"جابك الله في زحام العمر صدفة "

68

~~~~ فالمستشفى ~~~~
فرح : ولدي شفيه تكفين يادكتوره
فاتن : اهدي يابنت الحلال مافيه الا كل خير
ميهاف : فرح اهدي وخلينا نشوف شغلتنا
ام فهد : تعالي تعالي يابنتي اقعدي جب مويه يابوفهد
زامل : ارتح يبه انا اجيب
ابوفهد : خالد وش جابك هنا عسى اختي مافيها شى
خالد : لا ياخالي امي بخير الحمدلله بس احنا هنا لاجل ولد زينب تعبان والله
ابوفهد : ليه شفيه
خالد : حرارته مرتفعه واستفراغ تعرف تعب الصغار
ابوفهد : وامك وابوك شلونهم ووشلونك انت وخواتك
خالد : كلهم بخير انت شلونك ياخالي
ابوفهد : والله ياخالد احنا جايين هنا لاجل ولدك
فرح : يبه
خالد : فرح انتي هنا
زامل : انت شجابك هنا يبه امسك الماء اطلع برا
خالد : ماهو عيب اتطمن على ولدي
زامل : ولد من الي تدور عليه وتسال عنه لو تخاف عليه وتحبه مارميته هالرميه هذا ولد اختي ماهو ولدك ولا تحلم تشوفه
خالد : انا لو براسي شر اخذته بالقانون بس لاني اعرف ان اختكم مظلومه باخوان زيكم
ابوفهد : زامل نزل يدك مالك حق تمد يدك عليه
زامل : الا لي حق وستين حق بعد ابوه اخذ حلالنا ولا رف له جفن ولا امه يايبه عمتنا الي طول عمرها واصله فينا تركت اخوها وراحت مع زوجها وهي عارفه بغلط زوجها اكمل يبه ولا تبيني اسكت
ابوفهد : اسكت يازامل
زامل : لا خلني اكمل انت رحت وتسامحت مع عمي ابوسطام لاجل ان ابوخالد سحب كل شى منا وماعاد عندنا حلال نعيش عليه لاتحاول يايبه تكابر بالتخفي انا عارف وحاس وشايف وكل شى صار فينا بسبب هالكلب هو وابوه
ابوفهد وهو يصفقه : اطلع برا لااشوف وجهك
عبدالرحمن : عمي ابوفهد وش صاير وش جابكم هنا
ابوفهد : طلعني من هنا يادحيم
عبدالرحمن : ابشر ياعم تعال
~~~ في غرفه انتظار الاطفال ~~~
فاتن : تقدرين تشوفينه
فرح : طمنيني وشفيه
فاتن : مافيه الا العافيه امساك وبسببه جالس يصيح وماسكت وبيني بينتس انتي مهملته بموضوع
فرح : والله مااهملته
فاتن : ههههههههههههههههههه اهدي اهدي استهبل معتس بس انتي ماتشربينه ماء يابنتي جف الولد شربيه
فرح : الله يسعدك ويوفقنس طمنتيني
فاتن : ياروحي انتي هذا شغلي وبكتب لتس وصفه علاجات وخذيها
فرح : لا لا مايحتاج
فاتن : لاتخافين يام صح وش سميتي ولدتس
فرح : عزيز
فاتن : الله اسمه حلوو على كل الاحوال هذا مستشفى حكومي وماتدفعين اي شى والله يخلي لتس عزيز وتميم وابوتميم بعد
فرح : شلون عرفتي
فاتن : عرفت وبس
فرح : دحيم علمتس
فاتن : لا بس سمعته وهو يقول لاخوتس هايل
فرح : ياحبيبي ياهايل
فاتن : الله يقومه بالسلامه ويرده لكم
خالد : تزوجتي يافرح
فرح : فك يدي وكسر
فاتن : خير ان شاء الله وين عايشين
خالد : ليش زعلتي لاني تزوجت
