~~~ في بيت ابومحمد فالقريه ~~~
عبدالرحمن : ياعيال صدقوني سعيد وراء كل الي صار مستحيل خلف يعرف بكل شى وهو بحاره غير حارتنا عدونا بيننا
فهد : وانت تصدق كلام ابوخلف
عبدالرحمن : وليش مااصدقه
سطام : طيب مانتم خسرانين شى والحذر واجب وخلونا هالفتره نركز على سعيد
هايل : ياكبر خيبتنا لو طلع هو
زامل : ماحنا خسرانين شى بس الولد حاله حال نفسه ياله شايل امه وخواته والبيت كله على راسه تبيه ينشغل فينا
عبدالرحمن : حتى ولو انا براقبه انتم بكيفكم
سياف : خلاص كلنا بنراقبه
~~~ في بيت ابوفهد ~~~
ابوسطام : اهدا يابوفهد تخلي بيتك وقريتك وحارتك عشان سروق
ابوفهد : يابوسطام عدويي عندي
ابوسطام : شاك بمن انت
ابوفهد : صقر
ابوسطام : العداوه الي بينكم انتهت من مبطي يابوفهد وماتوقع له يد فالموضوع مشغول بعرس بنته
ابوفهد : اجل من من
ابوسطام : العيال بخليهم يتناوبون الين نشوف اخرتها
ابوفهد : باقي بيتي يدخله
ابوسطام : مستحيل عارف ان فيه عيالك
ابوفهد : احترت والله احترت
ابوسطام : لاتشيل هم يابوي ميسره باذن الله
ابوفهد : الا بسالك وش صار بخطبه ولد اخوي لبنتك
ابوسطام : والله انقطعوا يابوفهد وهي القطعه وماهو واقف النصيب على ولدهم
ابوفهد : اكيد انشغلوا بشي
ابوسطام : والله علمي علمك يابوفهد
ابوفهد : تتيسر يابوسطام تتيسر
ابوسطام : ان شاء الله
~~~ في بيت ابوفهد قسم الحريم ~~~
ام فهد : قولولولولوش مبروك يابنتي مبروك
شهد : الله يبارك فيتس ياخاله
ام فهد : ولد ولا بنت
شهد : للحين ماكشفت
ام فهد : اللي يجي من الله حياه الله ولد ولا بنت حبهم واحد
عفراء : أخيرًا وحده من زوجات عيالتس ياخالتي بتجيب ولد مغير انا
زينب : كانه ترمي الكلام علي
ندى : معليتس منها
شهد : لان زامل اول واحد تزوج ياذكيه احنا تونا متزوجين لو قصدك انا وزينب
عفراء : اي ادري
ندى : رجعت حليمه لعادتها القديمه ماتتغير عزالله
ام فهد : ندى دقي على اختس اساليها شلونها انقطعت عنا
ندى : لا يايمه تكلمني
ام فهد : وش صار بحملها
ندى : بالشهر الثالث او الرابع ومعييه تروح تشوف وش جنس الجنين
ام فهد : هاو وليه ماتبي
ندى : راسها يابس ماتعرفينها
ام فهد : دقي دقي عليها وعطيني الجوال اكلمها
ندى : ابشري بجيب جوالي
شهد : ياخاله المركز الصحي وقفل شلون بروح اكشف
ام فهد : علمتي سياف انتي
شهد : لا ماقعد عندي عشان اعلمه
ام فهد : وشكلتس ماتدرين
شهد : لا عن وش وش صاير
زينب : تذكرين لما جينا للرياض عشان عرستس
شهد : اي ؟
زينب : بوقتها طلعنا نفطر وخالي ابوفهد قال لابوسطام يدور وظيفه لسياف مع عزام والبقيه بالبنك حقهم
شهد : اي كملي
زينب : وابوسطام قال ابد كرسيه جاهز باي وقت يبي يجي للرياض شقته ووظيفته جاهزين
شهد : ووش افهم من الموضوع
ام فهد : الحمل اثر على عقلها يعني بكل الحالات بتروحون تسكنون فالرياض
شهد : بس انا مابي
ام فهد : وليش
عفراء : رافسه النعمه بيدها
شهد : ابي معكم هنا
ام فهد : ومن قال احد بيقعد هنا
