"جابك الله في زحام العمر صدفة "

61

~~~ صباح يوم جديد في بيت ابوفهد ~~~
ندى : يمه يمه فيه بزر صغير عند الباب يبيتس
ام فهد : يبيني انا ؟
ندى : اي والله
ام فهد : الله يستر
~~~ عن باب الشارع ~~~
هايل : من ولده انت
ام فهد : هلا ياحبيبي وش بغيت
محسن : السلام عليكم شلونكم
هايل : ياحليله ماشاء الله
ام فهد : بخير ياحبيبي شلونك انت
محسن : انا بخير أيضًا ماما قالت اعطيكم هذي العلاقيه وهذا بيتنا جنبكم بالضبط وتقول ايضا حياكم عازمينكم
ام فهد : زين ياقلبي سلملي على امك سلام كثيير وقل ان شاء الله اليوم العصر بسير عليكم
محسن : يوصل ياخاله
ام فهد : شفه ياهايل دخل بيتهم
هايل : اي تبين شى يمه
ام فهد : لا سلامتك وين بتروح
هايل : بروح للمحل مع ابوي
ام فهد : زين زين
~~~ في غرفه فرح ~~~
ندى : ها شلونتس اليوم
فرح : بخير
ندى : ادري للحين تبين تصيحين لاتمسكين نفستس انا اختس
فرح : تدرين وش الغلط بكل هالشي الي صار
ندى : وش
فرح : اني تزوجت انا طمست عيني بيدي واستعجلت فيه سياف وهايل وانتي نقزت وتزوجت
ندى : وكان الموضوع بيدتس كل شى بيد ابوي وبعدين ذا الي مكتوب لتس افهمي ان خالد مو نصيبتس
فرح : صدقيني حتى لو انه نصيبي بتطلق
ندى : كويس يعنيي فيه تقدم بديتي تكرهينه
فرح : ماكرهته ولا بعمري بكرهه خالد حياه ثانيه ياندى بس بعد الي سواه طاح من عيني الي شايله همه الي ببطني
ندى : وكلي امرتس لربي وربي بيعوضتس بواحد افضل منه بمليون مره
فرح : ارجع اكرر الغلطه بعد لا لا خلاص مارح اتزوج
ندى : تستهبلين توتس بزر اعرسي وشوفي حياتتس
فرح : ان كتب الله ووافق ابوي ادرس بكمل الجامعه وبربي ولدي وبصير مدرسه
ندى : ياكبر احلامتس
فرح : نقول ان شاء الله الا بسالتس
ندى : ها
فرح : فهد طلق زينب
ندى : قومه ابوي من الفجر وخلاه يمسك خط الرياض عشان يطلقها فالمحكمه
فرح : الله يعين
ندى : قومي يله نفطر حاطه لتس زيتون اخضر الي مشتهيته وازعجتينا الين جبناه
فرح : طيب جايه
~~~ فالمطبخ ~~~
عفراء : خالتي من الي جاء عند الباب يبيتس
ندى : اي صح يمه من طلع ولده
ام فهد : ياحبكم لكثر الهرج عطاني هالسله وقال انهم جيرانا توهم ساكنين وعازمينا
ندى : الله اخيرا ناس جديده بقريتنا
عفراء : مليون واحد يجي ويروح احنا الي ثابتين
شهد : طيب شفتي وش بالسله ياخاله
ام فهد : لا والله مافتحتها
عفراء : انا بفتحها فيني فضول
ندى : وخري انا بفتحها
عفراء : انا قلت اول خلي المبزره
ام فهد : وخرو انتو الثنتين انا بفتحها عطيني كرسي اقعد ياندى
ندى : طيب
ام فهد : كثر الله خيرها
ندى : وش حاطه
ام فهد : حلا وفطاير وفواكه وقهوه وشاهي
عفراء : شكلها طفشانه فالبيت لحالها قالت تشوف الجيران
ام فهد : هو حق علينا مفروض نروح نزورهم بس ماركزنا ان فيه احد سكن
ندى : حتى بيت عمي ابوسطام شفت من سطح بيتنا جايين ناس يشوفون بيته