فرح : لاتربطني فيك ولا فعلتك مثل فعلتي الفرق بيننا ان انت خسيس وانا صنت العشره الين سمعت خبر زواجك الي بعد طلاقي بكم يوم وابشرك ياولد خالتي ربي عوضني بشخص لو الف هالدنيا كلها مارح القى مثله وانت الله يخلي لك نصيبك الجديد
خالد : ولدي مايربيه رجال ثاني سامعه ولالا
فرح : اذا صرت رجال وتقول كلمتك وتسويها ذيك الساعه تعال وخذ ولدك
خالد : رجال وغصبا عنتس وولدي باخذه ان شئني وان ابيتي
فاتن : اطلع برا
خالد : مانيب طالع غير ولدي يجي معي
فاتن : اطلع ولا بنادي لك الامن
زينب : بس ياخالد اكسر الشر وامش اقعد عند ولدي واذا قام علمني
خالد : قال ايش قال بتتزوج
~~~ في كراسي الانتظار ~~~
زينب : السلام عليكم عرفتيني ياخاله
ام فهد : بنت ابوخالد
زينب : افا ياخاله صار اسمي كذا
ام فهد : زينب اعرفتس
زينب : امسحيها بوجهي ياخاله على كل الي صار انا سمعت من زامل ابوي وش مسوي
ام فهد : ماعمرنا عاتبنا الصغار ادري مالتس دخل بكل الي صار وادري انتس تحملتينا وتحملتي فهد يازينب فهد راح وخلاص ماعاد بهو راجع لنا
زينب : بسم الله ليه وين راح وش صاير
ام فهد : من صار هالشي وانا تمنيت انتس صبرتي عليه ولا خليتيته يروح يتزوج بس تذكرت انتس طيبه وتستاهلين الي افضل منه اعذريني ياامتس ظلمناتس
زينب : ياخاله انا وانتي وفرح مالنا ذنب بالي صار الخطا من خالي ابوفهد وابوي وهي بيبان قديمه وتقفلت بس علميني وش صاير ليش فهد ماعاد بهو راجع لكم
ام فهد : حرمته الجديده قويه يازينب قويه حرمتنا من فهد القديم ولدي الي قبل اللقمه ماتدخل بطنه قبل مايدخلها ببطني انا وابوه واخوانه واخواته بس الحين
زينب : وش الحين
ام فهد : دقيت عليه ابيه يسلفنا فلوس وعيا
زينب : مستحيل مايسويها فهد
ام فهد : هذا على خبرتس يازينب بس الحين تغير
زينب : الله يرده لكم ردا جميلا
ام فهد : يوم سمعت ابوفهد يكلم ابوسطام ويطلبه دعيت من كل قلبي على فهد ماقدرت امسك نفسي
زينب : حقتس ياخاله هو غلطان ولازم يصحح خطاه وتكفين ياخاله لاتقطعيني انا وامي والله متشفقين نشوفكم ونقعد معكم بس ابوي الله يهديه وشوفي ياخاله للمره الثانيه يبي يزوجني غصب ولد ابوسلطان يبي يرد حركه فهد
ام فهد : تكفين يازينب اذا تقدرين ترجعين ولدي لي لاتقصرين ان كان لي خاطر عندتس
زينب : والله ياخاله انا عشانتس اسوي المستحيل وانتي تعرفيني انا وانتي علاقتنا غير انا اكثر من كوني زوجه ولدتس قبل بس والله ياخاله هالمره مابيدي شى انا ماعاد اني بحلال فهد
ام فهد : فهد طلقتس مره وحده فيه امل ترجعون وبينكم ولد والله اني متشفقه اشوف عياله
زينب : من عيوني ياخاله والي تبينه يصير اليوم قبل بكرا تعالي معي وشوفي حفيدك ومن عيوني الثنتين بصير ارسل لندى صوره كل يوم وندى توريك اياه
