"جابك الله في زحام العمر صدفة "

15

~~~ في المركز الصحي ~~~
ابو فهد : يلا يولدي استودعناك الله يلا ياهايل رجعنا للبيت
ام فهد : متى ترجع لنا يولدي متى
سياف : ان شاء الله يايمه انا برجع
هايل : اي خل الدلع وقم الشغل كله صار علي
ابو فهد : اقول اهجد ولا تظغط على اخوك فيه انت وزامل وفهد
هايل : هذول كلهم متزوجين محد قايم فيك يبو فهد غيري
ام فهد : وانت بعد بكرا بتتزوج
هايل : اي ان شاء الله
ابو فهد : لكيع هالولد يلا يولدي بوصيهم عليك وابخلي هايل يوميا يجي عندك يونسك
هايل : اجل انا بقعد عنده وانت وامي ارجعوا للبيت
ام فهد : ماشبعت من ولدي للحين
ابو فهد : يلا الحين تجي الدكتورة وتطلعنا يلا يام فهد
ام فهد : لا لا بقعد عند ولدي رح انت وهايل
سياف : يالغاليه روحي انتي وسياف يقعد عندي لازم ترتاحين يكفي الي صار
ابو فهد : وعد بكرا لاجيبتس له من الصبح بعد اذا تبين
ام فهد : خلاص بس خلك على وعدك
هايل : اي عاد انتبه يبو فهد تخلف وعودك
ابو فهد : انا اقول انتبه لاخوك ولاتروح يمين يسار خلك عنده والله يعينك عليه ياسياف
هايل : كذا نظامكم اجل انا ماشي واقعدو انتم عند ولدكم
ام فهد : ولدي هايل ماهو وقت طقطقتك اقعد عندة
هايل : من عيني هاذي قبل عيني هذي كم عندي سياف انا
سياف : وراك بلاء اعرفك انا
ابو فهد : يلا يلا مشينا
ام فهد : تلحف زين غرفتك باردة
سياف : ابشري يالغاليه
هايل : وشلونك ياعضيدي
سياف : تكلم بالموضوع بسرعه بدون مماطله وشفيك
هايل : ضايق صدري ياخوك
سياف : افا من وش
هايل : اول شى على محمد وثاني شى انا احب وانت تعرف هالشي بس
سياف : بس وش
هايل : احس ان كل الطرق واقفه بوجهي شسوي
سياف : اذا الطرق كلها فوجهك وانت تحب بنية نظيفة فبتتحدا كل هالطرق ياهايل بنت الناس ماهي لعبه عندك توهمها وانت كم شخص وقفو بوجهك تراجعت ماهي حب ولا هو رجولة انتبه توهم البنت بمشاعر ماهي فيك انتبه
هايل : ماهي هذي القصه ياسياف انا ما اوهمها بس حتى صديقتها ماتبيني ولا وصلت الرسالة يعني باختصار يمكن صديقتها تغير تفكيرها علي
سياف : دامك تحبها فتحملها وان كانها تحبك مارح تسمع من غيرك وان كانها سمعت فهي فرصه سعيدة وانتهت
هايل : الله يكتب لنا الي فيه الخير
~~~ في المركز الصحي من جهه ثانية ~~~
فاتن : كنتي مع هايل صح
ميهاف : تستهبلين صح
فاتن : شفتتس وانتي تكلمينه من بعيد ليش مستمرة تكذبين علي
ميهاف : لان لو علمتتس بالصدق مااستبعد لو نشرتي الخبر اذا وصلت فيتس تخبين عني رسالة من شخص احبه توصل تسوين اي شى
فاتن : ههههههههههههههههههههههه وصلت تفكرين فيني كذا وهذا وانا كنت بير لاسرارتتس هذي نهايتها
ميهاف : بعد حركتتس الاخيرة صرت اتوقع منتس كل شى يافاتن انتي تغيرتي اعرفي بهالشي
فاتن : من كلامتتس ماودتتس تعرفين السبب الي خلاني اسوي كذا
