"جابك الله في زحام العمر صدفة "

40

~~~ في بيت ابوفهد ~~~
زينب : جاني تشنج راسك كبير
فهد : قمت خلاص لاتصيحين
زينب : بعد وش تراك نايم حول ٢٠ ساعه
فهد : تستهبلين اصبحنا
زينب : بنصبح
فهد : كم الساعه
زينب : الساعه ٢ فالليل
فهد : الله محد دق الباب
زينب : دقوه بس ماحصلو رد
فهد : ماسالتي وش يبون
زينب : شلون اقوم واسال وانت نايم على رجولي دائمًا تصدمني بذكائك
فهد : فاتتني صلاه المغرب والعشاء بروح اصلي فالمسجد الي فاتني وسوي لنا عيشه
زينب : طبعا عصافير بطني ماتت من الجوع
فهد : غريبه ماتحركتي
زينب : ضميري غلبني ولا انت ماتستاهل
فهد : بالله ياعالم ذي زوجه ذي خويي فالعسكريه
زينب : بسوي نواشف تبي ولا لا
فهد : كلها نعمه
زينب : حسبالي بعد يلا
ندى : الله يخرشتس وشفيتس فكيتي الباب فك
زينب : الحقيني
ندى : وشفيتس
زينب : رجليني مقدر امشي
ندى : شلون ففتحتي الباب
زينب : سويت مشيه العارضات رجل يمين ورجل يسار اهخخ يوجعوني
ندى : من مكسرهم لتس
زينب : راس اخوتس نايم من المغرب ماتحركت ابي الحمام
ندى : وقفي عند حدتس انا طالعه ابي الحمام
زينب : ندى تكفين محبوسه لي ٢٠ ساعه
ندى : من سبق لبق
زينب : ندى تكفيييين الله يسلط عليتس
عفراء : لا انتي ولا انتي بدخل ولدي يشخ
زينب : يلا خذي بسبتتس دخلت ولدها مفروض بكل غرفه حمام
ندى : تحسبينه قصر
زينب : عفراء تكفيين بسسرعه
عفراء : كم تدفعين
زينب : كليتي بس افتحي
عفراء : اصبري طيب بتوضى لصلاه الوتر
زينب : صبرك ياروح
~~~ في بيت ابوسطام ~~~
ام سطام : رد ؟
ابوسطام : لا
ام سطام : من سواد وجهه مارح يرد
ابوسطام : الوقت متاخر مايصلح ادق
ام سطام : مااحترمتو اوقاتك لاتحترم اوقاتهم
ابومحمد : هلا ابوسطام
ابوسطام : رد اسكتي الو ابومحمد
ابومحمد : ياهلا والله عسى ماشر بهالوقت
ابوسطام : الشر نسابتكم يابومحمد ماقدرت اصبر لبكرا البنت استخارت ورفضت ماعندنا لكم نصيب وان كانت نيتكم تاخذونها عشان حفيدكم فبنتي كانت مغصوبه تاخذ ولدك انا غصبتها والحين ندمت
ابومحمد : صاحي انت يابوسطام وش هالكلام وداق فالليل تقول هالكلام
ابوسطام : العلم ووصلك الله يستر عليكم
ابومحمد : اختر اوقات مناسبه تدق فيها
ابوسطام : لااخترت اسلوب زين انت واهلك اخترنا اوقات مناسبه ولدك مايستاهل شعره من بنتي ويلا مع السلامه
ام سطام : اوه بردتتت قلبي امسك الشاهي
ابوسطام : فوقت وقاحه اهله وصاخه اسلوبه هو بعد
~~~ في بيت ابومحمد ~~~
ابومحمد : مهبول ذا داق يهابد بالكلام يحسبه لعب بزران
ام محمد : وش صاير من داق
ابومحمد : وش قايله انتي لاهل ابوسطام
ام محمد : ماقلت شى
ابومحمد : الا قايله محد يطير نصيب عيالي غيرتسس اهجدي يامراه ولا بيت اهلتس يتكفل فيتس
ام محمد : امها جلست تنطل كلام وتقول بنتي ماتعرف تطبخ واطبخي عندها ترضاها انا جده وينقال لي كذا
ابومحمد : وانتي رحتي قلتي اننا نبي بنتهم عشان حفيدنا وزودتي كلام ماينقال فشلتيني عندهم وطيرتي علينا بنت باحلام ولدتس مايلقاها
ام محمد : من زينها هي واهلها الف بنت تتمنى ولدي
