"جابك الله في زحام العمر صدفة "

83

~~~ في بيت ابوفهد ~~~
فهد : الا شصار بموضوع دحيم يبه
ابوفهد : ماقلنا لك كل شى تم عرسه الاسبوع الجاي
فهد : زين الله يبارك له يارب متى ناوي ينحط عرس ندى وفرح كانهم طولو يبه
ابوفهد : لعل فالامر خيره والله ان ابوتميم مستعجل بس اجلنا لاجل خاطر فرح يوم سالفه هايل ماكنت معنا انت صح
ندى : احم صادق ابوي الصراحه كل تاخيره فيها خيره
فهد : ايه يبدو ان كلامي ماعاد ينوخذ فيه يله اجل سلام
ابوفهد : والعشاء
فهد : بالعافيه عليكم مااشتهيه
ندى : غريبه يبه تعامله كذا
ابوفهد : تحسبين بقدر انسى كل الي سواه
ندى : وسع صدرك بس يابوفهد كان بصدرك قهر بسبته رح واهبده تراك ابوه
ابوفهد : خلي الهياط بس وقومي شوفي من عند هالباب
ندى : على هالخشم
ابوفهد : مدري وش بسوي اذا زوجتتس
ندى : هلا هلا بحلوه اللبن الي راحت وسحبت علينا
ام فهد : انتم معيين تجون اخذت بنتي
ندى : افا يام فهد صار عندتس بنت جديده
هايل : وانسحب علينا
ندى : الشكوى لله يابوزيد
هايل : من ابوزيد
ندى : جارنا ولده التعبان ضايع ف طرا على بالي وقلته
هايل : وش تخربطين انتي هلا بابوفهد الحمدلله عالسلامه
ابوفهد : تكلم خويك انت وش هاالاسلوب
هايل : ودنا نصغرك بس كيفك تبي اكبرك
ابوفهد : لا انطم شفيتس يام فهد نقل وجهتس تعبان
ام فهد : من تعب المشي
ابوفهد : احد يممشب رجليا للمزرعه هالبعيده الله يصلحكم عجلين
ام فهد : ننتظر هايل يتوظف ويعرس ويشتري سياره نروح فيها
هايل : كلها على هالخشم الا الزواج
ابوفهد : يوه توك ماعرفت شى امك تبيك تتزوج بنت اختها
ام فهد : وانت محد يعلمك بشي
هايل : واشوفتس يام فهد تقولين رح ورها هالمزرعه امم عرفت نواياكم
ام فهد : تحسب بخليك كذا يعنيي بدون ماشوف عيالك تحسبنا بندوم لك انا وابوك نقول ابوك بيقعد بس انا مصيري بموت
ندى : وشفيها امي ليه طلعت من عندكم
هايل : ماقالت شى
ابوفهد : قايلين شى مضيق صدرها فالطريق
هايل : لا والله كانت تضحك حتى اني مستغرب
~~~ في غرفه ام رغد ~~~
رغد : يمه تبكين !! وشفيتس
ام رغد : مافيني شى بسم الله عليتس دخلت بعيني شعره بس
رغد : كبرنا على ذا الاعذار يمه وش فيتس قولي بسم الله ليه انهرتي يمه تكفين لاتخوفيني غيث وقمر فيهم شى
ام رغد : لا لا مافيهم شى بس
رغد : تكفين يمه قولي لاتخليني انهار معتس الحين وننفضح
ام رغد : اختي يارغد تعبانه
رغد : منهي
ام رغد : من غيرها ام فهد
رغد : وليه وشفيها خالتي
ام رغد : امس طرشت دم صدتها فالليل تصيح وقالت ان هالشي معها له شهر يمكن تطرش دم وينزل بعد معها نزيف
رغد : يمه تستهبلين تكفين !