ميهاف : عذرتتس تافه
فاتن : خلي العذر التافهه تعرفينه بعدين وبعدها ارجعي دوري حل عندي ووقتها خلي حبيبتتس ينفعتس
ميهاف : انا الي مفروض ازعل ماهو انتي اوف يافاتن الا ماتخلينا نبتعد اوف
~~~ يوم جديد وتحديدًا بالمقبرة ~~~
ابوفارس : احسن الله عزاكم في ميتكم
فارس : ياعم هم السابقون واحنا اللاحقون
ابو محمد : انا حزين على ولدي وحفيدي وشلون بيعيشون
ابو فهد : الله يرحمها
عزام : محمد ياخوك خلاص قم والله هالدموع كثر ماهي تضر تراها ماتفيد راحت للي ارحم منا عليها
محمد : الله يرحمك يالغاليه
"دفنوها ومن ذا اليوم اندفت روح محمد معها وهو عايش"
بعد اسبوعين من موتها
~~~ في بيت ابو محمد فالقرية ~~~
ابو محمد : متى يولدي ناوي ترجع لشغلك
محمد : ارجع له واخلي ولدي من يهتم فيه
شهد : افا يامحمد وانا ويني ؟
محمد : باختصار مالي نفس لاي شى ولا اعرف مارح تقصرين ياعين محمد
ابو محمد : يعني تبينا نبقى بالقرية
محمد : لاتاخذ برايي يايبه الي تبيه سووه
عبدالرحمن : انتو روحو للرياض وخلو محمد وسالم عندي
محمد : صادق عبدالرحمن تعرفون دفنت روحي هنا يبيلي وقت على مااجي للرياض
ابو محمد : خلاص تم شهد ياابوي جهزي اغراضنا
شهد : ليش ماقلت لابوي اقعد معكم
عبدالرحمن : مابيتس روحي اخدمي والديتس
شهد : طيب طيب الا ماتحتاجني بيوم
سالم : بابا لاتبكي ماما راحت للجنة
محمد : يارب
عبدالرحمن : سالم تبي اوديك للبقالة
سالم : همم طيب يلا بابا تبغى اجيب لك شى
محمد : لا يابابا انتبه ياعبدالرحمن
عبدالرحمن : مايحتاج توصيني
~~~ في السوق ~~~
هايل : يامرحبا بسلوم
سالم : بروح للبقالة اجيب لحبيبتس شى
هايل : افا حتى الورع ماسكها علي
سالم : اي انا ماانسى وابيك انت توديني للبقالة وتشتري لي بفلوسك
هايل : واذا ماشريت ؟
سالم : قرب اذنك بعلم عمي ابو فهد ان حبيبتك الدكتورة الي بالمركز
هايل : خلاص خلاص اسكت انا بوديه للبقالة انتبه للمحل
عبدالرحمن : تعجبني ياعين عمك خلك ابتزازي
سالم : اعجبك ياعمي
~~~ في بيت ابو فهد ~~~
زينب : من قال اني ميته عليك اذا تبي اليوم اروح اخطب لك حبيبتك تراها مو فارقة معي
ندى : اوف اوف صوتهم طالع
عفراء : لايجي خالي والله لاتصير سالفة قويه
ام فهد : وشلون نسكتهم
فهد : لاترفعين صوتتس لانثر ضلوعتس هنا
زينب : ماني خايفة منك والله لو تزودها معي يافهد لايوصل العلم لابوي وابوك وبعد اخوي
فهد : ماجبتي الا طاري اخوتتس الرخمة
زينب : انت الرخمة والله ولا اخوي صان اختك تصفقني يافهد هذي قوتك علي بس
فهد : انقلعي برا الغرفه لاكمل عليتس وانا حالف من تمسكين يدي بحول حياتتس لجحيم عشان ابوتس وابوي يندمون
زينب : خل ابوك لحالة يندم مو هو الي غصبك وابوي لاتجيب طارية على لسانك
فهد : انتي ناويتها على نفسك تحملي
"تعالت اصوات الصراخ بينهم والكل برا متوتر خايفين ابو فهد يسمع وتصير مشكله اكبر "
