"جابك الله في زحام العمر صدفة "

13

~~~ في بيت ابو محمد~~~
فاتن : من انت ؟
عبدالرحمن : ولد جيرانكم
فاتن : هات الاكل
عبدالرحمن : عز الله ماتطلعين الا لاكل
فاتن : ومره ثانيه لاتدف الباب كذا وانت عارف فيه بنات غريبات عندكم
عبدالرحمن : اي ان شاء الله اوامر ثانيه بعد الحلال حلال ابونا وعلى حقنا يناشبونا
ميهاف : وشفيتس معصبه
فاتن : ذا المريض دف الباب علي بقوة احسبه حرامي
ميهاف : ومن طلع
فاتن : من غيره عبدالرحمن
ميهاف : اها طيب فاتن بسالتس سوال
فاتن : ياكثر اسالتس هاتي
ميهاف : متاكدة هايل ماعطاتس رساله او شى او يمكن حطها وانتي ماشفتيها
فاتن : رجعنا اقولتس ماجاء للمستشفى بكبره وخلاص انسيه وكولي
ميهاف : معقولة كلامي ماعجبه او هو نيته عكس ليه يتركني بحيرة ولوم الله يسامحه بس
فاتن : بزر هدى ذا ابسد حلقة بطريقتي
ميهاف : هيه هيه اجلسي بيت جده وبتطاولين عليه
فاتن : والله جده الي معطي المستشفى احقيه يسكنون بنات التطبيق ودافعين له فلوس ترا مو مجانًا
ميهاف : خلاص اقعدي وكولي
فاتن : عشانتس بس
~~~ في بيت ابو فهد ~~~
ام فهد : يلا ياندى استعجلي بالفطور بيجون الحين
ندى : أبشري يمه تكه ويخلص
هايل : على ان ماتستاهلين بس بساعدتس
ندى : زين تذكرت ان عندك اخت مكروفه لحالها
هايل : ماتبين البس مريله واشتغل معتس
ندى : وليش لا يمكن تشوفك ميهاف ويزيد حبها
هايل : ميهاف على طاريها تتوقعين قرت رسالتي
ندى : اعطيتها اياها ؟
هايل : اعطيتها خويتها ماكانت هي بالمركز
ندى : تثق بخويتها
هايل : اي يعني اكيد بتعطيها الرسالة
ام فهد : سنه بالمطبخ يالرفله هايل وش تسوي هنا
هايل : يلا خذيلتس لقب جديد يالرفله والله ياحلوة اللبن قررت اساعد اختي بما ان بقينا انا وهي
ام فهد : اترك الملاعق وخذ ابريق الشاهي ووده يلا وجب خبر معك من الفوال تميس حار
ندى : جبه بالجبن تعرفني احبه
هايل : اي تامري وانا انصلخ بالحر ادور لتس خبز
ندى : وانا انشوي هنا عشان اسوي لك فطور
هايل : لازم نوقف نذل بعض عشان تمشي حياتنا
ندى : ابتزوج وافتك منك
هايل : اي احد يجيتس برفضه
ندى : على اساس برايك الموضوع
ابو فهد : هايل وصمخ ماتسمع امك شقالت لك يلا رح للي امرتك عليه ومر شف اخوك سياف طمنا عليه
هايل : اي اي ابشر يبه وتبشر امي ابروح ذي الي يقعد معها يضيع يومه بدون فايدة
ندى : اجل نياقك الي لهم فايده كل حياته جالس يحلب فيهم
ابو فهد : وانتي استعجلي بالفطور
ندى : اي يلا لاحقتك للمجلس
~~~ في الشارع ~~~
هايل طلع متنرفز من البيت لان كل شوي يامرونه : ليت سياف يقوم ويرجع يساعدني يااني كنت بنعيم بوجودة
ابوفارس : من تكلم انت
هايل : هلا بعمي ابو فارس ارحب عيدك مبارك شلونك
ابوفارس : بخير الحمدلله شلون ابوك وعمامك
هايل : كلهم بخير وينك ماتعيدت بالديرة اشتقت لقصصك
ابوفارس : انتبه لاتصير انت احد قصصي