ابو محمد : محد يحب ولدتس كثرتس ترا وبكرا انا ماشي للقريه وبدونتس وباخذ اخوي وبنعتذر منهم انا كلامي ماارجع عنه عشان سوالف حريم ماتخلص مايكفي المرحومه طلعتي عيونها والحين ذي وشلون لو تزوج عبدالرحمن اعتقي عيالتس ياحرمه
ام محمد : الحين انا زوجتك وتهاوشني وهم تدافع عنهم ماسمعت الكلام الي سمعوني اياه اسال زوجه اخوك وبنتك شاهدين
ابومحمد : مادافعت عنهم الا اني اعرفتس زين وخبز يدي ياام محمد
ام محمد : والله ماتصير زوجه ولدي حلفت يابومحمد
ابومحمد : صومي ثلاث ايام ماتضر
~~~ في بيت ابوفهد ~~~
زينب : اعتقد يكفي اي يكفي
هايل : وش تسوين
زينب : يمه
هايل : معليش معليش اعذريني احسبتس ندى والله
زينب : عادي ياابوي وش بغيت
هايل : جيعان واحسبتس ندى قلت بخليها تسوي لي شى اكله
زينب : ابشر بحط لك معنا تبي تاكل مع اخوك فهد؟
هايل : اي عادي
زينب : ابشر اذا خلصت بجيبه لكم المجلس
هايل : جعلتس يديتس ماتعرض عالنار
زينب : امين وياك ياابوي
عفراء : كاني سمعت صوت هايل
زينب : اي يحسبني ندى وبحط له اكل هو وفهد
عفراء : حطي لي معهم
زينب : ها
عفراء : اقصد حطي لي اكل
زينب : زين تعالي غرفتي ناكل مع بعض
شهد : ريقي ناشف وبطني يوجعني يابنات
زينب : باي شهر انتي
شهد : مدري مارحت اشوف
زينب : تمزحين صح
شهد : لا شسوي قفلو المركز قبل اروح لهم
زينب : ويعني هي صعبه الدكتوره بتصير زوجه اخوتس دحيم وتمونين عليها دقي عليها تجيتس
شهد : شلوه تجيني ومامعها السونار
زينب : شغلتتس صعبه صراحه
شهد : بخلي عبدالرحمن يوديني سياف مشغول بدكان ابوه بعد ماانسرق
عفراء : زوجتتس يرتاحون ورجعتي لهم
شهد : الاخوان سند حبيبتي وش فايدتهم اجل
عفراء : اي الله يخليهم لتس
شهد : حبيبتي انتي وش تاكلون باكل معهم
زينب : تعالي حياتس خذو الصينيه وودوها غرفتي وانا ذي بوديها لفهد واخوه
شهد : انتبهي لايشوفتس سياف
زينب : ها هكرتتس عفراء
عفراء : شدخلني انا
شهد : ههههههههههههههههههههههههههههههه كل شى براستس
عفراء : مسوين طالعين منها وذي زوجها لو كلم حبيبته طلعت روحها
شهد : عاد فرق
~~~ يوم جديد وصباح جديد ~~~
~~~ في بيت ابومحمد ~~~
ام محمد : للحين صامل تروح
ابومحمد : اي وانتي اقعدي ابروح لحالي
ام محمد : طيب طيب انا حلفت ومارح اصوم ثلاث ايام والي قلته بيصير
محمد : يبه لاتتعب نفسك
ابومحمد : وخر عن دربي انت وش جابك هنا
محمد : دقت امي امس علي وعلمتني وش بتسوي
ابومحمد : علطول رحتي قلت له كل شى
محمد : انا مابيها يبه وبعد كلام اخوها وابوها ارفض زياده
ابومحمد : وش قايلين
محمد : البنت ماتبيني يايبه ابوها غاصبها امس قال لي بوجهي وقدام دحيم بعد
ابومحمد : وشنهو
ام محمد : يتسذب بنته ميته تبيك
محمد : مستحيل يتسذب اكيد البنت كانت متردده وهو اقنعها
ابومحمد : حتى ولو بروح والملكه بتتم وبتتزوجون
محمد : الله يهديك يايبه اجل امش نروح مع بعض يمه مارح تروحين
ام محمد : مالي مجلاس ببيتهم ومقابل وجيههم الي تسد النفس بقعد عند سالم
محمد : الي تشوفينه يالغاليه
~~~ في القريه ~~~
ابوسطام : لاتحاول تقنعني يابوفهد خاطري صدو
ابوفهد : فكر بعقلك لاتخلي كلام حريم ياثر عليك تعرف سوالفهم ماتخلص
ابوسطام : معليش يابوفهد انا مستحيل اكذب ام سطام اصدق وحده بالدنيا هي ومافيه ام تبعد نصيب بنتها الا ان قلبها ماهو مرتاح
