"جابك الله في زحام العمر صدفة "

73

~~~ فالمستشفى ~~~
عبدالرحمن : ابوها كلم ابوي ابوها كلم ابوي
هايل : وش هالمرافق ياربي
عزام : شبلاك صرت ببغاء
عبدالرحمن : وافقت يابوالعزم وافقت
عزام : منهي ذي بعد
هايل : حبيبته الدكتوره
عزام : اوله تو توصلك موافقتها
عبدالرحمن : يله عاد خذلك شعرفك انت بالاوقات الصح اجل مثلكم رايحين تخطبون والولد فالمستشفى البنت انتظرت لاجل انها شايفه حالي على ولد عمي
عزام : ولد عمك تراه ولد عمي ونسيبي
عبدالرحمن : للحين ياهايل صامل توافق على ذا وجهه ماهو وجهه عرس
عزام : اجل انت الله يعين البنت
هايل : اقول انت واياه اثنينكم مانتم وجه عرس اقعدو عندي بس
عبدالرحمن : تراه توه قبل كم يوم هو الي ناشب بحلقي ارجع اكلم ابوي فالموضوع
عزام : تعودت على انفصامكم
هايل : لا صدق وش مقعدكم هنا
عزام : حلف ابوي على ابوك اني ماطب القريه الا رجلي على رجلك وتدخلت رجل دحيم بالواسطه
عبدالرحمن : تبون تروحون للقريه بدوني اجل
عزام : ماهو من زينها كم يوم وانا رايح للشرقيه
عبدالرحمن : احسن بنفتك منك
عزام : عاد انا الي ميت على شوفتك
هايل : ماجاء فهد
عزام : من فهد
عبدالرحمن وهو يطقه : احم لا ماجاء
عزام : يقصد اخوه
عبدالرحمن : اي نسيبك لاتنساه
هايل : زين
عبدالرحمن : ورع قم سولف معنا تراك بتطفش اذا اعرسنا
هايل : ماهو من زين سوالفكم
عزام : خله خله عشان يتعود يعيش من دونا
هايل : ماتفرق
عزام : دام مافيه لا دكتوره ولا ممرضه شرايكم نطلع نفطر كبده وشكشوكه
عبدالرحمن : تحسب مافكرت فيها بس هايل ممنوع ياكل هالاشياء
عزام : هايل ممنوع منهم احنا شدخلنا
هايل : خذه يفطر يادحيم لايموت علينا ماهو مرافق ذا عله
عبدالرحمن : ارفقو على بعضكم تراكم صرتو انساب
عزام : ياهالنسابه الي بتطلعها من خشومنا
محمد : السلام عليكم
عبدالرحمن : ابوسالم شعندك
محمد : يعني ارجع
عزام : لا لا ادخل جايب اكل ونردك
محمد : اي جبت لكم فطور حس قلب سالم انكم مافطرتو واخذت بشوره
هايل : هلا هلا بسالم
سالم : هلابك الحمدلله على السلامه
هايل : اخس والله وكبرت ياسويلم الله يسلمك ياحبيبي
محمد : عاد اعذرنا ياهايل جبت لك اكل المستشفى توهم عطوني اياه عند الباب
هايل : لا عادي يابوسالم تعودت عليه
محمد : عساك بخير مايوجعك شى ترا خلاص بكرا اخر يوم
هايل : لا ازهل انا ذيب
محمد : عبدالرحمن خذ الفطور وروحو افطرو برا ابي هايل بكلمه راس
عبدالرحمن : وليه بس هايل الي تبيه
محمد : خل العناد ورح
عبدالرحمن : لا بقعد
هايل : دحيم خلاص قال رح رح
عبدالرحمن : طيب طيب قومو
عزام : شعنده اخوك
عبدالرحمن : شدريني امش نطلع
هايل : تفضل يابوسالم وش بغيتني فيه
محمد : هذا ياطويل العمر انا لاجل عمي ابوفهد مريت على شقه فهد تعرف انا الوحيد الي ادلها
هايل : ايوه
محمد : رحت وياليتني مارحت وانا اخوك
هايل : لاتخرعني شصاير وش شفت
