بيت ابومحمد ~~~
ابومحمد : ياهلا ويامرحبا باخواني
ابوفهد : لو مخلينا نمشي امس البيت مافيه احد
ابوعزام : فيه هايل
ابوفهد : تبيني اتكل على هالبزر
ابوعزام : فيه ولدي بعد واكيد فهد جاهم الله يصلحك بس
ابومحمد : ماله داعي تروحون والعرس بعد اسبوعين خلو اهلكم يجون بعد
ابوفهد : لا لا قبل العرس بكم يوم نجيكم ان شاء الله بنشرب هالفنجال وبنمشي
ابومحمد : الا علمني سياف انه انقبل بالوظيفه عندنا بالرياض عساك وافقت يجي
ابوفهد : ايه جاي مع ولدك فالطريق وبنتك
ابومحمد : عيالك كلهم راحو ياخوي متى ناوي تطلع من هالقريه
ابوفهد : لامنكم دفنتوني اطلعو
ابومحمد : بعد عمر طويل يابوفهد ماقول لك حط البيت للبيع لا خله فالاعياد تجون له
ابوفهد : لا لا مالي نيه اطلع من قريتي
ابومحمد : الله يصلحك مستحيل تقتنع وانت يابوعزام
ابوعزام : انت تعرف ياخوي ماعندنا وظايف عشان نحط لنا بيت حلال لعيالنا فالرياض فدام عندنا بيت فالقريه ليه نخليه ونطلع
ابومحمد : لاتخليه خله لك فالزيارات فالاجازات موب تسكنون خلاص فيه الله يهديكم الدنيا تغيرت وتطورت وعيالكم ماهم ملزومين يعيشون عيشتنا
ابوفهد : بناتنا بيتزوجون وبيروحون للرياض والشرقيه وسلمى بنت ابوعزام فالرياض بعد خلاص مابقى احد عندنا ملزوم يعيش عيشتنا
ابومحمد : ولدك عزام وبنتك ندى بيسكنون فالقريه وهايل بعد
ابوفهد : هايل بيدرس فالرياض
ابومحمد : امحق دراسه يخوي كلها كم اسبوع وهو راجع لك
ابوفهد : انت لاتشغل بالك بامورن محلوله خلك بحوسه عيالك وعروسهم
ابومحمد : الا على طاري العرس هايل ماله نيه يرجع يخطب بنت غير بنت ابوصقر
ابوفهد : لا
ابوعزام : انا مستغرب ابوفهد شعندك ماعطيته العين الحمراء
ابوفهد : ماهو موضوع خاطر ولدي بس شذنب بنت الناس
ابومحمد : الله واكبر يابوفهد وولدك فهد وبنت جهير ماهو انت الي مزوجهم غصب
ابوفهد : اذا غلطنا نرجع نكرر خطانا ؟ لا انا بحاول فيه ماهو قاعد اعزب طول عمره بس ودي الين ينسى ويجي هو من نفسه ويقول اخطبو لي
ابوعزام : ولدك ماهوب جاي مير الحق عليه عشان تشوف عياله
ابوفهد : عاد الله وعياله مثلهم مثل عيال عيالي الباقين يرجال اشرب فنجالك بس تبون نسكن فالرياض وانتم للحين افكاركم ذي
ابومحمد : انا كنت حاس انك ياخوي افكارك متطوره بس تربيتك عودتك عالمكان
ابوفهد : هالمكان انولدنا فيه الفلوس ماتغير النفوس
ابومحمد : على كل الاحوال العرس بحطه الاسبوع الجاي واعزمو الي تعرفونهم تبون اعزم ابوخالد
ابوفهد : ايه اكيد ناسي حرمته اختك
ابومحمد : اخاف الانفس تصير شينه
ابوفهد : لا لا اعزمه ماصاير الا كل خيير
ابومحمد : وصح قبل انسى ترا ابوالبنت قال انه بيعزم صقر لانه خويه وماعنده غيره
ابوعزام : وانت وش قلت
ابومحمد : قلت يصير خير وش تبيني بعد اقول يابوعزام اطرده عيب
ابوفهد : لا خير ماسويت ياخوي يله مشينا يابوعزام
ابوعزام : يله
ابوفهد : ولدي بامانتك يابومحمد وولد ولدي
ابومحمد : افا عليك كل يوم مسنترين عندهم نشوف هايل الصغير
