"جابك الله في زحام العمر صدفة "

62

~~~ في بيت ابوفاتن ~~~
ابوفاتن : الخطبه وتمت ياولدي والموافقه وجت الباقي عليكم
عبدالرحمن : عادي لو نستعجل
ابوفاتن : العجله مامنها فايده خل موضوع تحديد الملكه والعرس علي انا وابوك ومايصير خاطرك الا طيب واعتبر فاتن حرمتك
عبدالرحمن : الله يخليك لها ويطول بعمرك
ابوفاتن : بس اسمعني يولدي انا عندي شرط واحد
عبدالرحمن : اي سم ياعم شروطك اوامر
ابوفاتن : ماتكلم البنت بعد الملكه انا ياولدي هي وحيدتي لو صار بينكم شى وتهاوشتو وطلبتو الطلاق مايصير بحقي وبحق ابوك صح ولالا يابومحمد
ابومحمد : كلامك صحيح يابوفاتن وابد اعتبر شرط وصل وانقبل بس دام مايقدرون يكلمون بعض لازم نسعجل بالعرس
ابوفاتن : ان شاء الله الامور الاساسيه مانختلف فيها
ابومحمد : والله عندي انا بعد موضوع بتكلم لك فيه
ابوفاتن : اي سم وش بغيت
ابومحمد : البنت تبع زوجها يابوفاتن وين شفت زوج تبع مرته يعني عبدالرحمن ساكن عندنا بنتك المصونه تسكن عندنا مايصير العكس يجي ولدي يسكن عندك
ابوفاتن : يابومحمد انا بعد شايف ان الموضوع غلط بس بنتي رافضه فكره الزواج عشاني واني ببقى لحالي وولدك الي اقترح موضوع انه يسكن عندي
ابومحمد : والله اني شايفه غلط يابوفاتن
ابوفاتن : لاتفكر بهالموضوع وخل الزواج يعدي على هالشي بعد الزواج انا بقنع بنتي تسكن عندكم
محمد : ليش ياعم ماتزوجت
ابوفاتن : انت جاوبني ليش ماتزوجت
محمد : اي فهمتك
ابوفاتن : تقهوو تقهوو وعينو من الله خير وان شاء الله شروطنا تعجبكم وشروطكم تعجبنا
ابومحمد : على خير اجل
~~~ في غرفه فاتن ~~~
فاتن : يمدي ارفض
ميهاف : وش اهبدتس فيه انا الحين وش ترفضين
فاتن : للحين ماصار شى رسمي مجرد خطبه
ميهاف : وليش بترفضين
فاتن : مدري خايفة
ميهاف : محد بيغصبتس انتي صلي استخاره واذا ماارتحتي قولي لابوتس
فاتن : طيب
ميهاف : يليل انا وذا الغثيان مدري شصاير لي
فاتن : هاااا
ميهاف : من رجعت من الشرقيه وحاسه بلوعه
فاتن : قابلتي هديل وخوله شلونهم
ميهاف : بخير بخير يسلمون عليتس وعزمتني هديل على عرسها
فاتن : على سعود
ميهاف : اي هي وسعود وخوله وسطام كلهم بنفس اليوم
فاتن : ياماشاء الله
ميهاف : اصبري بروح الحمام
فاتن : الله يستر
~~~ في بيت ام فهد ~~~
ام فهد : ياحليلها هالجاره يابوفهد تنحط عالجرح يبرى
ابوفهد : زوجها ماهو كبير هذا الي خلاني مارتاح لكلامه الي قاله
ام فهد : وش كلامه الي قاله
ابوفهد : فيه ارض لابوي بس لانه توفى الله يرحمه صارت للورثه الي هم احنا عياله وهو جاء وقال لنا هالموضوع
ام فهد : هو حق عقار
ابوفهد : اي
ام فهد : اجل صادق وماعنده سبب يتسذب وانا شفت اهله كلهم صغار بس الشغل ماهو عيب ولا مقياس للعمر
ابوفهد : صح كلامتس بس وش يوصلني لجهير ولميهاف