محمد : اعتقد جاء الوقت الي نقول فهد ماعاد باهو فهد القديم ياهايل دقيت جرس شقته فتح لي ورع صغير قلت من انت قال انه اخو زوجه فهد عايلتها كلها فالشقه قلت للورع ناد لي فهد قال فهد رايح يجيب لنا غداء وانا شايف سيارته برا سالته ان هنا سيارته قال لا هذي حقت اخوي الكبير يعني اخوك فهد معطي شقته اهلها وسيارته اخوها ورايح على رجوله يجيب الغداء وطلعت الا جاني حق الشقق وقال فهد له شهرين ماسدد اجار شقتين استغربت شقتين لمن قال رجال غريبين حاولت فيه يعطيني الاسماء ودريت انهم خوات زوجه اخوك وازواجهم ماخذين شقتين على حساب فهد
هايل : ياقو وجيههم هذا وهي حرمته مديرته فالشغل
محمد : هذي كذبه كذبها فهد عشان يوافق عمي انه يتزوجها وانها يعني معها فلوس هي البنت كانت تشتغل فاداره شغل فهد يعني مديره على قسمه بس الحلال ماهو لها هي موظفه مثلها مثل فهد ويوم تزوجته فصلت من شغلها انا مابغيت اجي واقولك وكنت بدق على زامل بحكم انه يعتبر الحين الكبير بينكم بس اعرف اخوك الله يهديه مايسكت بيروح يكب العفش عند عمي وزوجه عمي وانا مابي تكبر السالفه
هايل : اذا ماسوى زامل كذا انا بسوي الى متى يابوسالم الى متى بنسكت وبنغبي على فضايحه
محمد : استهدي بالله وانا اخوك نقدر نحلها بدون ماتكبر السالفه
هايل : شلون نحلها ماهو مخلي لنا فرصه نتقرب منه يصرف على عيال الناس واهله كانو بحاجته ومقفل السماعه بوجه امي والله يابوسالم اني ناوي اروح ادوسه بس انتظرني اطلع من المستشفى
محمد : عيب بحق عمي وزوجه عمي تتضاربون وانتم اخوان هو بنفسه يحل مشكلته وقت يندم احنا الي علينا بنسويه بنقابله وبننصحه ماهو متقبل صدقني ربي بيرده ندمان
هايل : مستفزني يابوسالم حركاته
محمد : اهدا وكل شى بينحل
عبدالرحمن : وش قاعدين يقولون
عزام : حتى اذنك خربت ماش شيبت يادحيم
عبدالرحمن : اقول اسكت وابلع من هالتميس
عزام : وخر عن سالم غفصت راسه فالباب
محمد فتح الباب : ابوطبيع مايجوز عن طبعه
عبدالرحمن : اي ليه تقول لهايل شى واحنا ماندري
عزام : مسوي مجنون ندري ان هايل بيقول لك كل شى
عبدالرحمن : انت مسوي ماهو هامك الموضوع
عزام : طبعا مايهمني دام قال شى لهايل فهو يخص هايل مايخصنا الا ابوسالم وش السالفه
محمد : ههههههههه لا واضح مايهمك
عزام : ههههههههه استهبل معك اكلت نص التميس وماخلصتو
محمد : بالعافيه ادخل
عبدالرحمن : شالسالفه هايل
هايل : ياحبك للهرج السالفه تخص اخوي فهد وفهمك كفايه
عزام : شقصدك يعني ماتبي تقوله وانا موجود
هايل : يوهه والله البلشه
عزام : تحسبني مادري بسالفه فهد ؟ ادري قايل لي عمي
عبدالرحمن : الحمدلله انك تدري
عزام : اي اي ادري وخلونا من فهد ذا الي غاسل يدي منه وعلمنا انت متى عرسك
عبدالرحمن : ماحطيت عرسك انت عشان انا احط عرسي
هايل : شجايك عليه انت
عبدالرحمن : ههههههههه احب احارشه يخوي شسوي
عزام : تعرف قدري لامني ابعدت
عبدالرحمن : الحقك وين ماتروح
عزام : تخسي
هايل : ياعيال بالله رتبو الشناط والاغراض الي جايبينها اهلي بعد شوي بيجيبون لي ورقه الاخلاء
عزام : اخلاء وش
هايل : اخلاء المستشفى يعني خلاص بطلع
عزام : مابغيت ياخوي اجل ماهو بكرا الي اخر يوم لك
هايل : الا بس ابغى ارتب اشيائي من الحين وعلى كلامهم ان لازم اوقع الحين