ابوفهد : الله يخليه لنا يله سلمنا على محمد وولده وان شاء الله قبل العرس بيوم واحنا عندكم هنا
ابومحمد : العين اوسع لكم من المكان الله يحييكم باي وقت ولاتخلون احد انا طالبك كلهم يحضرون
ابوفهد : لا ان شاء الله محنا تاركين احد يله استودعتك الله
ابومحمد : فمان الله
عبدالرحمن : عمي وين طالعين
ابوفهد : بنرجع للقريه ومبروك ياعريس تعنينا عالفاضي
عبدالرحمن : يابعد راسي ياعمي والله عنوتك ماتنسى ليش مستعجلين اقعدو تعشو معنا
ابوفهد : لا ياولدي تعرفني ماحب اتحرك لاغابت الشمس
سياف : يبه خلني اوصلكم وارجع
ابوفهد : لا لا اقعد هنا ليه مانزلت لشقتك
عبدالرحمن : انا حلفت عليه يجي يتعشى عندنا وتروح نرتب الشقه بعدين يروحون لها عاد
ابوفهد : زين ماسويت ياولدي يله عقبال نتجتمع بعرسك
عبدالرحمن : هانت ياعم اسبوع
ابوعزام : مبروك عقبال تجون عرس ولدي عزام
عبدالرحمن : يارب
ابومحمد : عااطاري متى ناويين تحطون عرسكم مع الغريب
ابوفهد : من الغريب
ابومحمد : ابوتميم صالح
ابوفهد : ماعاده غريب ذا صار نسيبي والله لو عليه حطه اليوم قبل بكره بس انا اجل
ابومحمد : وليه تاجل
ابوفهد : مابعد شبعت من بنتي بتروح للشرقيه هي
ابومحمد : بتروح مع زوجها ماهو غريب
ابوعزام : يتسذب عليكم كلمه صالح تعرفون هو يتيم وقال ياعم ودي نحدد العرس ومن هالكلام ووافق ابوفهد قال الشهر واليوم والوقت الي يناسبك يناسبنا
ابومحمد : بس يبي يخرعنا
ابوفهد : بعد تبيني اضيع نصيب بنتي
ابومحمد : ايه وطيب متى بيكون حددوه
ابوعزام : اي يمكن بعد شهر الوكاد ان ابوفهد مايبي يحط عرس صالح وبنته قبل عرس ولدي عزام وبنته عاد شالسبب مدري
ابومحمد : وليه ادخلو ياعيال ادخلو جاي انا
عبدالرحمن : شكلها طرده
سياف : مب شكلها الا اكيد
ابوفهد : انتم تعرفون اني زوجت فرح قبل ندى وذا مايصير ندى اكبر من فرح
ابوعزام : بس هي كانت راضيه
ابوفهد : حتى ولو ف ودي نفرح بندى قبلها هالمره
ابوعزام : مايصير خاطرك الا طيب البيت وجاهز ابد قدام بيتكم والمهر وجاهز بس ننتظر السياره
ابوفهد : سياره وش
ابوعزام : لعزام عشان اذا بغو يسافرون
ابوفهد : يابن الحلال عندك انت السياره وانت ماتطلع من القريه الا معي عطه بس سيارتك الين يلقى شغل فالرياض ويطلع هو بنفسه سياره
ابومحمد : وانا بدور له وظيفه هو تخصصه اسلامي صح
ابوعزام : ايه
ابومحمد : ابد ابشر بدور له اعرف لي مدرسين عيالي قبل صارو فالتوجيهه بكلمهم
ابوعزام : ماتقصر يابومحمد عسى عمرك طويل
ابومحمد : ابد نعين ونعاون وذا ولدي مثل ماهو ولدك يله استودعتكم الله طمنوني لاوصلتو
~~~ فالسياره ~~~
ابوعزام : الا يابوفهد ابقول لك علم
ابوفهد : حاس انك تبي تقول شى قل وش عندك
ابوعزام : بنتك راضيه تسكن فالقريه
ابوفهد : وليه ماترضى
ابوعزام : عشان اخوانها واختها كلهم فالرياض قلت يمكن هي بعد تبي
ابوفهد : ان صارت فرصه لعزام يتوظف فالرياض تنقل معه وخلصنا بس ماصارت عاد وش يسوي يروح يشحذ مايصير هالكلام يابوعزام ولا يجي بخاطرك ندى اصلا تبي القريه ولا تبي تطلع منها
