"جابك الله في زحام العمر صدفة "

17

~~~ في المزرعه ~~~
عفراء : قولولولولوش باركو باركو
ام فهد : وشفيتس يابنتي لمن نبارك
عفراء : لسلمى
سلمى : لي وشدخلني تباركون لي
عفراء : يوه ذي يبيلها قعده شرح رحت اعطي زامل الشاهي وسالته وشصار بعد سالفه ابو متعب النكدي ذا وقال ان عمه ابوعزام يوم شاف ابوفارس حزين عطاتس ولده فارس
ام عزام : وشو بدون شوري
عفراء : عاد ذا الي صار
ندى : يس يس مبروك ياسلمى مبروك
فرح : انتي فرحانه عشانتس ماتبينها لهايل صح
ندى : اي صح
زينب : مبروك ياحبيبتي سلمى تستاهلين
فاتن : وشفيها عصبت وراحت
ميهاف : شكلها ماتبيه
فاتن : من يلومها ابوها باعها له
زينب : غلطانه ماباعها ولا شى يقولك اخطب لبنتك قبل تخطب لولدك
فاتن : اي اذا على كذا اجل مبروك
الجد محمد : هلا بحفيدتي سلمى ياهلا مبروك يبنتي
هايل : انا بروح للمجلس ياجدي
الجد محمد : لا خلك جالس هنا بسلم على الي داخل واجيك توديني لمجلس الرجال
هايل : على خشمي ابتحراك برا
سلمى : هايل
هايل : سمي
سلمى : دريت باللي صار
هايل : وش الي صار
سلمى : ابوي بيزوجني فارس اكيد انك عارف
هايل : اي انتي بنت عمي ابوعزام ياهلا مبروك اي عرفت الله يجعله زواج الدهر
سلمى : تستهبل هايل انا طول عمري انتظرك تخطبني
هايل : وشو
سلمى : حفيت ورسمت لحالي حياتنا واخرتها انت عارف ومبسوط
هايل : يابنت العم انتي والنعم فيتتس بس مابينا شى عشان تبنين حياتتس علي
سلمى : بس انا احبك من يوم واحنا صغار واعرف انك تحب الدكتورة ورحت هددت خويتها تبعدها عنك انا عانيت عشانك وطلعت تحب غيري هايل تكفى انا مابيه انا ابيك انت
هايل : عشان كذا خويه ميهاف تكرهني اسمعيني يابنت الاجاويد انا ماعمري شفتتس كحبيبه ولا كزوجه وحبتس لي سراب مالي نهايه ترضيتس واذا على ماتبين فارس فانا مالي دخل ابوتتس الي اعطاتتس اياه وهو خير الرجال حتى يمكن احسن مني
سلمى : لو رفضته توعدني تخطبني
هايل : لا والله
سلمى : قل يارب ان شاء الله ماتفرح انت وحبيبتك ذي وتكون نهايتكم مثل نهايه حبي لك
هايل : لاتدعين انا ماضريتس انا توني ادري انتس تحبيني
سلمى : قلت لك بتخطبني لو رفضه وقلت لا
هايل : اي والله لا ليش اكذب عليتس
الجد محمد : يلا ياهايل رجعني ادخلي يبنتي داخل كانت تكلمك
هايل : اي باركت لها بس
~~~ في مجلس الرجال ~~~
ابوفهد : ها يبوفارس وش قلت نقول مبروك لفارس
ابوفارس : ان شاء الله يبوفهد ان شاء الله انا استاذنكم ابروح اشوف هالولد وين راح
ابومحمد : زارتنا البركه الله يعوضه
ابوعبدالعزيز : عاد ولده ماشاء الله الف بنت تتمناه بس هو مغرور
ابوفهد : شلونك يبوخالد شلون خالد وبنتي عساهم مبسوطين
ابوخالد : والله ماشفت منهم الا كل خير وتوهم راجعين من السفر ورتبت قسمهم انت قل لي وشلون فهد وزينب فهد كان خاطره ماش
