"جابك الله في زحام العمر صدفة "

69

~~~ فالمستشفى ~~~
فاتن : ليش جيتي
ميهاف : طقت روحي من قعده البيت
فاتن : وتشوفين الشغل حل ولا تعب لتس وللطفل
ميهاف : ضايق صدري بفش خلقي لتس
فاتن : اي عارفه جيتس ماهي للشغل تكلمي
ميهاف : مارح تقعدين
فاتن : تعرفيني ماحب اسمع وانا قاعده لازم اشغل يدي بشي
ميهاف : طيب طيب بتكلم فيه سوال بخاطري وبحاجه اجابه ومافيه غيرتس يفهمني
فاتن : يعني انتي ماتدورين اجابه منطقيه تبين اجابه مثل الي ببالتس اذا كذا تفكيرتس ف ميحتاج تسالين الجواب بعقلتس بس قوليه بصوت عالي عشان تصدقينه
ميهاف : مارح تسمعين وش سوالي
فاتن : تكلمي
ميهاف : تهقين حبي لهايل كان وهم ولا مراهقه ولا هبال ولا اعجاب بسيط واحنا كبرناه
فاتن : ليش ماتنتظرينه يقوم وتسالينه هالسوال محد يقدر يجاوب عليه غير انتي وهو
ميهاف : مالي وجهه ارجع اكلمه وانا بطني الى خشمي
فاتن : دامتس ماتبينه يعرف بحملتس فهذا لا هو وهم ولا اعجاب بسيط ولا هبال هذا حب حقيقي ودامه جاء وخطبتس ماهي مره ولا مرتين ثلاث مرات تردد على ابوتس ولو ماتزوجتي بهالسرعه كان كل يوم بتلقينه عند بابكم ومااستسلم للحين يقول لعبدالرحمن لو طلقها عبدالعزيز بخطبها وبتزوجها يمكن بالنسبه لتس وهم بس بالنسبه له حب حقيقي
ميهاف : طيب ليش احس بتانيب
فاتن : لان محد مظلوم بكل هالحكايه غيره هو ولو انتي تحبينه ياميهاف ماتقبلتي عبدالعزيز وها ماشاء الله حامل بولده بعد
ميهاف : وش تنصحيني اسوي
فاتن : اذا تبين ضميرتس يرتاح انسي هايل وكملي صفحتتس الجديده مع عبدالعزيز الي مارح تطوينها عشان هايل ولا تحاولين تسالين عنه ولا تفكرين فيه ابدي حياه جديده وخليه لما يشوفتس ابتعدتي وصديتي خلاص هو بعد بيبدا حياه جديده لا تعلقينه بين كلمه حب ووهم هو ماخذ المعنى الاول وانتي مازلتي تكررين المعنى الثاني فالافضل يكون كل واحد بطريق دام مارح يكون بينكم وصل مدى الحياه
ميهاف : بس هذا مايعني اني ماحبه او اوهمته انتي تعرفين شكثر كنت احبه وابيه ورفضت وانضربت وحبسني ابوي وصار يعاملني وكاني مسويه ذنب كبير
فاتن : تذكرين يوم قلت لتس فالقريه هذا الولد مايصلح لتس دام بين ابوه وابوتس مشاكل انسي يكون بينتس نصيب وش قلتي لي ؟ قلتي انا بحاول وهو بيحاول ولو كل الطرق والاسباب وقفت بوجهينا بناخذ بعض والحين ؟
ميهاف : يعني قلت هالكلام يعني فعلا انا احبه
فاتن : قلت لتس انتي ماتبين جواب منطقي تبين الجواب الي ببالتس ودام تبين اقوله ف خلاص صح انتي تحبينه بس علميني وش بتسوين حبتس له وش بيسوي ؟
ميهاف : عالاقل يعرف اني وافيه له
فاتن : الكلام سهل ياميهاف بس وين الافعال ؟ لو احط نفسي بمكانه يمكن بوصل لمرحله اكرهتس لاخر يوم بعمري شويه منطق انتي بعد
ميهاف : بس هو يعرف اني مغصوبه وكل شى يصير ماهو بارادتي