ام فهد : الله يوفقتس ويسعدتس يابنتي والود ودي ترجعين كنتي
زينب : الكاس اذا انكسر مايرجع يتصلح هذا مثل علاقتي انا وفهد سامه وحاده وانسكرت مارح ترجع مثل ماكانت تعالي الحين انتي شوفي حفيدك وخلينا نسولف وننبسط بس بخلي خالد يروح عشان مايعلم ابوي وتصير مشاكل
ام فهد : حسبي الله على من كان السبب بهالتفرقه كلها
~~~ عن باب المستشفى ~~~
عزام : السلام عليكم تدخن ياورع ارمها
زامل : الورع انت
عزام : هذا انت يازامل ياوجه الله ياوجه الله انت تسوي كذا
زامل : سويتها انت مانيب عاجز
عزام : الا عاجز ورخمه بعد الي يعتبر التدخين مرجله
زامل : مافيه حل الا هي
عزام : انت شايف حال اهلنا شايف انهم يقدرون يامنون لك شى تاكله عشان يامنون لك مبلغ الزفت ذا الي تعتبره راحتك رجال شكبرك متزوج وعندك ولد وبنت وتدخن وش خليت للي اصغر منا وش خليت لاخوك الي منسدح لاهو نايم ولا هو قايم تعتبر الي يصير لك تعب واكتئاب ونفسيه وتدخن عشان تنسى اجل هايل وش يسوي يغسل ذاكرته عشان ينسى كل الي صار له مااقارن تعبك بتعبه بس شف الي طايح عالسرير بحاجه عافيتك عشان يقوم وشف نفسك يالي بعافيتك وقاعد تدمرها
زامل : ياخي الانسان مايتعب تعبت تعبت اهلي من جهه والشغل من جهه وهايل من جهه
عزام : هذا ماهو عذر يالبزر ماهو عذر شفني انا لاتزوجت ولا شفت عيالي ولا عندي شغل
زامل : وخطبتك على اختي وش
عزام : قبل كنتو رافضيني الحين مابقى شى عالثلاثين على عالعموم انا هالمره بعديها لك وان شفتك المره الجايه بعلم عمي ابوفهد ترا محد ناقصك وعندك ولد وبنت من بيصرف عليهم ؟
زامل : استغفرالله واتوب اليه ترا توني شاريه من البقاله وتوني مشغلها وجيت انت
عزام : الي فيه تعب واكتئاب يروح يدخل المسجد ويصلي ويدعي ويتقرب من ربي وشف بعدها ان بقى فيك ذره تعب وذلحين ارمي هالشر من يدك والحقني ناكل مع دحيم
زامل : وش جابك هنا
عزام : تذكرت هالضعيف دحيم لا اكله اكل ونومه نوم وكلمني ابوسالم اروح اشوفه ومارديت له طلب وجيت
زامل : دحيم طلع مع ابوي يتمشون
عزام : ليش
زامل : ابوي زعل مني لان رفعت صوتي عليه
عزام : الله يصلح الحال امش ندخل نشوف هايل وتعلمني بكل شى صار
زامل : يله
~~~ بسياره ابوفهد ~~~
عبدالرحمن : علمني ياعمي وش صاير فهمني
ابوفهد : ليه ابوك تغير ياولدي ليه خلاني احتاج للغريب وهو عندي
عبدالرحمن : امسحها بوجهي يالغالي ابوي غلط
ابوفهد : مالك ذنب ياولدي خلاص ارتحت رجعني للمستشفى
عبدالرحمن : على هالخشم يابوفهد
ابوفهد : وش صار مع هايل
عبدالرحمن : بخير الحمدلله
ابوفهد : للحين عندك امل
عبدالرحمن : اي ومتاكد ان انت بعد للحين عندك امل يقوم
ابوفهد : اخ والله اني مشتاق له رغم انه شيطاني وغثيث بس ذا ولدي وضناي وقطعه من قلبي
