"جابك الله في زحام العمر صدفة "

41

~~~ في استراحه سعود ~~~
سطام : يامرحبا ياصويحبي وش جاك تغيرت ونحفت
سعود : اختلاف اجواء شعرفك
سطام : والله كاني اشوفك ماسك بطنك وماتبي تاكل
سعود : بما انك عارف ليش تسال
سطام : اعرفك على اخوياي هايل وعبدالرحمن
سعود : يامرحبا والله الله حييهم
هايل : الله يحييك
عبدالرحمن : الله يحييك
سطام : تراهم عيال عم انا الغريب بينهم
سعود : شلون تحملتو سطام كل هالمده
عبدالرحمن : شنسوي فوق طاقتنا
سعود : جزت لي ههههههههههههههههههههههههههههههه تفضلو
سطام : وين باقي القروب
سعود : بيجون
سطام : امش ريحه طبخ اكيد صويلح الي فالمطبخ
سعود : عليك نور ازعجنا بطبخه ياعيال واخر شى نتسمم
صالح : واجهوني يالرخوم لاتتكلمون من وراي ايام الطفره وانتم تجون لشقتي  واطبخ لكم جحودين تراهم السلام عليكم انا صالح
سطام : وش عقبه
هايل : وعليكم السلام يامرحبا
صالح : هذولي هم اصدقائك
سطام : اي ليكون ماهم مالين عينك
صالح : بطردك وادخلهم معنا
عبدالرحمن : لا الحين انت اثبتت لنا انك جحود
صالح : ههههههههههههههههههههههههههههههه بذوقكم احلى بسبوسه بتاكلون اصابعكم وراها
سعود : ادخلوا ياعيال ادخلوا
عبدالرحمن : صوت اطفال استراحتكم مشتبهه فيها
سعود : بسم الله عليك اقعد اقعد ذا ولد صالح
هايل : متزوج !
صالح : شكلي اصغر صح
عبدالرحمن : كم عمرك
صالح : كم تعطيني
عبدالرحمن : يعني ٢٣
سعود : لا وين سطام ماصار كبركم تبون حنا كبركم
عبدالرحمن : سطام مانت كبرنا
سطام : صباح الخير يابوي لا عمري ٢٨
عبدالرحمن : وعقلك اصغر من عمرك
صالح : الوكاد ان عمري ٢٩ ومتزوج وعندي ولد عمره ٣ سنين ومنفصلين انا وامه
هايل : والله ماهو واضح عليك
سعود : لا لا كلنا كبار اكبرنا صويلح وعلى مشارف الثلاثين وطباخنا
هايل : شلون تعلمت الطبخ
صالح : ابقولكم قصتي بس امشوا المطبخ عشان ماتحترق بسبوستي
سطام : يلا وبسوي القهوه انا عمر وينه ماجاء
سعود : اسكت تكفى لايجي
سطام : خارشنا ذاك ههههههههههههههههههههههههههههههه
صالح : اي ياطويلين العمر انا وحيد امي وابوي ويوم جابوني كانو كبار يعني بين الاربعين والخمسين ربوني وكبروني وتزوجت خلصت الثانوي وانقبلت فالتقنيه بس بعيده علي فالقصيم ومابغيت اترك امي وابوي تعرفون كبار سن ومادخلت التقنيه قعدت بشاهدتي الثانوي ورحت ادور وظيفه منا ومناك ولقيت وظيفه امن عند حديقه عامه وتوظفت وكان راتبي حول ٥٠٠ مايسوي شى بس عالاقل اجيب مقاضي البيت ابوي ينزل له راتب تقاعد بس قليل وكنت اروح مشي على رجولي لمكان شغلي على انه بعيد بس يجون عيال حلال ويقفون لي وياخذوني يعني باختصار عانيت وكنت اجمع نيتي اباخذ لي سياره وجمعت لي مبلغ يجيب لي سياره فورد ومبسوط فيها واخذتها ومن ثاني يوم جاني حادث فيها وجلست غيبوبه حول سنتين باعجوبه عشت كان الحادث خطير ويومها درت امي ويصيبها مرض الشين حزن علي وتشوف الاجهزه علي سنتين وحيدها وانتم تعرفون الضنا شلون غالي لان ماجيت الا بعد علاجات وكلام ناس وتعبو امي وابوي المهم ياطويلين العمر قمت بعد سنتين ومنهار سيارتي