فاتن : بس هو مايعرف الي داخلتس هو يشوف الظاهر بيشوف انتس عايشه احلى عيشه مع عبدالعزيز وتنتظرون طفلكم متوقعه مارح يسال نفسه هالسوال انه لهدرجه هان عليتس ؟ بتخلينه يرجع يعيد السنين الي حبتس فيها وبيندم فافضل حل انتس انتي تبعدين بعد
ميهاف : اكيد ببعد ماباليد حيله بس يشهد الله علي انه اجمل شعور عشته ومستحيل يتكرر حتى لو عشت بقيه عمري عبدالعزيز هايل بيبقى غييييير
فاتن : ايه ليت كل شى نبيه يصير يصير
ميهاف : ماقلتي لي وش صار عليتس انتي ودحيم
فاتن : الله اعلم رايحه اشوف احوال المرضى ارتاحي انتي
ميهاف : جايه معتس ضايق خلقي
~~~ بالسيب عند غرفه هايل ~~~
فاتن : تساليني عن احوالي مع دحيم شوفه عينتس مايطلع من غرفه ولد عمه الين اجي واطرده
ميهاف : هالشي الي يسويه مايخليتس تبينه اكثر
فاتن : ولد عمه اكيد بيحبه وبيخاف عليه بس البنت بدالها بنت
ميهاف : هذا عند الكل الا دحيم انتي اكثر وحده مفروض تستحي على وجهها ماانسى شلون كان يحاول فيتس وانتي راستس والف حصاه معييه
فاتن : ههههههههههههههههههههههههههههههه مشينا ندخل
عبدالرحمن : الحين انتم وش تسوون له
فاتن : وانت شدخلك ذا شغلنا ماتعلمنا
ميهاف : هههههه اسكتي انتي تعطيه مغذي تعرف هو ماياكل ولا يشرب عشان ماينخفض عنده الضغط والسكر
عبدالرحمن : يعني فيه امل يقوم
ميهاف : اي ان شاء الله ليش لا الي علينا الدعاء
عبدالرحمن : وانتي ليش تكلميني بقله ادب
فاتن : لان سوالك مايستحق الاجابه وسوال تافهه وغبي
عبدالرحمن : خويتها خذيها
فاتن : خلصت الزياره
عبدالرحمن : مسرع ممدا
ميهاف : ماخلصت ماخلصت امشي انتي اطلعي نفستس الخايسه ذي متى بتتعدل
فاتن : والله ياميهاف ماهو بيدي اذا انا بعيده عنه يوه تشوفين شلون امدحه بس اذا جيت عنده تقل شيطان بيننا
ميهاف : تصدقين يمكن بينكم نفس
فاتن : مدري بس هو زعلان لانه سمعني وانا اقول لفرح انه ياليت خطب ندى واني بقنعه ياخذها
ميهاف : يابجاحتتس تستهبلين انتي البنت اذكر بتتزوج ودحيم قلب الدنيا عشان يخطبتس واخر شى ذا كلامتس
فاتن : شسوي فرح قالت لي عن طفولتهم وقد ايش ندى تحبه وحزنت
ميهاف : تتوقعين انه بيصبر عليتس كفايه عاد فاتن بحركاتتس ذي بتخلينه يكرهتس
فاتن : قلتها عفويه والله
ميهاف : وعاد ليتتس اعتذرتي ولا سكتي بس لا تبين تتهاوشين معه
فاتن : دايما انا الخطا وهو الصح
ميهاف : امشي نمر على باقي المرضى الله يصبره
~~~~ في شقه فهد ~~~~
فهد : ليش داقه
زينب : السلام عليكم كيفك شلونك كيف حياتك
فهد : اختصري وش تبين
زينب : والله يابن الناس انا دقيت عليك وماهو مقصدي ان لي حاجه عندك انا داقه عشان خاطر خالتي قابلتها فالمستشفى وقالت لي انت وش مسوي
فهد : لحظه وانتي شدخلتتس بيني وبين اهلي
زينب : عشان خاطر امك انا دقيت
فهد : لاعاد تدقين انا رجال متزوج ومارضى اكلم حرمه ثانيه وعلى حسب ماسمعت انتس بعد بتتزوجين