ابوفهد : بيجي اخوي وبيعتذر لك هو ومحمد وش تبي اكثر
ابوسطام : مابي اظلم بنتي مع ولد اخوك انتهى
ابوفهد : لا ان شاء الله بتقتنع اهدا انت بس واترك كل شى علي
ابوعزام : وشفيكم اصواتكم تتعالى
ابوفهد : تعال اقنعه يقول مايبي يزوج بنته محمد
ابوعزام : وليش احسن الرجال محمد
ابوسطام : ابوفهد اعرف باللي صار
ابوعزام : والله لو عندي بنت لازوجهه استهدي بالله بس ولاتخلي العصبيه تاثر عليك
~~~ في محل عبدالرحمن ~~~
عبدالرحمن : جت القهوه اجحدو رحت سويتها وجيت
سطام : من قال انت مسويها
هايل : طعمها خايس لاعاد تسوي
عبدالرحمن : صدق انكم سبك وماتستاهلون
سطام : يامرحبا ومسهلًا وينك يارجال اختفيت
هايل : اخس كل هالترحيب
سعود : والله تعرف طلعت ادرس بالخارج وتوني رجعت وقالو لي انكم رحتو للقريه لاتكون القريه الي وريتنا اياه
سطام : ابد عليك نور متى رجعت انت
سعود : ابد امس رجعت ونمت وقمت دقيت عليك
سطام : اي يامرحبا ومسهلا والله والحمدلله على سلامتك
سعود : الله يسلمك ياحبيبي متى بترجع للشرقيه
سطام : الواضح اننا مطولين
سعود : اشتقنا لك بالشاليه يارجال تعال زرنا فتره وارجع
سطام : ابشوف لي يوم واجيكم مع العيال
سعود : منهم
سطام : خوياي بالقريه
سعود : مسرع تعرفت عليهم
سطام : ابوي يعرف ابوانهم فالموضوع سهل
سعود : يلا استعجل وتعال هاليومين عندنا
سطام : ابد تم اليوم وانا مطبح عليكم فالشاليه
سعود : الله يحيك ياابوي علمني لاجيت
سطام : ابشر وصل سلامي لعمي
سعود : يوصل ووصل سلامي لعمي ابوك يعني
سطام : فاهم فاهم
سعود : يلا مااطول عليك سلام
سطام : الله يحييك
هايل : مابغيتو تخلصون مكالمتكم
عبدالرحمن : قهوتك بردت
سطام : ياعيال شرايكم اليوم نروح للشرقيه
هايل : وش ودانا
سطام : كنت اكلم خويي سعود خويي من الطفوله وتوه رجع للسعوديه وعزمنا نجي للشرقيه
عبدالرحمن : انا ماعندي مشكله قدام
هايل : انا عندي مشاكل
سطام : لاتشيل هم شى مكفول يرجال بس امش
هايل : اي على كذا قدام ماافوت الفرصه
~~~ في بيت ابوسطام ~~~
ابومحمد : ياسواد وجهي منك يابوسطام العذر والسموحه وحقك على هالرقبه
ابوسطام : ماكنت ابي استقبلك ببيتي بي لاجل خاطر اخوك وش بغيت
ابومحمد : حقك حقك تزعل الي سمعته كله غلط بغلط وسوالف حريم وانت اعرف ماكانت نيتنا كذا والله واحنا لنا الشرف نناسبكم وابد مستعد اقعد هنا فالقريه عشان مانطول عليكم الين نملك لهم ويصيرون زوجين وعاد وقت العرس متى ماانتم تبون
ابوسطام : اعذرني يابومحمد
ابوفهد : فكر يابوسطام فكر
ابوسطام : انا عارف ان ولدك ماله دخل بكل شى وعارف انه اجبار منكم تبونه يتزوج وانا اجبرت بنتي فاظن كلنا غلطانين بهالشي
ابوفهد : لا والله مانتم غلطانين قل شى يابوعزام
ابوعزام : خلصنا رسميات بتصيرون اهل وخلاص افصح وسامح واقبل اعتذاره وتصافو
ابوسطام : طيب طيب حصل خير واتمنى هالشي مايتكرر
ابومحمد : بيض الله وجهك قم ياولد حب يد عمك واستسمح منه
محمد : اعذريني ياعم يوم جاني سطام معصب ماقدرت امسك اعصابي
ابوسطام : حصل خير يولدي الله يسامحكم
ابومحمد : اجل موافق الملكه بكرا