وامي وتراكم كل شى وقمت الوم نفسي ورحت بدور وظيفه وعيت امي قالت راتب ابوك يكفينا حدنا ثلاث اشخاص يوم قمت من الغيبوبه وقتها كان عمري ٢٢ وجاني الحادث وانا بعمر ٢٠ المهم وقعدت عند امي وابوي ويضيق صدري عليهم ابوي يجي ويقول لي الجيران عازمين بعض ولا عزموني ياولدي وكنت ياله امسك اعصابي ابروح لهم المهم ويجي يوم رايحين انا وابوي للمسجد نصلي العصر فالرجعه يجي واحد من جيراننا ويتلفض على ابوي وعلي ويتكلم وانا مامسكت نفسي تهاوشت معه ماكان كبير مره ولا كان بعمر ابوي عشان احترمه وانزل فيه ضرب ويطلعون عياله وهواش قوي وانسجنت ٤ شهور تقريبا زاد تعب امي ونسيت الموضوع وهو الموضوع الاهم بس كانت تجي وتزورني وتعبانه مرهه عيت تروح تاخذ علاج او بالاصح ماكنا نعرف مستشفيات كويسه ولا عندنا امكانيه نروح للمستشفى ماعندنا سياره وعايشين على راتب التقاعد حق ابوي بين مقاضي وكهرب وماء اول ماانسجت ابوي راح يتنخى جارنا الي طقيته انا ويقول تنازل ومعيي ابد وعياله متوعدين فيني اذا طلعت كانو كلهم جيران ويعرفون بعض الا انا ماتعرفو علي
هايل : يالله كل ذا صار معك
سعود : هذا نقطه من بحر كمل كمل
صالح : المهم ووقتها رفض جارنا وابوي فقد الامل وانتظروا اربع شهور وطلعت واموري زينه وقتها ماكنت اعرف سطام وعمر وسعود كنت انا فالجبيل وهم فالدمام المهم ويوم طلعت وللحين متوعدين فيني عيال جارنا وكنت راجع من البقاله والقاهم متجمعين شكثرهم واطنشهم وامشي ويمسكوني ضرب ضرب كلهم علي واخذ لي واحد وشيطان بيننا وطاح عالارض الرجال ماكنت ابيها توصل لهالدرجه بس انقهرت ليه متجمعين علي كلهم نص ماسكيني ونص يضربون فيني وابد دخلت سنه و ٨ شهور
عبدالرحمن : وهم ؟
صالح : هم ٨ شهور بس
عبدالرحمن : اهم شى خذو جزاهم
صالح : ومشت الايام وطلعو هم وبقيت انا وابوي راح يتنخى ابو الي تعديت عليه انا ووافق يتنازل بس يبي تعويض فلوس يعني ووقتها ابوي كان توه نازل له الراتب والله يهديه خذاه واعطاه ذا والكهرب كان يطلبنا والماء مااهتم ابوي لكل هذولي واخذ راتبه وعطاه ذا وتنازل وطلعت وماارتحنا طفو علينا الكهرب وتوقف الماء لازم نسسد وماسددنا وقالو لو ماسدتتو بنطردكم من البيت ومطفين كل شى علينا وحقهم احنا ماسددنا وبهالوقت طلعت من البيت ومتضايق حييل ورجعت له وابوي مبسوط ويلبس ويكشخ واساله وشعندك ياابوي يوه اتذكر هذاك اليوم الله يرحمك يالغالي المهم واساله شعندك وين رايح قال جتني عزيمه بمجلس رجال وبيجي واحد له منصب وانبسطت وقتها ان ابوي انعزم وطلع صاحب هالعزيمه عمي ابوسعود وراح ابوي ويوم طلعو المعازيم جلس يتنخى ابوسعود يدور لي وظيفه وماقصر عمي ابوسعود طق صدره وقول وفعل وتوظفت عنده فالبنك على مكتب ومبسوط ونقلنا للدمام وقمت براتبي اسدد حق بيتنا الاول طبعا هم فاتحين زي السكن شقق
سطام : اي اي ولد عمهم متوظف عندنا فاهمين