شهد : ليش بتنقلون كلكم للرياض
ام فهد : فهد من مبطي عنده شقه هناك وهو يجي هنا زيارات فبيرجعون هو وزينب وزامل بيشتغل مع سياف هذا المفروض وبياخذ عفراء وبيروحون للرياض وندى بنزوجها وهايل بيقعد عندنا وعاد لو لقينا بنت الحلال فهو مايبي يطلع من القريه يعني بيجلس عندنا
عفراء : وليش زامل معيي
ام فهد : والله مدري يابنتي اساليه انتي
زينب : خايفه تقعد تكرف هنا لحالها
ندى : الو فرح
فرح : هلا ندى فيتس شى
ندى : لا بس امي تبي تكلمتس
ام فهد : وش اضغط
ندى : بس حطيه على اذنتس وتكلمي
ام فهد : الو فرح تسمعيني
فرح : اي هلا يبه
ام فهد : وينتس مختفيه
فرح : والله ماني مختفيه يالغاليه بس منشغله بمواعيد المستشفى واساعد عمتي
ام فهد : انتبهي انتي حامل ياامي وبعدين ليش انقطعتو عنا هي تسمعني الحين
ندى : اي اي تسمعتس ههههههههههههههههههههههه
فرح : ماجت فرصه نجي للقريه تعرفين شغل خالد
ام فهد : اباخذ رقمه من اخته وبدق عليه يجيبتس
فرح : لا لا مايحتاج يمه انا بقول له نجيكم زياره كم يوم
ام فهد : اي يالقطوعه يلا خلصت وشلون اقفل بوجهها
ندى : اظغطي السماعه الحمراء
ام فهد : اي ظغطتها احسن خل تزعل تقطع امها عشان شغل زوجها
ندى : يوه يوه يافديتتس ياحلوه اللبن اجلديهم ماعليتس منهم
ام فهد : اي يلا قومي جيبي القهوه والشاهي
ندى : توني اعزز لتس الله يسامحتس
زينب : روحي روحي يلا
ام فهد : قومي معها انتي بعد
زينب : ابشري ياخاله ههههههههههههههههههههههههههههههه
ندى : تستاهلين
زينب : وش بتسوين بدوني احلفتس بالله
ندى : يازين من زار وخفف ياحبيبتي
زينب : قدها
ندى : تصدقين يازينب جد مدري وش اسوي بدونكم ليش ماتقعدين عندنا وتخلين فهد يروح لشغله هناك
زينب : ودي ودي ياندى بس تعرفين اهلتس واهلي بياكلوني تخلين زوجتتس عزابي تعرفينهم مايحتاج اكمل
ندى : مشكلتي اعرفهم بس لو قلتي لفهد يمكن هو يقنعهم بطريقته
زينب : مدري بشوف لاتستعجلين ترا تونا مارح نروح الحين
ندى : باخذ رايتتس بشي بس بيننا تكفين
زينب : افا عليتس بير انا وش قولي
ندى : انا احب
زينب : يمه تستهبلين من
ندى : تبين الصراحه
زينب : اي تكلمي اخلصي
ندى : انا احب عبدالرحمن
زينب : من عبدالرحمن اهاا قصدتس اخو شهد ماغيره
ندى : اي والله يحترق قلبي اذا شفت شهد تتكلم مع هذيك الدكتورة عن اخوها
زينب : تذكرت يوم نجتمع عند هديل تكلمو عنهم بعد وانتي جلستي تعززين
ندى : اهخخ من وراء قلبي انا بالبدايه سمعته يوم كانت ملكه شهد على سياف سمعته وشفته وهو يشوف صورها بجوالها ويصور نفسه وسمعته يوم يقول لاخته شهد انه مايبيني ويبي الدكتوره
زينب : دقيقه دقيقه هو المفروض شهد لسياف وانتي لعبدالرحمن !
ندى : اي هذا الي كانو متفقين عليه ابوي وعمي بس عبدالرحمن رفض وقال لابوه بياخذ وحده عن حب واخخ انكسر قلبي يوم عرفت
زينب : يعمري انتي طيب هو مااوهمتس ولا كذب عليتس ولا حتى ظلمتس معه ماتحسين ان حركته افضل وانتي الحين خاطبتس عزام
ندى : وحبي له !!