ام فهد : كلها تنحل وانا اختك قل لاخوك ابومحمد يعطي جهير حقها اما بالنسبه لميهاف ف عفراء تدق عليها تجي وتاخذ حق امها
ابوفهد : هههه ابومحمد لو تدرين وش مسوي
ام فهد : وش مسوي بعد
ندى : جت القهوه لاحلى ثنين بالدنيا ليش سكتو كملو سوالفكم
ابوفهد : المهم دقيت على ابومحمد لان ابوسامي دق علي ويسال عن العيال ومتى بيرجعون رد علي ابومحمد وقال انه مشغول بخطبه ولده خطب لولده يام فهد وماقال لاخوانه ولا عزمهم حتى بنته ماظنتي تدري وانا حطيت سبيكر وسمع هايل وضاق صدره من عبدالرحمن وعاد بغى يختمها اخوي وباع بعد محل عقاره اظن فهمتو مقصده
ام فهد : يسوي الي يبي انت قمت باللي عليك قسمت الورث وحاولت تجمعهم عندك مثل ماكان عمي يسوي
ندى : ماعليك منه يايبه صدقني عمي ابومحمد مايطول ويمكن ولده ازعجه الا يخطب له وماامداه يقول لكم
ابوفهد : لا يمديه رايح يخطب لولده وولدي وبنتي توهم مطلقين وولده هالكلب دحيم ليش ماقال لهايل
ام فهد : جاء وقت يابوفهد انك تهتم لعايلتك وبس اخوانك الله يهديهم تمد لهم حسنه يردونها لكم بسيئه
ابوفهد : بس ابومحمد من يوم وهو صغير وكذا
ام فهد : لا والله ماكان كذا صح دائما افكارهم متعارضه بس والله كان شخص واصل ودايما يجي عندنا وحتى قبل يعرس دائمًا عندنا ولا نسيت يابوفهد
ابوفهد : مانسيت بس انا الحين ببري ذمتي وبقسم كل الحلال الباقي ابجرب ادق على جهير وانتي عطي علم لعفراء تكلم اختها تجي
ام فهد : زين زين اقمزي قولي لها ياندى
ندى : ابشري
ابوفهد : هلا والله بجهير اختنا شلونتس يابوي شخبارتس الي صار امسحيه بوجهي
جهير : ياهلا والله مافيه عتب علينا ولا عليكم المساله نصيب وهم مابينهم نصيب
ابوفهد : انا دقيت والله اسلم عليتس وعندي موضوع ثاني
جهير : موضوع يخص عيالنا اعذرني يااخوي ماقدر اخدمك فيه
ابوفهد : لا لا موضوع يخصنا احنا
جهير : وش صاير
ابوفهد : جاني رجال من الرياض وقال لي ان فيه ارض لابوي الله يرحمه وصارت للورثه وانا ابي اعطيتس حقتس وانا اخوتس
جهير : وانا كنت بكلمك بالموضوع نفسه
ابوفهد : ليش كنتي عارفه
جهير : لا توني عرفت منك بخصوص الارض بس ياخوي وبخصوص البيت الي انت ساكن فيه هذا بيت ابوي وابوي توفى وصار لنا احنا يالورثه
ابوفهد : تبيني اطلع من البيت ياجهير
جهير : بكل الاحوال وانا اختك الورث بيتقسم وانت قسمت كل شى وانا تنازلت لنص ورثي عشان تبنون مسجد لابوي وامي واختي بس باقي الورث مارح اتنازل وباقي سياره ابوي والبيت
ابوفهد : بس ياجهير ماعندي بيت غيره
جهير : بيت المزرعه حقك وين راح
ابوفهد : خير خير ان شاء الله ابعطي حق الارض حقتس لهايل يجيبه لتس
ام فهد : وش بلاء وجهك انقلب وش قالت لك
ابوفهد : ولا شى انا بطلع
ندى : وين راح ابوي