صالح : اي والله انفتحت بيبان الرزق بوجهي وتوظفت وجتنا شقه ووقتها كنت اروح على رجولي لان ابد قريبين من بعض مبنى سكننا والبنك ومبسوط وشاد حيلي وامي وقتها زاد مرضها وجلست تقول ياوليدي شرايك تتزوج ابي اشوف عيالك قبل اموت وقلت لها تم الي تبينه يصير وانا بقلبي ماودي وقتها كان عمري ٢٤ وخطبت لي بنت خالتي ومدحت فيها واخذتها لاجل خاطر امي ولا انا ماكنت ابي اتزوج بهالعمر المهم ياطويلين العمر ومرت سنه وزوجتي ماحملت وامي بعد الي صار لها صارت خايفه تكون ماتنجب بس راحت وكشفت وطلعت حامل بولدي ذا ومرت شهور وولدت حرمتي وامي كانت طريحه فالفراش وتردد يوميًا انا بموت وانا بموت حرمتي وقتها انا موصيها على امي وابوي وتهتم لهم تعرفون كبار سن بس هي ماكانت قد هالمسؤولية وهاوشتها وضربتها ووديتها لبيت اهلها سمعتها تصارخ وتهاوش امي وحلفت امي علي ماادخل البيت الا ارجعها ورجعتها لاجل خاطر امي وعشان ولدي امي تبي تشوفه ودخلت ٢٥ سنه وامي توفت الله يرحمها ويجعل مثواها الجنه وابوي يوم عرف طاح وهي الطيحه صار طريح فراش يعني يحتاج الي يغير له وكذا انا وقتها رحت كلمت عمي ابوسعود وقلت بفصل ومدري ايش ووقتها الله يبيض وجهه قال لي لك اجازه بس لاتفصل وقلت تم ورحت اقوم بابوي وخلصت اجازتي ورجعت لشغلي ووقتها كالمعتاد اوصي زوجتي على ابوي وكنت ارجع للبيت اسال ابوي شلون تعاملها ويجلس يقول ياولدي زوجتك عصبيه مره وتحطني فالحمام وتروح وتتركني ماترجعني وانا ماقدر امشي واعصب عليها واضربها وكانت تقول ابوك خرف انا وش ذنبي وللامانه صدقتها بالبدايه لان ابوي وقتها كان في مرحله الخرف مره يقولك كذا ومره كذا وورجعت اروح لداومي وابوي ساءت حالته مرهه وكلما جلست عنده يقول اشتقت لامك حلمت انها دخلت من الباب وبتاخذني معها وقلبي يتقطع عليه مشت السنين وهواش بين زوجتي وابوي وصار عمري ٢٦ وولدي صار عمره سنه وكبر وصار يمشي وابوي انبسط عليه مره بس زوجتي قامت تقول لي ابوك يطق ولدك ومن هالكلام بس ماكنت اسمع له واقول كبير سن ياحرمه المهم وكانو يجون الاسعاف ياخذون ابوي لو صار له اغماء مفاجئ وعطوه علاجات وحرصو ياكلها وابره سكر لان ابوي مريض سكر لازم يدق ابرته وووصيت حرمتي على ابرته وعلاجه وكنت اسمع شكاوي من ابوي ان زوجتك اوجعتني بالابره وماتعطيني العلاجات ونفس السيناريو اهاوشها واحيانا مااصدق ابوي ويجي يوم ورحت للدوام وتعبت فيه واستاذنت ورجعت للبيت برتاح وعلى رجعتي الا اسمع صراخ ابوي وزوجتي وادخل القى زوجتي تدق ابوي الابره بقوه وبكل مكان ماهو في مكان واحد وعاد كنت مصدع وتعبان ومافيه قدامي غير اطقها والله طقيتها قدام ولدها وطلقتها بالثلاث ورمت الولد علي وراحت تزوجت مافكرت فيها وجلست عند ابوي واهتم له مابغيت اجيب شغاله وتسوي سواه زوجتي دخلت ٢٧ واركض بين ولدي وابوي وشغلي مر شهرين على علاجات ابوي وهكذا وفاقت روحه ومات جعله عظامه فالجنه هو وامي واخذت اجازه طويله ومنهار وولدي اهملته مره ماعندي لا ام ولا اب ومانيب مرغوب عند عمامي او خوالي وجاني عمي ابوسعود يشوف حالي وكذا وساندني وبوقتها تعرفت على سعود ودخلت مع اخوياه الي هم سطام وعمر وسمح لي ابوسعود اجيب ولدي للشغل معي وصرت هكذا الى يومكم ذا اجيبه معي واحيانا سطام مايقصر ياخذه ويحطه عند اهله وسعود يوم وبس هذي هي كل قصتي وشوفه عينكم بصير ثلاثيني السنه الجايه