فاتن : السلام عليكم
هايل : وعليكم السلام
فاتن : كيف حالك ياهايل ان شاء الله افضل اليوم
هايل : الحمدلله بخير
فاتن : مايوجعك شى ابدا
هايل : لا ليه
فاتن : ودنا تقعد عندنا زود شرايك
هايل : لا لا برجع لدياري
فاتن : دام اني فتحت هالموضوع مع اهلك لازم يكون عندك انت خبر بعد اسمعني يااخ هايل موضوع انك تخرج من المستشفى رح تطلع اليوم بكرا الاسبوع الجاي بس لازم يكون عندك خبر ان فيه اعراض رح تجيك واول ماتحس فيها لازم تجينا
عبدالرحمن : بس يادكتوره هو بالقريه ومافيه هناك مستشفى
فاتن : والله مادري وش احل بس ضروري تكون عندنا
عزام : طيب وش هي الاعراض
فاتن : نغزات فالقلب صداع نصفي غير طبيعي او اذا حسيت فجاه انك بمكان غريب مع ناس غريبه لازم تراجعنا لاتعتقد انك طلعت من هنا يعني خلصت رح نسوي لك مواعيد تجينا وبنحاول ماتخليها متقاربه لظروف مكان سكنك
هايل : طيب لو حسيت ان على قولتتس بمكان غريب وماعرف وش اسوي اذا لازمني هالشي يعني
فاتن : تجينا هذا اول حل طبعا بس اذا ودك انا بعطيك حل جانبي الافضل انك تقرا دايما وتكتب او تحاول ترسمهم يعني ترسم اهلك ترسم الناس الي تمر من عندك وتكتب اسماءهم وصفاتهم وكلما يجيك هالشي تشوفهم هالشي ممكن يخلي عقلك يحفظ الاشخاص وينميه ولكن تذكر يااخ هايل ان الحل الاول والأنسب انك تجينا اي شى تحس فيه تعال لنا ومع مواعيدك احنا رح نراقب حالتك الصحيه وباذن الله رح تقدر تتخطى هالشي ومبروك خروجك من المستشفى والحمدلله على السلامه
هايل : الله يسلمتس يادكتوره ويعطيتس العافيه على شغلتس ذا
فاتن : الله يعافيك لاشكر على واجب بالتوفيق
هايل : ممداني افرح
عبدالرحمن : يخوي ماعليه ماهو انت الي قبل تبي جيه الرياض
هايل : اجيها على مستشفى ؟ لا والله مابي
عزام : الصحه اهم شى وانا اخوك لاتتهاون فيها
عبدالرحمن : انا بروح اجيب لك شنطه اكبر من ذي وباخذ لك دفاتر واقلام منه ترسمهم ومنه تكتب القصيد وها لاوصيك ارسمني اول واحد
عزام : يخوي انت ماخذ مرتبه اهله
عبدالرحمن : ههههههههه استهبل معه يابوي
هايل : ههههههههه
~~~ في بيت ابو فهد ~~~
ام فهد : يله خلونا نرتب غرفه هايل جاي بكرا
ابوفهد : وشوله العجله بتغبر ماجاء
ام فهد : وبعدين معك انت ليه ماتترك الفال والقول الشين
ابوفهد : ماقصدي شى يابنت الحلال قصدي بكرا رتبوها
ام فهد : لا تقصد اجل بتغبر ليه هو بيطول لاسمح الله
زامل : لا لا يايمه جاي بكرا
ام فهد : اي علم ابوك
سياف : يايبه ارفق على امي انت تعرف قلبها رهييف
ابوفهد : هي تبي تدلع هالولد وانا ابي اطلعه رجال
سياف : ماهو ورع لهالدرجه يايبه
ابوفهد : بني ادم يتغير كل دقيقه ماتبي اخوك يتغير
زامل : خلنا يبه من سالفه هايل فيه موضوع اهم
ابوفهد : وش صاير بعد
زامل : ماتحس تاخرنا عالناس
ابوفهد : اي ناس
زامل : ابوتميم وعزام من متى مملكين لهم على خواتنا حول ٦ شهور
ابوفهد : مايقام عرس وهايل ماهوب فيه
زامل : بس هايل بيجي بكرا