هايل : ليه انتبه
ابوفارس : ابحط فيك النون ومايعلمون انت بكيفك
هايل : لا لا اجل فكنا
ابوفارس : صحيح ان ولد عمك عزام توظف بالاسكان
هايل : اي والله توظف ومعه مجموعه من العيال
ابوفارس : اي اي معه ولدي فارس ماجاني علم ولد عمك الا من ولدي
هايل : انت بعد ياعمي ماتجلس عندنا بالقرية
ابوفارس : رحت انا وام فارس نتطمن على ولدنا تعرف وحيدنا
هايل : الله يخليه لكم والله مشتاقين له بجمعتنا
ابوفارس : فكه الله من جمعتكم مغير تهرج بهالقصايد جب جب الخبر
هايل : قصايدي احسن من قصصك
ابوفارس : لاتطول لسانك وقل لابوك ترا اليوم يمكن اجيه
هايل : اي فوق العيد والعرس عزيمتك كملت ياهايل كلها على ظهرك
ابوفارس : افا من الي اعرس لاتقول انت
هايل : واذا انا ماتبيني اعرس
ابوفارس : لا ابخليك تنتظرني اجيب بنت وازوجك اياها
هايل : والله ماعاد ينعرف لك ياعمي مره فيني الشينه ومره بنزوجني بنتك الوكاد ان الي اعرس اخوي فهد واختي الصغيره
ابوفارس : من ناسبتو
هايل : ناسبنا عمتي
ابوفارس : ابو خالد تقصد
هايل : اي
ابوفارس : وليش يوافق ابوك يعطي اختك خالد وهو مايعرف بعلوم المرجله
هايل : علوم المرجله عند الرجال واهم شى يصون بنتنا ويلا استاذنك ينتظرون الخبز
ابوفارس : سلملي على ابوك سلام كثير
هايل : يوصل ياعم ، مر من عند المركز ويناضره بنضره شوق ينتظر رسالة جديدة تبري شوقه : الله يجعلتس من نصيبي ياميهافي
~~~ في المركز ~~~
ميهاف : هذا ثالث يوم ولا رد اوريك ياهايل
فاتن : من تكلمين
ميهاف : اكلم نفسي والوم حظي الخايس
فاتن : اوه مشكله جديدة تكلمي وشفيتس
ميهاف : مافيني شى خلاص لان لو قلت لتس بترجعين تفتحين لي مواضيع
فاتن : اي عرفت من شاغل بالتس
ميهاف : ابروح اشوف اخوه يمكن هو يكون عذر لقائنا
فاتن : حتى المريض مهو مخلينه براحته
ميهاف : اوه قمت تسمعنا تشوفنا يوجعك شى
سياف برجفه وصعوبه والم : وش صار على فهد ومحمد
ميهاف : كلهم بخير الحمدلله وطلعو من المستشفى امس وتزوج اخوك فهد
سياف : كم يوم لي هنا
ميهاف : أربع ايام
سياف : كل ذا صار باربع ايام
ميهاف : اي يوجعك شى
سياف : اي
ميهاف : وش يوجعك ؟
سياف : احس ضباب على عيوني مااقدر اشوفتس وراسي احس كان فيه ماء وجسمي كله يوجعني واحس بخمول
ميهاف : يعني مفروض ماتصحى الحين لانك دخلت بغيبوبه
سياف : يعني برجع اغمض عيوني
ميهاف : احتمال مافيه شى اكيد جوعان اجيب لك اكل
سياف : اي
ميهاف : طيب وانت ارتاح بعطيك مغذي على مايجي اكلك
سياف غمض عيونه من التعب كانت قومته اشبه بالمعجزة قام يتطمن على اخوه وولد عمه ورجعت عيونه تتسكر
ميهاف : الله يقومه بالسلامة كنت عارفه ان بيرجع يغيب
فاتن : وش صار عليه
ميهاف : قام خمس دقايق يسال عن اهله وقال انه تعبان وجوعان ورجع ينام
فاتن : الله يشفيه ويقومه بالسلامة فيه حاله بغرفه الانتظار شوفي لها