عبدالرحمن : الله يرده لنا يارب
ابوفهد : وش صار بزواجك
عبدالرحمن : كنسلته
ابوفهد : ليه
عبدالرحمن : انا حالف محد يشهد على عرسي غير هايل وهايل ماقام ف كنسلته
ابوفهد : مايصير ياولدي مايصير
عبدالرحمن : لاتشيل هم ياابوي بنت الناس راضيه
ابوفهد : ههههههههههههههههههههههههههههههه يالكلب ضامن
عبدالرحمن : اي اكيد ههههههههههههههههههههههه  يله وصلنا
ابوفهد : ماقصرت ياولدي
عبدالرحمن : حق وواجب الله يطول بعمرك
~~~ عند زينب وام فهد ~~~
زينب : طيب ليش مارحتو لبيته وفتشتو يمكن حاطه له بلاء
ام فهد : حتى بيته ماندري وينه
زينب : انا ادله
ام فهد : ماهو على خبرتس ست الحسن عيت تسكن فالبيت الي سكنتي فيه
زينب : اعذريني ياخاله بس تراهم طنجره ولقت غطاها وانا بحاول اكلم فهد وانصحه والله ماودي بس عشانتس وانتي تعرفين غلاتس عندي
ام فهد : حتى ولده مايبي يشوفه يقول ماعندي ولد
زينب : ولدي ماهو بحاجته عنده امه والحمدلله
ابوفهد : وش تسوين هنا يام فهد
ام فهد : تعال شف ولد ولدك فهد ولدنا صار عنده ولد يابوفهد
ابوفهد : حفيد ابوخالد مايلزمني
زينب : حفيد ابوخالد حفيدك ياخالي
ابوفهد : لو ان للحين تغلين خالتتس مارحتي اعرستي
زينب : ولو ان ولدك للحين يبيني مارح يعرس
ابوفهد : امش يام فهد امشي
ام فهد : خلني بشوف حفيدي
ابوفهد : ماعندنا حفيد
زينب : خالي الي صار ماهو غلطي لا انا ولا فهد ولا خالد ولا فرح الخطا خطاك وخطا ابوي اذا بتلوم احد على الي صار فحط نفسك اول القائمه وولدي مارح احرمه منكم انا ادري ان ابوه مايبيه بس اعرف ان عنده جد وجده وعمام وعمات يحبونه ويبونه وبعمرهم مارح يحسسونه انه يتيم اب وانا مستحيل الغي وجودكم بحياه ولدي رح اعلمه يوصل فيكم ويحبكم من حبي لكم ومايصير مثل ابوه قطوع خلص مغذي ولدي استاذنك ياخاله وانا على وعدي لك تاخرت على خالد بحفظ الرحمن وطمنيني اذا قام هايل
ام فهد : يوصل يابنتي لاتقطعيني
زينب : على عيني وراسي مع السلامه ياخالي ياجد ولدي
ابوفهد : بنت اختي تعلمني الصح
ام فهد : لان كلامها صح اثر فيك بروح اشوف فرح والله يهديك
~~~ في المستشفى عند فرح وولدها ~~~
فاتن : طمنيني وش صار معاكم
فرح : والله كل شى تمام ابوي تصالح مع ابوسطام
فاتن : عاد تصدقين اني اعرف اخباركم
فرح : دحيم مايسكت
فاتن : لاتظلمينه انا سمعته وهو يصيح ويسولف على هايل والله ماعمري شفت علاقه اخوه وصداقه مثل صداقتهم