ام فهد : طلع يتمشى متاكده قايله له شى جهير ماينقلب وجهه كذا عبث
~~~ عند محل ابوفهد ~~~
ابوفهد : اختي تقول لي كذا اهخ يايبه ليتك عايش وشايف الي يصير
ابوعزام : ابوفهد وش عندك رجعت للمحل توك مقفل
ابوفهد : مافتحته بس قاعد اشوف الرايح والجاي
ابوعزام : وش فيك وانا اخوك وجهي ماهو زين تكلم انا اخوك لاتغبي شى عني
ابوفهد : وانا اخوك جاني كلام سم جسدي كله
ابوعزام : تنزل دموعك يابوفهد افا ماهقيتها والله منك وش صاير انا عون لك تكلم
ابوفهد : دقيت على جهير اعلمها باللي صار وسالفه الارض
ابوعزام : اي وش صار
ابوفهد : قالت انها تبي ورثها من البيت والسياره
ابوعزام : انهبلت ذي البيت انت ساكن فيه وسياره ابوي معك من يوم كان ابوي عايش يمكن ابوخالد الي قايل لها تقول لك هالكلام
ابوفهد : قلت لها وانا وين اسكن قالت ببيت المزرعه الي سحبها مني زوجها
ابوعزام : شلون تخليه ياخذ منك المزرعه
ابوفهد : تذكر يوم احترقت المزرعه وبديت من جديد هو جاء واقترح علي اعطيه المزرعه باسمه ويعطيني سنويًا اجار لها
ابوعزام : وكل ذا صار ولا قلت لنا يابوفهد
ابوفهد : وقتها كان معي ابوسطام وقلت له وقال لاتامنه وجهه ماهو وجهه رجال صادق وليتني صدقت ابوسطام ياخوي قال لي ترا اخوك ماهو نافعك مقصده ابومحمد وفعلا سوا فرحه على حزن عيالي
ابوعزام : ولاتنزل دمعتك وانا للحين عايش انا متنازل عن البيت والسياره وبغصب ابومحمد يتنازل وانت شف بكم البيت والسياره وطلعه من شغل المحل وعطها اياه واقعد فالبيت
ابوفهد : وحق اختنا المتوفيه
ابوعزام : يابن الحلال بنتها ماتدري عن شى ولا تبي شى
ابوفهد : لا لا يابوعزام ذا حقها حتى لو ماتبيه وماقصرت وانا اخوك انا بدبر عمري
ابوعزام : ابوفهد بيتي مفتوح لك باي وقت ومرحبا ومسهلا فيك انت الداخل واحنا الطالعين
ابوفهد : ماتقصر ياعضيدي
ابوعزام : حسبي الله ونعم الوكيل والله وطلع لتس لسان ياجهير بس انا عارف ذا ماهو كلامتس ذا كلام زوجتتس
~~~ عن المركز الصحي ~~~
عزام : خلصت كل الامكان حاط فرشتك هنا
هايل : خلني خلني يابوالعزم مع هواجيسي
عزام : وش ناوي تسوي مع دحيم
هايل : ماني من الي يرد السوء بالسوء ياولد العم ابدق وافهم منه الموضوع
سياف : تراك مانت حرمته يبرر لك
هايل : بس هو واعدني اخرتها ذا وعد الرجال
عزام : وش واعدك فيه
هايل : يوم كانت اعمارنا ١٥ كان وقتها ابوي وابوه متهاوشين على موضوع مخبيه ابوي عن عمي ابومحمد وكبرت السالفه وعيو يتراضون ووقتها ماكانوا يبونا نعرف وش السالفه وارسلنا ابوي نحط مويه واكل فالمزرعه للنياق ورحنا انا والنذل دحيم وقعدنا نتكلم بموضوع ابوي وعمي ووقتها هو الي بدا وقال انت ناشب لي بكل حياتي حتى نفس العمر ومن قو النشبه ابوي وابوك تهاوشو قصده ليه ماتهاوش عمي ابوعزام مثلا مع ابوي او ابوه لا الي تهاوشوا ابوي وابوه المهم ووقتها قلت له تهقى اذا كبرنا بنتهاوض مثلهم قال عبدالرحمن اي يمكن بس عشان نتفادى هالشي خلنا نوعد بعض وعد رجال مانخبي شى عن بعض ابد ووعده واحنا قاعدين نصب ماء للنياق للحين اتذكر الكلام حرف حرف وكل شى صار اتذكره فهذا الي قهرني الحين