زينب : السبب الي جمعني فيك بيجمعني مره ثانيه بشخص غيرك وانا ماني داقه اعلمك اخباري او اخذ اخبارك بختصر لك واتمنى تاخذ كلامي على محمل الجد اهلك حالتهم قاعده تنهار وادري مالي حق اقول شى والسبب ابوي بس السبب الاساسي هو انت ومابي افتح مواضيع تسكرت بس اهلك بحاجتك يافهد لاتخليهم يدعون عليك عندك ولد امك بكت عندي وهذي ماهي اول مره تبكي بانهيار ويكون السبب انت اتمنى انك تفرق بين اهلك وزوجتك اهلك اهم من كل شى ب هالدنيا وخابت هقواتي وظنوني فيك هقيت انك بتسوي المستحيل عشان اهلك اخر شى خليتهم يحتاجون للغريب وولدهم الموظف موجود بس رفض يساعدهم بس هذا سبب اتصالي اذا مو عشاني عشان امك وابوك وخواتك وخوانك الي صار لك مده ماشفتهم وماشافوك يوم ماشافو فيك خير لا انت ولا حرمتك طلبتني خالتي اكلمك وانا الي عليه سويته فمان الله
فهد : دقيقه متى ناويه تخليني اشوف ولدي
زينب : هههه انت اول شى اوصل باهلك بعدين بولدك ولدي ماهو بحاجه اب انا بعوضه عن وجودك الي اساسا ماله داعي
هيام : منهي الي تكلمك
فهد : زينب
هيام : ماشاء الله ماقلت لي انك حاذفها وهي حاذفتك منهي هذي تكلم
زينب : حط سبكر اسمعيني يابنت الناس اي نعم انا زينب وانا دقيت عليه لاجل اهله ولا مابيني وبينه شى واذا انتي خايفه يكلم بنت ثانيه وتاخذه وتخرب بيتك مثل ماانتي خربتي بيته قبل ف تطمني انا مو هاذي البنت سلمني على خالي وخالتي والاهل كلهم يافهد
فهد : صدقتي الحين
هيام : وليش اهلك يخلونها تكلمك ليكون عندهم نيه يرجعونها
فهد : من بيرجعها اذا انا زوجها ومابيها
هيام : طليقها
فهد : مهما كان كنت زوجها وابو ولدها جهزي الشناط بروح لاهلي
هيام : لا وعدت اهلي نروح لهم اجل سفره اهلك
فهد : لي ٧ شهور ماشفتهم
هيام : عادي انت مشغول بيعذرونك
~~~~ في بيت ابوفهد ~~~~
ابوفهد : شتبي بنت ابوخالد داقه عليتس
ام فهد : شفتها فالمستشفى وقلت لها لاتقطعني من حفيدنا
ابوفهد : حفيد ابوخالد ماهو حفيدي
ام فهد : ندى تعالي خلي ابوتس يشوف ولد ولدنا الكبير
ندى : شف يبه خدوده ماشاء الله
ابوفهد : ياحليله هذا ولد فهد يام فهد
ام فهد : اي ياعبدالله كبرو عيالنا وصار عندهم عيال
ندى : تبوني اصيح صح واكنسل زواج واقعد عندكم
ابوفهد : ماعندنا بنات يقعدون
ندى : مدري كلامكم ماطمني
فرح : اشوف ياحلوه يشبه فهد
ندى : لا طالع يهبل يشبه زينب
ام فهد : شقصدتس اخوتس ماهو حلو
ندى : نسيت وجهه اصلا
ابوفهد : شلون احط صورته عندي
ندى : ياحبيبي يابوفهد جوالك كشاف مايصور
ابوفهد : شلون صار عندتس
ندى : لان جوالي فيه كاميرا
ابوفهد : اي اجل خلي جوالتس عندنا وروحي
ندى : زين يبه لاتضغط شى وبعدين تدق عليها
ام فهد : الله لايخزينا انتبه انتبه
ابوفهد : والله وكبرت يافهد وصار عندك ولد
ام فهد : قلت مثلك هذا حفيد ابوخالد ماهو حفيدنا بس قلبي ماطاوعني
ابوفهد : على قوله بنت ابوخالد الخطا مني ومن ابوها عيالنا والاحفاد مالهم دخل الا وش سموه