ام رغد : لا تهقين وش فيها انتي ممرضه يابنتي
رغد : لازم تبدا علاج لازم نقنعها يمه تكفين لو خلينيها رح
ام رغد : ام فهد وش فيتس ليه تصيحين
ام فهد : كنت بفضح قدامهم وضحت لهم ياختي وضحت
ام رغد : من حقهم يعرفون تكفين اسمعي كلامي وخلينا نبدا علاج
رغد : اسفه على التدخل ياخاله بس والله تطويلتس للموضوع ماهو حل
ام فهد : انا ادري ان علاجي مافيه فايده بموت يابنتي زوجه ولد عم عيالي ماتت
رغد : ليش علطول حكمتي انكم بنفس المرحله ياخاله المرض له انواع وله مراحل تكفين اتركي الموضوع علي انا بفتح لك ملف فالمستشفى الي ببدا تشتغل فيه وانا بقول لبناتتس وعيالتس بعد
ام فهد : لا لا تكفين لا ننتظر عالاقل يتزوجون فرح وندى من تعب هايل وهم ماجلين الموضوع بعدين نشوف حل
رغد : لو عرفو عذرتس ياخاله رح يزعلون والله صحتتس اهم من زواجهم
ام فهد : ماعليه يابنتي
ام رغد : وش فيتس يام فهد
ام فهد : عطيني زباله
رغد : ياحبيبتي ياخاله
ام رغد : سكري الباب لحد يسمع
~~~ في غرفه ندى ~~~
ندى : فرح وش تسوين
فرح : قصري صوتتس تكفيين لايقوم طلع عيوني على مانام
ندى : عندي لتس خبر
فرح : وش هو
ندى : توقعي
فرح : تكفين قولي والله عقلي مافيه شى
ندى : خلاص بقول تخيلي من دق على ابوي
فرح : من
ندى : عمي ابو عزام
فرح : ايه وش يبي
ندى : يبي ملح يعني وش يبي قال لابوي مانبي نتاخر اكثر من كذا كم لنا خاطبين ومن هالكلام وحددو العرس يافرح حددوه بنهار
فرح : تمزحين وجايه بكل حزن تعلميني امشي نطلع نصارح بعيد عن عزيز
ندى : خايفه خايفه
فرح : ايه طيب من حطوه
ندى : بعد عرس عبدالرحمن باسبوعين عشان يمديهم يحضرون
فرح : الله الله ورانا عروس واجده
ندى : وتكلمو بموضوعتس بعد بس زوجتتس مادق
فرح : صالح ماعنده اب وام فعشان كذا يستحي ومايعرف شلون يتصرف
ندى : هايل قال كذا لابوي بس ابوي قال لا خلنا وقت عرس ندى نفتح الموضوع عشان بعد انا يمديني احضر عرسكم
فرح : ياجعله زواجه الدهر ياختي وين خالتي وبنتها
ندى : على طاريها تخيلي ابوي فضح قدام هايل ان امي تبيه لرغد
فرح : اححح تمزحين فايتني واجد
ندى : معليتس انا نقاله علوم امشي نروح نعلم رغد
فرح : يله
رغد : ههههههههه اهلا اهلا يالبنات
فرح : شفيتس متوتره
رغد : ارتعت شوي ايه شعندكم
فرح : جايين بالبشاره
رغد : ادخلو
ندى : يمه وشفيتس قبل شوي قمتي زعلانه
ام فهد : مافيني شى بس ابي اخوف هايل عشان يقتنع المهم انا بنام سوو العشاء للباقين ولاتقوموني
ندى : طيب بشارتي
ام رغد : اقعدي ياكافي اسمعي بنتتس
رغد : لا يمه خلي خالتي تروح ترتاح
فرح : ليه فيتس شى يمه
رغد : قست ضغطها مرتفع شوي لازم تنسدح معليه ندى مصيرها بتعرف
ندى : لا عادي اهم شى راحتها
ام فهد : مبروك يابنتي اعرف الموضوع بدون ماتقولين سمعناتس انتي وفرح
ندى : يابعد قلبي كنت عارفه انتس ماتنطنشين موضوع يخصني
ام فهد : اكيد
ام رغد : امتس عرفت فهمينا وش