سياف : والله وطلع بينهم وعود واحنا ماندري
هايل : اي اي عزالله محدن جاي مثل دحيم بس هو عليه حركات
عزام : ماجاوبتني وراك حاطنا عند المركز الصحي تتفاول علينا بعد
هايل : يقول ياعزام
جيت للمكان اللي جمعنا وخفِيت
وقامت جروحي للجوارح وطاحت
ضحكت ماابغى الناس تدري يبالفيت
لكنها غصب عن العين سااحت
حارت دموعي في عيوني وصديت
وارمشت مابيها انها تبين وطاحت
عزام : برضو مافهمت
سياف : ذا المكان الي قابل فيه حبيبته الي اشغلنا فيها
عزام : صح وش صار عليها
هايل : تزوجت ولد عمها ياولد العم قدامي زفوها وتدري وش اخر مكاتيبها لي
عزام : اتحفني
هايل : انا مابيك ابي ولد عمي من يوم كنا صغار
عزام : لا بارك الله فيها ولا بولد عمها
هايل : ولد عمها اي بس هي استغفر
سياف : اي اي تبكبكو وعلو اصواتكم خلو كل الناس تسمعنا
هايل : سياف تشوف الي اشوفه
سياف : وشو الا والله هو
عزام : منهو
سياف : ولد عم حبيبه هايل
هايل : وش جابه هنا ولا عند بيتنا
سياف : امش نشوف
هايل : وش جابكم هنا
ابوفهد : هايل اسكت ياهلا والله اعذرنا عنيناكم
عبدالعزيز : ياهلا فيك ياعم والله اتصلت اخت زوجتي وتصيح وخفنا عليها وجينا
ابوفهد : تصيح ؟
عبدالعزيز : اي والله ذا العلم
ابوفهد : رح شف وين زامل
سياف : ابشر زامل
ندى : جابك الله اخوك المجنون ماسك ضرب بحرمته
سياف : لا يفضحنا ذا زوج اختها محامي
~~~ بغرفه زامل وعفراء ~~~
عفراء : خلني اخذ عيالي
زامل : والله دامني حي ماتشوفينه بعد اليوم يله برا البيت
سياف : استهدي بالله اهلها برا
عفراء : خلهم عندك اجل ولا اشوفك متصل علي
ام فهد : استهدو بالله وش جاكم
~~~ عن باب الشارع ~~~
ابوفهد : ام عبدالله وش صاير
عفراء : رح اسال ولدك
زامل : تكلمي مع ابوي زين احسن لتس ذا عمتس وتاج راستس
هايل : اهجد ياولد
عبدالعزيز : خلي الشناط انا بركبها
ابوفهد : دامكم جيتو امسك هااظرف واعطه حرمتك
عبدالعزيز : وليش اعطي حرمتي شى منك
هايل : الزم حدودك
ابوفهد : هذا ورث امها وعاد باقي البيت والسياره اذا تقسم بيوصلها حقها
عبدالعزيز : زين زين بيوصل
~~~ بسياره ميهاف وعبدالعزيز ~~~
ميهاف : وش عطاك
عبدالعزيز : هذا ورث امتس
ميهاف : توهم يعترفون اني بنت اختهم
عبدالعزيز : وش صاير يام عبدالله
عفراء : ودني بيت امي بسرعه
عبدالعزيز : طيب طيب
ميهاف : وين عيالتس
عفراء : عيا اخذهم
ميهاف : وش صاير بينكم
عبدالعزيز : خليها لاتنفجر علينا الحين