ام فهد : بيشوفوهم ابوتس وبيضيق صدره
ندى : يمكن جارنا الجديد حليل ويصير خوي ابوي
ام فهد : ان شاء الله تجهزي انتي وعفراء وسوي شى يبيض الوجه وقهوه وشاهي عشان نروح
عفراء : شهد عيالي عندتس
شهد : حلوه ذي
عفراء : زوجه عمهم بالاسم بروشهم وبغديهم وبحطهم عند التلفزيون وتراهم مؤدبين
شهد : خلاص خلاص اعرفتس مرواحه تحبين العزايم عندي هم لاتشيلين هم
~~~ في السوق الديره ~~~
ابوفهد : هذا ابوسامي يدق
عزام : ابلش
ابوفهد : هلا ابوسامي
ابوسامي : يامرحبا ابوفهد شلونك شلون الاهل كلهم
ابوفهد : بخير الحمدلله شلونك انت
ابوسامي : بخير الحمدلله الله يحفظك يابوي بغيت اسالك
ابوفهد : اي سم
ابوسامي : متى العيال بيرجعون للشغل
ابوفهد ؛ اعذرهم يابوسامي انشغلنا شوي ان شاء الله بكرا وهم عندك
ابوسامي : على خير ان شاء الله استودعتك الله
ابوفهد : بحفظ الرحمن ليش ماذكروتني انت واياه
هايل : بايش
ابوفهد : بشغلكم الي هناك اشوفكم تراخيتو
عزام : جينا هنا لاجل نزور جدي فجاه هلت المشاكل ونسينا
هايل : يقول يابوفهد
ابوفهد : يقول قم شف الزبون وش يبي
هايل : ابشر
عزام : عطاك ميوت ههههههههههههههههههههههههههههههه
ابوفهد : ابدق على ابومحمد اشوف وش عنده ماخلا دحيم يروح
ابومحمد : ياهلا اخوي فيك شى
ابوفهد : لا سلامتك بس دق علي ابوسامي يسال عن العيال واستغربت مادق عليك
ابومحمد : الا والله دق علي وتعذرت منه لاجل خطبه دحيم وقلت له يدق عليك عشان تخلي عزام وهايل يروحون يمسكون هالفتره الين نخلص موضوع خطبه دحيم
ابوفهد : خطبته واحنا ماندري
ابومحمد : الحين دريتو
ابوفهد : يعني خلاص خطب ولا توه بيخطب اخلي سياف يجيب اخته
ابومحمد : لا مايحتاج تعرف هي حامل وتعب عليها الطريق امس رحنا خطبنا وواليوم على اساس يردون لنا والملكه بعد كم يوم
ابوفهد : بهالسرعه يابومحمد
ابومحمد : لاتلومني الولد بينهبل على مايخطبها
ابوفهد : شكلك مادريت عنا يااخونا وعن حالنا على كل الاحوال بارك لولدك والله يتمم لهم على خير
ابومحمد : ليش شصاير لكم
ابوفهد : سلامتك يله جاني زبون
هايل : مستحيل مايسويها دحيم
عزام : والله صدمني هو وعمي يخطب ومايقول لنا
هايل : انا واياه واعدين بعض فالخطبه والملكه نحضر لبعض اخسي يالردي ولا قال لي حتى
زامل : لاتسى الظن يمكن مرسل لك ومافتحت جوالك
هايل : فاتح جوالي انا امس واليوم ماجاء منه حرف
عزام : والله ماهقيتها منه عاد خلنا احنا على جنب كلنا بس انت غريبه سوا كذا لك
هايل : والله حتى انا مستغرب
ابوفهد : تمنو له الخير وخلو كثر الهرج وهايل انا بهالعمر خويي اهانني في بيته
هايل : بس يايبه ذا مو بس خويي ذا انولد معي وكبرنا مع بععض وفوقها ولد عمي كل عفشي اكبه عنده وهو بعد كذا بس اخر فتره مدري شفيه علي
عزام : يمكن زعل منا لاننا كذبنا عليه