فرح : يوه هذولي الثنين اهلنا ماصدقو على الله يكبرون جننوهم تجنيين من كثر ماان عمي ابومحمد تارك عبدالرحمن عندنا صرنا نناديه اخونا تشوفين رفض ياخذ ندى لانه يعتبرها اختها ربينا مع بعض ويوم كنا صغار قبل نتغطى عن بعض كنا نلعب مع بعض ونسرق فلوس من ابوي وهو نايم ونعطيه دحيم وهايل يجيبون لنا من البقاله كانت احلى ايام يافاتن بس كبرنا وتغير كل شى صار دحيم يستحي منا على كثر مايتهاوش هو وندى يوم كنا صغار كل اهلنا قالو انهم بيحبون بعض اذا كبرو وفعلا ندى تحب عبدالرحمن وماودي اخبي عليتس بس ليومنا ذا تمنت انها تاخذ عبدالرحمن مو عزام بس النصيب وشهد وسياف بعد كانو كلما يجونا بيت عمي ابومحمد نفك سياف من شهد كل يوم هابدها وقلنا عنهم اذا كبرو مستحيل ياخذون بعض بس خذو بعض
فاتن : لاتقولين لي كذا الحين اروح اقول لدحيم تزوج ندى
فرح : يوه عشان يقوم الدنيا مايبي الا انتي وبس يهذري عنتس على ان والله قبل كان يخبي الحلويات عشان يعطيها ندى بس غريبه يوم كبرو ماحبها
فاتن : لا لا بصيح علاقتهم حلوه شرايتس عزام ندور له حرمه ونزوج دحيم ندى
فرح : لايسمعتس عزام من يوم كنا صغار كان يتهاوش مع دحيم عشان هالموضوع بيني وبينتس هو يعرف ان ندى تحب عبدالرحمن اصلا كانت مفضوحه عند كل العايله
فاتن : يمكن دحيم كنسل حب ندى بسبب عزام
فرح : لا دحيم يوم كبر يعني صار عمره ١٨ كذا صار قلبه فندق كل من مرت بقريتنا قال حبيتها ونكب هايل يقول له قصيد عنها وهايل على نياته مايدري ان ندى تحب دحيم فكان يجي يقول لامي عن عبدالرحمن وش يسوي وهي تزعل
فاتن : اجل يمكن ندى حب طفوله دحيم يوم كبر كنسل
فرح : اي يمكن وعاد يوم دخل العشرين هو وهايل حبوتس انتي وخويتتس سمعت انها حامل
فاتن : اي والله شتسوي تعرفين ابوها شلون قاسي والحين رجعت زوجه اخوتس للبيت وبدال ماتتحمل امها بس صارت تتحمل عفراء وعبدالعزيز مايقصر من جميع النواحي والبنت بحاجه احد حنون واصلا عبدالعزيز نصيبها
فرح : اي الله يوفقهم ويعوض هايل اي واقولتس ذي قصه دحيم وندى
فاتن : والله حبيتهم مع بعض خير ماله داعي دحيم
عبدالرحمن : احم السلام عليكم شلونتس يام عزيز
فرح : بخير الحمدلله شلونك انت
عبدالرحمن : بخير الحمدلله عسى ماشر وشفيه حفيدنا
فرح : ابد والله تعب فجاه والحين بخير ماقصرت فاتن قامت بالواجب
عبدالرحمن : اي اي سمعت واجبها والله وكبرتي وصار اسمتس ام عزيز وانتي قبل مغير تلاحقين القطاوه والخنافس تخوفينا فيها
فرح : اي والله كبرنا حتى انت بكره تتزوج فاتن ونقول له هالكلام
عبدالرحمن : اي نصيبنا عيا يصيب
فرح : يصيب يصيب اصبر انت بس
عبدالرحمن : ان شاء الله اسمعي يادكتوره
فاتن : قله ادب وش اسمعي نعم شتبي
عبدالرحمن : الزياره مفتوحه عمي ابوفهد وزوجته يبون زياره
فاتن : اي هم لو انت كان رفضت
عبدالرحمن : اذلفي اذلفي بس
فاتن : وليش تذلف وليش تمشي وراي اصلا
عبدالرحمن : طال عمرتس رايح عند عيال عمي فيها شى
فاتن : اها اي دربنا واحد يعني