ام فهد : فهد يضرب زينب من متى فهد يتطاول على حريم
عفراء : اي ياخالتي محد كامل
عبدالله : بابا بابا
زامل : هلا يابابا وشفيك خايف
عبدالله : عمي فهد يضرب زوجته صوت صراخهم هناك
ابوفهد : وشهو فهد يتطاول على بنت اختي فهد
زامل : اهدا يايبه لاتدخل بينهم
ابو فهد : وخر عن وجهي يازامل وخر افتح يافهد لاترفع يدك عليها افتح الياب
فهد : لاتدخل يبه الي لسانها طويل تستاهل الي يجيها
ابو فهد : اكسر الباب يازامل ولف وجهك
زامل : بسم الله واحد ثنين ثلاثه
ام فهد : يمه بنتي زينب قومي قومي عن الارض
ابو فهد : خذيها ياام فهد وهديها وانت امش قدامي عالمحل بسرعه
فهد : لاتسمع من طرف واحد يبه هي الي بدت
ابو فهد : مابي اسمع صوتك امش قدامي جب عصاتي يازامل
زامل : والله هالزواج شر من بدايته
ام فهد : وش يوجعتس ياامي
زينب : مابيه ياخالة مابيه
ام فهد : اهدي انتي الحين يابنتي ولحظه غضب اكيد وانتي تعرفين فهد حليل وطيب و
زينب : لا ماعرفه من قال اني اعرفه ولا ابغى اعرفه ولا ابغى اصبر عليه عطيني جوالك ياخالة بدق على ابوي
ندى : ليش وين جوالك
زينب : الحليل الطيب الي لازم اصبر عليه ماخذ جوالي
عفراء : ترا احنا مالنا دخل تحطين حرتتس فينا
زينب : اذا ماعندك خبر ياخالة ولدك يحب مديرته بالشغل هذا الي تبين اصبر عليه
ام فهد : مالتس الا الي يرضيتس يابنتي ابوفهد بيعدله لتس
زينب : يعني مارح تعطوني جوال
ندى : ماعندنا جوالات
زينب : اوف اوف
~~~ في السوق ~~~
ابو فهد : كذا ربيتك يالرخمه كذا انا ربيتك تطاول على حرمتك
فهد : قلت لك مابيها يايبه
ابو فهد : اص اقطع واخس انت احد يرضى فيك
فهد : فيه الي ترضى فيني وانا احبها وتحبني ولو تجبرني من اليوم لبكرا اباخذ الي احبها غصبًا عن الكل
عصب ابو فهد وماشاف قدامه صفق فهد كف ومن قوه الكف يد ابو فهد اوجعته وطاح فهد عالارض والغبنه والقهر داخله
ابو فهد : انقلع عن وجهي انقلع
عبدالرحمن : زامل شصاير
زامل : مفروض تتعودون على مشاكلنا
عبدالرحمن : كل شى اتعود عليه الا تبادل الشخصيات الي قاعد يصير بعايلتكم
زامل : وش تقصد
عبدالرحمن : قبل انت الي تسوي المشاكل والي يصلح فهد والحين العكس
زامل : هذا الي يتزوج غصب كذا يصير فيه
عبدالرحمن : الله يعين
ابوفهد : وين هايل ياعبدالرحمن
عبدالرحمن : خذا سالم للبقالة
زامل : ومحمد وينه
عبدالرحمن : فالبيت عيا يروح لشغله وعيا يطلع يجتمع هنا
زامل : الله لايلومه
~~~ في المركز الصحي ~~~
فاتن : قطع هالشايب ماحبيته مدري كيف اذا اخذتي هايل بتتحملينه
ميهاف : لاتشيلين همي
فاتن : الحين زعلانه مني ياميهاف ؟
ميهاف : لا حشى ليش ازعل
فاتن : ميهاف بيجي يوم وبتعرفين ليش سويت كذا بس الحين تكفين خلينا نرجع مثل ماكنا
ميهاف : نرجع بس بشرط
فاتن : اعتبريه صار