عبدالرحمن : ليش ماتزوجت بعد حرمتك
صالح : مااخلي وحده غريبه تربي ولدي وتعذبه خلاص تزوجت عشان خاطر الغاليه وجبت ولد يكفيني فالحياه هو
هايل : سبحان الله هذي نهايه الصبر
صالح : اي والله ياخوك لايغرك الاشكال من برا الي داخل اعظم
هايل : الله يخليه لك ويبر فيك ويقوم فيك مثل قومتك بامك وابوك
صالح : امين وياك ياابوي خلصت البسبوسه
سطام : يلا ابحط القهوه
عبدالرحمن : بجهز الطوفريه
هايل : بسم الله وش ذا صوته
عمر : لو سمحتو الكل يسكت جاكم الحلو المسكت
سعود : وش فاجر برا
عمر : طراطيع ارحبو ياعيال ماعرفكم بس ارحبو
سطام : هذولي اخوياي
عمر : سطام جيت اخيرا مانورت الشرقيه
سطام : اسكت بس لادعسك طوله ١٦٠ ويهرج
عمر : ١٦٠ في عينك يتسذب ياعيال طولي ١٧٠
عبدالرحمن : وهي تفرق
عمر : ايوه وش قاعدين تسوون الله الله صويلح هنا يعني فيه اكل
صالح : وش جابك
عمر : للحين زعلان مني يابوتميم مالك داعي
هايل : اسم ولدك تميم
صالح : اي
هايل : الله يخليه لك يارب
عبدالرحمن : تصدق يابوتميم اخوي مثلك عنده ولده اسمه سالم فالروضه عمره ٧ سنين وامه متوفيه وجالس يربيه لحاله بس توه اقتنع يعرس وبياخذ اخت سطام
سعود : صادق ياسطام
سطام : والله مانيب راضي ياسعود
سعود : وعمي ابوسطام وش رايهه
سطام : فالبدايه رفض بس وافق انت اصبر يمكن يرفض
سعود : ابنتظر
هايل : ليش زعلان منك
عمر : هذا مسوي علينا انه ابونا
صالح : رايح يفحط مع عيال اعمامه لو صار لك شى
هايل : انت من ذا النوع
عمر : ليكون مانيب عاجبك
هايل : لا لا
سطام : نعرفكم عليه ذا اصغرنا واهبلنا صدق كانه بزر وولدنا كل واحد منا خايف عليه
هايل : الحين انتم من الاصغر ومن الاكبر
سعود : انا اقولك اكبر واحد فينا ابوتميم وعمره ٢٩ الشايب وبعدين سطام وعمره ٢٨ وبعدين انا عمري ٢٥ وبعدين هالبزر عمر وعمره ٢٢
عبدالرحمن : ووش جمعكم مع عمر صغير عليكم
عمر : انا اقولك احنا كنا جيران في حاره وحده فالدمام بدون ابوتميم ووقتها كنت راعي هوشات تعرفون مراهق وكنت امشي واطفي الكهرب عالبيوت ويومها صادني عمي ابو سطام وقال لو ماتتادب بشكيك ووعدته مااعيدها وحاول يدخلني فالشغل وهبلت فيه وعرفني على ولده وسطام دخلني بهالقروب طلع عندهم استراحة ويعني اجي عندهم وفصلت من شغل البنك وقررت اكمل جامعتي بس ماقبلوني ههههههههههههههههههههههههههههههه
سطام : باختصار نغصبه يجي معنا عشان مايروح يتهاوش ولا يفحط
هايل : ومتخاف وش بيصير بامك وابوك
صالح : زين واحد صاحي علمه فهمه
عمر : الا اخاف عليهم بس شسوي الانسان مبتلى
عبدالرحمن : يتحجج ههههههههههههههههههههههههههههههه
سعود : فتح تسجيل التقنيه سجل فيها
عمر : وش ذا الشله الي يفهمون بكل شى بلشه والله
صالح : اي انتم ياعيال عرفونا عليكم قم عمر وصب قهوه للضيوف
عمر : عشانهم ضيوف
عبدالرحمن : انا وهايل عيال عم وكبر بعض انا اهلي ساكنين فالرياض بس ابوي حاذفني اشتغل بالمحل حقه الي فالقريه وبس هذي كل الحكايه
صالح : ساكن لحالك فالقريه
عبدالرحمن : اي والله