زينب : لازم تتعلمين تتنازلين عن اشياء عشان تقدرين تكملين حياتتس هو بيتزوج الي يحبها وبيعيش حياته وانتي لنفترض بترفضين عزام وبعدين وش نهايه حياتتس عايشه بوهم ان عبدالرحمن يرجع لتس
ندى : يعني قولتس اوافق على عزام
زينب : وافقي وافتحي قلبتس له ترا عزام الف بنت تتمناه جامعي وموظف ويوه عندتس امه كل يوم تطبخ لتس
ندى : شورتس وهدايه الله بعطي ابوي موافقتي
زينب : الله يوفقتس ياحبيبتي
~~~ فالليل فالسوق ~~~
عبدالرحمن : ياعيال اذا اجتمعنا كذا رح يكشفنا
محمد : وش تبينا نسوي بعد
عبدالرحمن : عيال عمي ابوفهد روحو لبيتكم وخلوكم بحوش وراقبو وانت ياسطام بما ان بيتكم عند بيت عمي ابوفهد فراقب بعد اكيد بيمر الحرامي من عند بيتكم عشان يروح لبيت عمي ابوفهد
سطام : تم عندي
محمد : وانا وانت وش نسوي
عبدالرحمن : تدرون ياعيال كلنا خلونا نجتمع في بيت عمي ابوفهد
سطام : تم
عبدالرحمن : يلا مشينا
~~~ في بيت ابوفهد ~~~
هايل : انكتمت ياعيال تحت هالبطانية وينه ذا
سياف : اص اسكت
عبدالرحمن : ياعيال كذا ماينفع خلو نصنا يطلع ونكون في بيت عمي ابوسطام ونهجم عليه من قدام ووراء
محمد : كل شوي لك خطه انت
عبدالرحمن : افكر من كل الزوايا لاني
سطام : يلا مشينا ياعيال
عبدالرحمن : انتبهوا
هايل : لاتوصي حريص رح رح
~~~ في بيت ابوسطام ~~~
ابوسطام : وش عندكم مجتمعين عند الباب
عبدالرحمن : الله يهديك ياعمي خرشتنا
سطام : نبي نمسك الحرامي
ابوسطام : وش ذا الحرامي الغبي معلمكم بيجي لبيت ابوفهد
عبدالرحمن : احنا نفترض ياعم بما ان مستقصد عمي ابوفهد فنقطته الاخيره البيت
ابوسطام : يلا اجل خل انتظر معكم قم ياسطام جيب لهم شى يشربونه
سطام : كلكم تبون مويه صح
محمد : اي عادي
عبدالرحمن : سوو شاهي مايستكن عقلي الا فيه
سطام : خلني انا استكن عقلك شرايك
ابوسطام : رح يسطام سوو له شاهي ولي بعد
سطام : هذا الي ناقصني ادخل المطبخ اسوي شاهي كيف يتسوى اصلا خلني ابحث مويه وسكر ولبتون حلو سهل
~~~ في بيت ابوفهد ~~~
فهد : كانه طول ذا
زينب : من تنتظر
فهد : الحرامي
زينب : يمه وشعرفكم انه بيدخل البيت
فهد : دمر كل شى لابوي باقي البيت
زينب : هو نفسه الي جلس ينطل كلام علينا فالبقاله صح
فهد : من تقصدين
زينب : راعي البقاله مدري الي يحاسب فيها وش كان اسمه اذكر قلتوه انه راح مستشفى بسبب الهوشه
فهد : قصدتس سعيد
زينب : ايوه هو جاء واحد وجلسو يتكلمون وسمعت ذا سعيد يقول له هذول من جماعه ابوفهد لاوصيك فيهم والثاني قال لاتوصي حريص وجلس ينطل كلام علينا
فهد : وليش توتتس تتكلمين
زينب : ماسالتني واصلا نسيت
فهد : يعني عبدالرحمن كان صادق ياعيال
سياف : اص اص صوت رجلين
هايل : صادق
سياف : اي اي زامل قم
زامل : قمت قمت وينه
فهد : ياعيال اسمعوني
سياف : اسكتت يافهد الله يرضالي عليك
هايل : طب فالحوش مشينا ياعيال نطلع له
سياف : اصبر نشوف وين متوجهه
زامل : متوجهه للمطبخ الكلب مستقصد الحريم الي فالبيت
