"جابك الله في زحام العمر صدفة "

45

~~~ في بيت ابوفهد "المطبخ"~~~~
فهد : ياهلا بهايل اكيد تبيني احط لك شى تاكله
هايل : لا مانيب مشتهي
فهد : متاكد انت هايل ولا جني
هايل : لا لا هايل بحذاريفه
فهد : وماتبي تاكل
هايل : اي ياخوي بالغصب هي
فهد : لا بس مستغرب ماهي من عوايدك
هايل : ولا هي من عوايدك اشوفك فالمطبخ تصبح على خير
فهد : شعنده ذا
ندى : خله من تزوجت حبيبته وهو متغير انتي شعندك فالمطبخ تحوس ومن بيغسل المواعين
فهد : انا اطبخ بس غسيل تبطين
ندى : اجل لاتطبخ
فهد : خلاص لاتصيحين زينب تغسله
ندى : اي كذا تمام وش قاعده تسوي
فهد : شكشوكة تبين
ندى : شكشوكه فالليل باكلها الصبح لا خلاص مابي بروح اقوم هايل يجيب لي اندومي
~~~ في المجلس ~~~
ندى : هايل هايل هايل
هايل : ها ها شتبين
ندى : قم قم قم
هايل : بتقولين وش تبين ولا اطلعي برا
ندى : من قال انها غرفتك تراه مجلسنا تقوم ونقعد فيه
هايل : مالي خلقتس اطلعي
ندى : لا اسمع جد جيعان
هايل : لا
ندى : انا جيعانه طيب
هايل : شسوي لتس
ندى : ابي اندومي قم جبه لي
هايل : والله الي ماطرا اقوم عشانتس
ندى : بيننا خبز وملح
هايل : كليهم
ندى : قم ياهايل اخلص خل حركاتك ذي بعدين الحين جيعانه انا تبيني اروح البقاله لحالي
هايل : اكسر كرعانتس
ندى : خلاص قم جبه لي
هايل : خلاص قايم بس فكيني من صوتتس
ندى : جب كيس
هايل : الفلوس
ندى : وانت دائما مفلس اصبر اشوف كم معي
هايل : بعد مجمعه فلوس
ندى : ليومي الاسود امسك يلا جب معهم ببس لي ولك
هايل : خلتس عند الباب لايقوم ابوي ويسكره علي
ندى : ازهلني
~~~ في بيت ابومحمد ~~~
عمر : ياعيال شرايكم نبيع الاستراحه حقتنا ونشتري هنا
عبدالرحمن : ماعندنا استراحات هنا
سعود : مايحتاج نبيع ونشتري ابوي جاي بيشتري مزرعه هنا وبيستثمر فيها
صالح : وش فايدتها مزرعه باخر قريتهم نبي هنا بين الاوادم
سعود : تجي هنا لهم وترقد هناك
عمر : عرض حلوو صراحه
عبدالرحمن : ارقدوا ترا عمي مايحب التاخير في عزيمه له
صالح : عزيمة وش
عبدالرحمن : عازمنا عمي ابوفهد بكرا الصبح
عمر : عزيمه الصبح
عبدالرحمن : عارف اننا شباب ومافيه احد يطبخ لنا ف بيعزم اكيد من الصبح
صالح : كثر الله خيره يلا ارقدو واسكتوا لا يقوم تميم
~~~ في بيت ابوفهد ~~~
ندى : طبقنا خلص
هايل : الله وهالطبق كله اندومي
ندى : اكله وانعم
هايل : الحمدلله ماقلت شى
ندى : من زمان عن قعدتنا ذي
هايل : مسويه صايده جوي اخلصي وش تبين قولي
ندى : مابي شى بس بسالك
هايل : اسالي
ندى : وش فيك
هايل : الحين ذا السؤال
ندى : اي تعرفني احس فيك على بعد دول
هايل : مافيني شى
ندى : قل هالشي لغيري اخلص ياخي قل وش هالتمطيط
هايل : اشتاق لها ياندى والشوق قد سهر العين
من كثر نار الشوق قد ضاق حالي
مقسوم قلبي في ضلوعي لنصفين
نصف الغرام ونصف شوق الليالي
يااهل الهوى يامصعب الشوق
وياشين الشوق بعد الفراق
ندى : وانت للحين باقي على رجوى وصالها تزوجت خلاص
هايل : لاتقهريني فوق قهري
ندى : مااقهرك انا اذكرك
هايل : مابي اتذكر عندي امل انها بترجع لي
ندى : بس هي خلاص صارت متزوجه
هايل : لو تطلق منها والله لاخذها
ندى : اسمعني لازم تنساها
هايل : لو اقدر ؟
ندى : عالاقل لاتتغير محد مونسني غيرك
هايل : ماتغيرت ولا شى
ابوفهد : احمم
ندى : يمه ابوي
ابوفهد : وقفي وقفي شايفتس
ندى : تبي اندومي
ابوفهد : شايفين الساعه كم
هايل :  كم
ندى : ٣
ابوفهد : قم انت واياه ارقدو محذركم عند هالقعده للفجور قم
هايل : غصيت فالاندومي كله بسبتتس
ندى : شدريني انه بيقوم