صالح : ووش تاكل
عبدالرحمن : من البوفيه واحيانا هايل يجيب اكل وعلى هالحال
صالح : طيب ليش ماتروح لاهلك
عبدالرحمن : مطرود ابوي عنده محل عقار فالقريه وانا اشتغل فيه واخوي الكبير ظابط ويشتغل فالرياض ف مافيه الا انا فاضي
صالح : وانت
هايل : انا ساكن فالقريه انا واهلي واشتغل بين حلال المزرعه حق ابوي والمحل حقه
صالح : ماشاء الله مثابرين للحين طيب ليش ماتتوظفون عندنا فالبنك
عبدالرحمن : انا كرسيي جاهز عند ابوي بس يبوني اتزوج ويجيبوني للرياض
صالح : وليش ماتتزوج
عبدالرحمن : توني عمري ٢٣ يارجال
هايل : نصاب يحب له وحده بس مايدري شلون يفاتح اهله
سعود : فضحك ههههههههههههههههههههههههههههههه
صالح : وانت ماتحب بعد
عبدالرحمن : ها تقول لهم ولا اقول انا
عمر : وش ذا القريه البطله حب وتمعشق
سطام : يوه موضوع هايل طويل قل لهم
هايل : قصتي ياطويلين العمر انا كنت اشتغل فالمزرعه حقت ابوي ابوي اذا يبي يعاقبنا يودينا للمزرعه عشانها بعيده ومحد عندنا المهم وكان وقتها تو يفتح عندنا مركز صحي وفيه دكتوره تصير بنت خالتي بس ماعرفت الا بعدين
صالح : دقيقه دقيقه شوي شوي شلون ماتعرف انها بنت خالتك
هايل : انا اقولك قبل ماننولد وقتها كان عندي عمه بس ماتت الله يرحمها هذي عمتي متزوجه واحد اسمه صقر وهو نفسه ابو البنت الي احبها وكان قاسي على عمتي الين مرضت وماتت ابوي وقتها حقد عليه وصارت مشاكل ومقاطعه بينهم لدرجه البنت بكبرها ماتدري ان امها ميته وان ابوي وعمامي خوالها ابوها قايل لها ان امتس متزوجه وماتبيتس المهم ومشاكل بين ابوي وصقر ووقتها كان ليله رمضان ومن عوايدنا فالقريه نسوي عزيمه ونجتمع كلنا وهنا اختي عزمت الدكتورات هم ثنتين الجايات عندنا تدريب طبعا ابو البنت تزوج وحده وهالوحده عندها بنت متزوجه اخوي
عمر : انقلب راسي بس كمل بحاول افهم
هايل : المهم وقتها ابوي قال لي رح جب فناجيل ورحت اجيبها وبالصدفه شفتها فالمطبخ تكلم امي ووالله جازت لي ووقتها طاح علي سالم ولد اخو عبدالرحمن
صالح : يعني قصدك اخو عبدالرحمن محمد عنده ولد اسمه سالم
هايل : عليك نور هذي هي وطاح علي وتعرفون البزران فضيحه فكنت اوديه للبقاله بشرط يجيب لي اخبار البنت
سعود : الحب ومايفعل ههههههههههههههههههههههههههههههه
هايل : وكنت اكتب فيها القصايد واعطي سالم حلويات يوديها لها ويقول انها مني وبالصدفه هي عرفتني وكتبت لي رساله من محتوى الرساله اني انا بنت ناس وسمعتي تهمني ومالي بسوالف الحب والي يبيني يطق باب ابوي هنا زاد حبي لها المكابر تعلق المهم وكتبت لها رساله وكان المندوب بيننا سالم وعطيتها رساله محتواها ان انتي دين برقبتي ومحد ياخذتس غيري وحبي لتس شريف مابي صورتتس ولا ابي اقابلتس ولا ابي اسمع صوتتس بس ابيتس تعرفين اني احبتس وتوعديني ماتوافقين على احد غيري ومع الوقت حبتني وصار لقاءنا الوحيد المستشفى اذا تعبو اهلي اقابلها هناك وللامانه نتكلم شوي بس صادين عن بعض ومرت الايام وابد الشهر الي فات اخوي جاب لي جوال وهي خذت رقمي من اختي واخواني وخواتي يعرفون بحبي لها حتى عيال عمي وامي