ام فهد : بدق عليها الحين وباخذ اخبارها واسالها السلام عليكم
زينب : خالتي ام فهد فيك شى تونا مقفلين
ام فهد : اعذريني يابنتي نسيت اسالتس ودقيت الحين
زينب : لا عادي ياخاله تفضلي
ام فهد : وش سميتي حفيدنا ابوفهد شافه ويسال
زينب : كنت عارفه خالي مستحيل يكرهه سميته أحمد ياخاله
ام فهد : ياحلووو هالاسم وراعي الاسم بس على من الاسم
زينب : يابعد قلبي ياخاله والله احترت بين الاسامي وتذكرت ان فهد قال لي قبل انه كان يبي يسمي ولده الكبير احمد على اسم خوييه الي مات عاد مدري اظن انكم تعرفونه كانو جيرانكم على كلام فهد
ابوفهد : ايه ابواحمد الله يذكره بالخير
ام فهد : من كانو يابوفهد ناسيتهم
ابوفهد : جارنا الي اول واحد فتح محل فالسوق وكان يبيع رطب وتمر الله يذكره بالخير
ندى : تكلمون من
ام فهد : زينب
ندى : حركااات شلونتس زينب
زينب : بخير ياقلبي شلونتس انتي ومبروك الملكه وان شاء الله اقدر احضر العرس
ام فهد : وش كان سبب موته
ابوفهد : هذا ياطويله العمر تذكرين كان معنا فهد عمره ٩ سنين وزامل ٦ او ٧ سنين وسياف ابوثلاث سنين وكنتي حامل بهايل وهم رزقهم هالتمر والرطب كان يمسك خط فالليل الله يرحمه ويروح يجيب التمر والرطب من القصيم كان هو اول من علمني تجاره المحلات وعلم ابوخالد بعد كانت جهير متزوجه ابوخالد وكانو ساكنين عندنا مامعهم الا زينب وقلت لابواحمد يارجال خل اهلك فالبيت امانه عندي وعيا قال لا اهل حرمتي فالقصيم بخليها تزورهم هو كان اصغر مني صديق لابوخالد بالمره فكل مكان مع بعض المهم كان فهد يروح مع ولدهم احمد مايفترقون عن بعض حتى اذكر جاني فهد وقال يبه عادي اذا كبرت اتزوج اخت احمد واحمد يتزوج اختي وقلت له اي عادي انتم اكبرو بس ويوم جاء هايل زعل فهد يبي بنت عشان يزوجها احمد وام احمد كانت توها والده بنت مع هايل قد بعض يعني وبعد الولاده مشو للقصيم حتى كانو يبون فهد معهم يروح بس انا عييت تقل قلبي حاس وراحو وهم بالرجعه جاهم حادث وماتو كلهم الله يرحمهم
ام فهد : اي تذكرتهم الله يذكرتس بالخير يام احمد اطيب الجارات بالنسبه لي كانت تموت بزامل وهي الي سمته على اسم ابوها
ندى : ياقلبي عليهم الله يرحمهم
زينب : اجل دام السالفه كذا تحزن ليتني ماسميت
ام فهد : بالعكس بينبسط فهد
زينب : شلون شهد وفرح وعيال زامل
ندى : كلهم بخير انتي شلونتس وشلون عمتي وسوير
زينب : كلهم بخير هذي سوير قاعده تلعب احمد يبه
ابوخالد : تكلمين اهل فهد صح
زينب : اي
ابوخالد : اقفلي الجوال
زينب : قفلته بس ماهو حل الى متى خلاص فهد تزوج وانا بتزوج تكفى خل علاقتكم ترجع مثل ماكانت
ابوخالد : خالتس مايستاهل لا هو ولا ولده
زينب : والله يايبه انه للحين وده بك بس انت زودتها توه قاعد يقول لي قصتك انت وابواحمد الله يرحمه
ابوخالد : ابواحمد للحين يتذكره ابوفهد