ندى : زواجي بعد ثلاث اسابيع بالضبط
ام رغد : صادقه انتي
ندى : اي والله ياخاله
ام رغد : مبرووك مابغيتو ينحط هالعرس
رغد : مبروك يام زيد ههههههههه
ندى : لاتعلقين عالكلمه تكفين الله يبارك فيتس وعقبالتس
فرح : بس انا مادق صالح شرايتس ياخاله ارسل له
ام رغد : ملكتو على بعض
فرح : لا ههههههههه
ام رغد : اجل ليه تدقين عليه
فرح : يجي تنحط هالملكه والزواج عادي بعد ندى انا قلت كذا ياخاله لان هو يتيم امه وابوه متوفين ومايعرف بذي السوالف زواجه الاول كانت امه عايشه بس هو الحين مايعرف بشي وابوي اكيد مارح يدق ويقول متى بتحط الملكه كانه بايعني
ام رغد : يعني انتي تكلمينه وتمونين عليه
فرح : لا ماقد كلمته بس عندي رقمه
ام رغد : تعرفين احد يقرب له طيب حرمه
فرح : اي هديل اخوها سطام خوي صالح
ام رغد : خلاص قولي لها وهي بطريقتها توصل له
فرح : تهقين ترد هي بعد زواجها بعد يومين يمكن
ام رغد : انتو اخبر بها ماعرفها
فرح : بسم الله برسل
ام رغد : بنت رغد ليش اصريتي تروح ام فهد
رغد : كان لبسها عليه دم شوي
ام رغد : يوهه اشوا انتبهتي بس
فرح : قرت الرساله يمه تكتب
ندى : اهدي من حقتتس ترا
رغد : وش كاتبه قولي
فرح : وعليكم السلام كلنا بخير الحمدلله بس ماعندي علم بشي واالله بخصوص اصدقاء سطام وانا بحاول اقول لابوي وهو يقول له
ام رغد : انتي وش كاتبه لها
فرح : سالتها اذا صالح جاب طاري ملكتنا وكذا
رغد : بعد منطق بيجي اخوها ويقول لها يعني اخوها مايدري ان بينكم تواصل
فرح : منطق
ندى : اهم شى هي بتقول لابوها
فرح : تهقون غلط الي اسويه
ام رغد : اذا ابوتس يشوف انه عيب يدق عليه ويساله والرجال ماعنده حريم عشان تتواصلون معهم وش الحل ؟
فرح : خلاص الي يصير يصير عمي ابوسطام يعرف طبع ابوي ترا
رغد : خلاص انحلت وموضوع ندى انحل
ام رغد : عندكم صرافات هنا يابنتي
ندى : ياقلبي ياخاله لا والله ماعندنا نتعامل بالكاش
ام رغد : جاي ورث من المرحوم وفكرت اشتري البيت الي جنبكم يصير نوسع صدورنا يوم هنا ويوم ببيتنا واخوكم فهد جاء وفيه بنتي رغد ماودي يتضايقون عرفتو
ندى : ياقلبي ياخاله كل اخواني تربيتس اصلا ويشوفون رغد بزر
ام رغد : حتى ولو اخذت قراري
رغد : طيب كيف بتوصل الفلوس
ام رغد : بقول لعمتس يجي يعطيني اياها لو غيث فيه كان تسهل الموضوع الا وينهم مختفين بدق عليهم
ندى : رغد امي وشفيها
رغد : هلا مافيها شى بسم الله عليها
ندى : ان شاء الله طيب شصار هناك فالمزرعه
رغد : اوف كان ينقص وجودكم تجنن شفت اشيائكم
ندى : ههههههههه عسى معتني فيها هايل
رغد : ماشفته غير عند حصانه مدري وش اسمه
ندى : ايه اسم حبيبته الاولى ميهاف الا عرس فاتن ودحيم بعد اسبوع بتحضرون
رغد : مدري والله يمكن ومنها ناخذ الورث احسن من يتعنى عمي وينقل علوم ماهي زينه بروح اقول لامي
ندى : ايه روحييي وين اختفت فرح
~~~~ فالمطبخ ~~~
رغد : وين راحت امي بسم الله خلني اسوي شى ناكله بس بموت من الجوع بسم الله كان فيه احد مر من الشباك
