"جابك الله في زحام العمر صدفة "

49

~~~ في بيت ابوعزام ~~~
عزام : ليش تهاوشت مع عمي ابوفهد
ابوعزام : سالفه طويله لاتجيب طاريه عندي
عزام : يبه انت تعرف اني ابي بنت عمي ومن زمان قايل لك مارح اخذ غيرها ليش تخرب
ام عزام : اهدا يولدي انت ماجاك من العلم الا القليل
عزام : تكلم يبه ليش تهاوشتو ليش
ابوعزام : انساها بنت عمك ماتبيك
عزام : وش صار خطبها واحد ثاني قبلي ماطلت فالموضوع انت
ام عزام : عزام اطلع برا البيت
عزام : طالع يايمه طالع ومالي رجعه الين اخذها ورايح اسال عمي وش صاير
ابوعزام : ان رحت له لاني ابوك ولا اعرفك
عزام : يبه تكفى لاتقول كذا تكفى لاتروح لغيري
ابوعزام : جاك العلم
عزام : الله يسامحك انت وعمي هذا طبعكم تمشون وراء شوركم بس
ام عزام : عزام عزام يولدي ارجع
ابوعزام : خليه ينقلع الله لايرده
ام عزام : استغفر ربك يارجال ذا ولدك وبيشيل اسمك
ابوعزام : مايصدق ابوه رايح يسال عمه ماهو ولدي ذي
ام عزام : الله يصلحكم
~~~ في محل ابوفهد ~~~
هايل : يقول ياعبدالرحمن
عبدالرحمن : لاتقول لي ولا اقول لك الشغل واصل فوق راسي
سياف : انا الي اشوفه صدق ولا اتخيل
هايل : وش تشوف
سياف : ذا عزام ولا انا غلطان
هايل : الا والله هلا بعزام وينك يارجال سحبت عليها
عبدالرحمن : جازت له الرياض
عزام : هلا فيكم ياعيال
سياف : من رحت الرياض وانت متغير وش علمك
عزام : مانيب راجع للرياض
هايل : افا ليش
عزام : بفصل من شغلي
عبدالرحمن : تستهبل وانت مشغلنا بشهادتك وتبي وظيفه يوم لقيت تبي تفصل
عزام : خلونا من موضوع الوظيفه هايل سياف بسالكم وجاوبوني بصدق انفداكم
سياف : اي ابشر وش العلم
عزام : وش صاير بين ابوي وعمي
هايل : قصدك ابوي وابوك
عزام : اي
هايل : ماصار الا كل خير
عزام : بموضوعي
هايل : من كثر المشاكل والمواضيع الي صارت لاتشرهه علي ان نسيت وش موضوعك
عزام : وش لي موضوع مع عمي برايك
سياف : قصدك الخطبه
عزام : زين احد صاحي هنا بتجيبون لي الجنون
عبدالرحمن : لاتشرهه عليه امسحها بوجههي
سياف : والله ياعزام بكل اختصار مالك نصيب عندنا
عزام : وليش مالنا نصيب ماينقصني ولا شى
سياف : ماهو كل مرفوض منقوص
عزام : عطني سبب طيب
سياف : صلت استخاره وما ارتاحت
عزام : مافيه امل يعني
هايل : اسمعني وانا اخوك انا مريت بهالشي ولا ودي احد يمر انا برجع افتح الموضوع مع اختي واذا فيه نصيب محد بيوقف بوجيهم
عزام : بس ابوي وابوك متهاوشين
سياف : تنحل تنحل اهم شى لاتفصل ان فصلت ماتمسك يد اختي هذاني عطيتك العلم
عزام : لاتبنون لي بيت من الاحلام ويهدمني نسناس من الرفض
هايل : مارح اوعدك بس بحاول
عزام : عبدالرحمن اهلك فالبيت
عبدالرحمن : لا ليش
عزام : متهاوش مع ابوي ومايبي يشوفني برقد عندك
عبدالرحمن : بشروط
عزام : اخس يالنذل وش هي شروطك
عبدالرحمن : ماتجي ويدك فاضيه مره غداء ومره عشاء ومره فطور ومره حلويات
عزام : من هذي الناحيه تم
عبدالرحمن : حياك اجل في بيت عمك
عزام : الله يحييك هات المفتاح تعبان من الطريق
عبدالرحمن : ها امسك ترا ابوسالم فالبيت
عزام : زين زين
عبدالرحمن : منجدكم انتم بتكلمون عمي بالموضوع مره ثانيه
سياف : بنحاول يمكن محاولتنا فيها خير
عبدالرحمن : انا اقول لو ماعشمتو الرجال قد انه اشوا لكم
هايل : لاتقطع الامل بوجيهنا احنا ماعشمناه احنا قلنا بنحاول واحنا بجد بنحاول
عبدالرحمن : الله يهدي عمي ابوفهد اذا طلع واحد يبي الثاني عيا وسوا مشكله واذا اثنينهم مايبون بعض عاند والا يوافقون ويعرسون
سياف : ابونا شنسوي مانقدر نقول لا
عبدالرحمن : اي الله يخليه لكم ويطول بعمره
سياف : الا انت متى بتعرس
عبدالرحمن : لاقي لي عروس
هايل : اترك هالدفتر تقل بتصيد لك شى
عبدالرحمن : مشغول مشغول بس ناطل اذني معكم
هايل : هي وقفت عالاذن كل شى معنا الا اصبعك مع الدفتر