عبدالرحمن : اي اي اجل ليته تزوج ندى وودتس تزوجينا وقبل كم ساعه جايه تقولين مابي غيرتس منفصمه انتي تراتس بالمستشفى روحي تعالجي
فاتن : هههه هههه حبيبي من وين مطلع هالكلام متى قلت لك كذا واي ابيك لندى شفيها
عبدالرحمن : امشي امشي والله لو انتس حلالي لاهبدتس هنا
فاتن : نشوف اذلف لاتمشي وراي
عبدالرحمن : الله يشغلتس اسوي اسقاط نجم علطول مريضه انتي
فاتن : اي اي مريضه وقف اذا وصلت امش قله ادب صدق الي استحو ماتو
عبدالرحمن : ذي مريضه ولا شجاها الحمدلله والشكر والله اني اعاني
~~~ بغرفه هايل ~~~
فاتن : الزياره عشر دقايق بس
ابوفهد : طيب يادكتوره مافيه امل يصحى
فاتن : كل اجهزته الحيويه ممتازه النبض والتنفس طبيعي جدا ونسبه انه يقوم قاعده تزيد انتو ادعو والباقي على ربي
ام فهد : اهخ ياوليدي راح عمرك وانت قاعده على هالسرير كل عيال عمك بيعرسون كلهم ماعاد بقى احد الا انت
ابوفهد : الله يقومك بالسلامه ياولدي
عزام : يادكتوره عادي ندخل معهم عشان مره وحده
فاتن : ادخل انت واخوه ولد عمه قاعد عنده له مده لايدخل
عبدالرحمن : لا شكلها ذي تبي مشكله
فاتن : الحمدلله والشكر
عبدالرحمن : انا الحين صرت الحمدلله والشكر الله يشفيتس يادكتوره
عزام : وش مسوي لهم اكيد مزعجهم
عبدالرحمن : يرجال ماسويت شى ذي تتبلى
~~~ بغرفه هايل ~~~
ام فهد : والله ياهايل اني مشتاقه لك متى تقوم ياوليدي ترا والله رحت من هنا وقلبي يتقطع ودي اقعد عندك واتامل وجهك واتخيل انك قايم وتسولف معي تكفى ياامك قم البيت من دونك ماهو زين
زامل : صدق ياورع خل الدلع وقم
ابوفهد : زامل امك بدت تصيح ومايصلح ازعاج بمكان زي كذا طلعها تهدا
ام فهد وهي منهاره : تكفى ياهايل قم تكفى ياحبيب امك مابغى افقد امل دخلتك علي تكفى يامك ماشتقت لي
زامل : تعالي يمه فالسياره تعالي
ابوفهد : اعذرني ياولدي وديتك بمكان بدون مافكر ان فيه عيال مايخافون الله وبيسوون فيك كذا اعذرني ياهايل فكرت بنفسي واهلك قبل مافكر فيك والله امك قالت لي لاتوديه بس عاندت ووديتك لاتزعل علي انا فدا وجهك التعبان هذا ان قمت اوعدك ماعاد ارسلك لمكان وانا مانيب معك اعذرني ياولدي على كل الي سويته فيك انا مادري انت بتقوم وتفرحنا بشوفتك مره ثانيه ولا هالمكان بيكون اخر مكان يجمعنا فيك مااتسذب عليك ياولدي انا والله مافقدت الامل بس قدام اهلك عشان اقوي نفسي قلت لهم مشينا وماعاد فيه امل كسرت الامل الي فيهم على امل انه بينكسر مني طلع ماانكسر لا منهم ولا مني هايل يابوك لاتخليني احتاج للغريب وانت موجود وعدتني وانت عمرك ١٤ سنه تعزني وتعز اهلك وين وعدك يالضعيف ادنى طعنه بطحتك بهاافراش وماعاد قمت ماهو هذا ولدي الي ربيته بس يشهد علي ربي اني ماقد نزلت