ميهاف : تمام واذا قام ودي له اكل
فاتن : طيب
~~~ في بيت ابو فهد ~~~
ابوفهد : مريت اخوك ياهايل
هايل : لا والله ابفطر وبزوره
فهد : لاتروح لحالك انتظرني ابجي معك
ابوفهد : ها شلون ليله امس
فهد : وتسالني يايبه
ابوفهد : لاترجع تفتح علينا مواضيع سكرناها بطلوع الروح انت اخذت احسن البنات
فهد : ابشر ابشر مايصير خاطرك الا طيب يلا ياهايل مشينا
هايل : اي يلا
زامل : ابروح افتح المحل يايبه بتجي اليوم
ابوفهد : اي ابجي انتظرني ابسلم على حرمه فهد وبنروح
زامل : على خير
~~~ في بيت ابو فهد بمجلس الحريم ~~~
ام فهد : ها يابنتي عساتس مبسوطه مع فهد
زينب : الحمدلله ماعلينا ياخالة
ام فهد : ترا فهد حليل وطيوب ومع الوقت بتعرفين وشقصدي
زينب : ان شاء الله
عفراء : زينب تعالي لغرفتي
ام محمد : واضح ماهي مرتاحه البنت
ام فهد : الله يصلحك يافهد وش نسوي ياام محمد اصالي من واشيا هم من كبرو وكبر همهم وانتي اعرف
ام محمد : اي والله شايله هم ولدي محمد وحرمته
ام فهد : الا وشلونها اشوف وجهها تقل تعبان
ام محمد : والله ياام مدري وش اقول بس الله يعين البنت حتى ماتنام بنفس غرفه زوجها امس نامت عند شهد
ام فهد : ليه وش بلاها تسوي كذا
ام محمد : على ماتقول وفهمت ان تحس بتانيب ضمير على محمد وسالم وتحس انها مقصره وبنفس الوقت مغير سالفه هالموت على لسانها
ام فهد : لا بسم الله عليها مواعيدها ماشيه والعلاج ماشي
ام محمد : اي بس بيني وبينتس الدكتور يقول جسمها ماتقبل العلاج
ام فهد : ياعمري عليها الله يخليها لزوجها ولولدها
ام محمد : امين ويقوم سياف بالسلامة
ام فهد : امين يارب
عفراء : اي قولي لنا وش صار مااقتنعت بكلامتس مع خالتي
زينب : وش اقول وش اخلي
ندى : قولي كل شى
زينب : اعذريني ياندى بس اخوتس نفسيه واول مادخلنا استقبلني بكلامه الي يسم الجسم تراني ماابيتس ومغصوب عليتس وانا قلت كل الي بخاطري وعلمته اني اعرف بموضوع حبيبته
عفراء : انتي غبيه ليه تعلمينه كذا قدامتس بيكلمها ولايهمه
زينب : على اساس انا يهمني
هدى : ياحبيبتي يازينب عفراء قصدها ان لو ماقلتي له رح يحط لك مليون حساب ومايقول قدامتس لان خايف تروحين تقولين لابوتس بس الحين عرف انك عرفتي ف بيصير يسولف معها قدامتس
زينب : عادي خل يسولف ويتزوج مايهمني انا بسكن هنا وعندي عفراء وندى
ندى : بس شغل اخوي بالرياض مو هنا
زينب : يروح لحاله انا بقعد
عفراء : اي شاطره طيري نصيبتس بيدينتس خليه يروح عندها
زينب : هو مايحبني وانا مااحبه خلاص
هدى : وشعرفك الزمن وش كاتب لكم
زينب : الله يكتب الي فيه الخير
~~~ في السوق ~~~
ابو محمد : غريبه للحين اخوي مافتح محله
عبدالرحمن : اقول يبه بقولك شى
ابو محمد : قل ياكثر ماتقول
عبدالرحمن : وشرايك ننقل محلنا للرياض واصير عندكم