ابوسطام : كانك مستعجل خلها السبت افضل
ابومحمد : وليه عالاقل ماهو الجمعه
ابوفهد : خلاص السبت انسب يمكن مشغولين
ابومحمد : تم خلاص الي تقوله يصير
ابوفهد : نستاذنك يابوسطام امش لبيتي عندي لك كلام
ابومحمد : استودعتك الله
ابوسطام : فمان الله
ام سطام : وش صار
ابوسطام : اعتذروا وقبلت اعتذارهم
ام سطام : وامه وينها ماجت تعتذر
ابوسطام : تكفين ياام سطام لاتفتحين مواضيع اوجعني راسي
ام سطام : قلبي حاس هالعرس مارح يتم
سطام : السلام عليكم وش جابهم ذولي عندنا
ام سطام : اسكت لا يعصب ابوك بيصيرون انسابنا
سطام : تستهبل يبه صح
ابوسطام : وش رجعك انت
سطام : كنت بقول لكم اني بروح مع العيال للشرقيه رجع خويي سعود وعزمنا
ابوسطام : اي اي افضل رح
سطام : وان شاء الله ارجع والقى كل شى مكنسل
ام سطام : الله يجعلك ياسعود من نصيب بنتي احسن من ذا
~~~ في بيت ابوفهد ~~~
ابوفهد : هذا فعل تسوونه ماربانا المرحوم على الحركات الرديئه
ابومحمد : والله ماتكلمت يااخوي الحريم تهاوشوا وصارت بوجيهننا
ابوفهد : تعلم تسكت حرمتك من قبل وانا اعلمك عمها
ابومحمد : مهما كان هي ام الولد ولها كلمه
ابوفهد : الله يهديكم بس
ابوعزام : الحين انتهى الموضوع وتسامحتو انتبه يامحمد تفرط فيهم
محمد : لو علي ماصاار كل هالشي
ابوفهد : اقول عض شحمه انت الي خليت ولدك يلجأ لبنت الناس ويتركك وانت ابوه
ابومحمد : قم قم رح عند العيال
ابوفهد : هذي بدايه كلامه الله يستر من الي بيسويه
ابومحمد : عجزت عنه فيه عناد مدري من وين جايبه عكس اخوه عبدالرحمن
ابوفهد : الله يهديهم
هايل : السلام عليكم شفيه مايرد
ابوفهد : وعليكم السلام وش مرجعك
هايل : ابقولك شى يبه
ابوفهد : ها شعندك من بلاوي
هايل : عازمنا خوي سطام فالشرقيه وبنروح الحين اذا سمحت
ابوفهد : من متى رجلك طايله مع الرايح والجاي
هايل : ضايق صدري وانت اعرف بالسبب وبياخذنا سطام نغير جو
ابوفهد : ماله لزوم اقعد فالمحل اخوانك متزوجين ومشغولين
سياف : لا يبه خله يروح انا بقعد فالمحل
ابوفهد : انت اسكت وصب قهوه لعمامك
ابومحمد : وانا اقول ولدي من وين جايب العناد طلع منك رح ياولدي رح ووسع صدرك بيروح معكم دحيم
هايل : اي
ابومحمد : ولا جاء يستاذن ابو اذاني اوريه
عبدالرحمن : افا يالغالي مااخيط شى الا اعلمك به تسمح لي اروح
ابومحمد : اي عادي رح وسع صدرك ولا تاخذ اخوك النكدي بينكد عليك
عبدالرحمن : معنا هايل بينكد علينا هو وشعره الخايس
هايل : من قال بروح
ابوفهد : خلاص رح رح معهم وانتبهو تلفون يمين يسار سمعتوني
عبدالرحمن : معليك ياعم الامور تحت يدي
ابوفهد : وهي عشانها تحت يدك مانيب متطمن
عبدالرحمن : افا عليك يااعم للحين ماتثق فيني
ابومحمد : روحو قبل نغير رايننا يلا
~~~ فالحوش ~~~
سطام : بشرو
عبدالرحمن : رح لحالك ماوافقوا
سطام : ياعيال لاتستهبلون
هايل : ههههههههههههههههههههههههههههههه يطقطق عليك الهطف وافقوا وافقوا يلا مشينا
سطام : يلا يلا استعجلوا
عبدالرحمن : انزل من قدام احسن لك انزل
هايل : والله تبطي عظم مانزلت يلا وراء
عبدالرحمن : والله مااتحرك الا واركب قدام
سطام : يليل الورعان ترا ورانا طريق طويل ماهي الرياض الشرقيه استعجلوا علي