فرح : يوه ماصكيناه صكيه ترا فيه تعبان ويدورون عليه انتبهي على نفسك
رغد : لا انتو كذا بتبدون تكرهوني بالقريه
ندى : ياحبيبي لسى ماكرهتيها
رغد : لا
ندى : مريت من غرفه امي وسمعت خالتي عندها وكانو يبكون وش السالفه رغد تعرفين شى
رغد : امشوا نتكي فالحوش واهرجكم
فرح : الله يستر بسوي الشاهي وبجيكم
رغد : عندنا فصفص بجيبه وبجيب جلال اخاف احد يمر بالصدفه من اخوانكم
ندى : قاصدين اروح افرش الفرشه صح
رغد : وحطي مركى بالله
~~~ فالحوش ~~~
ندى : كل شى علي كل شى متعب علي زواجي بعد اسبوعين مافيه دلع ابد عائله ماتستحقني اقعدي بعد يالفرشه لحول اهجدي
فرح : جاء الشاهي جاء الخادر
رغد : امسكو جلال والفصفص جاء
ندى : بسرعه وش صاير قولي لنا
رغد : ماصاير شى ههههههههه بس كنت طفشانه وقلت احمسكم
ندى : امي وش فيها وليش تصيح هي وامك
رغد : امي ودها نرجع للرياض عشان ببدا شغل بعد شهر ويمكن خاله ماتبينا نروح ف زعلت
فرح : امي خاطرها صاير ماش وصايره تسلك معقوله تعبانه ولا قالت لنا تبينا نتزوج بعدين تصارحنا
رغد : يمه بسم الله
ندى : وش
رغد : ها لا شفت احد مر بس
فرح : هذي هديل ترسل
ندى : وش تقول غريبه
فرح : تقول اهلين ام عزيز قلت لابوي وقال انه خلهم يتجهزون فجاه الا احنا عندكن ومعنا المليك بعد بس اول مايخلص زواجي رح يجون
هديل : يمه يمه بيجون فجاه
رغد : الحين انتم منجد ليه تبون تتزوجون
ندى : انا عن نفسي مابي بس امي وابوي يقولون كلهم بيعرسون وهم مارح يدومون لنا ومن هالكلام وهذاني زواجي بعد اسبوعين
رغد : وانتي فرح
فرح : مريت بتجربه سيئه صحيح بس ليه مااتفائل ان ربي بيعوضني
رغد : صدق انتي تبين تتزوجين ولا تبين تردين لخالد حركتها
فرح : اول ماتزوج صح مااتسذب عليتس كانت ذي قكرتي بس لما شفت حنيه صالح قلت ليه اخليه وسيله باني انسى شخص مايستحق افكر فيه حتى وانا لو ابي انتقم من خالد كان حطيت ولده عنده وخربت عليه وهو وزوجته بس وش ذنب الولد
رغد : طيب عادي تقدرين تربين ولدتس لحالتس بدون ماتتزوجين
فرح : قلت لتس حسيت صالح بيعوضني واطلع من القريه بعد عصفورين بحجر
ندى : ليكون انتي بعد ماتبين تتزوجين
رغد : اي والله دامني توظفت بالوظيفه الي ابيها ليه اخرب على نفسي واتزوج واتقروش بعيال وزوج نختار شى ياوظيفه يازواج
ندى : ايوه الي قدامتس جامعه ماكملوها
رغد : اذا تزوجتو كملو دراسه
ندى : ادعي يلقى عزام وظيفه فالرياض ولا بتكي قبالكم
رغد : يعني جد بقعد بالبيت لحالي مع اخوانكم وابوكم احس ماش طفش
ندى : صدق طفش الي انقذني شهد وعفراء وزينب كنا مع بعض لما تزوجت فرح
فرح : الا شصار مع زوجه اخوتس حملت ؟
رغد : لا للحين تتعالج
ندى : ايوه من جيتي واحنا نهرج عليتس بعلمونا وانتي ماعلمتينا شى يخصتس
رغد : انتي سالتي وقلت لا ؟
ندى : حبيتي صدق جاوبي
رغد : فيه احد كل شوي متحرك بسم الله