هايل : بيدق يهاوشنا مايقطع كذا
ابوعزام : انت صادق يابوفهد رايح يخطب لولده واحنا وسط هالمشاكل يفرح على حزننا
ابوفهد : لاتكبرها يابوعزام ماهي كل مره بيحزن معنا وبيفرح معنا وولده وبنت الناس شذنبهم بمشاكلنا
ابوعزام : ماهو عذر ياخوي ماهو عذر اصلا متى ابومحمد شاركنا شى يجي يتفلسف على روسنا بالموسسات والشغل والمحلات ويمشي ذكرني بيوم قسم خبزه عشان يعطينا اياه من يوم كان صغير وهو كذا همه نفسه
ابوفهد : لاتجيب طاري الماضي قدام عيالنا الفات مات واحنا عيال هاليوم وهو مادرى الغلط منا ماعلمناه
ابومحسن : السلام عليكم اعذروني عن المقاطعه
ابوفهد : ياهلا والله ومرحبا وعليكم السلام
ابومحسن : شلونكم شخباركم عساكم طيبين كلكم
ابوعزام : بخير الحمدلله من انت
ابومحسن : اعذروني نسيت اعلمكم انا يقال لي ابومحسن جاركم
ابوفهد : انت الي توك ساكن جديد جنب بيتنا
ابومحسن : عليك نور يابوفهد
ابوفهد : شعرفك باسمي
ابومحسن : انا جاي لهالقريه عشانك
ابوفهد : عشاني
ابومحسن : اي نعم
ابوفهد : تفضل اقعد جب قهوه ياهايل
هايل : سم يبه
ابوعزام : وش عندك من علم انا اخو ابوفهد
ابومحسن : يامرحبا فيك انا جاي عشانكم كلكم دامكم اخوان انا ياطويل العمر مسوول عن عقار بمنطقه شقراء وجاني رجال يبي يشتري ارض وشيكت على الملفات الا الارض باسم محمد وحاولت اتصل على رقمه محد رد علي ورحت لارضه وصادفت واحد له ارض جنب ارض ابوكم وسالته اذا يعرفه وجاوبني الرجال وقال اي عنده ولد فالقريه اسمه عبدالله ويقال له ابوفهد وعطاني اسم قريتكم بالصدفه لقيت محل للعقار عندكم للبيع وقررت انقل هنا ومنه ادوركم
ابوفهد : اي هذا ابوي ياهلا والله ومرحبا
ابومحسن : ابوكم عنده ارض في شقراء مساحته كبيره ولو تقسمت المساحه لكل ارض جابت يمكن ٥ اراضي وفيه واحد يبيها كانكم بتبيعونها بعطيكم رقم الرجال وتواصلو معه
ابوعزام : خمس اراضي لمن ماقال لك
ابومحسن : الي وصلني بعطيكم اياه ارض باسم ابوفهد وارض باسم ابومحمد وارض باسم ابوعزام وارض باسم ام خالد وارض باسم ام ميهاف انا مالقيت غير ابوفهد عاد كانك تعرف الباقين انا ابي ابري ذمتي
ابوعزام : معك ابوعزام واخوي ابومحمد وام خالد وامي ميهاف رحمه الله عليها
ابومحسن : حلوو كذا انا اخليت وابريت ذمتي
هايل : عمي عادي اسالك
ابومحسن : تفضل ياولدي
هايل : محل العقار الي انباع لك باسم من
ابومحسن : ابومحمد وقال لي انه اول محل فالسوق قدام محل ابوفهد وشكلي وصلت
هايل : يعني دحيم مارح يرجع للقريه اوريك يالبزر
ابومحسن : على كل الاحوال انا استاذنكم بيجون العمال للمحل انا بيتي جنب بيتك اذا بغيت شى انا موجود يابوي
ابوفهد : ماتقصر
ابوعزام : اخوي اختنا ميته ارضها نقسمها علينا
هايل : ليش تقسمونها
ابوفهد : لاتتدخل انت
ابوعزام : وشلون بتوصل لبنت اختنا