دموع هالكثر كثر مانزلت عليك يابوك انا احتجت للغريب وولدي موجود اخوك الكبير فهد الي قبل كل مثل زين اضرب به هو اول واحد واهزب فيك انت وزامل وسياف والحين ندمان لانه طلع العكس سامحني ياولدي لاني ماخليتك تاخذ البنت الي تبيها ظلمتك وظلمت بنت الناس وظلمت امها الي هي خالتك مااكتفيت بهالقساوه وارسلتك لمكان مايعيش فيه الا الجن ومازلت بهالقساوه وحاطه هقاوي اننا بننساك قلت بسوي عرس بس وقفو بوجهي اخوانك اول مره يوقفون زامل وسياف بهالقوه قدامي وخواتك رفضو خابت الهقاوي ياوليدي خابت تكفى يابوك خلني اشوفك قبل تغمض هالعين تدري ان اختك ندى للحين تحط فرشه وشاهي وفصفص وتنتظرك تجي وعندها امل ولما اجيها ابقعد معها تقمز وتشيل الاشياء تعودتو لما تسمعون صوتي تركضون تنامون بس تدري وش الفرق هالمره انت مانت موجود وهي يوم شافتني ماراحت تنام تغيرت الانفس والبيوت وحتى جيرانا بيمشون وسوقنا المحلات بدت تقفل كل شى تغير وانا ابوك وانت للحين ماقمت كل صبح اجي لفراشك اذا شفته مرتب احوسه عشان احس انك للحين موجود وانت الي حايسه قمت انادي عيال الحاره باسمك خايفن انساك الله يصلح الحال وانا ابوك واشوفك قايم على رجولك وراجع لنا بذيك الابتسامه الي وراها الف حزن ودفتر قصايدك بالحفظ والصون الله يقومك بالسلامه يابوي بحفظ الرحمن تاخرنا على اخوانك فالقريه ابطلع من هالباب وان شاء الله مانوصل للقريه الا وداقين يبشرونا بقومتك شد همتك وانا ابوك وقم لنا
عبدالرحمن وهو يمسح دموعه : هلا ياعمي بتمشون
ابوفهد : اي يابوك وانت بعد رح لبيت اهلك وارتاح
عبدالرحمن : مقدر ياعمي مقدر اذا ابعدت عن المستشفى تقل تارك ضناي فالشارع وماشي والله مقدر لاتظغطون علي
ابوفهد : فيك الخير ياولد ابومحمد
عبدالرحمن : الله يرفع قدرك ياعمي
ابوفهد : وانت ياعزام بتقعد ولا تمشي معنا
عزام : لا ياعمي بقعد مع دحيم
ابوفهد : اجل تعال ابيك بكلمتين
عزام : سم ياعم لا والله ماتدخل جيبي تكفى ياعم
ابوفهد : انا طالبك ماتردها
عزام : ماتقصر عسى عمرك طويل
ابوفهد : معليه ياولدي ماهي شى كثير انتبه لولد عمك وانتبه لنفسك وحاول تواسي هالمسكين واضح عليه نفسيته تعبانه
عزام : موضوعه عندي لاتشيل هم
ابوفهد : الله يحفظكم يله سلام مشينا
~~~ في سيب الانتظار عند غرفه هايل ~~~
عبدالرحمن : تهقى يقوم
عزام : انت اكثر واحد مايحتاج تسالنا هالسوال من كثر الامل الي فيك
عبدالرحمن : تخيل مايقوم
عزام : لا بسم الله عليه بيقوم
عبدالرحمن : للحين فيه باقي اشياء بداخلي ابقولها له
عزام : شدعوه يادويحم عندك انا
عبدالرحمن : ماتقصر يابوالعزم

انتهى البارت

اعذروني عالتاخير بس حبيت اطول بالبارت عشان كذا طولت قراءه ممتعه يااصدقاء 💞💞