ابوفهد : وش اقول وش اخلي عزالله انك ربيت انت واختي وفهد تعرف مظغوط من شغله خلصت اجازته وماهو عارف يوازي الامور
ابوخالد : خلهم يجون يسكنون عندنا
ابوفهد : ماهي هذي المشكله ولدي فهد عنده شقه فالرياض هناك وهذا شرطكم ولبيناه بس تعرف توهم عرسان والشغل نشبو له
ابوخالد : اي اي فهمت ابروح اشوفه
ابوفهد : الله يصلحك يافهد
~~~ فالاسطبل ~~~
عبدالرحمن : وش مزعلك انت الحين
عزام : ابوي
محمد : وش مسوي عمي
عزام : قدام الرياجيل يعطي فارس اختي وين صارت ذي ماارضى
فهد : عشان رجال كويس قلت ماترضى ولو انت جايبه وماهو رجال صح وجبرتها وش بيصير فالبيت
محمد : بعيدًا عن كل ذا انت شدخلك
عزام : اختي هي اختي ركزو
سياف : واذا هي اختك
محمد : يقولك المثل اخطب لبنتك قبل تخطب لولدك وفارس رجال انا عارف ان قصدك تخاف يجرح اختك بهالشي بس فارس ماهو من هالنوع استريح
عزام : مافكرت كذا
هايل : مسوي نفسك مثقف وجامعي وهذا تفكيرك قم قم ساعدنا بس قومو كلكم عبدالرحمن سياف عبدالعزيز يلا كلكم
عبدالعزيز : يلا جاي
فهد : وشلونك يامحمد
محمد : تسال عن اخباري يافهد
فهد : الله يعينك ياخوك
محمد : سامع عنك كلام مايعجبني
فهد : وشهو
محمد : شلونك مع حرمتك
فهد : مثل جوابك اذا سالتك وشلونك يامحمد
محمد : لاتخلط نفسك معي انا غير وانت غير
فهد : ابطلبك يامحمد
محمد : اطلب
فهد : ابي سلف
محمد : ابشر يافهد كم
فهد : ٥٠ الف
محمد : وش له وش مسوي من يطلبك هالمبلغ
فهد : ابتزوج
محمد : فهد تستهبل توكم ماصار لك شهر معرس
فهد : محمد انا مابغى اوهم بنت والعب عليها انا حبيتها ووعدتها اتزوجها لولا تدخل ابوي
محمد : ووش ذنب زوجتك الحين وش ذنبها فوق انها تعرف عن حبك سكتت وماقالت لاهلها
فهد : ابقول لها والي هي تبيه يصير
محمد : يعني مارح تسمع الكلام والي براسك بتسويه
فهد : اي نعم علمي معي
محمد : اجل اعذرني مارح اسلفك عشان تتزوج على بنت عمتي
فهد : ووش دخلك فيها
محمد : لاتنسى يافهد انا فقدت زوجتي قبل كم اسبوع واول ماتزوجتها ماكنت احبها ولا ابيها ومشاكل الين هديت والحين نادم قد شعر راسي اني اذيتها حتى لو بكلمة اسف يافهد انت ولد عمي واخوي وتبشر بس تتزوج لا
فهد : هذا اخر كلام عندك
محمد : اي
فهد : ترا بحركتك ذي مارح تمنعني اتزوج اقدر اطلب دين
محمد : الي تبيه سوه بس مايجي الضرر مني لبنت الاجاويد
~~~ في مجلس الحريم ~~~
ام فهد : ندى عفراء تعالو ساعدوني نشيل العفش
ندى : بنرجع اليوم لقريتنا
ام فهد : لا بكرا بنرجع
عفراء : اجل ياخاله مايحتاج نرتب الحين
ام فهد : انتم غبيات ولا تستغبون قصدي نرتب الاغراض بعد حوسه العزيمه
عفراء : ماسمعت اسم زينب معنا
زينب : بجي لاتخافين
ميهاف : فاتن قومي نساعدهم
فاتن : يلا
ميهاف : خاله روحي ارتاحي انتي احنا بنتساعد وننظف
ام فهد : ماقصرتي يبنتي
ندى : فرح تعالي بسرعه
فرح : وش صاير
شهد : شلونتس شلون حياتتس شصار