فرح : تلقينه هايل ذي حركاته
ندى : لاتنحاشين عن سوالي جاوبي
رغد : كيف اصارحتس ان لا وبعمري فكرت ان فيه حب ولا احب ذي السوالف
ندى : اممم علينا عاد انتي معتس جوال ماتعرفتي يمين يسار اخوان صديقاتس بهالجامعه
رغد : اممم ماعندي صديقات وجوالي تدرين وش التطبيق الي فيه ؟ واتساب وتلقرام عشان الجامعه بس ههههههههه
ندى : لا مستحيل انتي نادره حرفيا نادره
رغد : ليه
ندى : كل شى مفتوح لتس ومع ذلك طلعتي انطوائيه طيب ليه
رغد : مايحتاج سبب انا ماحب ذي السوالف الحب
فرح : يمكن مريتي بتجربه سيئه خلتتس تكنسلين ذا الفكره احس مستحيل مايلف قلبتس كذا لو ولد جيرانكم اي احد حب طفوله
رغد : فالطفوله ماذكر ان كنت احب احد بس امي تقول كان ولد جيرانا يهتم لي بس كله اتهاوش معاهم وعيال عمي وعماتي لما كبرت تقابلنا قدني اتغطى ماشفتهم
ندى : والله انتس غريبه
رغد : لا غريبهه ولا شى بالعكس مريحه راسي حتى زواج شايلته من عقلي
ندى : يحليلتس ماتدرين وش يتخطط من وراتس
فرح : بسم الله الله يصلحك وراء ماتطلع صوت تغطي رغد قايله لكم ذا هايل ذي حركاته
هايل : انا اعقل من ذا الحركات يام عزيز بس جيعان
ندى : معكم فلوس نقط ويجيب لنا من البوفيه
هايل : ابد جيبو الفلوس وابشرو بالاكل
رغد : معي ٢٠ ريال
هايل : نشتري البوفيه كلها
ندى : وانا معي ١٠
فرح : وانا معي ٣٠
هايل : كم كلها
رغد : ٦٠
هايل : تجيب ذبيحه بعد اذا تبون
ندى : لا كلكم مثلي طبعا تورتيلا حجم كبير وببسي وانت اطلب معنا بعد
هايل : كم عددكم
ندى : تستغبي ٣ وانت الرابع
هايل : يله بسم الله بروح اعزم النسيب عليها
ندى : وش قال
فرح : مدري لاتتاخر
هايل : ايه ايه طيب يصير خير
رغد : ليش احس بتصير فيه غدره
ندى : ابوالهيل مايسويها الله يستر
~~~~ عن بيت ابوعزام ~~~~~
عزام : شايف الوقت يوم انك تدق
هايل : ادري انها الساعه ١٢ تبي تبلع ولالا
عزام : اذا ذي السالفه تم وش بتعشينا
هايل : معي ٦٠
عزام : نشتري القريه كلها بس انت من وين لك اخبرك مطفر
هايل : خواتي ههههههههههههههه
عزام : زوجتي المستقبليه معهم
هايل : تستغبي ماعندي غير اختين يعني اكيد هي بعدين احذف هاللقب ماهيب حرمتك
عزام : على كيفك انت خلاص يبوي الحين هي ببطاقتي
هايل : مارضى تراك ماخذها بدون رضاي
عزام : وهذي اغلى مطالبي اقول شرايك نص حبه عالبخاري بس سلطه وشطه ولبن
هايل : وتجيك الغيبوبه ذيك بعدها اوفف
عزام : يله مشينا
~~~~ في ببت ابوفهد ~~~~
ندى : كانه تاخر
رغد : كانه ؟ الا تاخر وكثييير بعد
فرح : هذا صوت عزيز يصيح اوف ياهايل وينك مت جوع
ابوفهد : احمم بسم الله اصبحنا واصبح الملك لله
ندى : ابوي ابوي النحشه
ابوفهد : وين منحاشين ووش تسوون برا وانا محذركم ان فيه ولد ماهوب صاحي يدور عندنا
ندى : جعنا يبه وعطينا هايل فلوس يجيب لنا وراح ومرت ساعه ولا جاء
ابوفهد : دقو عليه طيب
ندى : كيف نسينا
ابوفهد : روحو ارقدو روحو
فرح : ليش قايم يبه الحين