ابوفهد : يجي بكره ويرتاح كم يوم واحط عزيمه بمناسبه طلوعه ثم نتكلم بموضوع الزواج بعدين تعال وش غايتك انت يوم تكلمني بهالموضوع ماهي بالعاده تتدخل
زامل : كوني اخوهم الكبير قلت افاتحك بالموضوع لان مستحيل خواتي يحون يتكلمون عيب بحقهم واكيد انسبانا مارح يقولون شى
ابوفهد : اجل انت اسكت ولا تقول شى بعد
زامل : سم طال عمرك انا كان قصدي اتاكد منك وين بتحط عروسهم
ابوفهد : قايل وراك غايه ماتهتم كذا من الباب للطاقه والله يابوعبدالله انا الي اعلي اعطيهم بناتي موضوع العرس على الرجال وذا المعروف
زامل : اي يعني بتوافق لو بيحطونه خارج القريه
ابوفهد : لا
سياف : لا يايبه تكفى لاتكسر بهم حرام عرسهم يكون بالقريه وسكنهم بالقريه يايبه الدنيا تطورت وبتتطور زود واحنا للحين بهالقريه
ابوفهد : اي وبنندفن فيها
زامل : بعد عمر طويل المقصد ان ليه ماينحط عرسهم بالرياض وبافخم قصر مثلهم مثل باقي هالبنات قد شفت يبه احد بهالقريه سوى عرس ؟ مغير احنا الي نسوي هذا دليل ان القريه بس سكن ماهي كل شى
سياف : صح كلام ابوعبدالله نقول فرح عرسها هنا بس سكنها فالشرقيه وعرسها الاول فالرياض بس ندى ؟ تطلع من بيتنا خطوتين لبيت عمي ابوعزام مايصير والله
ابوفهد : انتم الحين شدخلكم هم شكو لكم
زامل : مايحتاج يتكلمون يابوي يوضح من وجيههم وانت اعرف ببناتك وعيالك
ابوفهد : العرس فالقريه والموضوع تسكر وبعدين تعال من قالك ان ندى بتسكن هنا عزام بيتوظف فالرياض قدم له على مدارس تعرفون شهادته طلعت تدريس
سياف : والله شى حلو ماقال لنا هالسلوقي
زامل : مايبي يدرس ويلاحق له وراعين
سياف : حتى ولو يايبه خل عرسهم فالرياض تكفى
ابوفهد : انتهى النقاش صب لي شاهي
زامل : مايعرف لك الا الي بيجي بكرا نخليه يكلمك
ابوفهد : عزالله ابطى
~~~~ فالمطبخ ~~~
ندى : بشر شقال
زامل : عيا وانا اخوتس
ندى : سياف ماكلمته
سياف : الا والله ياندى كلمته وحاولت فيه بس رافض انهى النقاش وقومنا
ندى : اوف ياربي بنات الناس وش احسن منا فيه الى متى بنندفن بهالقريه
فرح : وش هالكلام انتي وش فيها القريه تهبل وطول عمرنا عايشين هنا ومناسباتنا هنا وش الي تغير الحين
ندى : انتي الله يعافيتس اسكتي واقلي هالدجاج عرستس الاول صح فالقريه بس سكنتي فالرياض والحين بتسكنين بالشرقيه اما انا لو عزام ماانقبل بوظيفه برجع انثبر هنا اطل على بيتنا من الدريشه
سياف : لاتبالغين عاد
ندى : اسكت تكفى ياسياف حتى انت بتروح الرياض وزامل بيروح القصيم كلكم طلعتو من القريه
فرح : وفهد وين راح شدراتس يمكن يرجع هنا
ندى : ماعندي اخ بهالاسم
فرح : والله انكم غريبين طمستو وجوده وهو اخونا الكبير
زامل : ماطمسناه ولا شى هو الي طمس وجود اهله
فرح : بس مانوصل لمرحله نكرانه مهما كان كلنا نخطي كلنا انت يازامل قبل ماتبينا وتبي ادنى فرصه تطلع من البيت وبس نتهاوش لدرجه كلنا تمنينا فعلا تطلع بس يوم الله فتح على بصايرك ردك لنا ودا جميلا انت وزوجتك الله يذكرها بالخير استقبلناها بكل صدر رحب ونسينا كل شى يوم جت على فهد قلبنا لا ابدا انا فهد مد يده علي ومد لسانه وتهجم علي وتدخل بحياتي وكان سبب طلاقي وتشتت عائلتي وحرمان ولدي من ابوه قلت شى ؟ حتى والله ماتحيسبت عليه مهما كان اخوي انتم وش سوى لكم