فرح : بسم الله شفيكم ماصار شى لنا شى
شهد : اقصد سافرتي وشلونه حليل
فرح : اي طبعا حليل وينحط عالجرح يبرى
زينب : تربيتي خويلد
ندى : وش سفرتتس
فرح : فرني بكل مناطق السعوديه خلوكم مني زينب وفهد شلونهم
ندى : اسكتي مو طايقين بعض
عفراء : بس لاتقولين لخالد يمكن زينب ماتبي اهلها يدرون
فاتن : زينب تعالي
زينب : سمي
فاتن : شوفي زوجتس قاعد بالاسطبل لحاله خذي الشاهي ووديه له
زينب : يخسي
ميهاف : خلي الاعتذار يجي من طرفتس ولا تخربين بيتتس ومشي هالحياه
زينب : وش امشي ووش اخلي اقولكم يكلمها اذا نمت
فاتن : صدقيني حتى لو تزوجها انه بيحن لتس وبتكونين غير بس اثبتي وجودتس عشان تصيرين درس له
ميهاف : يلا يلا امسكي الشاهي ووديه له واجلسو سولفو
فاتن : وسوو حركات رومنسيه شوفي الاجواء بارده شوي حطي عليه شالتتس
زينب : هاتي الشاهي وانتي اهجدي يافاتن
ميهاف : كفتتس فاتن
شهد : وين وديتوها
فاتن : لزوجها
شهد : حركات خلونا نراقب وش يصير
~~~ في مجلس الرجال ~~~
خالد : انسكر ظهري من الفرشات
سياف : اسمها زل الى متى وانا اعلمك علوم المرجله
خالد : اخذت اختكم وللحين تبيني اتعلم
سياف : ليه تحسب المرجله بالزواج
ابوفهد : سياف اشتغل وانت ساكت
سياف : ابشر
هايل : قايل لك انت دايما خلك ساكت
عبدالرحمن : ساعدوني ياعيال
هايل : بسم الله وشفيك
محمد : وش مطيحك
عبدالرحمن : ظهري يامحمد ظهري
ابومحمد : بسم الله عليك وش شايل
عبدالرحمن : شلت صحن الذبيحة وماشفت الدرج وطحت
عزام : مخروش كالعادة
محمد : ساعدوني ياعيال نرفعه
ابوفهد : نادو الدكتورات
هايل : تبيها من الله
عبدالرحمن : جب حبيبتك الثانيه ماطيقها
هايل : ترا بكسر رجلينك لو تتكلم عنها
ابوعزام : استعجل ياهايل
هايل : ابشر ابشر ياعمي
ندى : وش تبي
هايل : دحيم طاح على ظهره ويوجعه ابي الدكتورات
ندى : يوه طيب طيب انتظر اناديهم
~~~ فالمطبخ ~~~
شهد : ليش للحين اسمع صرصور الليل
فاتن : لان زينب للحين ماراحت
ميهاف : استعجلي يازينب ورانا اشغال
زينب : خلاص بروح ياكثر ماتتكلمون
ندى : هيه انتي وهي دحوم ظهره انكسر تعالو شوفوه
ميهاف : جيبي عباتي معك يافاتن
فاتن : طيب
شهد : بسم الله على اخوي وش شايل
ندى : مدري ماعرفت شى من هايل غير انه طاح
ام محمد : بسم الله على ولدي طمنا ياهايل
هايل : ابشري ياخاله
~~~ في مجلس الرجال ~~~
فاتن : وشلون نشوفه واحنا ماعندنا ولا شى هنا
محمد : لازم ناخذه للمركز
فاتن : اي للاسف
محمد : ابشغل سيارتي جيبوه ياعيال
ابومحمد : خذ الدكتورات معك
محمد : شلون احطهم
ميهاف : وحده منا تروح روحي فاتن
فاتن : لحالي
ميهاف : اي
فاتن : ليش تنكبيني وين بركب الحين هو منسدح وراء ؟
ميهاف : يمديك يمديك روحي
~~~ في السيارة ~~~
محمد : اسف يختي بس اركبي قدامي
فاتن : مالي مكان الا قدام الله يصلحك بس
محمد : هانت مابقى شى ونوصل