ابو محمد : لا مكانك انت هنا عاد لامنك اعرست والبنت ماتبي تسكن هنا في نقاش ثاني
عبدالرحمن : اخر كلام ؟
ابومحمد : اي
ابوفارس : السلام عليكم
ابو محمد : هلا هلا والله يالله حيه ابوفارس وينك لك فتره مافتحت حلالك
ابوفارس : الله يحيك والله يااخوي رحت مع ولدي للرياض الين توظف وامنته ورجعت
ابو محمد : ماشاء الله فارس كبر وتوظف وين
ابوفارس : والله توظف في بنك ويقول ان عزام ولد اخوك ابو عزام معه بنفس الشقه حتى
ابومحمد : يوه ياصغر الدنيا وياحلو هالصدف الله يوفقه وعقبال عرسه ان شاء الله عبدالرحمن يولدي صب لنا قهوة
عبدالرحمن : اي هذي شغلتي بس ابشر يبه
ابومحمد : الله محييه ابو فارس اخوي ابو فهد وابو عزام بيفتحون الحلال بعد شوي والله بيستانسون بجيتك
ابوفارس : الله يحييهم والله انا يوم رجعت للقريه رجعت لي روحي
ابومحمد : لاتبالغ يبوفارس انا ساكن بالرياض واجي زيارات هنا ولا يتغير فيني شى
ابوفارس : ماتعودت تعيش كل عمرك هنا واسال اخوانك الثنين
ابومحمد : اي اذا على كذا فانت صادق
ابوفارس : صحيح تزوج ولد ابو فهد وولد ابوخالد ؟
ابومحمد : اي امس عرسهم لو انك مبكر بالجيه كان اول الحضور
عبدالرحمن : تفضل فنجالك ياعمي
ابوفارس : مافاتنا شى يبو محمد ان شاء الله احضر عرس عبدالرحمن
ابومحمد : اقنعه يعرس جنني ماسك كلمة لا
ابوفارس : افا ياعبدالرحمن وشفيك ماتبي تكمل دينك
عبدالرحمن : توني صغير ياعم
ابوفارس : لا منت صغير شكبرك يمشي على زندك التيس
عبدالرحمن : الله بسعدك ياعم اقنعتني
ابومحمد : اشتقنا لقصصك متى جمعتنا
ابوفارس : الليلة ان شاء الله نجتمع بالديوان حقي
ابومحمد : امشي الظهر للرياض
ابوفارس : وش وراك تمشي الحين للحين اجازه العيد ماخلصت اقعد توني شايفك الحين
ابومحمد : والله لي فترة هنا وتعرف انا ملول
ابوفارس : عبدالرحمن بيقعد هنا
ابومحمد : اي اكيد
ابوفارس : اجل اليوم قصتي عن الزواج وانت دربك خضر عبدالرحمن امانه عندي ابوصي ام فارس يوميا ترسل له فطوره وغداه وعشاه
ابومحمد : ماتقصر والله يبو فارس وعاد طبخ ام فارس محد يقدر ينافسه
ابوفهد : السلام عليكم هلا هلا والله ببو فارس حي الله ذا الوجه
ابوفارس : هلا والله بالعضيد مبروك عرس عيالك
ابوفهد : الله يبارك فيك شلونك شلون حياتك
ابوفارس : ابد الحمدلله
ابوفهد : وين فارس مااشوفه معك
ابوفارس : فارس توظف مع عزام ولد اخوك
ابوفهد : ياماشاء الله الله يوفقه
ابوعزام : يامرحبا سمعت صوتك وانا توني بفتح محلي
ابوفارس : ياهلا فيك
ابوعزام : سمعت ان ولدك توظف مع ولدي
ابوفارس : اي والله وكلهم بشقة وحده
ابومحمد : خلصنا تكلم يابوفارس في بافمك كلام
ابوفارس : ابتكلم بس ودي بيننا ماتطلع
ابومحمد : فهمتك عبدالرحمن رح اطلع شف ولد عمك هناك رح عنده
عبدالرحمن : حد متصبيت قهوة وطردوني
زامل : وشفيك
عبدالرحمن : متجمعين ابوي وابوك وعمي ابو عزام وابو فارس وابوفارس يبي يقول لهم شى وطردوني