ابوعزام : طالعه على ابوها بس انا خفت تجي بخاطرها
ابوفهد : لا ماهي بخاطرها انت بس تمم الموضوع وتصير زوجه عزام خلاص ارتحنا من هم هالعيال
ابوعزام : باقي لك هايل اشوف ام عزام تقول ان حرمتك حاطه عينها على بنت اختها
ابوفهد : والله انا ساحب يدي من موضوع هايل الين يجي هو بنفسه ويقول ابي هالبنت يبه اخطبها لي
ابوعزام : على كذا ماهو جاي
ابوفهد : الشكوى لله
~~~~ في بيت ام فهد ~~~~
ام فهد : كل شى جاهز يله مشينا
ام رغد : متاكده مايزعل زوجتتس
ام فهد : خليه يزعل رايح للرياض بدون مايعلمني
رغد : عصافير الحب تهاوشو
هايل : لاتزعلين يمه من ابوي استعجل طير عقله عبدالرحمن
ام فهد : حتى ولو ابروح للمزرعه واشوف بيتذكرني ولالا
ام رغد : عاد اول مره اروح لمزرعتكم اخبرها يوم اني حامل برغد بس كانت صغيره
ام فهد : لا تغيرت
هايل : ماتدرين ياخاله ان صار مذابح عشان ترجع هالمزرعه
ام رغد : مافاتني شى علمتني امك بس اشوا رجعت لكم
هايل : اي والله اني مشتاق لميهاف
ام رغد : وخزياه من ذي
هايل : اسم خيلي
رغد : يالنصاب
هايل : هلا
رغد : متى نوصل ياخاله
ام فهد : قدام شوي مامن بعد ترا قربنا ياهايل
هايل : اي قربنا يمه ٧ دقايق واحنا عندها
ام فهد : وشو ٧ دقايق وتقول قريبين
هايل : اي اي
رغد : انت تكذب علينا صح
هايل : خايف اقول لهم باقي ٢٠ دقيقه وينفجرون علي
رغد : وانا اقول وين ٧ دقايق ماحولنا غير تراب ويوم انها بعيده ليه تقترح على خالتي نجيها
هايل : نغير جو
رغد : قصدك نفطس فالجو
ام رغد : تقل بدت تغيب الشمس واحنا للحين ماوصلنا هايل انت صادق
هايل : ههههههههه والله ماقدر اتسذب زود باقي ٢٠ دقيقه
ام فهد : يوه يوه ياراسي ومخلينا نكمل مشي مارجعتنا
هايل : عشان
رغد : مشتاق لميهاف
هايل : هي يمه قريبه بالسياره
ام فهد : من وين اطلع لك سياره
رغد : محد فاهم الا ندى اشوفها تضحك علي اهخ
هايل : توكم صغار تعبتو بسرعه انا يوميا اروح لها على وجولي
ام رغد : تتمشى مع هواجيسك انت احنا ماعاد فينا حيل
هايل : لمستني جرحي ياخاله
ام فهد : الحين وش اقرب لنا البيت ولا المزرعه
هايل : المزرعه اكيد
ام فهد : يله يله اسبقنا انت ورغد دام توكم شباب
رغد : عطني الصدق كم باقي ياخي
هايل : لا الحين جد باقي عشر دقايق
رغد : يله يمه يله ياخاله باقي ١٠ دقايق لو زادت رح ندفن ناس هنا ولامن حس ولا من درى
ام فهد : وراه وش سوا ولدي
رغد : لا سلامتك ياخاله
هايل : ها هذيك مزرعتنا
ام فهد : يله اسبقونا
~~~ فالمزرعه ~~~
رغد : يمه اشربي ماء خاله اشربي بعد
هايل : عطيني انا بعد
رغد : لك يد
هايل : شفيها ذي لحول ايوه ماودتس ياخاله تشوفين عيالي
ام رغد : انا جايه عشانهم تبيني ارجع وانا ماشفتهم يله تعال ورنا حلالكم
هايل : هذا حوش الغنم ماودتس نسمي وحده من هالغنم على بنتس
رغد : ههههههههه ليكون يقصدني النعجه ذا
ام رغد : اهجد ترا مايفكك شى من لسانها
هايل : وهذي نياق سياف
ام رغد : هو الي شاريها
هايل : ايه احنا كنا نتشغل بمحل ابوي وابوي كل نهايه شهر يعطينا تقدرين تسمينه راتب وسياف من يوم كان صغير يجمع وشرى هالنياق