وابوي الكل صار يعرف بحبنا وطلعت تحب الشعر وصرت اكتب لها قصيد وتحب الخيل وحبيته من بعدها وسميت خيلنا على اسمها ووقتها كان جدي عايش جدي ماهو متهاوش مع صقر يتقابلون ويتزاورون وصقر يسلم على جدي ووعدني جدي يروح يخطبها لي بس مات الله يرحمه ونهايه الشهر ارسلت لي وهي تصيح تقطع قلبي عليها بس ما باليد حيله جتني تقول ولد عمي خطبني وابوي وافق ووقتها انهبلت انا الا اروح واخطبها ابوي متهاوش مع ابوها وعيا ابوي يجي معي جاء معي اخوي فهد الكبير وابوها عاند ورفض وعشمني عالفاضي وقال خل ابوك يجي ومايصير خاطرك الا طيب وابوي عيا عيا وكلمت عمي ابوسطام واقنع ابوي ورحنا للمره الثانيه نخطب وطلعت فكره ابوها يهين ابوي وقالها بوجهي البنت خاطبها ولد عمها وهو محامي وعنده وظيفه وانت عايش على محل ابوك هزتني هالكلمه وكسرتني وجلست اترجاه يحجزها لي وبدور وظيفه ومن هالكلام وابد كلمه لا مافارقت لسانه وتهاوش هو وابوي هوشه كبيره وابوي زعل وقال والله ماتاخذها مر اسبوع والبنت خلص تدريبها وعلى اتفاق ابوها اذا خلصت تدريبها بيحط الملكه وارجع للمره الثالثه واخذ اخواني الثلاثه وعمي ابومحمد ابوي رفض وعمي ابوسطام رفض بعد الي صار ومن حقهم الكلام الي جاء ماهو قليل واروح ويرفض وقال مالك نصيب والبنت ملكتها الاثنين وقلت له اني احبها وهي تحبني والله يهديني قلتها وبلشت البنت ابوها هاوشها وهي زعلت وحذفتني وانا ماياست حاولت بكل مااقدر بس هو رفض وابد هذا عرسها الجمعه
صالح : يالله تحملت كل هذا بهالعمر الصغير
هايل : هذا حال الدنيا
عمر : شدني كلمه انك تكتب القصيد هات قصيده
هايل : لاتذكرني ياعمر ماودي انذكر
صالح : عطنا قصيده ونعطيك رايننا
عبدالرحمن : ترا قصايده تطلع عالراديو
سعود : ياماشاء الله ياله عطنا قصيده
هايل : يقول ياسعود
احسب اني بقلبتس غير عن كل هالغالين
اثرتس تصنعتي لي المحبه ومشاعر الغرام
عديتتس غاليه بقلبي واغلا من نظر العين
وكتبت بتس حلو القصيد والابيات والكلام
عطيتتس صدق المحبه بقلبي ولا لي قلبين
وكل مناي احقق لتس جميع المنا والاحلام
اخترتتس وليفه لي من بد هالبشر والملايين
لكن جزيتيني على محبتي بوجع الاوهام
رحلتي واعدمتي فيني المشاعر والموازين
وخليتيني اسهر اوّن من الوجع ولا انام
ماعاد ادري وين خذتتس الدنيا وانتي وين
ولا عاد توصلني زين علومتس من عده ايام
ابتدا العام الجديد وبقلبي وجع الحنين
ليتتس تعودين لي ونبتدي من جديد هالعام
سعود : الله الله صح لسانك
صالح : صدقني ياهايل ماهي نصيبك
هايل : وصلتني رساله منها وانا فالطريق محتواها كان حبي لك وهم وهي راضيه بولد عمها
عبدالرحمن : عشان كذا قلت جزيتيني على محبتي بوجع الاوهام
هايل : الله يصلح الحال وانا اخوك
عمر : ليش تقول قصيده بسعود قل قصيده لي
هايل : ماقلت فيه قصيده ههههههههههههههههههههههههههههههه
عمر : شرايكم تتكون عندنا واحد يقصد لنا وواحد يضحكنا
عبدالرحمن : من قال اني مهرج
هايل : ياعيال بطلبكم طلب
سعود : سم
هايل : عرسها الجمعه وودي اكون اول الحضور
عبدالرحمن : متاكد يولد