ابوفهد : للحين يسولفون قم انت واياها
ندى : طيبب يبه انت هد بس بنقوم بغسلهم وبرقد
~~~ صباح يوم جديد ~~~
سياف : هايل اخلص قم ورانا عزيمه ابوي
هايل : من يحط عزيمه الصبح
زامل : ابري عازم خوياك الي جايبهم من الشرقيه
هايل : زين قايم
سياف : وشل فراشك معك حطه بغرفه ندى
هايل : طيب
سياف : حسبي الله على من كان سبب بانطفائك ياخوي
زامل : ليه وشفيه
سياف : مسرع نسيت الي صار له
زامل : اها موضوع زواجه الله يعوضه بالافضل منها
سياف : متغير مرهه ليت بيدي شى اسويه والله لاسويه
زامل : الا مايرجع مثل ماكان اعرفه هايل مايترك طبعه
سياف : بس هالمره غير غير يازامل
زامل : الله يعين ياخوك
~~~ فالمطبخ ~~~
ام فهد : ركزي بغيتي تطيحين العيشه فالارض
ندى : مركزه يمه مركزه
ام فهد : هذا كله من السهر عين مفتحه وعين مغمضه موعين من ذي
ندى : ست الحسن زينب وولدتس
ام فهد : ليش ماغسلتيه سريع سريع وحطيتيه
ندى : لا والله خدامه عندهم انا
زينب : حاشاتس ياعمه عيالي تصيرين خدامه انا بغسله من عيوني
ام فهد : ماشاء الله وش هالروقان ياجعله دوم
ندى : تحت كلمه ياعمه عيالي الففف معنى
زينب : لا معنى واحد وواقعي انتي عمه عيالي
ندى : الي مابعد جو
زينب : بيجون ليش الاستعجال
ندى : اي استعجلي عشان انتي وشهد مره وحده ونخلصكم
زينب : وش شايله همه
ندى : العزايم والنفاس
زينب : بنفس عند امي
ام فهد : افا يازينب
زينب : عاد اعذريني بذي ياخاله كل بنت تنفس عند امها
ام فهد : شهد ماقالت كذا
زينب : لاتزعلين مني ياخاله للحين ماحملت حتى فالافضل نسكر الموضوع
عفراء : من بيجي اليوم بعد صباح الخير
ندى : وش عقبه
ام فهد : الضيوف الي من الشرقية
عفراء : هم اصدقاء جارنا ابوسطام ليش مايعزمهم هو ؟
ام فهد : عيب وش هالكلام انتي تعرفين خالتتس مجلسه مفتوح دايم
عفراء : اي محد غيرنا يتعب بهالعزايم
ندى : اقول ترا ماصارتس فالقصر الا البارح العصر توتتس صرتي تدخلين المطبخ وتساعدينا اذكرتس بفعايلتس قبل
ام فهد : خلاص ياندى
ندى : اي ماترفع صوتها عليتتس وكان البيت بيتها والثلاجه من فلوس ابوها
عفراء : لا البيت بيتي ولا الثلاجه من فلوس ابوي الله يرحمه بس احنا بشر ونتعب ماله داعي كل يوم عزيمه
ندى : الا له داعي ابوفهد وام فهد اذا قالو كلمه تصير بدون نقاش
شهد : خلاص هدو كل شوي هوشه انتم
ام فهد : وش جابتتس للمطبخ يابنتي
شهد : احسب فيه سالفه من صراخهم
ندى : لا تطمني لا صراخنا بيضرتس ولا بيضر الي ببطنتس روحي انبطحي علل على قلوبنا ماهو زوجات اخوان
شهد : وشفيها ذي طايره فينا
زينب : خليها خليها مانامت والنفسيه مو كويسه
ام فهد : روحي لغرفتتس ندى بلا منتتس
ندى : صار الحين الي اسويه منه عليكم يايمه من عمري ١٢ سنه وانا داخله المطبخ معتتس وصار عمري ٢١ وللحين ساكته اطبخ وانفخ وانظف اقوم بابتسامه وانام بابتسامه محد قال يحول ندى تعبت وتبون تزوجوني ولد عمي عشان اكرف عندهم زياده
عفراء : قبل شوي اقول ليه العزايم كلتني والحين تتشكى من الكرف ماهي طبيعيه
زينب : هدي ياحبيبتي تعالي معي للغرفه تعالي
~~~ في بيت ابوسطام ~~~
ام سطام : اليوم السبت ماشوف جو وحطو الملكه
ابوسطام : الي فيني مكفيني يامره لاتزودينها
سطام : كله بسبب هديل وقراراتكم المتسرعه ولا خوي سعود خاطبها وبيعشها بعز وللحين عند كلمته بس انتو وين والاقناع وين
هديل : عادي ادخل ؟
ابوسطام : ادخلي ياابوي وشفيتس
هديل : خلاص يبه انا ارفض مابي اخذ محمد
سطام : وبتاخذين سعود
هديل : خلاص تم دامك تشوفه مناسب لي انا موافقه على سعود