عبدالرحمن : استعجلو احس بطرش
محمد : اوقف السيارة 
عبدالرحمن : اي وقفها مقدر اتحمل
فاتن : عندك كيس تعطيه مايقدر يتحرك
محمد : كيس كيس اي اي لقيت وراء امسك ياعبدالرحمن
عبدالرحمن : اهه يابطني ليش اطرش وانا مااكلت شى مو زين
فاتن : لانه كسر الي فيك
عبدالرحمن : استعجل ياخوك تكفى مقدر اتحمل
محمد : طيب طيب تحمل
~~~ في الاسطبل ~~~
زينب : ليش قاعد لحالك
فهد : خلصت عزيمتهم
زينب : تبي شاهي
فهد : صبي ماقول لا
زينب : مادريت وش صار داخل
فهد : لا وش صار
زينب : عبدالرحمن انسكر ظهره وودوه للمركز
فهد : ماهو شى جديد لازم كل عزيمه بلاء الله يقومه بالسلامه
زينب : بس ذا الي عندك
فهد : اي بعد شسوي غير كذا
زينب : تحبها
فهد : منهي
زينب : انا من غيرها مديرتك
فهد : وليه تسالين هالسؤال كان نيتس تقولين لابوتس فهذاك هو فالمجلس روحي قولي
زينب : اذا قلت له بتصير سالفه ومارح تقدر تتزوج حبيبتك
فهد : يعني انتي تبيني اخذها
زينب : دامك تحبها الله يوفقكم
فهد : ثروتي خلصتها عليتتس
زينب : قصدك ماعندك مهر تدفعه لها
فهد : اي بس اباخذ دين
زينب : لا لاتاخذ دين مهرك الي اعطيتني اياه للحين بمكانه ماجيته ابعطيك اياه ورح تزوج حبيبتك فيه
فهد : وش معنى هالكلام
زينب : لاني ماحبك يافهد ولا ابيك مثل ماانت ماتبيني ولا تحبني انا بعد كذا وانا مستعدة اعطيك مهري تدفعه لها لعل وعسى فعلتك ذي اقدر اتطلق منك ويكون عذر
فهد : الي تشوفينه بس مابي اتزوجها الحين وانا توني متزوجتس
زينب : الي تشوفه بس انا واصله لهالمرحله من الاستغناء وبدال المشاكل الي نسويها نصير متفاهمين لان يوم حطيت نفسي مكانك حسيت بشعورك
فهد : لو تزوجت بتطلبين الطلاق
زينب : اكيد
فهد : على خير ان شاء الله تبين نرجع للقريه ولا نمرح معهم
زينب : لا بنقعد هنا
فهد : الي تشوفينه
زينب : تعشيت
فهد : بعد السالفه الي صارت والهوشه محد اكل شى
زينب : جوعان طيب
فهد : اي يعني شوي
زينب : اوه طحت فالانسانه الصح طبخي تاكل اصابعك وراه بروح اسوي لك اكل تاكل باستا
فهد : وشذي باستا
زينب : مكرونه يعني
فهد : اي اكلها
زينب : تم انتظرني هنا لاتروح
فهد : ابد جالس هنا اتحراتس
زينب : تمام رحت
ندى : وين اختفيتي انتي جلست ادورتس
ميهاف : وشصار معتس
ندى : ليش وش مسويه
ميهاف : وديناها لاخوتس
ندى : وانا اخر من يعرف يعني تصالحتو
زينب : ماتصالحنا بس عطيته كلام يحطه حلق باذنه ومايعرف اني منطوله له
شهد : وش هالكلام
زينب : بقول لكم فالليل بسوي اكل له يقول ماتعشى
عفراء : انا صدقت ان هي اعطته كلام قوي
ميهاف : عفراء خليها يمكن تتعدل علاقتهم
عفراء : هذا وجهي ان تعدل شى وحتى لو تعدلت فهد بياخذ حبيبته
ندى : اقول شهد وراتس مبرده واخوتس رايح المستشفى
شهد : وصيت فاتن ومحمد عليه وهي كلها طايح ترا لاتكبرونها اعرف دحيم انا
ميهاف : انا مدري شلون خليت فاتن ترجع للقريه لحالها