ميهاف : ماعاد تخبين عني اي شى
فاتن : خلاص تم حتى لو مصلحتتس وشى يضرتس مالي دخل مابخبي شى
ميهاف : كذا خلاص تصالحنا
فاتن : اوف اخيرا اسمعي الي ساكنين عندهم اخوه الثاني جاء وجلس عنده وش نسوي
ميهاف : وش نسوي
فاتن : بيصيرون يتكلمون علينا فلان وعلان ولدين وبنتين فالبيت
ميهاف : تو زوجته متوفيه بعدين فيه ولده ماعلينا من كلام احد ولو زاد الوضع ناخذ بيت ثاني
فاتن : اصلا باقي شهرين وكم اسبوع ويخلص تطبيقنا
ميهاف : يوه مابغى كم صار لنا هنا
فاتن : تطبيقنا ٥ شهور والحين صار لنا شهرين و ٣ اسابيع بالقرية
ميهاف : نقدر نكمل تطبيق
فاتن : لا خلاص تطبيقنا ٥ شهور عاد لو توظفنا يمكن نقدر نجلس بس حبيبتي اقعدي لحالتس هنا انا بروح للرياض عند ابوي
ميهاف : ان شاء الله تطول هالايام
فاتن : استغفري انا مقدر اتحمل
~~~ في السوق ~~~
ابو فارس : شفت اخوك مشى للرياض صح ولا لا
ابوفهد : والله ماشفته يبو فارس ليش وشبغيت منه
ابوفارس : شكلكم نسيتو الخطبه
ابوفهد : محد نسى يبوفارس وانا وابو عزام بنروح معك
ابوفارس : كنت ابي ابو محمد يجي بعد
ابوعزام : ليش احنا مانكفي
ابوفارس : مافيكم قصور يابوعزام بس تعرف ابومحمد ساكن بالرياض وابومتعب مثله ف ممكن يقدر يقنعه
ابوفهد : الا احمد ربك انه راح ترا ابو محمد للحين عنده وحده ماتزوج
ابوفارس : وش قصدك يبوفهد مافهمتك
ابوعزام : قصده واضح ان يمكن ابو متعب يعطي بنته لولد ابو محمد وعاد هنا المشكلة
ابو فارس : لا اجل اشوا راح
ابو فهد : مايدري ان ولده هنا ههههههههههههههههههههههه
ابوعزام : خله مشتط
ابو فهد : وين عزام
ابو عزام : فالبيت بيجي بعد شوي يمسك الحلال عني
ابوفهد : ليه وين رايح انت
ابوعزام : بروح للسوق الرئيسي اخذ اغراض للمحل
ابوفهد : اجل عطني خبر لا رحت ابخاويك
ابوعزام : على خير
~~~ في البقالة ~~~
هايل : قشيت كل البقالة وين بتودي هالاشياء
سالم : ههم لي
هايل : كلهم
سالم : اي كلهم لي
هايل : وانا احسبك ماخذ لي ماش ماش يبو محمد ماتعرف بالواجب
سالم : قم بالواجب انت يبو عبدالله
هايل : لا لا مايصير اخوي سالم هو ابو عبدالله
سالم : وانت وش بتسوي ولدك
هايل : كان لسانك طايل تسال اسئله اكبر من عمرك
سالم : طيب اسف لاتقول لابوي
هايل : بشرط
سالم : اعطي هالكيس لحبيبتك صح
هايل : صح بنروح للمستشفى ابطلع سياف وتعطيها اياه تم
سالم : تم امسك كيستي طيب انا
سعيد : ممشيك البزر على سيراط المستقيم
هايل : دنيا ياسعيد صارو الورعان يمشونا على كيفهم
سعيد : ههههههههههههههههههههههههههههههه رح رح اعتبر اغراضك تحاسبت
هايل : عارف بطفرتي تعجبني ياسعيد
سعيد : رح لاتخليني احطها عالحساب
هايل : رجعو لك جماعه خلف
سعيد : يجون يشترون ويعني ينطلون كلام ويروحون تعودنا
هايل : لاجوك عطني خبر من زمان ماتهاوشت مع احد