ابوفهد : نوصل نوصل اهم شى ماناكل حق اختنا وبنتها عايشه يكفي الي سويناه كثيير فالبنت والذنب ذنب ابوها
ابوعزام : وجهير شلون بتعلمها بعد الي صار
ابوفهد : الي صار مهم يابوعزام ذي ذمه وضمير وحتى لو مشاكل الدنيا بيننا تبقى اختي وذا حقها وبرضو الذنب ذنب ابوخالد ماهي جهير
ابوعزام : على كل الاحوال ابي حقي يجيني يابوفهد بدون لانقص ولازياده
ابوفهد : عين من لله خير انت خلنا نتاكد من الرجال كلامه صح ولالا
ابوعزام : وشلون بتتاكد
ابوفهد : بخليه يوريني صك الارض انت شايف الرجال توه صغيير ماينوثق بكلام الصغار
ابوعزام : هو جارك خل ام فهد تزور حرمته وتشوف وش اوضاعهم
ابوفهد : وذا الي بيصير
ابوعزام : يله اجل استاذنك غدانا جاهز عزام قفل المحل والحقني عالبيت
عزام : ابشر طال عمرك وانت اسمعني اسحب على دحيم وصر صويحبي
هايل : تستهبل انت وراسك كلنا عيال عم وخويا
عزام : امش تغدا عندنا
هايل : امي مسويه غداء اترك غداها واقابل خشتك
عزام : ماتستاهل انت اصلا بس اسمعني نبي اذا رجعنا للرياض نقلب على دحيم
هايل : انا وولد عمي ضد الغريب
عزام : القبله وراك ياخبل انا ولد عمكم بعد
هايل : انا الي افكر فيه الحين الاكل ف بعد مااتغدا بجيك
عزام : رح لخيمتنا
هايل : ياوك بعيده ذي
عزام : ازرف سياره فهد
هايل : بتجيب لي المشاكل انثبر هنا فالسوق بس
عزام : اذلف اذلف برقد ابرك من اقابلك
~~~ العصر في بيت ام محسن ~~~
ام محسن : يامرحبا بجارتنا والله
ام فهد : البقى ياحبيبتي
عفراء : ياحياتي طلعتي توتس صغيره
ام محسن : ههههههههههههههههههههههههههههههه لايغرتس الشكل
ام فهد : والله توقعتس عجيز مثلنا وعندتس عيال غير هالصغير
ام محسن : لا والله انا ماصار لي معرسه غير ٦ سنين
عفراء : يعني ماعندتس غير محسن
ام محسن : عندي بنت اكبر منه
ندى : مافهمت شلون
ام محسن : تفضلو اكب عفشي عندكم
عفراء : حبيتتس ان شاء الله تعوضينا عن ام سطام
ام فهد : اي تقهوينا تشوقت اعرف قصتتس
ام محسن : جايتس بالعلم ياخاله ياطويله العمر انا عمري ٢٤ وزوجي عمره ٣٠
ندى : تمزحين توكم صغار
ام محسن : زوجيي يصير ولد عمي ومتزوج قبلي وحده الله يستر علينا وعليها غصبه عمي يتزوج بنت عمتي وكان عمره ٢٢ سنه وهي ١٩ واول ماتزوجو حملت وجابت بنت وهي تولد البنت توفت الله يرحمها وانا وزوجي كنا نحب بعض قبل بس لاجل كلام رجال وحلف ومحالف انجبر ياخذ بنت عمته وهو مايبيها يعني كلنا قرايب وسبحان الله ماتت وهي تولد بنتها وهو قعد يربي بنته لحاله ماحب زوجته بس اكيد بيضيق صدره عليها وقعد ٥ سنين مااعرس وانا انخطبت ورفضت وانخطبت وكنت موافقه مبدئيا وهو يوم سمع اني بتزوج جاء وخطبني وانا احبه وهو يحبني قبل يتزوج زوجته المرحومه وبعد صراع عوائل وانتي بنت تاخذين واحد متزوج وعنده بنت وقال وقيل ماخلو ولا بقو الله وكيلكم تم الزواج الحمدلله واول مااخذت رفضت رفض تام احمل رحمت بنته عمرها ٥ سنين واجيب طفل ثاني ويروح كل الدلع عليها وتميت اكل حبوب منع وجتني اتعاب وانتو اعرف وبعدها هو سحب مني الحبوب وحملت بولدي محسن بعد سنتين من الزواج وقعدنا نربيهم والحمدلله على كل حال