فرح : مارح يصير لها شى ترا بكرا الصبح بنمشي احنا بعد للقريه
ندى : انتي وش تبين جايه معنا
فرح : تعودت يختي
زينب : قصدتس بتروحين لبيتنا صح
فرح : اي عاد مدري خالد الي يقرر
شهد : مستحيل افهم المتزوجات انا
عفراء : اذا تزوجتي تفهمين
زينب : لايغرتس ياشهد انا فهد سالني وخيرني اذا نقعد فالمزرعه ولا نرجع للقريه وقلت نقعد بس فرح من حبها لخالد مخليه كل شى عليه
شهد : احب الصراحه تعجبيني يازينب
زينب : حبيبتي انتي بالخدمه
عفراء : ترا كلنا جوعانين ماتحطين لنا مكرونه مع زوجتس
زينب : اشوف اذا بقى حطيت لكم
ندى : اذا ماحطيتي لي ابروح واكل معه
زينب : عناد فيتس مارح احط
ندى : تشوفين
~~~ في المركز الصحي ~~~
فاتن : حطه هنا واطلع
محمد : بسم الله ياثقلك يادحيم انتبهي لاخوي
عبدالرحمن : قربي لي الزباله بطرش
فاتن : للحين
عبدالرحمن : امسكي ظهري احس روحي بتطلع تكفين
فاتن : احم طيب طلع طلع الشر ارتحت
عبدالرحمن : يعني شوي بس عيوني طلعت
فاتن : مستحيل يكون السبب ظهرك وش ماكل اعترف
عبدالرحمن : كليت من الي كلوه كل الرجال
فاتن : غريب انسدح على بطنك اشوف ظهرك
عبدالرحمن : شوي شوي
فاتن : بتخلص ولا لا
عبدالرحمن : طيب طيب مفروض يجيبون دكتور رجال
فاتن : لاتعاند
عبدالرحمن : نادي محمد ابيه
فاتن : يارب صبرك لو سمحت يبيك اخوك
محمد : وش فيك
عبدالرحمن : فك ثوبي ذي غبيه ماتفهم
محمد : اسكت هي تقوم بشغلها شدخلها بثوبك تعال افك ازرارك
فاتن : اكيد مارح تسمح لي احط لك الكريم فتفضل يااخوه حطه له
محمد : اي ماعندي مشكله عطيني حطيت وش غيره
فاتن : يكفي انا بلف الشاش ولا ماتبيني
عبدالرحمن : لا خلاص لفيه بس خلي محمد موجود يساعدني
فاتن : تمام ترا كلها دقايق وخالصين
محمد : طيب وش طلع معه كسر
فاتن : لا لو كسر مايتحرك مجرد رضوض بسيطه من طيحه الدرج وحطيت شاش نلملم عظامه لان الطقه جت بين فقرات عاموده الفقري لازم مايتحرك اليوم خلوه عندي بالمستشفى لان يمكن تجيه حراره من الالم فالافضل يبقى تحت مراقبتنا
محمد : ماقصرتي يالدكتورة ونعتذر جبناك من هناك
فاتن : مايفيد الاعتذار حصل خير قدامك العافية
عبدالرحمن : خلاص محمد رح البيت مايحتاج تقعد عندي
محمد : وش غير رأيك
عبدالرحمن : ابوي ترانزيت من المزرعه للرياض مارح يرجعون للقريه سالم وين ينحط؟
محمد : صادق يادكتورة لاهنتي مايحتاج اوصيتس بس انتبهي عليه قعدتنا هذا
فاتن : لاتوصي حريصه وهو ماعليه يمشي على زنده التيس
عبدالرحمن : مايمدي اكنسلها وتجلس انت
محمد : اقول انثبر تتدلع علي عارف انك نقطه ضعفي انا بمشي للمزرعه
فاتن : اوف ليتني قلت له ياخذني معه بس اخوه نشبه مجبورة اقعد ها تتصل ميهاف اقعدي مارح ارد
~~~ في المزرعه ~~~
ميهاف : ليش ماترد ردي يافاتن
هايل : ميهاف
ميهاف : يمه وش جابك
هايل : جابني الله في زحام عمرتس صدفه عشان اسعدتس