هايل : اي دام حبها لي وهم ليش انا اعيش كل هالوهم لحالي
عبدالرحمن : لان انا لحالي اعرف انك كذاب بس بكيفك تم نروح
~~~ في بيت ابوفهد ~~~
ام فهد : والله البنت ماتستاهل الي يصير لها
ابوفهد : يابنت الحلال النصيب لاجاء ترتبت الامور
ام فهد : ماشفت كلام ام محمد الله يهديها الله لايلومهم
ام فهد : وش تبين اسوي انا ابي الخير لبنت خويي ولولد اخوي
ام فهد : وش فيتس بسم الله عليتس
ندى بدموع : اشتقت لهايل وينه
ابوفهد : تبتسين عشان اخوتس ماهو موجود
ندى : له كم يوم متغير ومشتاقه له
سياف : وشفيها بسم الله عليها
ابوفهد : تبتسي تبي اخوها هايل
سياف : ههههههههههههههههههههههههههههههه ماهي صاحيه
ام فهد : وش صار معكم يولدي
سياف : دقيقه ابقعد تعبت من الطريق ابد ياحلوه اللبن رحنا وكشفنا وطلعت بالشهر الثالث وجلست تحرص ماتشيل ثقيل ومن هالكلام
ندى : وش بتجيب
سياف : توها فالشهر الثالث مايوضح
ام فهد : الله يسهل عليها
ندى : لو ولد وش بتسميه
سياف : والله مدري مافكرت فيها
ندى : لو بنت سمها ندى
سياف : تم
ندى : يس
ابوفهد : ودموع التماسيح وين اختفت
ندى : سياف يعوضني عن هايل هات فنجالك يبه
سياف : اتركوها هذي عليها طواري
~~~ في بيت صقر ~~~
ميهاف : فاتن فاتن
فاتن : بسم الله وش فيتس
ميهاف : قرا الرساله بس مارد
فاتن : وش تبينه يقول
ميهاف : قاريها من ثلاث ساعات بس مارد
فاتن : طيب خلاص بلكيه بكرا عرستس
ميهاف : يكتب يكتب يمه خايفه
فاتن : انا شدخلني ترمين الجوال علي
ميهاف : خايفه وش بيقول
هايل :
جاني الخبر ياميهاف واظلم الكون
قدام عيني ثم نطقت الشهاده
على العموم اقولها لتس الف مليون
مبروك من قلب شكالتس ابعاده
انا اول العالم على القصر يلفون
هايل اول معازيم الفرح والحداده
وصيتي لو جاك ولد وانا امون
سميه هايل قبل الولاده
ميهاف : يالله بصييح والله فوق طاقتي والله مجبوره ياهايل
فاتن : دقيقه دقيقه اقري السطرين الي قبل الاخير
ميهاف : انا اول العالم على القصر يلفون هايل اول معازيم الفرح والحداده
فاتن : يعني بيحضرالعرس !
ميهاف : ترا هو وعبدالعزيز يعرفون بعض
فاتن : ولو قال شى لزوجتتس
ميهاف : ماتوقع يسويها يمه ارسل
هايل : القصيد الي حبيته منتس بيسمعونه كل الناس الا انتي وسمييتس من الخيول امانته عندي ولا يلحقتس لوم ابعتبر نفسي اني انا الغلطان وانا المخطي والف مبروك من وراء قلبي الله يسمح لتس دربتس
فاتن : الله يسعده ليته نصيبتس ياميهاف
ميهاف : اخ يافاتن قلبي يتقطع
ام عفراء : شعندكم هاجدين بالغرفه
ميهاف : وش تبين
ام عفراء : خلي الصياح لاتتفخ عيونتس عرستس بكرا وانتي الثانيه ابوتس برا اطلعي له
فاتن : يلا استودعتس الله بكرا الصبح ابجيتس
ميهاف : اي تكفين لاتنسين
فاتن : لا شدعوه
ميهاف : عزمتي احد من البنات
فاتن : عزمتهم كلهم هديل قالت بتجي وخويتها خوله بتجي اما الباقين مادري
ميهاف : معهم حق اخوهم ليش يجون
فاتن : لاتزعلين نفستس وحاولي تحذفينه قبل تطلع الشمس وتنسين ويشوف جوالتس عبدالعزيز
ميهاف : لا معليتس بحذفه الحين
فاتن : فمان الله ياحبيبتي

انتهى البارت

قراءه ممتعه 💙💙💙