ميهاف : اي بكيفها اذا وصلناها خلنا نروح المستشفى
عبدالعزيز : ليش
ميهاف : بكشف
عفراء : على وش
ميهاف : سبحان الله ذا طبعتس مدري حاسه بلوعه فبروح اكشف
عفراء : اختصري وقولي انتس حامل
عبدالعزيز : يعني احتمال اصير اب لولا الحياء منتس يام عبدالله كان شغلت اغاني
عفراء : اذا نزلتوني شغل
~~~~ في بيت ابوفهد ~~~
ابوفهد : وش صاير ياذا المهبول وش فيك على حرمتك
زامل : انا ماسوي شى لها الا وهي غلطانه
ابوفهد : انتم منتم صاحين ابد وماحنا خالصين من مشاكلكم انتم وزوجاتكم والله يلعنكم
هايل : استغفر يبه تاخذ ذنب على هالوجيهه مايستاهلون
سياف : اي طيب وش سوت عشان تضربها وتطلقها قدام عيالها وتحرمها بعد من عيالها
زامل : هي الي عطت زوجه فهد جوال تدق على اهلها كل شى قاعد يصير لنا حاليا من ابوخالد بسبتها لو ماعطت حرمه فهد الجوال ماصار كل ذا ولا تطلقت فرح وقعدت هنا
ابوفهد : وانت وشدخلك تطلقت ولا ماتطلقت وسالفه قعدت هنا فهي قاعده ببيت ابوها ماهو بيتك سامع ولالا
زامل : انا ماعاد ابيها ولا ابي اتزوج نهائيًا فكوني
ام فهد : وعيالك من بيربيهم ؟
زامل : كلهم كبار مايحتاجون تربيه
ندى : ٥ سنين وسنتين كبار ها صرعتهم بمشاكلك تعالو حبايبي
ابوفهد : انقلع برا البيت لاشوفك
زامل : طالع
هايل : امش امش حاطين قهوه وشاهي هناك امش
سياف : الله يغثك انت وفهد كان مشاكلكم ذي ماتخلص ابد
~~~ عند المركز الصحي ~~~
عزام : راحو وتركوني ياونتي ونه شايب وحييد ايوه
هايل : انت لا صوت ولا موهبه ولا شى الله يخلف عليك
عزام : وش ذلفتو وخليتوني افا ابوعبدالله وشفيك معصب
هايل : امور عائليه
عزام : محسسني اني ولد الجيران انطم ياشيخ
احمد : السلام عليكم
هايل : ياهلا وعليكم السلام
احمد : انا جاركم ابومحسن اعذروني طبيت عليكم كذا بس شفتكم قاعدين وقلت اجي اتعرف عليهم
عزام : ياهلابك باي وقت تعال
احمد : ماتقصرون والله
سياف : الا غريبه ياهايل شفتها وماقلت شى ولا قفلت على نفسك
هايل : وش اسوي وانا اخوك اذا بسوي بكل مره كذا ماعشت خل الشعور الداخلي اصارعه لحالي ولاني ادري ان امي اذا شافتني حزين بتشيل همي فخلني اشيل همي بنفسي
سياف : اي عاد ان شاء الله هالكلام صح
عزام : اي يابومحسن وش الي قردك وجيت لقريتنا
احمد : ههههههههههههههههه لا قراده ولا شى جاي فتره وبرجع لشقراء
هايل : ومدارس عيالك
احمد : ولدي محسن توه فالروضه اما بنتي فانا بصير اوديها واجيبها
سياف : لاتقول مدرستها بشقراء
احمد : اي والله بشقراء
عزام : وبتمسك خط يوميًا
احمد : شسوي بعد ماعندكم مدارس هنا
هايل : كان عندنا بس تقفلت مافيه معلمين ليت بعض المعلمين يهتمون بشغلهم
عزام : انطم انطم فاهم نطلاتك علي
هايل : ههههههههههههههههههههههههههههههه

انتهى البارت

قراءه ممتعة يااصدقاء 💞