ابوفهد : عطيني ماء ريقي ناشف
ندى : بسم الله عليك
ابوفهد : حلمت بامكم كانها تعبانه وقمت اصلي الوتر وادعي لربي يحفظها لنا ويطول بعمرها
ندى : عن اي حببب زمنا فيه وهذا حب الطيبين
رغد : كيوت الله يخليهم لبعض اسمعي فرح بسوي لنا اكل روحي عند ولدتس
فرح : يابعد كل الدنيا مدري وش بنسوي بدونك
رغد : يله يله هالسلوقي سحب علينا عطيته اخر ثروتي
ابوفهد : دقيتي على هايل وينه
هايل : السلام عليكم
ندى : وينك يالبغل رحت اخذت الفلوس وهربت
هايل : قربي اذنتس رحت عشيت النسيب
ندى : لا نسيب ولا غيره بطني اهم
هايل : اص خلاص نعوضتس بعدين ابوفهد شعندك قايم الحين
ابوفهد : جب عصاي ويله معي للمسجد نصلي الوتر
هايل : ابشر
~~~~ بطريقهم للمسجد ~~~~
هايل : تحاول تغطي دموعك بالغتره وانا اسمع صوت شهقاتك
ابوفهد : انطم وناظر الدرب بس
هايل : سم طال عمرك بس ليه تصيح وش الي صاير لدرجه نزل دموع ابوفهد
ابوفهد : امك
هايل : شفيها امي
ابوفهد : مافيها الا العافيه بس حلمت فيها انها تعبانه
هايل : بسم الله عليها تصيح يابوفهد من حلم
ابوفهد : مابقى لي من ريحه الطيبين غير امك ياهايل
هايل : الله يطول باعماركم وهذا مجرد حلم يالغالي
ابوفهد : امش نتوضى ونصلي وندعي
هايل : يله
~~~ بعد مرور اسبوع ~~~~
~~~ في بيت ابومحمد ~~~~
ابومحمد : عريس وللحين راقد وراك ماقومته يامحمد
محمد : عجزت فيه يبه من الساعه ١٠ وانا اقومه
ام محمد : ايه شكله مايبي يتزوج ندق على ابوها نكنسل ولا شنسوي
ابومحمد : مدري شنسوي بس دامه ماقام فبيروح العرس عليه وبيجي الرفض منهم هم
محمد : شكل هالزواج مافيه نصيب دق عليهم يبه اجله
عبدالرحمن : لا لا قمت هههههههههه
ام محمد : محد يعرف لك غيري يله اخلص قم تسنع مع اخوك
ابومحمد : انا عارف ليه يماطل ترا عيال عمك وصلو من الفجر وهذاهمم هايل وعزام يتحرونك تحت
عبدالرحمن : اي كان قلتو من زمان انهم من تحت
ابومحمد : كلنا بنروح مع بعض يله قم اخلص وانتي ام محمد ليه للحين مارحتو
ام محمد : ننتظر سياف يجي وشهد ونروح مع بعض عاد مدري حريم اخوانك وبناتهم بيجون معنا ولالا
ابومحمد : ابنزل اسال هايل وعزام
هايل : ياهلا بعمي
ابومحمد : هلابكم
ابوفهد : وينكم يخوي جايب لكم الصالون عشان يكفينا ولنا ساعه تحت
محمد : ماقام العريس ياعمي الا يوم قلنا له ان عزام وهايل تحت
ابوعزام : يهب ياصملاته يخلص علينا
ابومحمد : حريمكم بيروحون مشغل
ابوفهد : ايه بيوديهم فهد
محمد : عسى بيجي زامل بعد
ابوفهد : ايه ماشي من الساعه ٨ يمكن يوصل الظهر
ابومحمد : عزمت ابوخالد وبيوجب وبيجي
ابوفهد : ايه الله يحيه وابوسطام
ابومحمد : ابوسطام جاي من قبل يومين
عبدالرحمن : وسعود وصالح وعمر بيحضرون صح
هايل : ايه كلهم شجايك تبي تعزم الكل
عبدالرحمن : ابي كل الي اعرفهم يحضرون عمي ماعزمت احد من القريه
ابوفهد : الا كلهم بيجون الي يشتغلون فالسوق معنا والي عندهم مزارع عزمتهم وبيجي عمك ابوسامي وخويه الي شفتوه هناك