رغد : والغنم لمن
هايل : لامي وابوي وهذولي الحمام والدجاج والديك لندى
ام رغد : ماشاء الله هالمزرعه مباركه كلكم فيها
هايل : ايه وهذا مشتل الفراوله لفرح محد يزرع هالفراوله ويسقيه غيرها ويوم تزوجت وصتنا عليه وذي محميه القمح لفهد وذي محميه الخضروات لزامل يزرعونها هم ويهتمون فيها هم الين عاد لهو بحياتهم ووكلوني موضوع المزرعه هي كانت شراكه بين ابوي وبين خويه ابوسطام وتنازل ابوسطام عنها وخذا فلوس وحط وحده جنبنا له بعدين دخل ابوي شراكه مع زوج عمتي ابوخالد وصارت مشاكل وانسحب بعد والحين صارو كل محل الخضره بالقريه والرياض والشرقيه شراكه مع ابوي وعمي ابوسطام
ام رغد : الحين كل اخوانك لهم شى وانت وين حلالك
هايل : هذا هو حلالي اسطبل هالخيول
ام رغد : ماشاء الله تبارك الله الله يبارك لك فيه كم خيل عندك
هايل : خيلين من فلوسي والثالث عمي ابوسطام مهديني اياه
ام رغد : حاط لهم اسماء
هايل : ايه اكيد خيل عمي ابوسطام مسميه سهم لان عمي يحب هالاسم واسم الخيل الثاني نجد والثالث ميهاف
ام رغد : عرفنا ان سهم عشان عمك والاسماء الباقيه عشان من
هايل : لان قلبي في نجد
ام رغد : وميهاف
هايل : ياخاله
رغد : اسم حبيبته
ام فهد : مابقى احد ماعرف وقفت على اختي
هايل : ماهو ذا المقصد
ام رغد : سير قلبك على نجد والرياض يعني مانيب عارفه ان ميهاف اسمها
هايل : وبس ذي مزرعتنا
ام رغد : والله ماشاء الله حلوه شرايتس يارغد
رغد : حلوه بس احس ينقصها اشياء
ام فهد : مثل وش
رغد : نخل وشجر ويصير فيها تمر وليمون بتعطي شكل للمزرعه وورد بعد
ام رغد : صادقه بنتي غريبه مافيه نخل عندكم
ام فهد : والله مالي بسوالف المزرعه اسالي هايل
هايل : مانسقي الارض واجد بس فكره حلوه
ام رغد : حرام تضيع هالمزرعه بدون اهتمام حطو لكم صبي ينظفها ويعتني فيها
هايل : لا ياخاله انا فدا وجهتس لاتجيبين طاري هالعماله
ام رغد : ليه
هايل : وصينا واحد من قريتنا عليها وسافرنا رجعنا لقيناها محترقه
ام فهد : تذكرينه الي خطب بنتي ندى وهم صغار
ام رغد : سعيد حق البقاله مستحيل
ام فهد : ابد هو
ام رغد : ووش صار عليه
ام فهد : سكن فالحاره الثانيه
ام رغد : الله يكفي الشر
ام فهد : جهزت الجلسه امشي نقعد قبال هالمحميه
ام رغد : اي والله تفتح النفس وين راحت رغد
~~~ عند اسطبل الخيول ~~~
هايل : اكتبي ماشاء الله لايطيرون خيولي
رغد : صدقني محد مهتم الا على هالخيول تعرف تركبها
هايل : شرايتس
رغد : توقعتك حق نياق
هايل : لا اميل للخيول اكثر
رغد : هذيك موب كانها تشبهكك
هايل : الخروف انتي والله
رغد : الا بعدين وش حركات البزران
هايل : شمسوي بعد
رغد : ولا شى يمه متى بنرجع
ام رغد : ماجازت لتس المزرعه
رغد : الا لو رايحين معنا فرح وندى عالاقل
ام رغد : يوه عاد هايل قد عمرتس سولفي معه
رغد : يمه
ام فهد : وهي صادقه هايل مسرع طفشت ضيفتنا
هايل : شدخلني فيها
ام فهد : روحو اقطفو لنا فراوله ولا خضره
رغد : شلون طاوع امي قلبها تخليني مع ولد اختها