ابوسطام : موضوع رفضتس لمحمد انا معتس وهذا قرارتس وكيفتس بس قرار موافقتس بهالسرعه على سعود على يابنتي لاتوافقين على سعود عشانتس منقهره من محمد واهله
هديل : لا منقهره ولا شى الي شفته انه مايبيني ويبي حرمته المتوفية الله يرحمها واهله مايبوني ليش اخرب حياتي بيدي وبالنهايه يايبه انتم راجعين للشرقيه وسعود ساكن فالشرقيه فاقرب لي واحسن لي
سطام : هذا الكلام الصح الله يوفقتس
ابوسطام : خلاص براحتتس عط الموافقه لخوييك
سطام : مو الحين
ابوسطام : ليه
سطام : متهاوش معه
ابوسطام : رح استسمح منه وامش احضر معي عزيمه ابوفهد
سطام : ابشر يبه الي تبيه يصير
ابوسطام : الله يرضى عليكم
ام سطام : حطي الفطور ياهديل
ابوسطام : احنا بنفطر عند ابوفهد
ام سطام : جعله بالعافية
ابوسطام : مستانسه على رفض هديل
ام سطام : اي مبسوطه وتقل مكبوب بصدري ثلج خل يذلف هو واهله مايستاهلون شعره من بنتي
ابوسطام : ههههههههههههههههههههههههههههههه الله يخليتس لهم
ام سطام : ويخليك لنا يارب
~~~ في بيت ابوصقر ~~~
صقر : ها ياولدي وشلون بنتي معك
عبدالعزيز : عزالله انك ربيت ياعم كامله والكامل الله
صقر : هي هذي تربيتي ووحيدتي
ميهاف : امحق
صقر : قومي صبي لي ولزوجتتس قهوه
عبدالعزيز : لا اقعدي انا بصب
ميهاف : لاتصب لي بروح اساعد خالتي
صقر : اي اي روحي الا ياولدي
عبدالعزيز : هلا ياعمي
صقر : علمني دامها راحت مجننتك ولا مسويه لك شى
عبدالعزيز : لا والله ياعم ماسوت لي شى ولو سوت ف هالشي بيني وبينها
صقر : اي كيفك قلت تعلمني أدبها
عبدالعزيز : لا مايحتاج ياعم مشكور
ميهاف : وش هالطيبه الزايده الي طالع فيها خلني ادق افضفض لفاتن
~~~ فالمستشفى ~~~
فاتن : تطمني ياخاله ولدك حاليا تحت الاجهزه
ام سامي : وش اجهزته
فاتن : اهدي ياخاله بس مغذي ومضاد وبخار وخافض حراره
ام سامي : اقدر ادخل عنده
فاتن : اكييد بطلع اصرف لك علاجات وتصيرين تعطينه اياه
ام سامي : يعني بتطلعونه من المستشفى وين نروح مااعرف احد فالرياض
فاتن : خالتي حبيبتي انا اذا وعدت مااخلف الوعد انتي بين الرمش والجفن الين يتشافى ولدك وترجعين للقرية لاتشيلين هم لشي وبالعكس بتونس معاك تعرفين انا وحيده هنا ابوي دائما طلعات مع اخوياه
ام سامي : الله يسعدتس يابنتي ويوفقتس ويرسل لتس النصيب الصح
فاتن : حبيبتي انتي انتظريني برجع جوالي يدق الو
ميهاف : الو وينتتس عن الجوال
فاتن : مشغوله بمريضه وش فيتس
ميهاف : جينا بيت ابوي وتخيلي اسلوبه مع ابوي حلوو ومره طيب اي شى اقول له يرد علي بحنيته تتوقعين وش عنده
فاتن : زوجتتس ويحبتس ليش مستغربه
ميهاف : بعد الي صار بليله العرس مااضن يحبني للحين
فاتن : الي يحب مايعوف بسرعه وانت اعرف
ميهاف : حتى تخيلي ابوي قال لي قومي صبي قهوه قال لا اقعدي انا بصب وطلعت واسمع ابوي يقول له قل لي دامها راحت مسويه لك شى وقال لا ويجلس يحلف ويقول لو مسويه شى بيكون بيني وبينها محد له دخل
فاتن : اغتنمي فرصه حبه وتعلقه فيتس ولاتروحينه من بين يدتس
ميهاف : اوهه وين وين
فاتن : بتقدرين صدقيني
ميهاف : وينتس انتي الحين تعالي عندي
فاتن : مشغوله مره بجيتس بعدين
ميهاف : طيب
فاتن : يلا مع السلامه خلي بيننا تواصل
ميهاف : ابشري يلا موفقه

انتهى البارت

قراءة ممتعة اعذروني هالفترة مضغوطه من الجامعه احبكم واحب اسئلتكم وكلامكم اقراه بس مقدر ارد هنا وكلامكم بالانستا يوههه يجنن ويحفزز شكراا على دعمكم الحلو روايتنا مستمره باذن الله حتى لو تاخرت بالبارتات ، اذا عندكم تصاميم او اي حاجه تخص روايتنا ارسلوها لي انستا i love so much ❤️❤️.