ميهاف : لو تخفف جياتك
هايل : افا ابشري ابشري بس كنت بقولتس شى
ميهاف : قل
هايل : قلت لجدي عنتس واني خايف ننرفض من ابوتس لان بينه وبين ابوي مشاكل وجدي طق صدره وقال انا اروح واطلبها من صقر والحين ارتحت
ميهاف : ليش كنت خايف
هايل : خايف ابوتس يرفض ولا ابوي يرفض يروح معي
ميهاف : لاتفكر بهالاشياء ياهايل كل شى بوقته حلو
هايل : متوقعه بخليتس كم شهر واجي اخطبتس
ميهاف : ماكانك مستعجل
هايل : خايف تروحين لغيري
ميهاف : لاتخاف انا لك مو لغيرك
هايل : وعد
ميهاف : وعد لاتخاف انا اما لك ولا مارح اخذ احد انا بروح لايشك احد
هايل : استودعتس الله
ميهاف : مارح تعطيني قصيدة تعودت اقرا شعورك
هايل : ههههههههههههههههههههههه
كيف اكتب الشعر وعيونتس قصيد
وكيف اوصفتس وانتي القصايد كلها
ميهاف : بعتبرها قصيدة يلا انا بروح
هايل : طلع دفترك هايل والسعادة ماليه قلبه حس ان ميهاف بتكون له وكل القلق والخوف الي كان فيه راح بعد ماسمع وعدها وكان وده يقول لها قصيدك بس حروفه تضيع قدامها طلع قلمه وهو يوصف ميهاف
انا فدا وجهك الطاهر وقلبك السمح
يا اغلى من الروح وابدا ملذاتها
ترا انشراحه ضميرك وابتسامه فمك
احلى المحطات في عمري ولحظاتها
عزام : خلصت انكسر ظهري من عزيمة ابوك
هايل : اسمع يالذيبان
عزام : وش تكتب بالدفتر انت تدرس جن بهالمزرعه
هايل : اسمع اخلص
عزام : تراني اسمع الحمدلله فقل اخلص
هايل : يمديك تتوسط لي بشغلك
عزام : انت !!
هايل : اي انا وش ناقصني
عزام : تعرف للكمبيوتر
هايل : لا بس تعرفني وخلصنا مانيب بهيمه افهم ترا
عزام : والله اذا جاد بكلامك ذا تبشر اتوسط لك
هايل : اي والله اني جاد بس انتظر فرصه مناسبه واقول لابوي وامي
عزام : خلاص تم قل لهم وعطني خبر
هايل : متى بتمشي للرياض
عزام : بقعد حول ثلاث ايام وبمشي تعرف مشتاق لقريتنا
هايل : اشوفك حبيتها الحين
عزام : تدري يابن العم من طلع من داره قل مقداره
عزام : احد يزعجك هناك
عزام : لا لا بس اشتاق للقريه ولاهلي
هايل : اي على كذا الله يوفقك لاتروح بدون مااقول لك
عزام : اي انتظرني امش ساعدنا نفرش الفرش نبي ننام
هايل : اي يلا وين سياف وزامل وفهد وخالد وشكثرنا
عزام : زامل وابوي وعمامي راحو يم حلالكم يتفرجون وخالد وسياف يرتبون المجلس عشان ينامون الكبار والخيمه من يرتبها تبيني لحالي ارتبها تخسي
هايل : كنت بقوم دحيم بس راح فهد وينه
عزام : وانا وش دراني تسال عن الكل انت امش اخلص يكفي حاطينا بخيمه برا انام جنب صارور الليل
هايل : كانك ناسي قريتنا اذكرك
عزام : لاتذكرني امش بس
~~~ في اسطبل الخيول ~~~
ندى : يمه
فهد : بسم الله وش موقفتس هنا
ندى : نبي الصراحه يافهد
فهد : هاتي هاتي ماوراتس الا البلاوي
ندى : كنت ابي باستا حقت زوجتك وعييت قالت كلها لفهد وانا جيت بملعقتي اكل معك
فهد : صار اسمها زوجتي وقبل كل الدلع لها