سياف : ضر امي وابوي الي اغلى منه يافرح
فرح : حتى ولو زامل كان يشوف امي تغسل وتنظف ماقوم زوجته
زامل : انتي قولي انتس حاقده علي للحين ولا اقولتس الكلب مايحب الا خناقه محد فكتس من فهد غيرنا وقفنا وقفه سند بوجهه وهذي نهايتها
فرح : مانكرتك تبقى اخوي على عيني وراسي وعيالك يوم جبتهم ماضيقنا عليهم اعطيهم مثل ماعطي ولدي واكثر بعد المقصد من كلامي كلنا اخوان واخطاء الوالدين مع عيالهو تنحل بينهم لانتدخل عشان نسلم
زامل : الي يسكر السماعه بوجهه امي ويرفض يساعدنا ماهو لا ولد ولا اخ ولا بعمري لو انزنقت بفكر ادق عليه واطلب منه الي مافيه خير على اهله مافيه خير عالناس خلتس كلامتس ومنطقتس لتس يافرح انا ماشي اعذريني ندى ماقدرت اقنع ابوي
ندى : عذرك معك يابوي
سياف : والي يرفض يستقبل اهله ببيته ومستقبل اهل حرمته مايستاهل الكلام الي قلتيه عنه فرح فيه اشياء تدرين عنها وفيه اشياء ماتدرين عنها لاتحكمين من كم موقف انا ممكن قبل والحين ماخطيت بس بعدين الله لايقوله بخطي وبرجع ندمان مثل رجعه زامل لنا مارح ارضى يرجع احد يذكرني فالماضي حقي ويقارني باخوي كلامتس عالعين والراس بس وقفتس مع فهد كانتس واقفه ضد امي وابوي
ندى : كلامهم صح ليتتس دايما توفرين كلامتس الي ماله فايده لتس فهد وزامل وانا وانتي وسياف وهايل خطنا وبعضنا بيخطي الصح الي سواه زامل يوم رجع ورجع بافضل رجعه ماهو مثل فهد يرجع عشان مصلحته
فرح : يعني الحين انتي حكمتي ان فهد مابيرجع افضل من قبل ومثل زامل ليه ثبتو خطاه عليه بني ادم يخطي صحيح بس يرجع يقدر يعدل اخطاءه
ندى : بيعدلها بس مارح تنسى يافرح خلى وسمه قهر على صدر امي وابوي بيتشوفينهم يسالون عنه ويحبونه مثل قبل بس تبينهم يعتبرونه سند لو طاحو هههه اتحداتس
فرح : ليش ماعندكم فرص
ندى : انا وانتي والدنيا كلها بتعطيه فرصه بس مارح ننسى الي سواه الي يفضل اهل حرمته على اهله مافيه خير حتى على نفسه ولاعاد تتكلمين عنه قدامنا ولاتقارنين زامل فيه اذا تشوفين كلامتس صحيح فهذا بالنسبه لتس اما بالنسبه لنا فهو جارح وجرح زامل واذا بتتكلمين عالفرص ماشوفتس عطيتي زامل فرصه
فرح : انتي بعد اشوفتس نسيتي ماضي زامل
ندى : امي وابوي خط حمر وافهمي كلامي على كيفتس رايحه انسدح اذا خلص العشاء ناديني
فرح : والله منطقكم غلط يعطون فرصه للناس الي يبون الاهل يعلمون بعض مايمسكون اخطاء بعض من اول غلطه والله غريبين
شهد : كل شخص وله كلمته يابنتي
فرح : حتى انتي سمعتي
شهد : سمعت سمعت لو اقولتس ان كل كلامك خطا وش بتقولين
فرح : هم صح خطا انا لا
شهد : ههههه لو انادي ندى بتقول نفس كلامتس
ندى : دايما احب كلامتس فعشان كذا رجعت