عفراء : ياحظتس بالاجر وينها نبي نشوفها
ام محسن : يوه ماتعرفين بنات هالايام صايره تستحي
ندى : طيب وش اسمتس انتي احس حرام نناديتس ام محسن
ام محسن : ههههههههههههههههههههههههههههههه اسمي ناديا وزوجي اسمه احمد
ام فهد : عاشت الاسامي والله يخليكم لبعض وابد احنا جيرانتس لو تبين عيونا لاتستحين تعالي
ناديا : والله ياخاله ترددت ثلاث مرات اجيكم المره الاولى انشغلت بنقل الاثاث انا واحمد والمره الثانيه شفت رجال يرمي اكياس عند بيتكم وقلت لااحمد انا احسبه حرامي ويوم جاء الصبح الا نسمع اصوات عاليه وقلت اجل مارح اجيهم اخاف اكون جايه بوقت غلط وعاد مت من الطفشش قلت برسل محسن لكم
ام فهد : اعذرونا ازعجناكم بس بيتي ماشاء الله مليان عيالي وحريمهم وعيالهم
ناديا : ماشاء الله شفت رجال كثييرين عندكم
ندى : وين كنتو وليش جيتو لقريتنا
ناديا : والله اني ماعرف من العلم الا قليل فجاه احمد جاء وقال جهزي الاغراض بنمشي للقريه حتى ماقال لي وش اسمها وفالطريق سالته قال ان فيه ارض لشايب يقال له ابوعبدالله وان ولده ابوفهد بهالقريه وزوجي عنده محل عقار بيوت واراضي وصدف ارض ابوعبدالله عنده وفي واحد يبي يشتري ولازم موافقه الطرف الثاني وبس عشان هالسبب جينا
عفراء : يعني مارح تطولون
ناديا : والله مدري العلم مع احمد
ام فهد : وين كنتو ساكنين
ناديا : بشقراء احد محافظات القصيم بس انا من المدينة المنورة يعني مولوده هناك
ام فهد : لا مانعرف احد هناك يامرحبا ومسهلا تو مانورت قريتنا
ناديا : ياحبيبتي ياخاله منوره باهلها الا انتو ماعرفتوني عليكم انا هرجت واجد
ام فهد : ههههههه انا يقال لي ام فهد عندي اربع عيال وبنتين الكبير فهد مثل حال زوجتس تزوج قبل بنت عمته وحملت وتطلقو وللحين ماولدت والثانيه مديرته بالشغل يقال بينهم حب والثاني زامل وهذي زوجته عفراء عندهم ولد وبنت وتحته سياف متزوج بنت عمه وحامل والصغير هايل للحين ماتزوج وبعده هذي بنيتي ندى ماتزوجت للحين واخر العنقود فرح متزوجه ولد عمتها وحامل بس تطلقت والرجال الي شفتيه يحط اكياس زبايل عند بيتنا ذا زوجها يرمي اغراضها
ناديا : افا الله يعوضهم يارب ويوفق الي مااعرسوا واحسن لتس العزوبيه ياندى تهبل
ندى : اي ناويه اطول
ناديا : طيب وين باقي حريم عيالك ليش ماجبتيهم كنت متحمسه اتعرف عليكم كلكم
ام فهد : زوجه الكبير رايحه الرياض معه وزوجه سياف تعبانه حامل وفرح نفس الشى
ناديا : يوه الله يسهل عليهم يارب تراني دكتوره نساء وولاده اذا بغو شى لايستحون خل يجوني
ندى : ياكثر الدكتورات الي نعرف