عبدالرحمن : زين زين يله مشينا لانتاخر
محمد : ايه كل ذا وماتبينا نتاخر امشو يله اركبو انا بسوق
هايل : واحنا محذوفين وراء فالشنطه يبه ليه ماطلعت المرتبه الاخيره
ابوفهد : سيقانكم طويله مارح تكفيكم
عزام : شغل اغاني يابوسالم
محمد : نسيت ولدي ايه هذا هو اركب وراء مع عمانك
هايل : تعال تعال ياسالم دايم منسي مثلي
عزام : شغل اغانيي مفروض دحيم وراء هو اصغر مني
ابومحمد : عاد هو العريس اعذرنا هالمره
عزام : ايه انا بعده باسبوع وخلني اشوفكم ماتسوون لي كذا سمعت يابوعزام
ابوعزام : انطم لاخلي العقال يلوفك الحين
هايل : ابوك تقل معصب
عزام : وهو متى ماعصب
هايل : يمكن مايبيك تعرس وتخليه
عزام : بعيش عندهم الين اشوف لي وظيفه وانقل
هايل : ايه الله ييسرها
~~~ في بيت ابوفاتن ~~~~
هديل : اهدي يابنت الحلال بتسوون زفه انتم
ميهاف : ايه بيحطون زفه
خوله : طيب خلاص المفروض ماتروحين مشغل يطلعون لتس فالقصر وتتزينين هناك
فاتن : مابي العرس خلاص ياجلونه ولا يتكنسل كيفهم
هديل : تستهبلين بعد كل ذا المحاولات ماتبين قومي تروشي انتي الحين وروقي وبسوي لتس قهوه وجايبه الحلا الي تحبينه وكل شى بيمر وبيخلص هاليوم
خوله : مانيب مصدقه ذي الي كانت تكرش عبدالرحمن من المركز الحين بتاخذه
هديل : اي حبيبتي رضخت للحب
ميهاف : الصراحه ماعرف كيف اشكركم يابنات اتعبناكم معنا بس تعرفون فاتن ماعندها خوات او ام وانا حامل وصعب علي اشيل معها واساعدها
خوله : تستهبلين اصلا لو ماعزمتوني بسوي لكم مداهمه
هديل : حبيبي ميهاف باي شهر انتي
ميهاف : امس دخلت السابع
هديل : ماشاء الله وش بنت ولا ولد
ميهاف : ماعلمتكم صبر بطلع لكم صوره السونار
خوله : كيييوت
ميهاف : وش وجهي وش تحسسون الجنين ؟
هديل : زايد جمالك شكله ولد
خوله : هو كل شى يعطي انه ولد بس انا ابي بنت وسميها خوله بعد
ميهاف : صح عليكم ولد
هديل : زوجه ابوك وبنتها بيحضرون
ميهاف : ايه حتى ابوي بيحضر الله يستر من المشاكل الا انتم متى زواجكم ووين بيكون
هديل : انا بعد شهر سطام نشب بحلوقنا وقدمنا عرسهم على عرسنا
ميهاف : خوله بتاخذ سطام صح
خوله : ايه وعرسنا يمكن بعد اسبوعين او ثلاث اسابيع
ميهاف : الله يوفقكم فالرياض ولا الشرقيه زواجكم
خوله : لا اكيد فالشرقيه
فاتن : بنات للحين ماكنسلتو
هديل : نكنسل وش
فاتن : الزواج
هديل : اقول امشي بس ابوك برا ينتظر بالسياره يودينك للقاعه
فاتن : مره بدري
هديل : وراتس جلسه تصوير وميكب وتسريحه ومابقى شى على اذان العصر ترا
فاتن : انا دخلت اتروش الساعه ١٠ شلون مابقى شى عالعصر
خوله : لتس ساعتين ياحبيبتي فالحمام الحين الساعه ١
فاتن : طيب بستشور شعري ونطلع طيب والفستان
هديل : عطتنا اياه ميهاف وركبنا كل شى عندتس اكسسوارات محدده بتلبسينها
فاتن : جايبين فالشبكه هم الماس بلبسه لان الذهب مايناسب