ندى : لا خلاص كنسلتها عيت تحط لنا
زينب : ممدا تحركت جيتي قلت لتس لو بقى حطيت بس مابقى
ندى : اخوي حبيبي قبل كلنا نتشارك الاكل الحين بيشاركني
فهد : اكيد اقربي اقربي وين فرح ماشفتها
ندى : ترا للحين هي زعلانه منك
فهد : الله يصلح الحال ابروح اسلم عليها مشتاق لها
ندى : اجل باخذ المكرونه البنات يحبونها
زينب : اصبري بجي معكم
~~~ في مجلس الحريم ~~~
شهد : هلا هلا بالمكرونه الحين جلسه الحش
عفراء : شفتو شلون ام متعب رافعه خشمها هي وذهبها
ندى : خلينا نسمي ياعفراء
عفراء : لو ماقلت هالكلمه انفجر داخلي
ام فهد : يلا يابنات قومو جهزو الفرش والطراحات يلا
ندى : يمه تونا قاعدين ناكل
ام فهد : اكل ونوم بتسمنين كذا
ندى : خلكم شاهدين
عفراء : قومي قومي يلا
ام فهد : حتى انتي قومي يلا قدامي
عفراء : عفراء تخلونها تخدم زينب توها عروس
ام فهد : اخلصي اقوم فرح قومي فهد يبيتس
فرح : وش يبي
ندى : يبي يسلم عليتس
فرح : توه تذكرني
شهد : قومي قومي سلمي على اخوتس كرشتهم عشان ناكل انا وانتي
زينب : ياعليتس افكار
فهد : شلونتس يالغاليه
فرح : بخير
فهد : للحين زعلانه مني ياعين اخوتس
فرح : شايله فقلبي عليك وعلى حركاتك قبل زواجنا
فهد : انا اعتذر وحقتس عليك والله يوفقتس مع خالد
فرح : امين ويهديك مع زينب
فهد : ماعليتس مني انا وهي انتي وشلونتس مع خويلد
فرح : بخير الحمدلله ماشفت منه الا الزين وسفرني وانبسطنا انت شلونك مع زينب
فهد : ماعلينا ان شاء الله انا بروح الحين اساعد العيال ادخلي
فرح : يتجاهل واضح مايبيها للحين
زينب : تاكدي بعد ان انا وهو مانبي بعض
~~~ في حوش النياق ~~~
ابو عزام : ماشاء الله يااخوي طلع عندك نياق واحد
ابوفهد : حلالي هو حلالكم يااخوي وذا كله حلال ابوي بس انا الي اديره
الجد محمد : كل شى لي لكم ياعيالي
زامل : وحفيدك
الجد محمد : عيوني لك يبوعبدالله
زامل : الله يطول بعمرك ياجدي
ابومحمد : ماكان الجو برد شوي
ابو عزام : الا والله برد
ابوفهد : قبل نرجع ابقولك شى يااخوي
ابومحمد : وشفيك ياعبدالله
ابوفهد : انا ابخطب بنتك لولدي سياف
زامل : وينك ياسياف تسمع
ابومحمد : لي الشرف والله يااخوي ومارح القى ولد احسن من ولدب سياف مربيه انا على يدي ابد بيتي مفتوح لكم بس قبلها ابستشير البنت وامها والله يكتب الي فيه الخير
ابوفهد : انا انتظرك بس لاتطول علي
الجد محمد : وراك مستعجل وعيالك توهم صغار
ابوفهد : ودي اشوفهم معرسين واشوف عيالهم وعيال عيالهم العمر جالس يسرقنا يايبه
الجد محمد : الله يكتب لهم الي فيه الخير

"انتهى البارت"

______________________________
اتمنى لكم قراءه ممتعه اعتذر عن تاخير تنزيل البارت بس انشغلت كالعادة وشكراااا مره على دعمكم الحلووو اي شى تبغون تسالون عنه ويخص الروايه فقط تحصلون حسابي الانستا بالبارت الي قبل هذا قراءه ممتعه 💙💙💙.