فهد : امشوا نطلع
عبدالرحمن : ليش ماتردون عالجوال شفناه وهو طاب عليكم
سياف : خلاص شفناه احنا بعد
هايل : عمي ابوسطام وش جابك
سطام : عرف بكل شى وجاء معنا
~~~ فالمطبخ ~~~
ندى : جوع اخر الليل يقتل وش اكل الحين من ذا هايل بلا حركات مبزره اعرف انك ابوبطين وجوعان امش حتى انا بسوي لي اكل هايل بسم الله يمه "تصارخخ يبه يمه حرامي"
فهد : مسكناك ياكلب
سياف : لاتتحرك
عبدالرحمن : دق عالشرطه يامحمد
محمد : طيب
هايل : بسم الله عليتس ياروح اخوتس
زينب : من يصارخ
فهد : خذيها يازينب عندتس وهديها
زينب : امشي امشي حبيبتي
سطام : طلعوه برا البيت نشوف من
عبدالرحمن : متاكد انه سعيد
~~~ فالشارع ~~~
ابوفهد : وش ذا الصراخ وش صاير
زامل : مسكنا الحرامي يايبه
ابوفهد : ومغطي وجهك من رداه فعلك
سياف : نزل الي على وجهك
ابوفهد : انا بنزله
ابوسطام : طلعت انت !
عبدالرحمن : احساسي كان بمحله
ابوفهد : وش الي خلاك عدوي ومحد كبرك وساعدك غيري انا واخواني تكلم
فهد : ياكبر خيبتي ياسعيد طلعت عدونا وانا احسبك تنوي لنا خير
زامل : تكلم ليش ساكت
سعيد : كل شى بسبب ابوكم
سياف : سد افمك لاسده
سطام : اهدا ياسياف
ابوفهد : وش مسويلك انا
سعيد : كانك نسيت يابوفهد انا بذكرك رفضتني عشاني على قد الحال ومن بعد هذاك اليوم مثل مااهنتني وكسرت خاطر ابوي وامي وابوي مات مقهور بسبب فعلتك وكلامك حلفت تموت مقهور انت بعد على حلالك الي شايف نفسك فيه
زامل : الزم حدودك ياسعيد
ابوفهد : ومتى اهنتك ورفضتك
سعيد : يوم جيت اخطب بنتك ندى وقلت لك اني احبها وابيها وجايب اهلي وابوي كان عايش وقتها
ابوفهد : تذكرت
سعيد : تكلم قدام عيالك ليه رفضت تعطيني بنتك تكلم رفضتني عشان فلوس والحين ولدك انرفض من البنت الي يحبها عشان فلوس بعد كيف طعم الحوبه يابوفهد مزرعتك واحترقت ومحد بيطلب منك ومحلك وانسرق ومحد بيشتري منك وخليت بينك وبين ابوخلف عداوه وصرت بكل مكان مكروه ومحد طايق وجودك
ابوفهد : اسكت ياكلب "وصفقه"
ابوسطام : اهدا يابوفهد اهدا متى بتجي الشرطه
سعيد : اخذت حقي واكثر وبردت قلبي وخاطري منك
ابوسطام : امش ادخل يابوفهد واذا جت الشرطه سلموه
محمد : ابشر ياعم ابشر
هايل : ياكبر خيبتي منك ياسعيد ياكبرها
العام قلت انك طويل الذراعي
واليوم ابسحب كلمتي واتحداك
دافعت عنك ولا نفعني دفاعي
وسويت لك قيمه وكبرت مركاك
وما دام كل اللي فعلناه ضاع
مافيه شى نطلبه غير فرقاك
بعد كشفتك ياردي المساعي
مالك علينا واجب غير ما جاك
اليوم خليتك مطب صناعي
امر وانت معترض .. واتعداك
حنا وطينا فوق راس الافاعي
وشلون ناقف عند مثلك وشرواك
سعيد : ضريت ابوك ماضريتك ياهايل
هايل : اجل تعلم الي يضر ابوي كانه يضرني
محمد : جت الشرطه الله معك بالي حسبناك قد الثقه
عبدالرحمن : الردي ردي مايتغير يااخوي
سياف : ماتوقعتها منه
عبدالرحمن : والله اني كنت حاس
هايل : تراك اشغلتنا انت واحساسك