هايل : ليه باكلتس انتي شايفه نفستس ليه
رغد : يحق لي
هايل : والله امحق على قله سنع
رغد : شف تراك للحين ماشفت وجهي الثاني احط المقص بكبدك
هايل : عشانها ممرضه اشغلتنا خلاص ندري انتس تعرفين للابر والسوالف ذي
رغد : من جاب موضوع الابره
هايل : خلاص انطمي واقطفي انا قلبي ماهو متطمن لا لامي ولا لامتس وراهم بلاء
رغد : مثل وش
هايل : مدري الله يستر
~~~ فالجلسه ~~~
ام فهد : جيتو
ابوفهد : ايه البنات يقولون انتس فتلمزرعه شعندتس هناك
ام فهد : رحنا انا وهايل واختي وبنتها لعل وعسى يغير تفكيره ويتزوج
ابوفهد : يعني صامله على بنت اختتس
ام فهد : وين بلقى احسن منها
ابوفهد : ولدتس راسه يابس
ام فهد : انا اطحن الحب الي براسه
ابوفهد : ايه زين لاتتاخرون غابت الشمس وفهد ترا جاء
ام فهد : ايه لا جيت شفته
ام رغد : غريبه بالعاده تركضين لعيالتس
ام فهد : عتبانه عليه للحين
ام رغد : الله يصلحه كان افضل قبل تزوجونه
ام فهد : يرجع احسن ان شاء الله
~~~ في بيت ابوفهد ~~~
ابوفهد : يافرح ياندى وينكم
ندى : لبيه يبه
ابوفهد : ليه مارحتي المزرعه معهم
ندى : وراي عرس يابوفهد تبي بشرتي تخرب
ابوفهد : يروح هايل يجي هايل ثاني مافيه عيشها ناكلها قبل امتس تجي
ندى : الا من عيوني الثنتين وش مشتهي بس
ابوفهد : تمر ولبن
ندى : ابشر وين فهد
ابوفهد : راح لغرفته
ندى : اجل بجي اتكي معك البيت هدوء شالسالفه
~~~ فالمطبخ ~~~
ندى : المطبخ كتمه والشباك عالشارع ابلش بفتحها والي يصير يصير
فرح : شتسوين
ندى : اكل لابوي وين كنتي لما كان ينادي
فرح : اتروش وسمعت عزيز يصيح هذا وانا مخلينه عندتس رحتي وخليتيه
ندى : يعني مارد على ابوي عشان ولدتس
فرح : لا خلاص انا عنده وين امي
ندى : ماجو للحين وصح تراني فاتحه شباك المطبخ انتبهي تراه عالشارع
فرح : من كثر حارتنا عاد
ندى : حذرت بروح اودي لابوي الاكل يله
~~~ فالمجلس ~~~
ابوفهد : من جاء هالحين امتس معها المفتاح
ندى : مدري اقوم اشوف؟
ابوفهد : لا اقعدي انا بقوم يله يله جاي
ابوسيف : السلام عليكم يالجار
ابوفهد : وعليكم السلام وراك تلهث
ابوسيف : جاين اعلمك ان ولد ابوزيد مختفي انتبهو قفلو بيبانكم زين تراه موب صاحي
ابوفهد : من ابوزيد ومن انت
ابوسيف : انا من الحاره الثانيه ارسلني ابوخلف خصوصي لك وقال لي حذر ابوفهد وهو يحذر حارته ولد ابوزيد تعبان يطب عالبيوت يحسبهم بيت اهله وعاد فهمك كفايه
ابوفهد : الله يستر بستره تحذيرك وصل ابعلم الحاره كلها اقلط فنجال
ابوسيف : مشروب يله سلام
ابوفهد : بحفظ الله
فهد : من ذا يبه اول مره اشوفه
ابوفهد : ذا من حاره ابوخلف
فهد : ووش عندهم بعد كل الي صار
ابوفهد : مرسله ابوخلف خصيصا لي غريبه والله
ندى : يبه الاكل قبل يبرد من طلع عند الباب
ابوفهد : رجال من الحاره الثانيه يحذر يقول قفلو بيبانكم زين ولد ابوزيد ماهو صاحي يطب عالبيوت
فهد : افا ياذا العلم خلقه ماهوب صاحي
ابوفهد : والله مدري ماعرف ابوزيد حتى
ندى : عاد امس جايه بعد حرمه لامي تحذر تقول فيه حرمه عليها قل صح