سعيد : ابشر ابشر شصار على اخوك سياف
هايل : هذاني بروح للمستشفى اطلع
سعيد : والله الي بتنور القريه بطلعته والحمدلله على سلامته
هايل : الله يسلمك
سالم : مطولين يلا تعبت
هايل : يلا يلا يابابا مشينا توصي شى سعيد
سعيد : سلامتك وصل سلامي لسياف
هايل : يوصل يلا فمان الله
سعيد : الله يحفظك خلنا نسكر الحلال ونروح نصلي بسم الله
خلف : يوه بتسكر
سعيد : وقت صلاة بفتح بعد الصلاة
خلف : لا افتح الحين مستعجل انا
سعيد : خلف مالي خلقك ترا قلت بروح اصلي وبجي افتحها
خلف : طيب طيب تقبل الله تعالو ياعيال هذي هي البقالة الساعه ٢ ابيكم تهدمونها
سعد : الامر عندنا اعتبره تم
خلف : عزالله بيحترق قلبه وهذا اهم مطالبي
~~~ في المركز الصحي ~~~
هايل : السلام عليكم
فاتن : وعليكم السلام
هايل : ابغى اخلص اجراءات الخروج لاخوي
فاتن : قصدك سياف
هايل : اي
فاتن : طيب دقيقة
سالم : انتي ميهاف
ميهاف : اي هلا
سالم : هذي الحلويات من عمي هايل وتراه يقول لي انتس حبيبته وهو يحبتس مره مره مره
ميهاف : حتى انا احبه الحين بسرعه رح لعمك قبل احد يجي ويشوفك عندي
سالم : اي يلا باي
عبدالرحمن : ماشاء الله ماخذ سالم وجايبه هنا وماتقول لي رحت للبقالة وماحصلتكم طار عقلي
هايل : شفيك مشتط بما انه معي فهو بامان
فاتن : قصر صوتك تراك داخل مستشفى ماهو مجلسكم
عبدالرحمن : طيب اسفين اشتقتي لي صح اعترفي
فاتن : اي فعلا اشتقت اكره الحياة
عبدالرحمن : شقصدتتس يادكتورة
فاتن : كلما اشوفك اكره حياتي فالشتقت لهالشعور كويس جيت
عبدالرحمن : الله ومن زينتس حتى الدنيا احلى منتس
فاتن : ياكثر ماتهرج
عبدالرحمن : لا بس صدق صدق اعترفي اشتقتي ولا لا انا اشتقت اتهاوش معتس
فاتن : اقول ارفع علومك ووخر يدك عن الطاولة لاتشوف تصرف ثاني
عبدالرحمن : طيب خلاص برفع علومي وبروح بس ايغى اعطيكم خبر ان اخوي وولده بيكون عندنا عشان ماتاخفون
فاتن : اي عرفنا بس ممكن تحطه معك بجزئيتك
عبدالرحمن : اي ماعليتتس انا اعتبركم مثل اختي شهد وبخليكم تاخذون راحتكم وكانه البيت بيتكم
فاتن : اي غصب عنك
عبدالرحمن : تخسين محد يقدر يغصبني
فاتن : اذكر انك بتتزوج شعندك للحين موجود
عبدالرحمن : جاي اشيك على مستقبلي
فاتن : ازعجبتني بمستقبلك حدك تشتغل بالقرية
عبدالرحمن : شتبين تشوفين مستقبلي شدخلتس فيه
فاتن : مابغى اشوف غير زولك وانت رايح
عبدالرحمن : حلو هذي المره الثانيه تطردني يلا انا رايح
فاتن : اصبر بسالك
عبدالرحمن : لا لا بروح
فاتن : خلاص رح
عبدالرحمن : لا خلاص تفضلي اسالي
فاتن : ليش عمك ابو فهد ضرب ولده
عبدالرحمن : سوالف عائليه انشغلي بحياتتس
فاتن : خف علينا يالسوالف كل القريه شافوه وقفت علي
عبدالرحمن : اقول امني مستقبلنا
فاتن : معليش شدخلك بمستقبلي
عبدالرحمن : احب المراه الي ماتسرف
فاتن : وقفت عند البنت الخطا