عبدالرحمن : ههههههههههههههههههههههههههههههه
سطام : والشاهي الي سويته من يشربه
عبدالرحمن : جبه جبه بنشربه بدكه عمي ابوفهد
سطام : يلا رايح اجيبه
~~~ في بيت ابوفهد غرفه زينب ~~~
زينب : بسم الله عليتس اهدي
شهد : يبيلها تشرب عصفر بعد الروعه
ام فهد : بسم الله عليتس يابنتي بسم الله عليتس
عفراء : طار النوم من عيني من الخوف
شهد : بروح اسوي له عصفر
زينب : اقعدي انتي حامل لاتتحركين انا بسويه لها يمه فهد وش جابك
فهد : وين امي
زينب : عندي دقيقه يطلعون حريم اخوانك
شهد : اجل انا بسويه لها انا وعفراء
عفراء : اي اي يلا امشي
ام فهد : وش صار يولدي
فهد : يمه ليش ماعلموتنا ليش
ام فهد : عن وش
فهد : ان سعيد خاطب ندى ويحبها
ندى : حبه برص
ام فهد : السالفه قديمه يولدي ماله داعي نفتح دفاتر الماضي
فهد : دفاتر الماضي الي صكيتوها بدون ماتحلونها انفتحت الحين سعيد السبب بكل شى صار للمزرعه والمحل والحين البيت ونفسه راودته على ندى يمه قالها بوجهينا ابوي رفضه عشان فلوسه وابوه مات مقهور من حركه ابوي والحين هايل انرفض من صقر عشان فلوس ووظيفه وتفاهه والقهر للحين بقلب ابوي بسبب صقر
ام فهد : والله ماتوقعنا تكبر كذا انا وش بيدي اسوي
فهد : الله يهديكم الله يهديكم اخطائكم احنا نعدلها
زينب : وش دخل امه
فهد : ابوي ندى صار لتس شى سوا لتس شى
ندى : فهد خفت خفت مرهه احسبه هايل بالبدايه
فهد : سمعناتس ياابوي ومسكناه وراح مع الشرطه لاتخافين
ندى : الله يكنس روحه
ام فهد : امشي ياندى نشربتس عصفر بغرفتس
ندى : لاتخليني لحالي يمه والله خايفه
ام فهد : مارح اخليتس ياامي امشي امشي
فهد : اخخ مقهور مقهور
زينب : الموضوع صار وخلص ماله داعي تكبر الموضوع
فهد : وش اكبر ووش اخلي يازينب قلبي موجعني اخاف ابوي يصير له مثل الي صار بابوسعيد
زينب : الله يهديك لاتقول كذا وكلنا ماشين على هالطريق
فهد : الحوبه توجعع ترا اخخ يايبه دموعي الي ماعمرها نزلت قدام حرمه نزلتها الحين وقدام وحده تكرهني
زينب : انا صح اكرهك بس بعد مابيك تصيح خلاص اهدا تبي عصفر انت بعد
فهد : ماهو وقت نكتتس اطلعي ابي اقعد لحالي
زينب : طيب يكيفك
فهد : وانا كلما قلت شى سويتيه قولي لا بقعد
زينب : تصدق عاد قاعده على قلبك مانيب متحركه ويلا ابك قدامي يابودميعه
فهد : تخسين انذل عندتس امشي بنام على رجلوتس
زينب : فيه اختراع اسمه مخده
فهد : وشدخلتس
زينب : رجولي
فهد : اسكتي ابي انام ولاتتحركين
زينب : واذا نملت رجولي والله نام اوف الله يهديك ياخالي
انتهى البارت
قراءه ممتعة 💙💙
أنت تقرأ
"جابك الله في زحام العمر صدفة "
Poetryرواية "جابك الله في زحام العمر صدفة" ( احداث الرواية قديمة جدًا تعود لزمن قديم جدًا زمن العيش فالقرى والحياة البسيطه والروح الحلوة تعود حياة القرى التي تحكمها العادات والتقاليد الي البنت لولد عمها والولد لبنت عمه وغير القرايب ماناخذ عادات وتقاليد قد...