هديل : خلاص طلعي لنا الطقم والروب حق التصوير والطرحه والكعب والبسي عباتتس احنا ننتظرتس يله
فاتن : طيب الحين من القاعه لبيتنا ذا صح
هديل : ميهاف علميها
ميهاف : لا للفندق
فاتن : ماجهزت شنطه للفندق
هديل : لا عاااد يافاتن
فاتن : والله شدراني
ميهاف : انا زوجه ابوي كل شى سوته ف مادري
هديل : الله يصلحتس وشناطتس الي بتروح عاد لشقتكم عساتس مجهزتها
فاتن : اي اي مجهزتها
هديل : خلاص خلي ابوك يكلمهم ويقول لهم انهم بيجيبون شناطك لبيتهم انتي بتسكنين عندهم صح
فاتن : ايه
هديل : زين وخلي شنطه  للفندق وطبعا بكرا لازم بتروحون لبيت اهله تسلمون عليهم قبل تسافرون بنحط لتس شنطه جنب الدولاب اعرفي انها شنطه السفره تمام ؟
فاتن : يابعد الدنيا مدري شسوي بدونكم
هديل : بننقسم انا وميهاف بنرتب شناطك ببيتهم وخوله وانتي روحي للقاعه بتجي حقت الميكب والتصوير الساعه ٤ العصر
فاتن : طيب مره مدري
هديل : حقت البدكير والمناكير بتجي الساعه ٣ حبيبتي لاتنسين خوله خذو غداء معكم واغصبيها تاكل
خوله : اشوا انتس اخت زوجي المستقبلي
هديل : يله يله الساعه بتدخل ٢
فاتن : قلت لابوي يقول لهم
~~~~في سياره ابوفهد ~~~~
ابومحمد : يوه نسيت من فاضي فيكم او خلص
هايل : انا
ابومحمد : خذ مفتاح سياره ابوك وهذا مفتاح باب بيتنا افتحه بيجون اهل العروس يحطون اغراضها وبعدها ياولدي رح للقاعه وشيك وش الترتيبات وصور لي كل شى بيجون الحين ولازم احد يكون فالقاعه ويعلمهم
ابوفهد : يله عجل
عزام : انا خلصت بجي معك
هايل : عمي بشت دحيم وينه
ابومحمد : يالله يالنسيان فالبيت ماجبناه فيه له غرفه فالقاعه خذه من البيت الله يعافيكم ياابوي وحطه فالقاعه بس ركز ترا فيه غرفه للعروس وفيه غرفه للعريس
عزام : دامني معه ياعم حط يدك ورجلك بماء بارد هات انا بسوق
ابوفهد : والعشاء عساكم حجزتوه
ابومحمد : ايه بس للحين ماعطيتهم وقت متى يجون
ابوعزام : شفيك ناسي يابومحمد ماهو اول ولد يعرس عندك
ابومحمد : مادري ياخوي لاتلومني
ابوفهد : خلهم ١٠ يجون
ابومحمد : تمام تمام الو ام محمد شصار بموضوع المطربه
ام محمد : كل شى جاهز ٨ وهي فالقاعه بعد صلاه العشاء ان شاء الله
ابومحمد : والزفه متى نحطها
ام محمد : متى بتحط العشاء
ابومحمد : ١٠
ام محمد : خلاص زفتهم ٩ ويطلعون من القاعه للفندق بعد مانقلط الناس عالعشاء
ابومحمد : زين زين حقين التقديمات متى بيجون
ام محمد : ٦ وهم فالقاعه بس لازم احد عندهم يوجههم
ابومحمد : ارسلت هايل وعزام يشيكون على كل شى
ام محمد : خلاص قل لهم يدخلون قسم الحريم ويصورون لك رتبو الكراسي وكل شى مظبوط ويقعدون الين يجيبون التقديمات ويتاكدون يابومحمد ان فيه مداخن العود عندنا وعندكم بالمدخل
ابومحمد : طيب طيب يله ترا اهل العروس جو للبيت
ام محمد : اي مفتوحه غرفه دحيم
ابومحمد : يله اجل لاتتاخرون قبل المغرب كلنا فالقاعه
ام محمد : حنا كثار عسانا مانتاخر

انتهى البارت
قراءه ممتعه با اصدقاء 💞