زامل : معقولة شى مهم
عبدالرحمن : ماطردوني عبث
ابوفهد : يلا تكلم وشفيك
ابوفارس : انا والله ماحبيت اتكلم عند ورع ويروح يفضح الموضوع حبيت بيننا بما ان احنا الكبار
ابومحمد : وشعندك يبو فارس تكلم اخلص
ابوفارس : انا ودي اخطب لولدي فارس احجز له بنت الحلال الين تظبط اموره ويتزوجون
ابوفهد : اي الله يوفقه ومن ناوي تاخذ
ابوفارس : ناوي اخذ بنت ابو متعب وتعرفون انا ماعندي اخوان يروحون معي يقومون بالواجب ف ودي اخذكم معي
ابوفهد : مافكرت تناسب الا ابومتعب
ابوفارس : والله عارف نفسه الشينه ورفعه خشمه بس ودي بنسابته لاجل ولدي
ابومحمد : يعني ولدك يحب بنته
ابوفارس : اي والله يحبها حب نظيف وشريف ولابينهم كلام ولا شى
ابوفهد : ابد تم حدد اليوم وابشر بنروح معك
ابوفارس : ماتقصرون والله
ابوعزام : ومبروك مقدمًا والله يعينك على شروط ابوها
ابومحمد : اما انا اعذرني يبوفارس ابمشي اليوم
ابوفارس : عذرك معك انا ابنتظره يرجع من السفر لان للحين ابو متعب ماهو ببيته وان كان لك فرصه تجي فهذي الساعه المباركة
ابوفهد : الله يوفقهم ويجعل النصيب بينهم
ابوفارس : امين يلا انا استاذنكم ابودي حرمتي تاخذ ابره السكر
ابوعزام : ياهلا حياك الله مالقى ابوفارس الا ياخذ بنت ابو متعب
ابومحمد : والله الله يعينه ابوفارس على قد حاله وابومتعب مطاليبه واجده
ابوفهد : اهم شى نروح والي علينا وعليه سويناه وان كانها نصيبه فبيوافق
~~~ في المركز الصحي ~~~
هايل : السلام لو سمحتي وين غرفه المريض سياف
فاتن : وش جابه ذا احم غرفه ١٠٩
هايل : يعطيك العافية
فاتن : الزيارة عشر دقايق بس وتخلص
فهد : اي ان شاء الله
ميهاف : هذا الاكل صحي لازم تاكل ولا بتعيش عالمغذي
سياف : مااقدر اطلع للبيت
ميهاف : لا انت شايف حالتك مره تصحى ومره ترجع تنام
سياف : خلاص امري لله عطيني الاكل يادكتورة
ميهاف : بالعافية اذا احتجت شى انا بالاستقبال
سياف : يعافيتس
هايل : بسم الله معليش
ميهاف : وصلنا لهالمرحلة ياهايل
فهد : وخرو ابدخل
هايل : تعالي شوي برا
ميهاف : نعم وش بغيت تسال عن اخوك
هايل : وشفيتس زعلانه من يسترجي يزعلتس
ميهاف : وتسال كم لي يوم معطيتك الرسالة
هايل : وش رسالته انا عطيتس امس رسالتي وماوصلني منتس شى
ميهاف : عطيتني ؟؟ تستهبل هايل حتى الكذب ماتعرف تكذب
هايل : اقسم بالله ياميهافي اني معطي خويتس الرسالة وقلت لها تعطيتس اياها
ميهاف : متاكد
هايل : اي والله متاكد واسالي خويتتس
ميهاف : ابشوف فاتن
فاتن : ها وش علتتس
ميهاف : صدق هايل عطاتس الرسالة ومااعطيتيني اياها
فاتن : من قال لتس
ميهاف : يعني صح ابفهم وش استفدتي
فاتن : ميهاف اسمعيني وخليني ابرر ولاتحكمين قبل ماتسمعين عذري
ميهاف : لا حشى عطيني عذرتس
فاتن : كنت خايفه يتسلى فيتس ويكذب عليتس ويعلم ابوتس