ناديا : اي والله اني دكتوره بس احمد رفض اكمل بوظيفتي
عفراء : وليش اعرف وحده دكتوره وبتتزوج وزوجها راضي وخويتها زوجها رافض
ناديا : والله مدري ياعفراء واصلا انا انقبلت بوظيفه فالمدينه وانا ساكنه مع زوجي بشقراء ف صعبه شوي
ندى : كان عندنا هنا مركز صحي بس تقفل مافيه موظفات
ناديا : حسافه ليتني ملحقه
ام فهد : انا برجع للبيت يبيني ابوفهد اقعدو ياندى وعفراء عند جارتنا ونسوها وبرسل لتس فرح وشهد تشوفينهم
ناديا : ياقلبي والله ياام فهد الله يطول بعمرك اي والله ارسليهم لي نتونس مابي اقعد لحالي فالبيت
ام فهد : ليه
ناديا : احمد راح لشقراء عشان ينقل باقي الاغراض لانه اشترى محل عقار هنا
ام فهد : لا ابد لاتخافين اذا تبين بخلي البنات عندتس الين يجي زوجتتس بعد
ناديا : ياحبيبتي انتي
عفراء : اقعدي اقعدي سولفي علينا شلون حبتس زوجتتس
ناديا : مافهمت
ندى : لاتعلمينها بشي ترا قرقاره
عفراء : خلاص صرنا نمون على ام محسن
ناديا : لا كذا بنتهاوش لاتكبروني
عفراء : انا بعد توني صغيره ويقولون لي ياام عبدالله
ندى : لانكذبين محد يقول لتس كذا الا زينب الله يذكرها بالخير
ناديا : زينب زوجه من
ندى : زوجه اخوي فهد الكبير والله ياناديا انها تهبل اعجز وانا اقول تهبل وتنحط عالجرح يبرى بكل شى تفهم وتفزع ومثقفه ودايما كل النصايح والحكم عندها بس ماش اخوي مايستاهلها اقولها لتس بكل صراحه
ناديا : النصيب له دور وانا اختك
عفراء : تتكلم بالكاف يحليلتس
ناديا : حبه حبه واتعلم اتكلم مثلكم اهم شى نفهم بعض
ندى : شكلتس بتصيرين خويتي كل يوم اسير عليتس طفشت من بيتنا كلها متزوجات وحمل
عفراء : عيب عليتس انا وهيام مو حمل بس متزوجات
ناديا : ياحبيبتي حاسه فيك حياك الله باي وقت
ندى : وش اسم بنت زوجتس
ناديا : لا كذا بنتزاعل قولي بنتك
ندى : اوه لهدرجه تحبينها
ناديا : اكثر هوشاتي مع ولدي محسن اني مدلعه ريهام عليه
ندى : اسمها ريهام
ناديا : اي ثواني بناديها لكم
عفراء : ماشاء الله بيتها من دخلت وريحه البخور موجوده وللحين ماطفى احسن من بخورنا ودي اسالها بس مستحيه
ندى : يوه يوه ياعفراء ياحبتس لكثره الكلام
عفراء : شوفي ماشاء الله تشوفين وجهتس فالبلاط من كثر النظافه واثاثها يفتح النفس على ان البيت تصميمه ماهو حلو وقديم بس من داخل ياماشاء الله وحوشهم اكبر من حوشنا الا شفتي لبسها ونعومتها ولا طريقه كلامها ياحظ هال احمد فيها وتحب بنته مالت على زامل
ندى : يمه يمه منتس يانقاله العلوم اي اي علي صوتتس وسمعيها وفشلينا
عفراء : وفوقها دكتوره وجايه القريه معه وتاركه العز الي هناك
ندى : اي مثلتس عاجبتس زامل والقريه وتاركه الرياض
عفراء : احم جت
ناديا : يلا حبيبتي ريهام سلمي على خالاتك ندى وعفراء هذولي جاراتنا
ندى : ياهلا والله بحلوتنا
عفراء : ذكرتني بساره الحبيبه
ريهام : مرحبا my name is ريهام