فهد : ليكون هى زيد يلبس مثل الحريم ويسوي نفسه حرمه
ابوفهد : والله غريبه ماكان فيه هالسوالف
فهد : بس شكل الرجال صادق ماجاء يلهث عبث
ابوفهد : الله يستر انتبهو وسكرو كل شى احتياط
ندى : امي وينها وهايل للحين ماجو
ابوفهد : تبي بنت اختها لهايل ومخلينهم هناك
ندى : مااجتمع رجال ومراه الا وثالثهم الشيطان
ابوفهد : صبي شاهي بس
فهد : طيب يبه عندي لك اقتراح وودي تقول تم
ابوفهد : وشهو قل
فهد : شرايك يبه نحط هالبيت للبيع ولا الايجار والمزرعه نخليها هي وقت الاعياد نجي فيها دام فيها بيت هناك ونسكن فالرياض
ابوفهد : اذا حطيتوني بالقبر روحو واسكنو فالقريه
فهد : بعد عمر طويل
ابوفهد : مانيب مطول تراني كبرت
ندى : توك شباب ابو١٦ يابوفهد تحب تكبر نفسك
ابوفهد : ههههههههه امكم عجزت ماتبون انا اعجز
ندى : ام فهد ام ١٣ بعد
ابوفهد : ههههههههه اييه
ندى : تتمنى يبه ترجع لهالعمر
ابوفهد : لو بصير طول حياتي بهالعمر ايه اما مصيري بكبر لا خليني بكبري هالدنيا فانيه وانا ابوتس
ندى : طيب يبه ماقد علمتنا شلون تعرفت على امي
فهد : ايه صدق يبه كنتو تحبون بعض
ابوفهد : الصراحه ان امكم ماكانت تحبني
ندى : افا ياذا العلم !! شلون
ابوفهد : ماكانت يم هالسوالف الحب بس اني شفتها بالصدفه فاتحه الشباك اهلها تحط ماء للعصافير ويوم شافتني حطت طرحتها على وجهها وقالت غض بصرك وجاء ابوها وانا هربت
ندى : اخس مامنت هين يابوفهد طلعت تحب وتتمعشق
فهد : ايه وبعدين
ابوفهد : كان الدكان حق ابوي البقاله يعني قدام بيتهم ف صرت يوميا ملتزم امسك عن ابوي الشغل وكان مستغرب قبل كنا مهاوش انا وعمامكم من يمسك الشغل وكان جنب الدكان مسجد اول كنت ولد شيطاني ومجنن ابوي بموضوع الصلاه اتاكسل ومجالد الين قلت لابومحمد اني شفتها وابيها بس شلون اعرف اذا ماهي متزوجه قام قال لي اكتب لها رساله والله كتبت لها وحطيتها جنب حوض العصافير لانها دايم تحط لهم ماء فاكيد بتشوفها
فهد : والله تحمست بعدين شصار
ابوفهد : ايه وصرت اكتب لها الرسايل بس ماكتب اسمي ولا شى وماكانت ترد امكم بارده وتستحي كنت اشوف وش تسوي بالاوراق تقعد تقطعهم وتنطلهم وارجع اشكي لابومحمد ويشور علي اكتب اسمي ومن انا يقول يمكن تشوفك وتعجبها وتوافق ترد عليك ههههههههههههههه فكتبت لها اسمي واذكر اول مافتحت الرساله رفعت عينها لقتني اناظرها وهي تستحقرني وتصك الدريشه ويوه ضاق صدري بعدها
ندى : افا ليه ليكون قطعتها بعد
ابوفهد : ماعاد حطت ماء للعصافير غيرت مكانهم مر شهر تقريبا ماعاد شفتها حتى تطلع الزباله صار ابوها كنت خايف ليكون مسوين فيها شى
فهد : ووش طلع صاير
ابوفهد : ايام اول كان عندنا عاده الي تنخطب ماتطلع ابد ومحد يشوفها
ندى : اوهه
ابوفهد : ايه كان جنب دكانا محل حق اثاث رجال غني طلع خاطبها وانا يطير عقلي سمعته يتكلم مع ابوي ويسال عن اهلها ماكنا نعرفهم ابوها شوي قاسي ف ابوي مااحتك معه زود المهم وانا اقعد لاانام ولا اكل ومغير اهوجس واكتب بهالقصايد شلون عيونن افتنوني يشوفها غيري