شهد : يسعدلي اختصر نقاشكم ذا دعو الخلق للخالق انتم تكلمتو بامور الدنيا وناسيين ان فيه رب مايخفاه شى حركات فهد ؟ ربي شايف ربي ابتلاه من انتم عشان تحكمون ياندى الله سبحانه وتعالى يبتلي عبده لانه يحبه الله يحب فهد عشان كذا ابتلاه تتوقعون ان فهد راضي ؟ تتوقعون وهو يسوي هالحركات هو بعقله مابدخل بالنيات ولا باي شى خلو فهد على ربي مثل ماربي كتب انه يسوي هالشي ربي بيرده لكم انتم عايله لو هو ولد عمكم ممكن تتكلمون كذا مالكم غير الدعاء له ان الله يرده وعمي ماعق بابوه او بامه بر الوالدين سلف ودين ياحبيباتي مايصلح هالكلام وحتى سياف مخطي بس طبيعه الانسان عصبي وعلطول يحكم ولا يبغى يسمع من الطرف المخطي بس تخيلي لو انتي ياندى سويتي شى بعمتي او عمي تتوقعون رح يجون اخوانتس ويسمعون لتس ؟ لا بس انتي بوقتها محتاجه احد يفهمتس ويسمع لتس عمي الله يهديه وسياف واخوانه ماراحو شافو فهد ليه متغير ماحاولو يرجعونه مثل ماكان وبرضو لو هو فعلا حس بغلطه ورجع مايبون يسامحونه ؟ ماهو منطق ابدا اذا الله سبحانه وتعالى اذا اخطينا ورجعنا تبنا واستغفرنا غفر لنا ف من احنا يالبشر عشان مانسامح والمسامح كريم وهذا اخوكم الكبير وسندكم الكلام مابقوله بس لكم قلته لسياف وقت عصبيه طبيعي بتقولون كلام يمكن حتى مارح تركزين انه غلط الا بعد سنتين ف بدال ماتتكلمون ادعو له وبس والله
ندى : واو ياحظ سياف فيتس حكمه وخلق واخلاق
شهد : والله بقلبي من زمان هالكلام بس سياف الله يصلحه وقت يعصب مايبي يسمع كلمه الحق
فرح : والله ياشهد ماقلتي كلمه زود عن كلامي انا كان قصدي كذا
ندى : لا حبيبتي وجهتي الكلام لزامل بالاخص ونغزتيه بالحتسي
شهد : خلونا من ذا كله انا تدرون وش خايفه منه
ندى : الله يستر وش
شهد : اخوانكم يسوون مشاكل بين بعض وتكون وظيفه زامل وسياف حجه بانهم مايجون هنا ويتقابلون مع فهد
فرح : ياعمري ياشهد والله انتس احسن حريم اخواني خايفه تبين تشوفينا
شهد : اي والله تعرفين يافرح ماعندي خوات ودحيم ومحمد مدري متى بيعرسون
فرح : وهايل الصغير ماهو مونستس
شهد : عاد مايحتاج اتكلم انتي عندتس بزر بعد والله مجنني الله يصلحه
فرح : لا الحمدلله عزيز مودب
ندى : الا بسالتس شهد اخوتس محمد ماكان خاطب بنت مدري وش كان اسم ابوها
شهد : صح ابوها الين كان يشتغل عنده زوجتتس واخوتس ودحيم
ندى : اي طيب شصار ليه ماكملو
شهد : والله مدري انا قلت لامي وابوي لاتغصبون محمد بس والله البنت ماتتفوت شفتوها انتم صح
فرح : اي ماشاء الله خلق واخلاق وجمال
شهد : اي ماقاصر البنت شى وراضيه تربي سالم
فرح : يعني محمد مايبي
شهد : ماقال بس وضح تعرفين حركاته يوم نخطب له هديل ايوه احسه قاعد يكررها
ندى : ماحس هالمره عمي بيسمع له
شهد : هو هذا الي انا خايفه منه يطلع مايبيها ويكرهه البنت عيشتها
فرح : لا محمد يخاف الله وماتدرين ترا مابعد الكره الا المحبه
ندى : اي وشعقبه يحبني وهو مكرهني عيشتي
فرح : ذكريني وش كان اسمها
شهد : عفاف
ندى : الصراحه حرام تاخذ واحد متزوج وعنده ولد
فرح : عادي هديل كانت بتسويها
شهد : هو ماهو مطلق زوجته لا زوجته ماتت الله يرحمها
ندى : الله يذكرها بالخير ويرحمها هدى
ام فهد : يله وين العشاء
ندى : يله يله بنحطه استعجلوا

انتهى البارت
قراءه ممتعه يااصدقاء💞