ندى : وش تقول
ناديا : تكلمي عربي ياماما
ريهام : اسمي هو ريهام
عفراء : تتكلم لغه فصحى
ناديا : اي هي واخوها محسن
ندى : وتتكلم انقلش
ناديا : اي تتابع افلام كرتون وتتعلم
عفراء : والله انا مانعه عيالي يتابعون تلفزيون ولا جوال
ناديا : اقعدي ياماما جنبي لا حرام عليك ياعفراء هنا مافيه حدائق او شى يطلعون طاقتهم فيه اوكي انا معك لاتخلينهم يتابعون بس مثلا اشتري لهم دفاتر واقلام يرسمون او يلونون او كوره يلعبون
عفراء : ابد يقعد يسمع سوالفنا ولا يرقد
ناديا : لا حرام مايصلح من اليوم ورايح جيبي عيالك لي كل عصر يونسون عيالي وعيالي يونسونهم كم عندك طفل
عفراء : مثلتس ولد وبنت
ناديا : حلووو خلاص من بكرا يجون عندي يوميا
عفراء : مالي دخل لو خربو شى
ناديا : لا معليك بسوي لهم نشاطات تونسهم
ندى : تعلمي تعلمي الله يخلف عليك يااخوي زامل
عفراء : اقول اسكتي بس بوديهم عشان افتك منهم عاد ياناديا تدرين انا هنا غريبه مثلتس اخوان زوجي ماخذين من بنات عمانهم وعماتهم الا انا بعيده عندهم
ناديا : حاسه فيك والله بس بالنسبه لزوجي فانا بنت عمه وهو ولد عمي
عفراء : اقصد معنا
ناديا : اي ياحبي لكم والله ماجو باقي البنات
ندى : ادق عليهم احضرهم لتس هنا يسمعون سوالفتس الي تهبل
ناديا : ياحبيبتي انتي يلا ماما ريهام طفي التلفزيون من عند محسن وروحي العبو مع بعض
ريهام : حسنا ماما
عفراء : مايصلح لهم لغه الفصحى
ناديا : بالعكس مره مناسبه للي بأعمارهم ولان بكل الاحوال بيكبرون وبيتعودون على كلامنا ف حلو يكون عندهم خلفيه عن اللغه الفصحى ريهام الحين شاطره باللغه الفصحى واللغه الانجليزيه اما محسن فقاعد يتعلم
عفراء : كم عمره محسن
ناديا : ٥ سنين
عفراء : ماشاء الله
ندى : وانتي عيالتس مايمدي اهاوشه والف الا لاحقني بالنعله
ناديا : طبيعي تجي طاقه سلبيه عند الاطفال وعصبيه مفرطه تربيه الاطفال ابدا مو سهله
ندى : يبي لشهد وفرح ياخذون دروس عندتس ماشاء الله
ناديا : ان شاء الله اذا طولت هنا فالقريه يبشرون
ندى : بيجون الحين ليت فيه زينب وتتعرفين عليها يوه حتى صوتتس يذكرني فيها
عفراء : وهدى بعد تذكرينها كنا نطقطق عليها عشانها تتكلم بالكاف ابد تذكرني بناديا ياحبيبي ياسالم مشتاقه له
ناديا : اوه فيه طفل كمان
ندى : اي ولد عمي محمد متزوج وعنده ولد اسمه سالم وزوجته توفت قبل سنه
ناديا : ياحبيبتي الله يرحمها ويغفرلها ويجمعنا بها بمستقر رحمته
ندى : امين يارب وموتى المسلمين اجمعين
ناديا : اعذروني بروح اسوي العشاء
ندى : لاتكلفين على نفستس بنمشي
ناديا : لا رح ازعل خاله ام فهد وعدتني تقعدون عندي الين يجي احمد
ندى : خلاص تم
ناديا : هذا احمد يتصل
عفراء : ياحلوها
ندى : اي عشان قالت جيبي عيالتس عندي بترتاحين منهم
عفراء : قفطوه قبل يبدا مشروعه

انتهى البارت

قراءه ممتعه يا اصدقاء 💞💞