عبدالرحمن : حلفت عاد انا
سطام : خلاص انا بنثبر وراء وواحد منكم يسوق
هايل : انا
عبدالرحمن : تعرف تسوق انت ولا تروح فينا
هايل : اعرف بس ماتمرست
سطام : اجل الله يرضى عليك ارجع وراء وخلنا نوصل بسلام
هايل : مانيب راجع يرجع دحيم
سطام : من الاكبر
عبدالرحمن : انا
هايل : نصاب انا
سطام : ادري انكم كبر بعض يالبزران دحيم باي شهر
عبدالرحمن : امم اسال هايل قبل
سطام : كل واحد يقول لي لحاله عشان ماتتسذبون تكلم دحيم يلا
عبدالرحمن : بشهر ٨ انا
سطام : حلو اركب السياره انزل ياهايل
هايل : وش قلت باي شهر
عبدالرحمن : شدخلك
سطام : وانت باي شهر
هايل : بشهر ٢ مولود
سطام : دحيم ارجع وراء هو اكبر منك بشهور واجد
هايل : يسس
عبدالرحمن : والله نصاب
سطام : خلاص قال شهره وانت قلت شهرك
عبدالرحمن : برجع بس صدق باي شهر انت
هايل : ٢ يالبزر
عبدالرحمن : كم شهر بيننا اوله ٥ شهور يالشايب
هايل : انت البزر يله وراء
عبدالرحمن : اوريك فالرجعه برقد فالسياره
سطام : خلاص اسكتوا
هايل : طيب
~~~ في بيت صقر ~~~
ميهاف : يع يالشعور يع
فاتن : انفك ظهري وانا اصفط وش قاشه انتي
ميهاف : تراني عروس
فاتن : وش شعورتس
ميهاف : ليومتس ذا ويمكن لاخر دقيقه اتخيل لو انه هايل
فاتن : الحين مانسيتيه
ميهاف : كتبت له كلام قاسي وماقراه للحين
فاتن : وش قايله له
ميهاف : امسكي اقري
فاتن : الله يستر هاتي ، السلام عليكم انا ميهاف مدري لو للحين رقمي عندك بس فيه كلام بخاطري انا اسفه لان ماصرنا نصيب لبعض الخطا مني وانا الي عشمتك رغم اني اعرف اني محجوزه لولد عمي بس ماقلت لك هالشي خفت شوي انا ببدا حياه جديده مع شخص ممكن يكون مناسب وفعلا هو نصيبي وبحبه اكيد ، حبنا ياهايل كان تقريبا وهم للحين مو مصدقه اني حبيتك بس النصيب فوق كل شى شف طريقك وانا بشوف طريقي زواجي الجمعه والله يستر عليك موفق
فاتن : تستهبلين وش حبتس له وهم ليه تعشمين الرجال وانتي كنتي عارفه بولد عمتس عالاقل انا انا صديقتس ماقلتي لي !
ميهاف : قلت له حبنا وهم عشان يقدر ينساني ولا والله من داخلي ودي لو هو الي بنزف عليه الجمعه وماقلت لتس لانتس بالبدايه كنتي رافضه حبنا انا وهايل ولو قلت لتس عن ولد عمي اعرفتس بتروحين تقولين لهايل
فاتن : ميهاف ركزي من يساعدتس بزواجتس ركزي من ستر عليتس بالقريه تتوقعين اسوي انا كذا ؟
ميهاف : خفت شسوي خفت
فاتن : طيب خفتي مني وشكيتي فيني ليش تعشمين الولد
ميهاف : مدري يافاتن مدري
فاتن : العذر اقبح من صاحبه الله يسامحتس بس الرجال من بعدتس كرهه عيشته وماتدرين وش بيصير فيه زياده وبكل بجاحه كاتبه عرسي الجمعه ليكون تنتظرين يحضر عرستس ويسلم على زوجتتس
ميهاف : لا ماتوقع بيسويها
فاتن : الله يستر على عقلتس بس

انتهى البارت

قراءه ممتعة ،
الي سالت وقالت هل نهايه الروايه سعيده او حزينه
- الروايه لسى ماانتهت والاحداث لسى ماخلصت بس بخصوص سوالك بالضبط فهذا سر رح تعرفونه نهايه الروايه وباذن الله نهايه تعجب الجميع اعتذر ماقدر ارد عليكم الواتباد يرفض اذا بغيتو اي شى بخصوص الروايه حسابي الانستا "lo7.eii" تعالو اسالو وبجاوبكم وبقرا كلامكم بكل حب ❤️