زينب : اي عشان سميت ولدي احمد قال لي هالقصه وعرفت ليه انت كنت تبي خالد يسمي ولده احمد وليه فهد كان يبي يسمي ولده بعد احمد
ابوخالد : الله يرحمهم
جهير : شفيكم خرعتو البزر
ابوخالد : مافينا شى ابطلع
جهير : وش صاير علميني
زينب : سمعني اكلم خالتي ام فهد
جهير : الله يصلحتس اشوف وجهه قلب
زينب : قلب لانه تذكر ابواحمد
جهير : من ابواحمد
زينب : صديقه ايام زمان
جهير : غريبه من ذا اييي الي كان جار ابوفهد الله يذكرهم بالخير توفو كلهم بحادث وبنتها توها فالمهاد واحمد عمره ٩ سنين
زينب : اي قال لي القصه خالي ابوفهد
جهير : الله يرحمهم
~~~~ فالمستشفى ~~~~
فاتن : بسم الله
عزام : شبلاك انت كلما دخلت هالدكتوره على هايل فزيت
عبدالرحمن : احسهم يعطوني امل عالفاضي
عزام : شغلهم وبيسوونه
فاتن : فيه بشاره
عبدالرحمن : وش
فاتن : ولد عمكم عطانا استجابه
عبدالرحمن : شلون مافهمت
فاتن : وانا ادقه حرك اصابعه يبغى يجمعهم داخل يده
عزام : يعني زي الي تالم من الابره
فاتن : ايوه صح
عبدالرحمن : هايل ياولد العم قمت ورعع تكفى لاتخليني ابتسي قل انك قايم
عزام : حرك يده اقسم بالله شفته حركها
عبدالرحمن : دق دق على عمي ابوفهد وبشره
عزام : طيب طيب
فاتن : ههههههههههههههههههههه الله يقومه بالسلامه
عبدالرحمن : تعال اخمك ياعزام
عزام : اهجد لاتتحمس
عبدالرحمن : اخيرا اخيرا بعد ٧ شهور صبررر اللهم لك الحمد
فاتن : استجابه بسيطه تعتبر حركه طبيعيه بس ماهي ضمان انه يقوم
عبدالرحمن : الله لاينكد على مسلم ولد لاتستهبل معنا خلاص انا حطيت ببالي انك قايم يعني بتقوم
عزام : الو عمي ابوفهد هات البشاره
ابوفهد : قل وش عندك
عزام : قبل شوي هايل حرك اصابعه ويده قدامنا ياعمي شفناه يحركها
ابوفهد : صوره لنا وهو يحركها
عزام : ابشر اذا حركها بصوره لكم بس لمن ارسله
ابوفهد : لسياف ولا لزامل
عزام : على هالخشم
~~~~ في بيت ابوفهد ~~~
فرح : يبه تكفى صادق
ابوفهد : والله هذا كلام ابوعزام
ام فهد : الحمدلله بيعيش ولدنا
ندى : يببببااااااه
ابوفهد : الله يخرشتس وراتس تصارخين
ندى : مبسوطه بيرجع هايل يايبه بصيييح
ام فهد : لاتصيحين
ندى : اشوفتس دموعتس نزلت
فرح : اللهم لك الحمد
سياف : وشفيكم تصارخون
ام فهد : اخوك ياسياف حرك يده واصابعه
سياف : يمه صادقه
ابوفهد : معودينك نتسذب يعني ؟
سياف : لا بس منصدم
زامل : الي سمعته صح انا حالف اسجد سجده شكر اذا تحرك هايل
ندى : الحمدلله الي جاء هاليوم
سياف : بسجد معك بعد
ام فهد وهي منهاره : عطيني مناديل ندى
ندى : يمه لاتصيحين وتخليني اصيح
فرح : انا تمطر بغزاره ياجورج
سياف : من ذا جورج اعلم ابوتميم
فرح : هههههههههههههههههههههههههه جورج اسم ولدي بالانجليزي
سياف : اي اهجدي
شهد : الحمدلله جاء اليوم الي كلنا مبسوطين فيه الله يقومك بالسلامه ياهايل وتشوف هايل الصغير

انتهى البارت

قراءه ممتعه يااصدقاء 💞💞💞