ميهاف : صار لي يومين ماانام وبس افكر ودمعتي على خدي ومليون شعور وتساول براسي وبكل مره اقول لتس وماقلتي لي هان عليتس حزني يافاتن
فاتن : والله ياميهاف مو بيدي كنت خايفه عليتس ليش مو راضيه تصدقيني
ميهاف بصوت عالي : لو خايفه علي ماخليتني اصيح عندتس وجلستي تطقطقين علي وانتي معتس الرسالة
فاتن : ماطقطقت انا احاول اخليتس تبعدين عنه لمصلحتس ومصلحته
ميهاف : اذا تدورين مصلحتنا لاتدخلين بيننا وين الرساله هاتيها
فاتن : خلاص مارح اتدخل بس اذا طاح الفارس بالراس لاترجعين لي وهذي هي امسكي واقريها وبليها واشربي مويتها
~~~ عند سياف ~~~
فهد : بالعافيه ياابوي وش تحس فيه
سياف : مبروك عرسك يااخوي
فهد : يشهد الله علي اني ماهان علي احط عرسي وانت مو موجود بس ابوي وانت اعرف
سياف : ماشرهت عليك يافهد ابارك لك بس
فهد : الله يقومك بالسلامة
هايل : عاد كانك جالس تتدلع يلا قم على حيلك وراك شغل ينتظرك
سياف : اذا على كذا مابي اقوم ههههههههههههههههههههههه
~~~ عند ميهاف ~~~
تقرا رسالة هايل وكل كلمه مكتوبه قدرت تلامس قلبها وكالعادة وصارت متعوده تختم كل رساله لهايل بقصيدة :
ابي منك وعد إنك ماتخليني
ولا تساوين غلاي باحد ثاني
وإن كانك تحبيني بجد وتغليني
لآمني خطيت إسمحي لي عشاني
وانا في محبتك ما يلزم توصيني
من يمك الروح تامرني وتنهاني
"اوعدتتس ياحبيبة الروح مااخلي العذال يضحكون علينا وان كاني حي ماامسك يد احد غيرتس"
ميهاف : اه ياهايل من كان يتوقع اني باحب احد ماكانت نيتي وتفكيري اطيح بالهوى الين شفتك ياحبيب القلب
فاتن : خلصتي الديوان الي هو كاتبه تعالي امسكي الاستقبال
ميهاف : طيب جايه ولاتكلميني للحين زعلانه عليتس
فاتن : اي الزمن يرضيتس
~~~ في بيت ابو فهد ~~~
ام فهد : لاتخلون هدى تشيل شى
عفراء : هي عيت الا تسوي القهوة وتجيبها
سالم : ماما انتي تعبانه
هدى : لا ياماما بس دايخه شوي
سالم بصراخ : ماما مام قومي ليش طحتي ماما جدتي جدتي
ام محمد : بسم الله وشفيك يولدي تصارخ
سالم : جدتي تعالي تعالي
ام محمد : اصبر البس نعولي وشفيك
سالم : ماما طاحت عالارض
ام محمد : يمه بنتي هدى هدى ياامي ردي
ام فهد : بسم الله عليها وش فيها
عفراء : من يطق الباب وقته يعني
شهد : لو سمحتو الكل يسكت جاكم الحلو المسكت ارحبي ياعفراء
عفراء : ماهو وقتتس هدى طايحه
شهد : يمه وشفيها وخرو اشوف نبضها
ام محمد : طمنينا تكفين
عفراء : ساره حبيبتي خذي سالم وروحي العبو مع عيالي
زينب : طمنينا شهد وشصار
شهد : لازم تروح للمستشفى الحين
ندى : ليه وشفيها
شهد : مافيها نبض

"انتهى البارت"

___________________________________
قراءة ممتعة الانستا حقي باحد البارتات اذا تبون تسالون متى انزل او ترسلون تصاميم مناسبة للروايه تعالو انستا ولو سمحتو "الانستا فقط للرواية" وبالتوفيق 🤍.