فهد : الله الله عليك يابوفهد
ابوفهد : بعد مافقدت الامل شفت الرجال تاجر معليه يعني مستحيل يتركه ويوافق علي ابوها بس كانت سمعه الرجال شينه هو كان متزوج ومطلق ف رحت احوس ابي اعرف وش سبب طلاقه طلع انه يضرب حرمته عاد هنا وصلت معي مارح ارضى يمد يده عليها
ندى : حركااااات
ابوفهد : ايه وقلت لابوي وراح نصح ابوها ان سمعه الرجال ماهي زينه وقال موافقتي من موافقه بنتي دامها تبيه انا ابيه عرفت ان الموضوع بيدها ف رحت كتبت لها رساله وحطيتها بالشباك حقها على امل تفتحه وقعدت بهالبقاله اناضر شباكها لعل وعسى تفتحه مر اسبوع وفتحته جيتها بدون تفكير وقلت يابنت الناس انا احبتس وابيتس وشاريتس تكفين ارفضي هالرجال سمعته شينه والله اني احسن منه حتى لو اني فقير مال انا غني اخلاق جلست تضحك قالت لو فيك خير كان شفتك تروح للمسجد وتترك هالدخان الي تشربه من وراء ابوك
فهد : كانت تراقبك مثل ماانت تراقبها
ابوفهد : ايوه وماكانت تشوفني اروح للمسجد وادخن كنت والله قولها فعل انتظمت عالصلاه وتركت الدخان ومرت فتره انتظرها ترجع تفتح الشباك مافتحته مرت شهور الا فجاه عزاء عندهم طلع عزاء ابوها مات وزنيت براس ابوي الين راح يخطبها والله وافقو اخوانها وليومكم ذا كلما نعيّد هالسالفه ترجع تقول ترا ماكنت احبك كنت ابيك تنتظم عالصلاه وتترك الدخان
ندى : افا يام فهد طلعتي قاسيه
ابوفهد : ايه وافقت علي لاجل ان اخوانها حريمهم مايبونها
فهد : ياعمري ياامي ترا دايم الي يقول لك مايحبك يحبك
ابوفهد : اي يمكن
ندى : لو يرجع فيك الزمن ترجع تختارها
ابوفهد : ايه بس لاتعلمونها
ندى : ههههههههه اخسس عصافير الحب
ابوفهد : عشان كذا ماعاد اقتنع بسوالف الحب ان مثلي انا احب امكم بس هي طلعت ماتحبني
ندى : لا يابوفهد الزمن تغير الحين مايخطبها الا اذا عرف انها تحبه
ابوفهد : ايه تقل برد الشاهي صبي جديد وانت دق على هايل يله يرجعون ماعاد صارت
~~~ فالمزرعه ~~~
ام رغد : ماعلمتي ابوفهد عالاقل
ام فهد : لا ولا ودي اعلمه
ام رغد : طيب شرايتس تروحين معنا الرياض انا وبنتي وهناك تتعالجين
ام فهد : ووش عذري
ام رغد : تغيرين جو
ام فهد : لا مايقتنعون انا عشان كذا ابي ازوج هايل رغد هي بعد تشتغل بالمستشفى واعلم هايل وهو يعلم ابوه وخواته مانيب متعالجه الين ازوج كل عيالهم وامنهم
ام رغد : وابوفهد يام فهد تروحين وتخلينه
ام فهد : مابقى من العمر ياوخيتي كثر مامضى يله هايل رغد نمشي
رغد : يله ياخاله يمه من ذيك
هايل : ياخاله مضيعه
ام رغد : من تكلمون يالخبول امشو شيلون هالفرشه
رغد : فيه حرمه هناك واقفه
ام فهد : وينها
هايل : بسم الله اختفت
رغد : يمه ليكون محد يشوفها غيري
هايل : انا اول من شافها
رغد : انت ليه تسذوب ؟ انا اول وحده
هايل : اعقبي انا سالتها
رغد : مانتخالف بس انا الي شفتها قبلك
ام رغد : عقبال ماتتهاوشون وانتم معاريس
هايل : يله مشينا انتي صح
رغد : مريض هذا والله

انتهى البارت
قراءه ممتعه يااصدقاء 🌷🌷

سوال /
اي شخصيه حابينها بالروايه ؟  كلكم جاوبو