عبدالرحمن : احمدو ربكم اشارككم سوالفكم الخاثره
سياف : لاتضيع سوالي جاوب
عبدالرحمن : لاقي لي حرمه طيب ؟
سياف : ماكنت تحب ذيك الدكتوره ولا بعد هي تزوجت
عبدالرحمن : ذكرتني فيها نسيت اسالها عن ابوها عن اذنكم ياعيال
هايل : اي عشانها صار فاضي
عبدالرحمن : اسكت اسكت لاذكرك بماضيك
هايل : اهخخ ليته يرجع هالماضي اما اعدل اخطائي ومااشرع لها بيبان قلبي ولا اروح عند باب اهلها واخطبها قبل ولد عمها
سياف : قطع طاري قم قم فيه زبون هناك
هايل : صب لي شاهي جاي
سياف : قم ولا تتامر
~~~ عند عبدالرحمن ~~~
عبدالرحمن : الو
فاتن : رجال دقيقه اعطيك ابوي
عبدالرحمن : لا لا انا عبدالرحمن
فاتن : عبدالرحمن من عبدالرحمن ؟؟
عبدالرحمن : افا نسيتيني
فاتن : لا متذكرتك بس اشكك بنفسك
عبدالرحمن : اعذريني على اتصالي المفاجئ بس ماعندي رقم عمي وقلت بتصل عليتس
فاتن : مو مشكله وش بغيت
عبدالرحمن : وشلون عمي
فاتن : بخير وشلون اهلك انت ؟
عبدالرحمن : بخير وشلون خاله ام سامي وولدها
فاتن : كلهم بخير الحمدلله
عبدالرحمن : تشافى ولدها
فاتن : مستحيل بهالسرعه ماشين على كورسات العلاج وان شاء الله بيتشافى
عبدالرحمن : قبل اقفل بسالتس عن شى
فاتن : بسرعه فيه مريض جاء
عبدالرحمن : مشغوله
فاتن : اي قاعد تكلم دكتوره اكيد مشغوله كل الوقت
عبدالرحمن : خلاص روحي للمريض مع السلامه
فاتن : شفيه زعل ذا يحسب انه وقته للزعل والرضاء
عبدالرحمن : مافيه وقت تفضى لزوجها المستقبلي كل حياتها شغل شغل شغل بتموت وهي تشتغل يوه وش قاعد اقول بسم الله عليها
سياف : من تكلم
عبدالرحمن : اكلم نفسي
سياف : الحمدلله والشكر
عبدالرحمن : ابشركم ياعيال ام سامي بخير وولدها بخير
هايل : اهاا الحين عرفت ليش قاعد يكلم نفسه
عبدالرحمن : انقلع انقلع
سياف : اقوم دحيم بسالك
عبدالرحمن : كثرت اسئلتك انت واخوك
سياف : خذ العلم اخوك متى ناوي يحط عرسه احسه طول
عبدالرحمن : والله ابوسالم ذا لحد يسالني عنه جايه انفصام حاد الله وكيلكم
هايل : ليه وش فيه من بلاء
عبدالرحمن : مره يبي البنت ومره مايبيها ومره هو مقتنع وارتاح لها ومره امي وابوي غاصبينه وعلى هالحال من نصبح الين نمسي مشغلنا كلنا
سياف : اشوف شهد جوالها مايطفى مكالمه وراء مكالمه
عبدالرحمن : الله يعيني انا واياها ماندري نسمع لمن
هايل : بس بحق عيب الي يسويه اخوك
عبدالرحمن : عجزت وانا اقول له ولامي ولابوي يايبه عيب يايمه ماتبونهم كنسلو ذا زواج ماهو لعبه وولدتس متزوج وعنده ولد والينت ماسبق لها وتزوجت وراضيه تبعد عن اهلها وتربي ولد ماهو ولدها مانتم لاقين مثلهم وامي معنده لا يعني لا وابوي يقول اي ماعاد ادري وش اسوي مستحي من سطام والله
سياف : وشدخلك تستحي الي يستحي اخوك هو الي طولها وهي قصيره بنات الناس ماهم لعبه
عبدالرحمن : انصحه كان فيك حيل تتحمله
سياف : والله نصحته وفهد نصحه والكل نصحه بس الي ماوده ماهو مقتنع
هايل : ماوده خلاص يكنسل كل شى يخوي ماصارت
عبدالرحمن : انا انتظره يحل امره لان انا انتظرت كثيير بتزوج بعد
سياف : وشوله مستعجل
عبدالرحمن : ابوفي بوعدي لبنت الناس قبل اموت
هايل : اعوذ بالله انطق منطق خير
عبدالرحمن : بعد عمر طويل لي ان شاء الله
سياف : والله من الهبد الي براسك ماتتغير
عبدالرحمن : يلا يلا انقلعو خلوني اشتغل عطيتكم وجهه
هايل : ابروح اجيب شاهي وفصفص ماتبون انتم صح
سياف : الا جب
هايل : زين انكم ماتبون
سياف : المعاند وراثه بشجره العائله كلها
عبدالرحمن : وانت اولنا ههههههههههههههههههههههههههههههه

انتهى البارت

اجازة سعيييده بما ان الكل عنده ويكند بصير انزل البارتات بشكل شبهه يومي واعذروني مقدر ارد عليكم هنا يرفض الواتباد بس اقرا كلامكم بكل حُب دعمكممم بقلبيييي واعذروني لو البارتات صغيره بعوضكم ان شاء الله ❤️❤️❤️❤️