عبدالرحمن : لاتصدقين كلام احد احيانا العكس صحيح
هايل : يلا ياعبدالرحمن مشينا ساندني بسياف
عبدالرحمن : يلا انتبهي لنفسك
فاتن : ياشين لقافته بسم الله وش فيتس تميعين
ميهاف : سرق قلبي سرقه
فاتن : منهو
ميهاف : جايب لي حلويات من البقالة ومرسلها مع الولد الصغير
فاتن : يقلع ابو الحالة وحده جوعانه ماينجاب لها شى ووحدة بالساهل يجيها الشى
ميهاف : لو قربتي من الكيسة بتسمعين الثلاث اسئلة
فاتن : من قال ابي من حلوياتك انا مشتهيه فلافل
ميهاف : فلافل المغرب ياوك
فاتن : كيفي معدتي كيفي روحي كلي حلاو حبيبتس لحالتتس
سالم : عمي عبدالرحمن عطني اذنك
عبدالرحمن : والله البلشه وش تبي
سالم : تراها مشتهيه فلافل
عبدالرحمن : منهي
سالم : الدكتورة الي كنت تتكلم معها قبل شوي
عبدالرحمن : اخس تطورت حالتك صرت بدون احد يقول لك تفهم
سالم : مافهمت شى بس انا احب الدكتورة وابيك تشتري لها فلافل وبعطيها اياه
عبدالرحمن : من وين المحبه ذي
سالم : من قبل احبها لما جاء رمضان شفتها وحبيتها
عبدالرحمن : يلا خذلك يادحيم حتى الورعان مناشبينك
سالم : يلا يلا بسرعه قبل تروح تشتري لنفسها وتروح علي
عبدالرحمن : ارفع علومك عاد
سالم : ابشر ياعم
~~~ في بيت ابو فهد ~~~
هايل : يمه يايمه تعالي شوفي من جبت
ندى : سياف اخخ عاش من شافك يااخوي
سياف : ياهلا بندى ياهلا بحبيبة اخوها
ندى : اشتقت لك ياسياف
سياف : حتى انا اشتقت لكم كلكم الا هايل
هايل : تسوي خير تلقى شر
عفراء : رح سلم على عمك ياعبدالله
عبدالله : عمي جيت اخيرا اشتقت لك
سياف : ياحبيب عمك وشلونتس ياام عبدالله
عفراء : بخير الحمدلله كان ودي تشوف ايلاف بس نايمه
سياف : الله يخليهم لتس وين امي
ام فهد : ولدي سياف
سياف : يابعد هالزول والله اشتقت لتس يالغاليه
ام فهد : حتى انا اشتقت لك يولدي تعال بحضني تعال
هايل : يمه لو سمحتي انا وندى واقفين
ام فهد : ماعلي منكم والله قلبي بيطير من شوفه وليدي ورجعته بصعوبه
سياف : موتو قهر الحنان والدلع كله لي
ندى : لنا الله

"انتهى البارت"
لكثرة الاسئله عن بعض الاسماء الي بالرواية ماوضحتها انا لان حسيت ان كل شى بوقته حلوو وقت مايكون لهم دور احط اسماءهم وبرضو جتني اسئله عن اسم ابوفهد وام فهد وبرضو اسماء عيال زامل
ابو فهد اسمه : عبدالله
وام فهد اسمها : فهده
ولد زامل الكبير اسمه : عبدالله وعمره ٧ سنين
بنت زامل المولودة اسمها : ايلاف وعمرها ٧ شهور
| بقيه الاسماء المجهولة مع باقي البارتات بكتبها لاتستعجلون|
_________________________________
قراءه ممتعة اذا تبغون اي شى بخصوص الروايه عندكم باحد البارتات حسابي بالانستا لو سمحتو فقط بخصوص الروايه تبون تسالون متى انزل البارتات اوعندكم تصميم يليق عالروايه ارسلوه لي وشكرا لدعمكم الحلووو وصلنا ٦ الف مشاهدة 💙💙💙💙.